Theihternak

Hi Nunnak Petu Thawngtha Blog nih ai tinhmi cu JOHAN 6:63 
(Nunnak=Thiang Thlarau, Petu=Jesuh Khrih, Thlarau=Pathian)

Zungzal Nunnak kan ngei ti kan hngalh khawhnak cu Thiang Thlarau kan ngeihnak hin asi i Zungzal Nunnak kan ngeih khawhnak dingah a Nunnak Petu cu Jesuh Khrih asi. Nunnak Petu taktak cu Thlarau asi i cu Thlarau cu Pathian asi i Pathian cu Thlarau asi.

(Nunnak Petu= Jesuh Khrih, Thlarau=Pathian, Thawngtha= Nunnak)

Pathian cu Thlarau asi i Thlarau cu minung Jesuh Khrih ah ai cang i Minung Jesuh Khrih cu Zungzal kan nun ve nakhnga a Nunnak Petu cu asi. A Nunnak a peknak thawng cun thihnak in Nunnak ah a kan thawhpi i Amah a zummi poah cu Amah bangin Zungzal Nunnak kan ngei ve cang timi hi Thawhgtha cu asi. Amen!

(Petu=Pathian, Thawngtha=Jesuh Khrih, Nunnak=Thiang Thlarau) hna hi sullam a khat dihmi pakhat Pathian sinak a langhtertu an si! Nunnak taktak cu Thiang Thlarau hi asi i Fapa Jesuh Khrih a kan petu cu Pathian asi, Thawngtha cu Jesuh Khrih nih a kan limpiakmi hi asi.

 
Cucaah Zumtu ka si ai timi poah nih Nunnak taktak asimi Jesuh Khrih Thlarau he pakhat kan sinak kha tehte kan ngaih cionak dingah hmaithlak in Thawngtha biatak riantuan hi ai hmuitinhmi asi. 
     Keimah ka min hi Chan Hmun Thawng asi i laitlang ka khua cu Khuafo asi i atu lio hi Chicago, USA ah ka um. contact a ka duhmi nih nunnakpetuthawngtha@gmail.com ah contact khawh ka si lai. Kan nun chung vialte Bawipa caah zumhthlak tein nun khawhnak Thiang Thlarau tthawnnak ngei cio ko uh.

Nunnak Petu Thawngtha Baibal Tlaihtung hna:

GENESIS 2:7

Cun Bawipa Pathian nih vawlei khan tlak tlawmpal a lak i mipa ah a ser; nunnak petu thaw kha a hnar chungah a chuahhnawh i mipa cu a hung nung. 
JOHAN 4:14
sihmanhsehlaw keimah nih ka pekmi ti a dingmi paoh cu zeitikhmanh ah an ti a hal ṭhan ti lai lo. Ka pekmi ti cu a chungah zungzal nunnak petu cerhtiput ah a cang lai," tiah a ti.

JOHAN 6:63

Nunnak petu cu Pathian Thlarau a si; minung ṭhawnnak hi cu zeihmanh a ṭhahnem lo.

Nannih kan chimhmi hna bia hi Thlarau le nunnak cu an si.

1 KORIN 15:45

Zeicahtiah Cathiang nih, "Mi hmasa bik Adam cu minung ah ser a si," a rak ti, sihmanhsehlaw Adam hmanung bik cu nunnak petu Thlarau a si.

1 JOHAN 5:11

Cu tehte cu hihi a si: Pathian nih zungzal nunnak a kan pek cang i cu nunnak cu a Fapa chungah a um.

Nunnak Petu Thawngtha nih ai hmaithlakmi hna:

1 KORIN 9:12

Midang nih nan sinin cu bantuk hmuh awk kha an i ruahchan ahcun, kannih nih cun kan i ruahchan chinchin awk a si hnga lo maw? Sihmanhsehlaw kannih nih cun, cuticun kan in ti duh hna lo. Khrih kong thawngṭha hi, zeilo nih maw dawn sual lai tiin zeizong vialte kha a in tu in kan in.

1 KORIN 9:18

A si ahcun ṭuan man zeidah ka hmuh? Ka hmuhmi cu, thawngṭha ka chimnak ka rian ah hin, cucu ka hmuh awk, khakha ka hmuh awk ti loin, alak tein ka chim i cu ka chimnak thawngin lungriamhnak ka hmuhmi hi a si.

1 KORIN 9:27

Zuamnak hmun ah rak i zuam u tiah midang kha sawm lengmang ṭung in a sawmtu keimah kha hlawtmi si sual lai ing ti phang in ka pum cu ka hrem i fek tein ka uk.

2 KORIN 2:14

Sihmanhsehlaw Pathian cu lawm ko u sih. Zeicahtiah Khrih teinak puai i a kal nuahmahmi mibu chungah khan kannih cu Khrih he kan i pehtlaihnak thawngin Pathian nih thongtla bantukin a kan hruai zungzal. Khrih kong hngalhnak cu khuazakip ah zihmui bantukin karhter awkah Pathian nih kannih cu a kan hman.

2 KORIN 2:15

Cucaah kannih cu Khrih nih Pathian sinah a pekchanhmi rimthaw zihmui bantuk kan si, cu zihmui cu khamh lio lengmangmi hna sin zong a phan i a tlau lio lengmangmi hna sin zong a phan.

2 KORIN 2:16

A tlau lio lengmangmi hna caah cun thihnak rimchia a si i khamh a si lio lengmangmi hna caah cun nunnak petu rimhmui a si. Cu bantuk rian cu aho nih dah a tuah khawh lai?

2 KORIN 2:17

Kannih cu Pathian bia kha, thil man fawi bantuk men in a tawngthammi hna bantuk kan si lo; kannih cu Pathian nih khan a kan thlah caah, amah hmaiah Khrih sal bantukin lungthin tak tein bia kan chim.

2 KORIN 5:17

Mi zeihmanh hi Khrih he an i pehtlaih tikah cun mi thar a si; a nunning hlun kha a lo cang, nunning thar kha aa thawk cang.

2 KORIN 5:18

Hi thil vialte a tuahtu cu Pathian a si i Pathian nih cun Khrih thawngin kannih a ral a simi cu a hawi ah a kan thlen i midang zong a hawi i ser ve awk rian cu a kan pek.

2 KORIN 5:19

Cucaah kannih kan biapi cu, Pathian nih mi vialte kha Khrih thawngin hawi ah a ser hna, ti hi a si. Pathian nih an sualnak kha anmah sual phawtnak ding caah cazin chungah a khumhpiak hna lo i kannih cu a hawi i a ser hnanak bia chim kha a kan fial.

LAMKALTU 26:18

Nangmah nih an mit kha na deiter hna lai i muihnak in ceunak ah, Satan pennak in Pathian pennak chungah na nunter hna lai; cun keimah an ka zumhnak thawngin an sual ngaihthiamnak kha an hmuh lai i Pathian thimmi hna lakah an i tel ve lai, tiah Bawipa nih cun a ti," tiah a ti.

Hi Website ah chiahmi hna:

Nitin Baibal Relnak: Nitin Baibal relnak tiin ka rak thlah lengmang. Hi ka thlahmi chungah hin keimah nih ka rel i ka duh deuhmi tete kha Note in ka chiah i ka rak kuat ve mi asi.

Baible Study tuahnak: Mah Baibal Study tuahnak hi keimah nakin Baibal leiah cawnnak sang ageimi le Thlarau lei mifim tampi an um ko nain keimah pumpak ka nunnak ah Pathian bia in ka khah chin lengmang nak ding caah ka tuahmi asi i ka tuah khawhmi hnihkhat chungin sharing kan tuah ve mi hna asi.

Thawngtha Bia: Nikhat ah Thawngtha Bia pakhat hi thlah khawh ka zuam i ka nun ah aummi le Nitin Baibal ka relnak in thazang ka lakmi kha vawlei cung khuaza ramkip i khua asami Laimi phunpi nih Pathian nih a kan dawtnak hi ngan chinchin in rak hmu ve hna seh ti saduhthah he ka rak thlah lengmangnak cu asi. Bawipa sunparnak caah si dih ko seh.

Thawngtha chimnak video: Thawngtha chimnak video pawl hi ka ngeih i thazang ka lak deuhnak tete hi sharing ka rak in tuah ve mi hna si i thazang nan rak lak cio lai zong ka zumh. Bawipa nih in umpi cio ko hna seh.

Theih herh deuhmi Baibal: Mah chungah ka rak thlah lengmangmi Baibal hna hi zumtu vialte nih theih kan herh deuh ko ti mi Baibal cang pawl ka rak tial mi asi. Ahlei in theih ding le hngal a herh ngaingai mi pawl ka rak thlah. Duhsah duhsah tein ka rak thlah chin lengmang lai.

Zumtu Nun: Khamhnak hmm cangmi hna nih Baibal he sehchih in zeitindah kan zumh awk asi ti mi tawi tein langhternak