ISRAEL MI HNA NIH MOSES LE PATHIAN AN LAWMHTER HNA LO

        Israel miphun hna cu Izipt ram in an chuah hnu kumhnih le thlahnihnak, nikhatnak ni ah Bawipa nih Moses cu Sinai ramlak ah a chawnh i milu a relter than. Bawipa fial bangin an rel hna i sing ruk, thong thum, za nga le sawm nga an si. Mah hnu ni (20) hnu ah puan Biakinn cung Minmei cu aa tthial tikah Israel pawl zong an i thawh ve i Paran ramlak ah khan an kal. Cun Bawipa minmei cu, an riahhmun in an i thawh fate chun ah annih cungah a um i kuang cu aa thawh fate Moses nih, "Tho tuah, maw Bawipa, na ral kha i ṭhek dih hna seh law, nangmah an huatu hna cu na hmaiah zaam hna seh," tiah a ti. Cun aa dinh tikah, "Ra kir tuah, maw Bawipa, Israel mi a thong a sang hna sinah hin," tiah a ti.

            Israel mi hna cu Bawipa theih ah an sifah retheih an innak ruangah an zai hawi tthan i Bawipa thinhunnak cu a alh i riahhmun kiang i aummi riahbuk a cheukhat cu a kangh hna. Cu tikah Moses nih thla a campiak hna i mei cu a dai. Cu hnu tlawmpal ah Israel mi hna cu sa an haw ciammam i  an tap len i Bawipa thinhunnak cu a alh tikah Moses cu a lung aa lawm kho hrim ti lo. Moses nih cun Bawipa sinah bawmh hal in thla a cam i hi mi hna hi keimah lawng nih ka pua kho hna lo, mah thil hi ka caah a rit tuk. Mahtihin na ka tuah ding a si ahcun, hmakhatte ah ka that ko, na mithmai ah velngeihnak ka hmuh a si ahcun, ka retheihnak kha ka hmuhter hlah tiah a nawl. Bawipa nih Moses cu a leh i nangmah an bawmtu ah Israel upa (70) hna cu ka sinah tonnak thlam ah ratpi hna law ka rungtum lai i na chung i aummi Thlarau tlawmpal kha ka lak lai i anmah chungah Thlarau cu ka chiah lai, Cun annih nih Israel mi thilrit phorh kha an in bawmh lai tiah ati bang khan Israel upa cungah Thlarau chiah asi i an holh cuahmah lengah tonnak thlam i ara lomi Upa pahnih cung zongah Thlarau an tingco i an holh cuahmah ve kha an hmuhtik ah Joshua nih cun Moses cu thlauh hna tiah a ti, Sihmanhsehlaw Moses nih anih cu, "Keimah ca lawngin dara na ruah hi? Bawipa mi vialte hi profet si dih in, annih cungah Bawipa nih a thlarau chia seh law ka hei tinak lakah cun!" tiah a ti. Cucaah kan nih zumtu le Pathian biatak ai tleihmi vialte hna kanmah bantukin mivialte hi zumhnak leiah an tthawn chinchinnak dingah hin tuanvo kan ngei i thazang tu kan pek awk hna le kan dirhkamh ve hna awk ai. Chimduhmi cu soi loin thlacamnak tuin kan bawmh hna awk le Thlarau in an khah cio hi kan duhchin awk asi.

           Cun Israel mi hna nih cun Izipt ram an chuahtak cangmi khua le an rak ei tawnmi sa an hawtnak kong an chim lengmangmi le Izipt kong an chim lengmang tikah Pathian a lung an lawmhter lo. Cu ve bantukin Khrih he kan i pehtlaih hnuah cun kan taksa duhnak le kan rak tuah lengmang mi sualnak i kirthan kan duh le kan ruah tthan tikah ah hin Pathian kan lawnhter ve lo ti hi kan philh lo awk asi. Cucaah cun kan nih cun Khrih thawng in hmaiah kal chin lengmang hna sihlaw Pathian kan dawt cu a nawl zulhnak in langhter chin ko hna usih. Halleluijah! Mah ruangah cun Bawipa nih Moses cu a chawnh i mah tluk in ka mi Israel mi nih sa an hawt ah cun thlakhat pumpi ei awk sa ka rak pek hna lai tiah ati tikah Moses nih cu a khuaruah a har tuk i Bawipa keimah le ka mi hna hi kum (20) cung hmanh ting (6) leng pei kan si cu Tuu runrun le caw runrun maw an i zat awkah thahpiak an si lai? Asiloah, rili chung nga vialte maw an i zat awkah pumhpiak an si lai?" tiah a ti. Cun Bawipa nih Moses sinah cun, "Bawipa kut cu a tawi hlah maw? Nannih ca i ka bia bangin a tlin le tlin lo cu na hmuh ko lai," tiah a ti bang in a tling taktak i Bawipa sinin thli a hrang i rili in nimte kha a ratpi hna, riahhmun pawngah cun a tlakter hna, hika leiah ni khat kal tluk, khika lei ah ni khat kal tluk, riahhmun cu a velchum in, vawlei ah dong hnih tluk chah in a tlakter hna. Bawipa min thangthat si ko seh! Kan biakmi kan Pathian caah hin a mi fale caah asi kho lomi le a tuah khawh lomi a um loh, cucaah cun pei zeizong vialte cungah hin kan hna a ngam chinchin ding asi cu! Khamhnak pek kan si ruangah tuah hin ilawm chin lengmang ko hna usih. Nimte cu an char hna i thaw tein an ei kho hna nain Bawipa cu an cungah ai lawmh lo caah rai tha loin a hrem hna i tampi an thi.

            Hezeroth i an um lio ah khan Moses nih Kush minu a thit ruangah Aaron le Miriam cu an zai i Moses sin lawngah maw Bawipa nih bia a chim? kan mah sin zongah a chim ve lo maw? tiah an timi kha Bawipa nih a theih tikah Bawipa thinhunnak cu Miriam cungah a tlung i thinghmui in a pum cu a khat dih.  Moses hi Pathian he hmaitonh in ai chawn lengmang asi i sihmanhsehlaw Moses bia al cu an tih hrim lo caah Pathian cu an cungah a thin a hunnak asi. Cutikah Aaron nih Moses cu a nawl i hruh bu in kan tuah i kan sual cang tiah a ti. Moses nih thla a campiak hna i Miriam cu nisarih hnu ah a dam tthan. Nikhat cu Bawipa nih Moses cu ka pekmi hna Kanaan ram ngiathlai awkah phunkhat ah pakhat cio an hruaitu hna kha thlah hna tiah a ti bang in Moses nih cun a thlah hna. Ni (40) an roah hnu ah an rak kir i na kan thlahnak ram cu cawhnuk le khualhliti in a luangmi ram asi nain cu ram i a ummi hna cu kanmah hnakin an tthawng, an ngan deuh i an khua cu kulhmi le mi ngan ngaingai mi an si tiah an ti tikah Mipi vialte kha an lung an zorter hna i an zai tikah Bawipa an lawmhter lo. Sihmanhsehlaw Kaleb le Joshua nih cun "Khulrang in hung kal u sih law, hung umhnawh u sih; zeitintiah ṭha tein kan tei khawh ko lai," tiah a ti. Nihin zumtu mi hna i kan tthawnnak cu kan mah si loin Pathian ah a si hi kan philh lengmang, Kaleb le Joshua nih an zumhmi cu Pathian nih a kan tuk piak lai ti kha fiang tein an hngalh caah raltha tein kan tei lai tiah an chim ngamnak cu asi. Israel mi hna hi an mah tthawnnak in ral an tei bal lo i Pathian tthawnnak le umpinak thawng in asi kha an philh lengmang ko bangin nihin zumtu zong hi kan si ve ko.

            Mah ruangah cun Israel mibupi cu an ttap ciammam i "Hruaitu pakhat i thim u si law, Izipt ah kir ṭhan u sih," tiah an i ti. Joshua le Kaleb nih cun an puan an i thleh i Bawipa cu kan cungah aa lawmh ahcun hi ram chungah cun a kan luhpi lai i kan tei ko hna lai, Bawipa cu a doh bel do sawh hlah u; cun cu rammi cu ṭih hna hlah u, zeitintiah kan caah rawl pei an si ko cu; annih an himnak cu an sinin ṭhial a si cang, Bawipa cu kanmah he pei a um cu, ṭih hna hlah u," tiah an ti hna nain an duh lo caah mibupi nih cun lung in cheh an zalh hna. Bawipa cu tonnak thlam ah sunparnak he a rung lang i zei can dah hi Israel mi hna nih hin an ka zawmhtaih lai i zum loin an ka um lai, anmah lakah i hi zat remruam hmelchunhnak ka tuah i ka tthawnnak in kan umpi zungzal ko ttung hna tiah a ti. Cucaah cun Rai in ka hrem hna lai i ka hlawt hna lai, nangmah chung hin annih nak i a ngan deuh le a ṭhawng deuh miphun ka ser lai tiah Moses cu a ti. Cu tikah Moses nih a thawh i Bawipa, nangmah nih, 'Bawipa cu a thin a fual i a fekmi dawtnak tampi a ngei, ṭhat lonak le phung buarnak cu a ngaihthiam khawh, sihmanhsehlaw a sualmi cu zei ti hmanh in a luatter men lai lo; an pale ṭhat lonak cu an fale cungah a tlunter lai, chan thum chan li tiangin,' ti i bia na rak kamnak a lianhngan tluk khan na ṭhawnnak cu lianngan ko seh tiah kan nawl. Cun a fekmi na dawtnak a ngan rup le hi mi hna cu Izipt ram in atu tiang na ngaihthiam hna bangin, hi mi hna an ṭhat lonak hi ngaithiam ko hna tiah a ti. Moses nawlnak cu Bawipa nih a cohlan i Nangmah bia bangin ka ngaihthiam hna tiah a ti. Halleluijah! Kan nih Pathian he ai chawn kho cangmi hna kan Miphun le kan ram, innchungkhar, nu le pa, unau caah thlaza cam in nawl lengmang ve hna usih.

            Bawipa nih Moses sinah cun hi bang in a chim, ahohmanh, Izipt ram chung le ramcar chung i ka tuahmi ka sunparnak le ka hmelchunhnak a hmu i voi hra tiang a ka hneksak i ka aw a ngai lomi cu, an pupa sin i kan pek hna lai tiah chiat ka serhmi ram kha an hmu lai lo, ahohmanh a ka zawmtaimi nih cun an hmu lai lo tiah a ti. Sihmanhsehlaw ka sal Kaleb cu lungthin dang a ngei i tling tein a ka zulh caah, a va kalnak ram ah khan ka luhpi lai i a tefa hna nih an co lai tiah ati. Cun Kaleb le Joshua dah ti lo cu, kan umter hna lai ti i chiat ka sermi ram ah khan nan nih lak i kumkul ri in a cung lei vialte pakhat hmanh an lut lai lo i ramcar chungah an thi dih lai. Sihmanhsehlaw nan ngakchia hna, annih cu tlaih khih awk men an si lai, nan timi hna kha ka luhpi hna lai i nannih nih zei i nan rel lomi ram kha an umhnawh lai tiah ati. Cun Ram kha nan hung ngiatthlai ni zat khan, ni (40) cu ni khat caah kum khat in nan ṭhat lonak kha nan in lai, kum (40) chung ka lunglawmh lonak kha zeidah a lawh ti kha nan hngalhnak hnga nan fale hna cu ramcar chungah kum (40) tuukhal an si lai i an vai lai tiah ati. Bawipa biakam bangin pale sual ruangah Fale chan (3), chan (4) tiang a ti mi cu an pale cungah a tlinter lawng si loin an fale cung zongah a tling taktak. Maw Bawipa kan miphun le kan pipu, pale sualnak le kan mah sualnak bang lehrulh loin kan ngaithiam ko. Si kan nih cu Khrih thawng in ngaihthiam kan si cang. Halleluijah!

            Mah thawngpang ttha lo cu Israel mi nih an theih tikah an i chir lengmang ko nain santlaihnak a ngei ti lo, ram kong thawng tthalo a van phortu hna kha rai nih a tlunh hna i an thi dih. Cun Israel mi hna cu tlangram a sannak ah an kai i  "Zohhmanh, mahka ah hin kan um hi, Bawipa biakammi hmun ah cun kan hung kal lai i kan doh hna lai; zeitintiah kan sual cang," tiah an ti. Sihmanhsehlaw Moses nih athawh hna i a tu ah cun Bawipa nawlbia cu nan buar, kal hlah u nan ral nih an in thah hna lai tiah a ti ko hna nain an ngeih lo caah Amalek le Kanaan mi nih an van tum hnawh hna i tampi an rak thah hna. Aruang cu an sinah Bawipa a um ti lo i an tuahmi kha Bawipa nih a theihpi mi hna si ti lo. Nikhat cu ramlak an um lio ah khan  Korah, Dathan le Abiram, On nih khan Israelmi hruaitu (250) kha an pumh hna hnu ah Moses le Aaron kha an pumhhnawh hna i annih cu, "Nan luan cang! Mi zapi cu an thiang cio ko i Bawipa cu an lakah a um ve ko. A si kun ahcun zeicahdah Bawipa mibu cungah cun nan i hlorh?" tiah an ti hna. Moses nih a theih tikah a bawk i thaizing ah Bawipa nih ahodah amah ta asi i a thiangmi asi ti cu a langhter lai tiah ati. Moses nih Korah a fial bangin Korah hawi le (250) le mizapi cu tonnak thlam innka ah cun a pumhter hna i Bawipa sunparnak cu mi vialte sinah cun a lang. Bawipa nih cun Moses cu a thawh i hi aa pummi hna he hin i tthen ulaw chikhatte ah ka khangh dih khawh hna ngakhnga tiah a ti.  Sihmanhsehlaw Moses le Aaron nih cun mahtluk in Mipi nih an ral hna i an chuahhnawh ko hna zongah cun an bawk i "Maw Pathian, titsa vialte i thlarau hna Pathian, mi pakhat Korah nih a sual caah, nangmah cu mi zapi vialte cungah hin na thin a hung in na thah dih ko hna lai maw?" tiah an nawl. Cucaah Bawipa nih Moses cu a chawnh i hi mitthalo mi hna sin hin mipi cu i thawn ulaw an thlam hna hin ttian u tiah chim hna a ti bang khan Moses nih cun a chimh hna.

            Cun Moses nih a thawh hna i "Keimah thinlung i a chuak chom in si loin, Bawipa nih pei mah rianṭuan awkah hin a ka thlah ti kha mah nih hin nannih nih nan hngalh lai. Cucu mah vialte cungah buainak a chuahtertu hna hi mi vialte thih kel le sifah in kel cio in an in ve lonak nih hin a langhter lai tiah a ti bang in vawlei a kak i a kaa a an i an mah le an innchungkhar hna le Korah mi vialte le an thilri vialte kha a dolh hna. Cun Bawipa sinin zihmui a pechan liomi Korah nih a thimmi Israel hruaitu (250) kha mei in a kangh dih hna. Sihmanhsehlaw a thaizing ah Israel mi nih an bu ningin Moses le Aaron cungah an zai i, "Bawipa mi kha nan thah hna," tiah an ti hna tikah, tonnak thlam lei kha an hoih i, zohhmanh, minmei nih a khuh i Bawipa sunparnak kha a lang. Bawipa nih Moses le Aaron cu mibu chung hin va chuak tuah u, kangh dih hna ning tiah a ti hna nain an nih cu Bawipa hmai ah an bawk i ngaithiam ko hna tiah an nawl. Moses nih Aaron cu a thawh i a rannak in "Na meilaknak kha i lak law biaktheng cung mei kha a chung ah chialaw zihmui phulh law, zokzok tein mibu sinah kalpi in annih caah remnak serpiak hna; zeitintiah thinhunnak cu Bawipa sinin a chuak cang i rai kha a tlung cang," tiah a ti bang khan Aaron nih remnak cu a serpiak hna i a thimi le a nungmi karlak ah a dir tikah rai cu a ṭian. Korah kongah a thimi hleiah, rai in a thimi cu (14700) an si.

            Mah ruangah cun Bawipa nih Moses cu a chawnh i Israel  mi phunkhat caah thiangthunh pakhat cio le thiangthunh cungah an min cio tial in tonnak thlam hmaiah  nan rak chuahpi lai i kan tonnak hmun ah khan na chiah hna lai tiah ati bang khan an rak chiah hna. A thaizing ah Bawipa nih a ti bang in ka thimmi thiangthunh cu a corh lai i a par lai a ti bang khan Levi phun ca i Aaron ṭhiangṭhunh cu a rak corh i a kuhkulul an chuak i an par i almond thei a hminmi an rak tlai taktak. Mah ti cun Israel mi hna cu an phunzainak kha an donghter i Israel mi hna hmelchunhnak caah chiah beh asi.

            Cun Israel mi cu Zin ramlak ah an lut i Kadesh ah an um tikah mibu caah khan Ti a um lo caah Moses le Aaron cungah cun an zai. Mah ti an zai tikah Moses le Aaron cu tonnak thlam ah an kal i Bawipa sinah bawmhnak hal in thla an cam i  Bawipa sunparnak cu an sinah a lang. Bawipa nih Moses sinah cun Ṭhiangṭhunh kha i lak law, mibu kha pum tuah hna, nangmah he na u Aaron he, cun lungpi kha a ti chuahter dingin an hmaiah chim; lungpi chungin an caah ti na chuahter lai i mibu le an saṭil hna cu din awk na pek hna lai," tiah a ti. Moses nih cun Bawipa nih nawl a pek bantuk khan a thiangthunh kha ailak i Aaron nih mibu cu lungpi hmai ah khan a rak chuahpi ve hna tikah Moses nih cun ai thawh i "Nannih ralchanh hmangmi hna, ngai tuah u; hi lungpi chung hin nan caah ti kan chuahter lai maw?" tiah a ti hna. Cun Moses nih a kut a hler i lungpi cu a ṭhiangṭhunh khan voi hnih a tuk i ti tampi a chuak i mibu le an saṭil nih an din. Sihmanhsehlaw Bawipa nih Moses le Aaron cu, "Nan ka zumh lo i Israel mi hna mithmuh ah nan ka thianter lo caah nannih nih hi mirun hna hi ka pekmi hna ram chungah nan luhpi hna lai lo," tiah a ti hna. Aruang cu Bawipa nih Moses a fialmi cu Ti a chuahnak dingah a chim in na chim lai tiah a ti nain a tuk tuin a tuk caah asi. Bawipa nih fial ning tuah hi nawl ngeihnak asi i nawl ngaih hi raithawinak hnak in a tha deuh. Amen! Zumtu mi hna kan rian cu Bawipa nawl ngaih hi asi.

            Moses nih Kadesh in Edom (Esau fefa an si) Siangpahrang sinah lamkal a hei thlah hna i na unau Israel (Jakop tefa an si) mi kan nih cu kan cungah a tlungmi vanchiatnak  vialte cu na hngalh ko. Izipt ram ah sal saupi dirhmun in Bawipa nih a kan chuahpi i Kanaan ram kal ding in Kadesh ah kan um ko cucaah cun na ram hi kan tanter ko sawh, keh le orh zongah kan pial lai lo tiah an ti ko hna nain Edom nih cun a ram tanter kha a duh lo caah Israel cu ralkap a tthawngmi he a rak chuah hnawh i Edom cu Israel mi hna nih cun an hrial ruangah harnak tampi an tong. Kadesh cun Hortlang an phanh tikah Bawipa nih Moses cu a chawnh i Aaron cu a mi hna sinah pumh asi cang lai a ti bang khan Hor Tlang ah cun a thi i a fapa Eleazar nih khan a rian cu a chawng. A unau Edom nih an ram chung in a luhter hna lo caah Atharim lam in an ra ti kha Arad ram Siangpahrang, Negeb i aummi nih khan Israel mi hna cu a doh hna i tlawmpal kha sal ah a tlaih hna. Cun Israel zong nih cun Bawipa sinah biakam tein bawmh a hal i an doh tthan ve tikah Bawipa nih an kut ah a pek hna i Arad siangpahrang cu a hrawh cikcek. Bawipa he umpi ah cun zeizong vialte teitu kan si ko. Halleluijah!

            Edom siangpahrang nih an ram in aluhter duh hna lo ruangah Hor Tlang in, Edom ram kha hrial awkah Rili Sen lam kha an tlaih i lam ah mi hna cu an ing a puang. Cun mibu hna cu Pathian le Moses kha an zaihnawh hna i, "Zeicaahdah ramlak i thih awkah hin Izipt ram in nan kan chuahpi? Zeitintiah rawl a um lo, ti a um lo i, hi rawl ṭhalo hi cu kan fih," tiah an ti. Khi tikah Bawipa nih meirul kha mi lakah cun a thlah hnawh hna i mi kha an cuk hna caah Israel mi tampi an thi tikah Moses sinah cun Mipi cu an ra i nangmah cungah le Bawipa cungah kan sual cang, kan nih sinin Bawipa nih rul kha a laknak hnga thla kan campiak ko tiah an nawl. Moses nih cun an sualnak an i ngaihchih taktak ti kha a theih tikah Bawipa sinah thla a campiak hna i Bawipa nih Moses cu a thawh i meirul pakhat in ser law, tung cungah tar tuah, rul cukmi poah nih an zoh tikah an dam lai tiah a ti. Bawipa nih fial bang cun Moses nih a tuah i rul cukmi poah nih an zoh tikah damnak an hmuh. Amen! Darrul tarmi hmelchunhnak cu Jesuh Khrih asi i Rulcukmi poah cu kanmah Sualnak ai hmuhmi hi kan si ve, cubantukin mah sualnak hmuh in Jesuh Khrih a zummi vialte cu Khamh kan si nak kong hi a rak chim chungmi asi. Amen! Bawipa min thangthat si ko seh.

            Israel mi hna cu Pisgah tlangpar pawng an um lio ah Amor siangpahrang Sihon sinah na ram chung in kan luhter ko tiah lamkal an hei thlah hna nain a duh lo caah a mi vialte kha a pumh hna i Israel kha a doh hna tikah Bawipa nih Israel mi cu a umpi hna i an dihlak in a rak thah dih hna i an ram vialte a lak dih. Cun an i mer i Bashan lei lam kha an zulh. Bashan siangpahrang Og nih Edrei ah anmah doh awkah amah le a mi vialte he an hung chuak. Sihmanhsehlaw Bawipa nih Moses cu a chawnh i, "Amah kha ṭih hlah, Sihon Siangpahrang cung i na tuah bantukin a cungah na tuah ve lai" ati bang khan an thah dih cikcek ve hna. Cun Moab Siangpahrang Balak nih cun Israel mi kong cu a theih tikah a tih ngaingai hna i Balaam Litin le camh thiammi kha rak ra law mah mi hna hi chiat ka serhpiak hna tiah ati. Asinain Balaam cu Bawipa nih Israel mi hna chiatserh cu awnh asi lo i voi (3) tiang tu thluachuahnak a pek hna. Amen! Balaam nih hin Jesuh Khrih arat lainak kong zong hi a rak chim chung ve cang. Cucu hihi asi, Jakob chungin arfi pakhat a chuak lai i Israel chungin bawifung pakhat a chuak lai; Moab cal cu a khuai lai i Sheth fapale hna cu a den dih hna lai tiah arak ti mi hi asi.

            Nihkat cu Shitim an um lio ah Israel tlangval cheukhat cu Moab fanu hna he hlawh an hlangtti i ram dang Peor i Baal pathian raithawinak sa kha an va ei i a hmai ah cun an va kun ve. Mah ruangah cun Bawipa thinhunnak kha Israel cungah a alh i  an hruaitu hna kha thlai hna tiah Moses cu nawl pek asi. Mibupi cu lungrawk in tonnak thlam ah Bawipa sinah ttah buin thla an cam lio ah Israel mi pakhat nih Midian nu kha tonnak thlam ah a rak luhpi tikah Tlangbawi Aaron fapa Eleazar i  fapa Phinehas cu aa pummi sin khan a tho i fei in an pahnih in a thah hna tikah Israel mi hna sin khan rai cu a dong. Ramdang pathian cung i hlawhhlang an tuan ruang le an biak, an kun ruangah minung (24000) an thi. Phinehas hi Tlangbawi asi caah a mi vialte caah remnak asertu asi i a tuahmi cu Bawipa nih a cohlan caah rai cu a daihter. Nihin ah hruaitu le Pathian riantuanmi upa vialte hi kan ram sualnak le kan pawngkam sualnak i ai ciah ve ko mi hna dantatnak in a luattertu si dingah Bawipa nih thimmi kan si hi philh hna hlah usih. Cu lawng hmanh si rih loin Midian nu ruang zong ah cun Moses cu Bawipa nih a chawnh i Midian mi hna cu awlokchinh hna ulawm that hna u tiah a ti. Ka chim duhmi cu kanmah ruangah kan miphun kan Khrihfabu hi chiatserh le dantak asi ve sual lai maw? Nitin tein kan nunnak ah hin Bawipa duhning in nun khawh le thangtthat khawh lawng hi izuam ko hna usih. Sualnak lam ah a kalpitu  siloin Pathian duhning tuin a nung chinchin mi si hram hna usih. Mah rai a dih hnuah Bawipa nih Moses cu a chawnh i phawnam tlai kho kum (20) a cunglei Israel mibu cu a relter i an dihlak ah  sing ruk, thong khat, za sarih le sawm thum an si. Mah relmi chungah hin Kanaan ram zoh i an kir hnu i an rak relmi pakhat hmanh an i tel ti lo, Kaleb le Joshua dah ti lo cu.

            Bawipa nih Moses cu a chawnh i Abarim tlang ah khin hung kai law, Kanaan ram cu hung cuan law na hmuh in nang zong na u Aaron sinah pumh na si ve lai. Kanaan ram cu na luhpi hna lai lo, zeicatiah Zin ramlak i ka mithmuh ah Ti chuahter kan tiah khan kan fial ning bangtukin na tuah lo i keimah thangthat awk i ka bia kha na doh, a chim in chimlaw kan timi cu Thiangthunh in voi (2) na tuk caah Kanaan ram cu na luhpi hna lai lo tiah ati. Cucaahcun Joshua kha Tlangbawi Eleazar le Mipi hmaiah dirter law a cungah na kut chuang law mipi hmuhah nawlngeihnak kha pe tuah, cun nangmah nih a mah cu na nawlngeihnak kha tlawnpal in na thuam lai i Israel mibu dihlak nih a bia kha an ngeih lai a ti bang khan Moses nih cun a tuah dih. Nikhat cu Bawipa nih Moses a rak chimh cangmi Midian mi hna kha that dih hna uh a timi kha a chimh tthan i va kal ulaw Bawipa caah phu va hlam tuah u tiah Israel mi kha nawl a pek hna. Midian cu an doh i pa vialte kha an thah dih hna i siangpahrang 5 lengah camhthiam Balaam zong nam in an chunh i an thah ve.  Israel ralkap hoatu pawl cu Moses sinah an ra i Na sal hna nih kan kut tang i a ummi ralkap hna cu kan rel hna i kannih sinin a baumi pakhat hmanh an um lo tiah an ti. Hallelujah, Bawipa min thangthat si ko seh. Bawipa nih fialmi kan tuah tikah hin lawmhnak le teinak a tling. Amen! Zumtu vialte le Pathian Thawngtha a aupimi vialte kan mah nih a ttha ti kan ruahmi tuah loin Bawipa fialmi tu hi tuah deuh ko hna usih. Amen! Kannih cu kanmah ta kan si lo i a kan ngeitu Bawipa ta kan si caah Bawipa fialmi tu hi tuah chin ko hna usih, Bawipa fialmi aw kan theih khawhnak hnga Thiang Thlarau nih kan bawm chin ko seh.

            Abarim tlang in an i thawh i Jordon tiva kam Jeriko zonah an riak tikah Bawipa nih Moses cu a chawnh i Israel mi hna sinah hi bang in chim hna " Kanaan ram i nan luh tikah nan hmai i aummi cu rammi vialte cu nan dawi dih hna lai i lung ttial vialte, thletmi siasal vialte, khuahrum bo vialte cu nan hrawh dih hna lai, cun cu ram cu nan co lai i a chungah cun nan um lai, zeitintiah co awkah Kanaan ram cu kan pek cang hna" tiah ati mi kha Moses nih cun mipi cu a chimh hna. Sihmanhsehlaw Kanaan mi hna cu nan dawi hna lo ah cun nan tantermi hna cu nan mit chungah hling le nan hrappang ah chuntu bantuk an si lai i nannih nan umnak ram chungah cun harnak an in pek hna lai. Cun  Kanaan mi cung i tuah awk ka ruahmi kha nan cungah ka tuah lai i nan lu cung van hna khi dar a si lai i nan tanglei vawlei hi thir a si lai, Bawipa nih nanral hna hmai ah an sunghter hna lai i annih doh awkah lam pakhat in nan kal lai i lam pasarih in nan zam lai, vawlei cung mi pennak vialte hmuhah tuksapur nan si lai, van arfi zat nan rak si tawnmi kha tlawmte lawng nan tang lai, Bawipa nih nan cungah thluachuah an pek hna i a rak i lawmh bantuk te khan nanmah cung i rawhnak tlunter le hrawh ah Bawipa cu aa lawm lai i co awk i nan va luhhnawhmi ram chungin an phawi hna lai tiah a ti.  Sihmanhsehlaw Bawipa nih an ttheknak hna ram hlatpi nan umnak zong in nan sualnak nan i ngeihchih i Bawipa nan Pathian cu nan lungthin dihlak le nan ruahnak dihlak he nan auh tthan tikah Bawipa nih an pumh tthan hna lai i nan pupa hna nih an rak comi ram chungah khan an luhpi hna lai i nan pupa hna nakin rum deuh le tam deuh ah an ser hna lai. Bawipa nan Pathian cu nan lung dihlak le nan ruahnak dihlak in nan dawt i nan nun nakhnga, Bawipa nan Pathian nih nanmah lung le nan tefa hna lung cuarpar cu an tan hna lai tiah a ti. Bawipa cu kan sual ko bu zongah ai ngeihchihmi hna caah cun azungzal in a kan ngeihthiam kho mi Pathain asi. Amen!

            Izipt ram in a chuahnak kum (40)nak kum dongh leiah khan Israel mi cu Bawipa nih anmah chimh awkah nawlbia a pekmi vialte cu an ulh nakhnga, nawlbia kan pekmi hna hi nan chap lai lo, nan zuk fawn lai lo tiah Moses nih a chimh hna i ralrinnak ttha tein a pek hna i Kanaan ram nan phanh tikah ramdang pathian nan biak in ka nawlbia leng karhlei nan lam hrimhrim lai lo, kan nawlbia zulh loin nan i thurhhnawmh ah cun nan lotlau zauzau ko lai tiah a ti hna. Cun Moses nih cun a thawh than hna i hi biakamnak cu Bawipa nih kan pupa hna he a ser a si lo, sihmanhsehlaw nihin ah hika i a nung rihmi kannih kan dihlak he hin a ser a si tiah ati bangin ni hin kan rel lengmang mi Baibal chung thluachuahnak le biakamnak vialte hi Israel mi ca lawngah si loin nihin zumtu nangmah le keimah ca tuah arak si ve. Amen! Bawipa nih sunparnak co ko seh! Bawipa nih Moses sinah a chimmi cu a ka dawmi le ka nawlbia a zulmi hna thong tampi cung i a fekmi a dawtnak a langhter kho mi Bawipa ka si tiah a ti. Sihmanhsehlaw Bawipa na Pathian min cu sawhsawh in va hmang hlah, zeitintiah a min a hmang sualmi cu Bawipa nih sual lo ah a ruat hrim hna lai lo tiah ralrinnak apek chih hna.  Moses nih cun maw Israel mi hna nan va phanh lai mi Kanaan ramah nan tlamtling i thuachuah nan hmuhnak hnga Bawipa nan Pathian cu nan lungthin dihlak le nan ruahnak dihlak le nan ṭhawnnak dihlak in nan dawt lai tiah a ti hna.

            Nihin ah Bawipa nih an thim hna hi midang hnakin nan tam deuh caah si loin an dawt hna ca tuah an thim hna asi, Izipt ram in sal sinak in a tthawngmi a kut in an chuahpi hna i nan pupa sin i a biakamnak cu a tlinter. Amen!  Nannih nih nan va phanh lai mi Ram mi hna kha nan tih hna lai lo, zeitintiah Bawipa nan Pathian, a lianngan i tih a nungmi Pathian cu nan lakah a um tiah a ti hna bang in kan nih sin zongah a um zungzal ve i vawlei harnak hi kan tih awk asi hrimhrim lo. Amen! Maw ka dawtmi Laimi phun kan tam ruangah le kan fim, rum ruangah si loin Bawipa nih a kan dawt ruang tuah thluachuah pekding in thimmi kan si ve hi philh hna hlah usih. Hi ruangah hin kan lungthin dihlak le kan ruahnak dihlak le kan tthawnnak dihlak in daw hna usihlaw mahhnak ngan chinchin in a kan cawi ko lai. Amen! Moses nih a thawh tthan hna i minung hi rawl lawnglawng in a nung lo, sihmanhsehlaw Bawipa kaa in a chuakmi thil kip in a nung ti kha an hngalhter hna nakhnga, rawlṭam fahnak le a nawlbia kha nan zul maw zullo ti hnalhnak caah harnak kha kum (40) an inter hna. Manna in an cawm hna i an hneksk hna, mah cucu nanmah nih siseh nan pupa hna nih siseh nan rak hngal lo tiah a ti hna. Cu ve bantukin kan nih zong rawl lawng si loin nunnak cu Bawipa bia ah asi i harsatnak le rawltam lungre thei i kan um caan zongah Bawipa hneksaknak chungah kan um ve maw ti hi ruat cio ve hna usih. Bawipa nih zu le va hmanh rawl loin a chia hna lo i kan nih zong  rawl loin cun a kan chia bal lai lo i kan tuar khawh lo le in khawhlo tiang cu a kan hneksak ve lai lo. Hneksaknak kan in cu Bawipa nih thatnak tuahpiak dingah le thluachuahnak pek a kan duh caah arak si. Amen!

           

            Moses a timi hna cu Bawipa nan Pathian cu nan dawt i a rian nan lungthin dihlak le nan ruahnak dihlak in nan ṭuan i nan zulh hna ahcun nan phanhmi ramah a mah le caan teah ruah Bawipa nih an pek hna lai i nanmah lo chung chuak thlai hna cu nan ei hna lai. Cun nan keza nih a lamhmi hmun poah cu nanmah ta asi lai tiah a hna. Sihmanhsehlaw nihin ah hin nan hmaiah thluachuahnak le chiatserhnak ka chiah: ka nawlbia nan zulh ahcun thluachuahnak cu pek nan si lai nain nan zulh loah cun chiatserh nan si lai tiah a ti hna. Cun Moses nih hin Israel mi cungah siangpahrang a um te lai i amah cu Bawipa nih thimmi asi lai i nanmah Israel mi chung lawng siangpahrang ah nan i thim lai. Cun amah nih nupi tampi a ngei luaimai hna lai lo, sui le ngun zong a tamter chin luaimai hna lai lo i Izipt ram zongah a rang tamter awkah nan kir fawn lai lo, zeitintiah a lung a pialter sual lai tiah a ti. Sihmanhsehlaw Israel siangpahrang cu Pathain tihza a thiamnak hnga  Phungbia kha ca uk pakhat in ai tlen lai i a nun chung vialte le a fale vialte nih an rel lai tiah a ti. Mah a cung i tialmi hi Solomon siangpahrang nih a zul ve lo i a cungah a tlingmi kha hmuh khawh a van si ko. Mah nih a kan cawnpiakmi hi Solomon tthatlonak va chim lengmang kha si loin kanmah tu hi lamdangah kan piallo nak hnga le chimhrinnak tu a rak si. Moses ca uk chungah fiang ngaiin Bawi Jesuh kong kan hmuhnak cu hi zon hi asi: Moses nih a thawh i Bawipa nih a ka chawnh i an unau hna chungin nangmah bantuk profet pakhat an caah ka chuahter lai i a kaa chungah ka bia ka chiah hna lai, nawl ka pekmi vialte kha a chimh hna lai i ka min in a chim laimi a bia a ngai lomi le zei i arel lomi poah cu  Keimah hrimhim nih zeicaahdah a tuah lonak kong kha ka hal hna lai i bia ka ceih hna lai tiah a ti. DEUTERONOMI 18:15 - 19

            Raldoh awk i nan i thawh tikah a thin phangmi le a lungdermi nan um ah cun cu pa cu inn ah tlunter siseh, a hawile lam an lung a mah bantukin a derter sual hna lai tiah a ti. Cun Ral doh awk i nan i thawh tikah nanmah nih remnak kha nan pek hmasa hna lai, an duh ah cun hnekmi rian nan tuanter hna lai nain an duh loah cun Bawipa nih an pek tik hna ah pa poahpoah nan tha dih hna lai tiah ati. Sihmanhsehlaw Bawipa nih ro caah an pekmi hna miphun cungah cun a ho cung hmanh ah remnak nan ser lai lo i a thawh a chuahmi poah nan thah dih hna lai tiah ati. Cu ve bantukin kan nih zong zumhnak kar kan hlannak ah hin mi lung ader tertu si loin ralttha ngaiin le Bawipa zoh buin hmai ah fongchin mi tu siko hna usih. Kan teinak cu kanmah tthawnnak in si loin Bawipa tthawnnak tuin asi lai. Amen! Cun Bawipa nan Pathian aw kha nan ngaih i nihin ah kan pekmi hna nawlbia vialte cu ṭha tein nan tuah ahcun, vawleicung miphun vialte hna cungpi ah khin Bawipa nan Pathian nih an chiah hna lai. Cun Bawipa nan Pathian aw kha nan ngaih ahcun hi thluachuahnak vialte hi nan cung a phan lai i an zulh hna lai tiah a ti. Amen! Nan bawm le nan changreu nennak kheng hna cu thluachuah pek an si lai. Nan luh leiah thluachuah nan hmu lai i nan chuah leiah thluachuah nan hmu lai. Nanmah an dotu hna nan ral hna cu Bawipa nih nan hmaiah a sunghter hna lai; nanmah doh awkah lam pakhat in an ra lai i nan hmaiah lam pasarih in an zam lai tiah ati. Bawipa min thangthat si ko seh.

            Moses nih Israel mi vialte cu a kawh hna i Bawipa nih Izipt ram i atuahmi khuaruahhar vialte le hmelchunhnak nganpi pi kha nan hmuh cang, Sihmanhsehlaw hngalhthiamnak lungthin siseh hmuhnak mit siseh, theihnak hna siseh Bawipa nih an pe hna lo caah kan chim hna lai, ramlak ah kum sawm li chung kan hruai hna i, nan keng cung puan siseh nan ke cung kedan siseh an ṭet lo, cu cu Bawipa tthawnnak le khuaruahhar hmelchunhnak an si tiah a ti hna. Moses cu Israel mi hna he biakamnak an tuah i nan pupa hna sinah bia a rak kamh hna bangin nannih zong amah mi siter awk le amah cu nan Pathian si awkah a hmai i an pumhter hna hi asi tiah a ti hna. Cucaah cun hi chiatser in biakamnak ka tuahmi cu, kanmah he nihin ah Bawipa kan Pathian hmaiah a dirmi hna he lawng hin ka ser a si lo, Nihin ah kan sin i a um lomi hna he zong ka ser a si tiah a ti. Nihin ah hin hi thluachuah le biakam vialte zong hi kan mah thluachuah kan hmuh khawh ve nak ding caah an si. Amen! Cun Moses nih ai thawh tthan i Aa thupmi thil hna cu Bawipa kan Pathian ta an si; sihmanhsehlaw hi phungbia vialte hi kan tuah khawh nakhnga, phuanmi thil hna cu kanmah le kan fale hna ta zungzal in an si lai i hi nawlbia cauk chungah aa ṭialmi a phungbia le a nawlbia hna kha ulh awkah nannih nih Bawipa nan Pathian aw kha nan ngaih i nan lung dihlak le nan ruahnak dihlak in nan i mer paohpaoh ahcun an rumter hna lai tiah ati. Moses nih mahtlukin thluachuah bia a kamh cuahmah bu ko hna ah cun a hmuh khawhmi cu Kanaan ram nan phanh tikah nan rau hrimhrim lai lo, nan rawk zauzau lai tiah kan thanh hna tiah a ti hna.

            Moses nih a tu cu kum (120) ka si cang i ka thi chawm lai, cun Bawipa nih Jordan tiva hi na tan lai lo tiah a ka ti cang. Sihmanhsehlaw "Ṭhawng u law, nan ral ṭha ko u, ṭih hlah u, an hmaiah therphang hlah u; zeicahtiah nanmah he a kalmi cu Bawipa nan Pathian a si; an deuh hna lai lo i an hlaw fawn hna lai lo," tiah a ti. Cun Bawipa nih Moses cu a chawnh i nang zong na pupa hna sinah na it dengmang cang; cucaah cun Joshua kha tonnak thlam ah ratpi tuah a ti bang khan a ratpi i Bawipa tthawnnak cu tonnak thlam ah khan minmei tung in a rung lang i Bawipa nih Nun fapa Joshua kha rian a pek i, "Ṭhawng law, na ral ṭha tuah; zeitintiah Israel fale hna cu annih pek awkah chiat ka sermi ram chungah na luhpi hna lai; nangmah sinah ka um lai," tiah a ti. Cun Moses nih a thih lai ah Israel mihpun vialte cu phunkhat hnu phunkhat thluachuahnak a pek hna i kan pekmi hna nawlbia zong hi nan van zulh dih hna lai tiah fak piin bia a tiam hna. Moses cu Bawipa fial bangin Nebo Tlang ah a va kai i Kanaan ram cu a cuanh i a hmuh hnuah Moab ram chungah a thi. Moses hi a thih ah kum 120 asi i Bawipa nih Moab ram chung nelrawn ah a vui, nihin ni tiang ah khawika a vui ti hi theih asi loh. Israel mi nih ni (30) chung an tahnak a dongh hnuah Joshua cungah Thlarau fimnak in a khat i Israel mi hna nih an tih i a bia cu an ngaih. Bawipa nih hmaitonh in a hngalhmi profet Moses bantuk an chuak ti lo. Moses nun hi kan zoh tikah a hruaimi a miphun caah a nun hloh a ngammi le thih asiangmi asi caah Bawipa nih a rak thimnak asi ve. Kan nih teh zeitlukin dah Pathian caah le miphun, Khrihfabu caah zohchunhtlak tein le Pathian duhning, tinhning in kan nun ve ti hi ruatti cio hna usih. Kan tuahmi thil vialte hi Bawipa sunparnak caah si dih ko hna seh.

Note: NAMBAR le DEUTERONOMI chung lakin tialmi asi.