Moses nih a miphun aiawh in sui cawsa milem an ser i an biak ruangah a nawlnak cu a theih tikah Bawipa nih a timi cu "Na sinah keimah ka kal lai i teinak kan pek lai," ti hi asi. Amen! Asinain Moses nih zeitluk tiangin dah Bawipa a nawl tiah cun ka hruaimi na mi Israel hna hi an palh taktak ko, na ngaihthiam hna lo ding asi ahcun anmah aiah keimah min tu kha na sin in hnawt law anmah tu kha thiamcoh hna,ngaithiam hna tiah a ti. Mah tlukin a nawlnak thawngin kan kalpi hna lai ati ko nain a sualmi pawl cu zoh sawh awk an ttha lai lo, an sual bantukin lehrulh an hau ko lai tiah a ti i Aaron milem ser an hnektu pawl kha rai in minung tampi a thah hna. Minung hi a ho kan si hmanh ah kanmah sualman te hi dantatnak kan ing ve ko lai. Jesuh Khrih nih a ka limpiak cang tiah Thawngtha chimtu bia in nangmah le nangmah i hnem duh hlah (an limpiak taktaknak cu Thawngtha chimtu nih a chimmi na theihnak in na chung tuah kan ngeihthiam cang ti hmelchunhnak tehte ah na sual ti lonak hin a tlin awk te asi). Nihin i na tuah lengmang mi sualnak kha na mertak lo chung poah cu na sual ruangah na thi hrimhrim ko lai (Thiang Thlarau in tipinak taktak na co rih lo). Aruang cu Jesuh Khrih nih khamh kan si taktak nak kan i hngalhnak cu kan tuah tawnmi kha kan ngol i Amah duhnak kan tuahmi le a nawl zulhnak chungah kan nunnak hin a langhter (Khrih nawl zulh le duhnak tuah a thiammi cu minung zuamnak in a si ballo i Thiang Thlarau kan chungah a nungmi hruainak tuin asi). Amen! Hrintthannak na hmuh hnu zongah na sual rih ko ahcun na sualman cu na taksa in chimhrinnak na ing hrimhrim ko lai ti hi ralrinnak pekchih kan duhmi asi.
Moses nih mah tluk fak cun a hruaimi Israel mi hna caah nawlnak a tuah. Nihin Biatak a ttanhmi hna nih teh zeitlukin dah mi vialte nih khamhnak an hmuhnak dingah kan nawl i kan ttuan cio??? Abiapimi cu nangmah le nangmah chunglei ral dohnak in ai awt hmasa ding asi. Pathian nih Moses a timi cu na sinah Keimah ka kal lai i teinak kan pek lai tiah a ti bangin a sinah a kal taktak i teinak cu a pek taktak. Amen! Cu ve bang cun Jesuh Khrih nih Thiang Thlarau in umpi kan sinak a sullam cu nan sinah zungzal in ka um lai a timi a tlinternak asi ve. Amen! Jesuh Khrih kan chungah zungzal a um ko ahcun teinak cu pek kan si hrim lai ti cu a fiang. Moses sinah teinak kan pek lai a timi cu a hmai i miphun dang tampi an ral pawl hi an si. Moses le Israel mi pawl nih an i ruahchanmi cu raldoh hi si loin biakamhmi Kanaan ram luh kha asi nain Kanaan ram an luh khawhnak ding caah ral tampi an doh le harnak tampi an ing a hau ve. A doh zong cu an doh ve i harsatnak zong cu tampi an ing taktak ve sihmanhsehlaw Izipt ram in chuahpi mi ah Biakamnak ram chung a lutmi cu minung pahnih te lawng an si. Zungzal nunnak kamhmi ram luh lawng si loin vawlei na nun chung caah Bawipa nih an tinh piakmi phan ding tein Patian sinah zumhtlak tein nun ve ko.
EXODUS 33:14
Bawipa nih cun a thawh i, "Na sinah keimah ka kal lai i teinak kan pek lai," a ti.
Moses le a hruaimi hna nih cun an ral an theih i an kal hnawhchanmi zong cu an theih ko nain awl zang tukin luh aitimmi hna caah cun harsatnak tampi an ing i an i ruahning leng piin thil a hung cang tikah an lung a dong. Cuccah pei kan lung a dongh sual ve nak hnga lo Jesuh Khrih nih ka zultu si nan duh ahcun nanmah le nanmah nan i hua lai i nanmah le vailam te nan i put lai a tinak kha asi cu (mah vailam put i kal hi a fawi ballo ti cu na hngalh ko lai dah). Nangteh awltuk in Jesuh Khrih hnu zulh naa tim ve maw? Naa chuahsual ve lai dah kaw... Kannih i kan doh dingmi le kan ral hi teh zeidah an si ne tiah cun kanmah thinlung te hi a si. Ahlan ahcun a lengah ral an doh nain Khrih rat hnu ahcun chunglei tu doh asi cang. A ruang cu Jesuh Khrih a rat tiang ah hin biaknak upa hna nih an i zuammi cu chunglei tlinnak le nunnak si loin lenglei mitling si zuamnak le mithmai ttha hmuhnak tiang lawng asi caah Pathian nih minung a kan ser hnawhchan ning in an nung ti lo ti kha a hmuh caah Jesuh Khrih nih chungthu lengnal kong kha tampi in a chimnak asi. Nangtah chungthu lengnal cu na si ve maw? A sullam cu chunglei hmanh teilo ahcun zeitindah lenglei cu kan doh khawh rua hnga! Nihin zumtu tampi nih kan i zuam ngaimi zong hi lenglei mi nih hmuhnak tiang lawng asi ton i chunglei nunnak taktak hi a doh lomi tampi kan um. Sualnak le tthatlonak vialte cu thinlung chung in a rami an si ruangah pei Jesuh Khrih zong nih chunglei ah a lutmi rawl nih cun mi a thurhnawmhter lo i thinlung in a chuakmi thatlonak tu nih mi a thurter a tinak asi cu..
Satan nih an hrawhnak dingah a hman dingmi hriamnam cu nangmah taksa duhnak te kha asi ko lai. Cucaah na doh dingmi na ral nganbik cu na taksa duhnak, nangmah thinlung te kha asi ko. Taksa duhnak tampi lak ah Pathian duhnak thim khawh hi teinak taktak hrampi cu asi i Bawipa zei tluk in dah na dawtnak na langhternak i a tthabikmi cu na taksa duh tukmi kha Bawipa mah hnak in nangmah kan duh deuh ti i na taksa duhnak hrial kha asi. Mah na ti khawhnak ahcun na thinlung na tei a hau i mah thinlung i tei khawhnak ahcun bawmtu kan hau. Bawmtu cu Jesuh Khrih lawng asi ko. Amen! Bawmtu kan chungah a luh khawhnak dingah Jesuh Khrih kan zumh a herh, kan zumnak nih a van hrin ve mi cu Thiang Thlarau toih kan si. Thiang Thlarau toih kan simi nih cun mah le mah uk khawhnak a kan pek. Amen! Mah le mah uk khawhnak kan ngeihmi nih cun taksa duhnak doh duhnak le tei khawhnak a kan pek i kan taksa duhnak kan tei khawhnak nih zumh awktlak ah a kan ser. Amen! Mah le mah uk khawhnak le teinak in Pathian caah zumh awktlak nun kan ngeih tikah Pathian ram koahnak ah rian nganpi kan ttuan kho i a sunparnak cu kanmah pum le thlarau hmangin an lang cang. Halleluijah..
ISAIAH 26:12
Bawipa, nangmah nih rumnak na kan pek lai; kan tuah khawhmi thil vialte hi nangmah tuahmi lawngte an si dih.
Mah le mah uk khawhnak na ngei taktak cang maw? Mah le mah chunglei taktak uk khawhnak le tei khawhnak cu minung zumnak in si loin Thiang Thlarau nih a chuahpi mi tu asi. A tu le a tu na biakam na let lengmang i na zulh ttunglo ahcun na uk kho loh tinak asi i a sullam cu Thiang Thlarau in na chungah umpitu na herh tinak asi. Thiang Thlarau na ngeih ahcun mah le mah uk khawhnak an pek lai i Pathian sinah voikhat "YES" na pekmi kha zungzal caah asi ko lai. Amah belte a tu "YES" na pek i hmaizarh na nun ah "NO" asi ko rih ahcun Thiang Thlarau na chungah a um rih lo ca tuah asi ko. Bawipa nih Thiang Thlarau ttamhalnak le Thiang Thlarau ngeih duhnak in pe ko seh. Khrihfa taktak asimi nih kan herh bikmi cu mah le mah i uk khawhnak le teinak hi asi i chunglei thil kan tei hnu lawngah Pathian duhnak taktak cu kan tuah kho lai. Sihmanhsehlaw mah vialte hi Jesuh Khrih na chungah a um ko ahcun taksa duhnak cu na tei khawh ko hna lai. Amen! Amah hrimhrim nih na sinah ka um lai i teinak kan pek hna lai ti hi biakamh kan si caah chunglei ral kan teinak in lenglei ral zong kan tei khawh cang lai. Amen! Hrinthan nun taktak cu mah le mah chunglei thatlonak doh hi asi. Mah hnu lawngah a leng ral kan doh kho lai... Bawipa nih mah le mah uk khawhnak le tei duhnak thluachuah in pe ve ko seh....
Comments
Post a Comment