Kan biakmi kan Pathian nih Thlarau damnak in pe cio ko hna seh. Amen! Nunnak Thawngttha ka rak in hrawmh tthan hna. Bawipa sunparnak caah si dih ko seh!
1 JOHAN 2:1
Ka fale hna, hi ca kan kuat hna cu sualnak kha nan tuah nakhnga lo caah a si; sihmanhsehlaw pakhatkhat nih sualnak nan tuah ahcun, a dingmi Jesuh Khrih, Pa sin i bia a kan chimpiaktu, kan ngei ko.
1 JOHAN 2:2
Cun kan sualnak ngaihthiam kan sinak cu Khrih thawng cun a si i kanmah sualnak lawng si loin mi vialte zong an sualnak kha ngaihthiam an si lai.
Johan Thawngttha nih sualnak kan tuahnak hnga lo le sualnak chungah a um dingmi kan si lonak kong kha a van kan theihter tthannak caah hi ca a kan kuatnak cu asi. Cucaah cun biaktak kan theih khawhnak ding ahcun Baibal kan rel lengmang ahoahnak hi asi. Amen! Sihmanhsehlaw pakhatkhat nih sualnak kan tuah sual si ahcun Pa Pathian sinah nawlpiaktu le biachim piaktu Khrih kan ngei ko caah hnangam tein ilawm ko hna usih. Amen! Biaceihnak hmai i kan dir tikah kan mah aiah Khrih cu a tho lai i mah mi hna hi ka thi in ka tlanhmi hna le a sualnak vialte cu ka thi in kan thenh piak cang mi hna an si tiah Pa hmaiah a kan dirpi te lai. Amen! Pa hmai i Khrih nih dirkamh dingmi cu nangmah le keimah lawng si loin Khrih azummi poahpoah cu dirkamhmi kan si cio te ko lai. Amen! Bawipa min thangtthat si ko seh! Siahcun kan sualnak nawlpiaktu kan ngei cang cu teh tiin sualnak cu tuah in kan sual peng lai maw? Tuah/sual peng hlah ee! Jesuh Khrih nih hin voikhat ah zalak in kan sualnak hi thenhpiak cangmi kan si. Amen! Cucaah sualnak le muihnak chung i kan i nuam ko rih ahcun kan hrintthan kan timi hi ruah len awk a um hnga. Minung kan si i taksa in kan nun rih caah kan tling kho ngaingai dih lai loh nain Khrih thisen in thenh kan si i Khrih sunparnak le tthawnnak cu hrawmh ve kan si bantuk in anunzia i nunning zong hrawm ve kan si. Amen! Cucaah Hrintthan cangmi poahpoah nih cun Khrih nunzia in kan nun chin lengmang ding le kan cawn chin lengmang awk asi. Amen!
1 JOHAN 2:3
Pathian kha a nawl kan ngaih ahcun, amah kha kan hngalh tiah fiang tein kan hngalh.
1 JOHAN 2:6
Pathian chungah kan um, a timi paoh nih cun Jesuh Khrih bantukin kan um awk a si.
Khrih he kan i pehtlaihnak thawng in Pathian fale taktak kan hung sinak a kan hngalhtertu le fiantertu cu Pa duhnak le anawl kan ngaih/zulhnak thawng hin asi. Amen! Taksa hmanh in Hringtu kan pa le ttihzanak pek le an nawl ngaih hi kan duh i kan izuam pengmi asi. Cu nih asawh duhmi cu kan Pa le an si taktak kha alanghter. Cu ve bangin Pathain fale taktak kan sinak cu Khrih nih a kan chiahtakmi nunzia in kan nunning hna le Abia ning in sualnak ah kan i ciah ti lo i a nawl kan ngaihmi nih hin a langhter ko. Amen! Khrih zong nih Pathian a nawl ngaihnak le duhnak cu teminnak fakpi he aithimnak thawngin Pathian nih vawlei mi vialte Khamhtu ah aser. Amen! Ka nawlh rih lai sualman thihnak tangah aummi, thih lawng aiba cangmi vialte kha zungzal nunnak tuin a kan khamh. Amen! Bawipa min thangtthat si ko seh.. Cu ve bantukin kan nih zong nih Khrih a nawl ngaih le duhnak tuah cu i thim ve hna sih. Amen! Khrih a nawl ngaih le duhnak kan tuahnak thawng cun Pathian nih sangpi ah a kan cawisan ve te ko lai. Amen! Sanpi cawi lawng hmanh si loin Thlarau tlaumi tampi tlaitu ah a kan hman ve te ko lai. Amen! Pathian chungah aum i Pathian Fa ka si ai timi kannih nih cun Khrih Jesuh bantuk in kan nun hrimhrim awk asi. Amen! Bawipa nih athar in thluachuahnak kan pek piak ko seh!