"NUNNAK."

JESUH CU NUNNAK ASI (John 14:6)

Minung vialte nih kan herhbikmi hi “Nunnak”, asi. Tulio i kan kawl, kan ṭuanmi tampi hna zong hi nun duh ah an rak si i Kan pum in dam kan duh lengmang mi zong hi nun kan duh caah asi. Thuk deuh in kan rak ruahlomi cu Nunnak maw abiapi deuh? Damnak dah abiapi deuh timi kong hi asi. Na dam ruangah na nun si loin na nun rih ruangah damnak na herh asi deuh. Damnak cu anungmi nih kan herhmi asi i athimi caah cun damnak aherhnak a um ti loh. Cubantuk in Khamhnak zong hi taksa in anung rihmi le Thlarau in athimi hna ca i sualnak thianhpiak, Sualman leiba champiak le sualnak chungin luatnak thawngin khamhnak kan hmuhnak ding caah Khamh kan herh arak si ve. Khamhnak kan ti lengmang mi cu sualnak ruangah Pathian thinhunnak in aluangmi dantatnak kan in dingmi chungin kan luat khawhnak ding caah Jesuh Khrih thisen in sual ngaihthiamnak kan hmuhnak ding caah tuahpiakmi le sualnak chungin luatternak thawngin sualnak sal kan si tinak hnga lo caah asi. Sualnak sal kan si timi sullam cu satan sal kan si rih tinak asi i sualnak chungin luatter kan si tikah satan sin in kan luat ve cang tinak asi. Khamh kan herh taktak mi hi kan pum le thlarau lawng si loin thinlung le ruahnak tiangin khamh kan rak herh. Khamh kan si, kan ti tikah sualman leiba champiak le sualnak kan rak tuahmi vialte ṭawlpiaknak in phuhrunnak kan ngeihtilo lawng si loin sualnak chungin kan luat cang ti langhternak ah thinlung thar le ruahnak thar pek kan si hlei ah kan pum tiang nih damnak ahmu. 

Ahleiin Adam ruangah kan thlarau athimi kha luatnak ahmu ve i Pathian nih arak ser hmasa ningah kirpi ṭhan asi i kan thlarau cu nunnak taktak ahmu cang. Khamhnak hi Nunnak asi loh, Nunnak kan hmuhnak dingah Adam sualman ruangah thihnak chungin luatnak a kan petu Khamhnak tu asi deuh. Nunnak taktak cu Jesuh Khrih lawnglawng asi i Amah kan zumh thawngin kan hmuhmi le Amah sin in kan hmuh khawhmi asi. Amen. Minung vialte hi a dingpengmi le asual ballomi pakhat hmanh kan um lo tihi Baibal nih a kan cawnpiakmi asi. Minung kan chungah aummi “Nunnak”, “Thlarau”, cu sualnak ruangah Pathian nih a cohlan duhlomi kha Fapa Jesuh Khrih nih limpiakmi le Amah kan zumh thawngin Pathian cohlan tlakah kan cang i kanmah “Nunnak”, “Thlarau”, le Khrih Thlarau “Nunnak”, cu apehter tikah Thlarau in “Hrinṭhannak”, kan hmu. Jesuh Khrih he Thlarau in kan i pehnak thawngin Thlarau in pakhat kan si i Pathian Fa kan si kan ti lengmang mi le Nunnak (Jesuh) kan ngei ka ti lengmang mi cu asi. Amen. Jesuh Khrih he Thlarau in pakhat kan si caah Nunnak taktak le Nunzia ṭha taktak zong ka ngei ko cang. Amen..

Minung kan chungah aummi nunnak cu thaw hi asi lo i pum zong asi ṭhiamṭhiam loh. Nunnak taktak cu thlarau (Pathian nih thaw a chuahhnawhmi thlarau) tuhi asi. Cu Pathian nih thaw a chuahhnawhmi “thlarau, nunnak” cu Adam in aithokmi sualnak ruangah athih caah khamh aherhmi asi. Minung kan pum anun rih cu Pathian nih kan chungah achiahmi Thlarau “Nunnak”, aum rih caah asi i minung kan thi kan timi zong hi kan chungah Pathian nih achiahmi thlarau ”Nunnak”, achuah caah kan pum athih asi. Pum nih acelhlo caah minung kan thih si loin Thlarau umnak caah a ṭhat ti lo caah le Pathian nih acan aza cang ati caah kan pum athih asi. Ataktak le ngaingai ti ahcun minung hi Pathian nih a kan ser bak in zeitik hmanh ah athi kho ti lo dingin a kan ser. Amah belte Baibal nih thihnak taktak atimi cu Hell tlak hi asi. Minung kan chungah aummi “Nunnak”, “Thlarau”, hi Pathian nih Amah he lo in sermi asi caah athi kho ti lomi “Thlarau”, “Nunnak”, asi. Minung kan pum aidinh tikah “Thlarau”, “Nunnak”, cu Petu Pathian sinah akir lai nain a pum in arak nunning tein biaceih asi lai. Nunnak “Thlarau”, cu Adam ruangah Pathian cohlan tlaklo le Amah sinah aum kho dingmi kan si lo caah Pathian nih “Nunnak le Thlarau”, asimi A Fapa Jesuh Khrih cu taksa in minung nunnak le Thlarau in kanmah Khamhtu ah avun thlah. 

Adam sualnak kan i hrawmlo atimi zong tampi kan um kho ko nain kan i hrawm le hrawmlo cu nihin kan sining le ziaza sualning nih alanghternak hin kan i hrawm ko ti kha tehte kan khan. Aruang cu chuahka in nihin kan si ning tiang asual ballomi kan umlonak hin sualcii fa kan sinak kan langhter. Jesuh Khrih nih Jews mi atimi hna cu Pathian hi nan Pa rak si taktak sehlaw nan ka cohlan ko hnga, zeicahtiah Amah sin in pei ka rat cu.. Sihmanhsehlaw nan ka cohlanglo cu nan pa khuachia fa nan si caah asi tiah arak ti hnanak kha asi. Adam nih tuahmi sualnak ruangah kan thlarau athi ti lengmang mi cu Pathian ta si ti loin satan ta kan simi thihnak khi chim duhmi si i kan chung ahcun Pathian nih thaw achuahhnawhmi thlarau cu a um ko caah nihin ni tiang kan pum in kan nun cio rihnak hi asi i cu kan thlarau satan ta sinak cun Pathian Fa si ṭhan dingah Jesuh Khrih thisen in a kan khamhnak cu asi. Amen. Bawipa Jesuh Khrih hi vawleicung ah sualnak vialte chungin tlanh dingah le khamh dingah ra hlah sehlaw ka thlarau cu a thi cang caah ka kalnak ding cu zungzal thihnak hell chungah si ko hnga. Pathian Fa asilomi paoh cu zungzal thihnak hell ah an kal ko lai. Thihnak taktak hi kan pum a thih hi siloin satan fa asimi le hell chung tlak tu hi thihnak timi taktak  cu asi. Nunnak ka ti lengmang mi zong hi Bawipa Jesuh ka zumh le ka cohlan thawngin Pathian ta (Pathian Fa) ka si ṭhanmi hi asi. Keimah caah a nunnak petu Bawipa Jesuh cu biaktak le thangṭhat tlak le upattlak Pathain asi zungzal ko. Amen.

Keimah “nunnak, thlarau”, le Khun Khun Nu “thlarau, nunnak”, cu nunnak asimi Thlarau nih kan pum hmangin a kan tonter tikah le hawikomhnak a kan ngeihter tikah fanu le fapa a kan ngeihter! Cunbantuk in Jesuh Khrih cu Pathian nih thlahmi Pathian Fapa asi ti ka zumh caah le ka sualnak ruang i vailam cungah thihnak in limpiakmi le thawhṭhan nunnak ka zumh, ka cohlan caah  keimah “Nunnak, thlarau”, le Bawipa Jesuh Khrih “Nunnak, Thlarau”, cu Pathian nih apehter tikah Thlarau in “Hrinṭhannak”, ka hmu. Hrinṭhannak kan hmuhning cu "Pathian nih Adam Thaw Chuahhnawhnak Thawngin Thlarau In Hrin Kan Si Nain Adam Le Eve Nih Sualnak An Tuahmi Ruangah Thlarau Leiin Kan Thi Nain Bawipa Jesuh Thaw Chuahhnawhnak Thawngin Thlarau in Hrinṭhan Kan Si i Thlarau In Kan Nung Ṭhan." Bawipa Jesuh kan zumh le kan cohlang thawngin Pathian Fa kan si cang caah le zungzal nunnak kan ngeih cang caah Thiang Thlarau in hrin kan rak si asi deuh. Pathian Fa ka si cang ruangah Thiang Thlarau in hrin ka si bantukin Khamnak ka co cangnak, zungzal nunnak ka ngeih cangnak, Pathian fa ka si cangnak, hrinṭhannak ka hmuh cangnak a fehtertu cu Thiang Thlarau ka chungah toih in Thlarau in hrin ka simi hin asi.. Thlarau in hrin kan si timi le Thiang Thlarau toih kan si ti lengmang mi cu Jesuh Khrih kan zumh le kan cohlannak thawngin Pathian nih Amah Fa kan si cang ruangah le Fapa Jesuh Khrih bantukin Pathian Fa kan si cang ti langhternak tehte le zungzal rawhnak hmun ah kaldingmi satan le amah ta kan si tilo ti langhtertu asi. Amen..