PENTEKOS NI HI NA CAAH SULLAM A NGEIIN NA CHUNGAH A TLING VE CANG MAW?

Nihin hi Vawlei cung Khrihfa vialte nih Petekos Ni tiah auhmi Ni asi. Chunglei Nunnak taktak he Jesuh Khrih a ngeimi kan caah cun sullam a ngei tuk i atthawng taktakmi lawmhnak Ni asi. Bawmtu Thiang Thlarau hi Jesuh Khrih a thih hnu ah zumtu hna sinah rak ttum hlah sehlaw siasal abiami men kan si ko hnga. Sihmanhsehlaw Jesuh Khrih nih keimah bantukin nan nung ve lai timi hmelchungnak cu Pentekos Ni i a zumtu hna cungah Thiang Thlarau in a ttumnak hin a langhter. Amen! Nihin hi Petekos Ni taktak cu asi lo nain Petekos Ni ah kan ca i a thimi Jesuh Khrih nih bia a kan kamh bantuk tein Bawmtu Thiang Thlarau cu Pa nih a kan pek taktak cang timi hngalhter tthannak lawng si loin a tu lio hrimhhrim ah hin Thiang Thlarau cu a zummi sinah a ttum zungzal ko. Amen! A hlan ahcun Thawh thannak in ni 50 ni kha Pentekos Ni tiah auh asi i a tu kan chan tu ahcun nichiar hmanh si ti loin second pakhat chung hmanah hin Thiang Thlarau cu a zummi cungah a tlung peng rih ko caah Ni chiar te hi Pentekos Ni cu asi ko cang. Halleluijah. Nang na zumhnak nih hin teh Petekos Ni i zumtu hna nih an comi Thiang Thlarau cu an coter ve cang maw? Nihin hi na cungah Thiang Thlarau tlun ni asi ve. Amen! Maw ka Pa Petekos Ni i zumtu hmasa hna sinah na rak pekmi hna Thiang Thlarau cu keimah cung zong na tlunter bantukin nihin ah an zumtu vialte cung zongah tlunter hram ko tiah Jesuh Min in kan nawl. 

Jesuh Khrih nih vawlei a um lio ah Lamkaltu ai thimmi hna sinah a cahtak  hna bantuk in lungkhat tein pumhnak le thlacam ttinak an ngei lengmang tawn i  Pentekos Ni zongah a pummi hi minung 120 an si. An i pumh cuahmah lio ahcun thlitu fakpi a hran thawng bantukin vancung in aw pakhat a rung ttum i an i pumhnak inn cu Thiang Thlarau tthawnnak he a khat. Cu lio ahcun minung "LEI" bantuk asi ttung i "A KANGMI LEITTE" kha an hmuh hna, an hmuh lawng si loin minung pakhat cung cio ah khan an hung i fu. Cu le cangka cun minung 120 aa pummi cu Thiang Thlarau in an khat i Holh Theihlo (holh dang) or (Van holh) in a holh duahmah hna. Amen! Bawipa nangmah an zummi poah nih kan duh cio kan zangfah ko muh... Cu ticun Johan nih ka hnu i a rami nih cun Thiang Thlarau le Mei in Baptisma an pek hna lai a timi kha a hun tlinter(Mathai 3:11)! Amen. Thuk deuh in chim ka duhmi cu Mei a kangmi LEITTE an cung i aa futnak sullam cu Pathian nih minung LEI bantuk kha Vancung LEI a pek hna ti asullam khi asi i cucaah cun holh dang in an holh khawhnak asi. Amen. Halleluijah zong hi van holh cu asi ve. Amen! Jesuh Khrih a nun lio zong ah hin van holh a hmannak tete an um ("Talitha koum"mark 5:41, "Eloi, Eloi, lama sabakthani" 15:34) Biakam hlun zongah an um len ko hna. 

      Nihin zumtu ai timi tampi cu Khrihfa kan si kan ti ko nain Efisa khuami bang Thiang Thlarau um le umlo hmanh a theilomi tampi kan um. Mi chimnak in cun na theih ve hmanh ah cucu Pathian nih nangmah ca teah a rak chiahmi Meizik he ailomi Leitte na cungah ai fut ve rih lo ahcun na caah Petekos Ni a phan rih lo tinak asi. Jesuh Khrih ka zum ve ko na ti zongah Thiang Thlarau na ngei lo ahcun Nunnak ca uk chungah na min ttial asi rih lo tinak asi ko. Petekos Ni Thlarau Thiang hi Khrihfa aitimi poah nih kan herh i miphun nunnak le Khrihfabu damnak, pumpak lawmhnak taktak cu Thiang Thlarau hi asi. Amen! Minung phung nih hin Pathian lung a lawmhter kho bal lo i chunglei Thlarau phung lawng nih a lawmhter. Chunglei in a kan hruaitu Thlarau phung nih cun Pathian duhnak le nawl zulh kha a thiam hna, chung lei nawl zulhnak in lenglei ah a hung langmi theitlai hna nih hin Pathian lung a ton. Amen! Maw Bawipa pumpak kan nunnak le Khrihfabu, kan miphun hna nih Nunnak taktak kan ngei cangnak, na Fale taktak kan si cangnak hmelchunhnak ca i pekmi Bawmtu Thiang Thlarau cu kan chung cio ah futter ve ko cang tiah zangfah kan nawl. Amen! Pentekos Ni hi na caah sullam a ngei in na chung ah a tling ve cang maw? Bawipa nih in pemhter ko seh... Thiang Thlarau mikip chungah nung ko cang.....

LAMKALTU 2:1

Pentekos ni kha a phak tikah zumtu vialte cu hmunkhat ah an i pum.

LAMKALTU 2:2

Chikkhatte ah khin van in aw pakhat a rung i a thawng cu thlitu fak piin a hrangmi thawng bantuk a si i an ṭhutnak inn kha a khat dih.

LAMKALTU 2:3

Cun meizik he aa lomi leiṭe an hung chuah kha an hmuh hna i cuka i a ummi hna an dihlak cungah khan lei cu pakhat cio ah an i fu.

LAMKALTU 2:4

Annih cu Thiang Thlarau in an khat i Thlarau nih chim khawhnak a pek hna bantuk cio khan, holh dang in an holh.