PATHIAN DUHNAK TUAHNAK AH HIN LAWMHNAK A TLING!

Dear Khrih chungchuak unau hna,

 Pathian bia lawng hi kan damnak le lawmhnak le hnangamnak aphakpi khotu taktak cu asi ko. Nunnak thawngttha ka rak in hrawmh tthan hna! Bawipa nih daihnak le lawmhnak tlingkhit khet in Amah nan zumh ruangah in pe cio ko hna seh.

1 PETER 4:2

Cucaah atu thawk in, hi vawlei cung i nan nun chung cu, minung duhnak kha si ti loin Pathian duhnak tu kha i ukter cang u.

Nihin i sawm kan duhmi hna cu atu thok in hi vawlei cung kan nun chung cu minung duhnak kha tuah ti loin Pathian duhnak tu kha tuah cang hna usihlaw Amah tu i ukter cang hna usih. Amen! Pathian duhnak cu zeidah asi kan tiah cun kan taksa duhmi thilttha lo poah kha hrial hi asi ko. Taksa duhnak na tuah chung poah cu Thlarau duh ning arak si lo ti hi kan fiang awk asi. Cucaah kan nih cu Khrih thawng in Pathian fale kan si i Khrih nunning le ziazatu hi kan i hruk zungzal awk le a kan chiahtami zohchunhtlak anun hi kan cawn ve awk asi. Ataktak le ngaingai kan tiah cun minung nih hin Khrih tel loin cun thilttha zei hmanh kan tuah kho hrimhrim lo ti hi nawlchih ka duh. Sihmanhsehlaw Khrih angeimi poah nih cun Khrih kan chung i aumnak thawng in thilttha tuah khawhnak tthawnnak pek kan si i cu kan tuah khawhnak dingah cun ningcang tein lamhmuhsaktu Thlarau nih a kan bawmh zungzal fawn. Amen! Kan mah minung nih tuah khawh lomi atam tuk ruangah Bawmtu Thiang Thlarau kan herhnak cu asi. Amen! Thiang Thlarau in khat dih cio ko uh. Amen!

1 PETER 3:8

A donghnak ah ka chim duhmi cu, ruahnak khat le lungthin khat in um u, u le nau bantukin i daw u law pakhat le pakhat i zaangfah u law toidor tein um u.

   Khrih nih a nunnak in a kan tlanhnak thawng in Pathian fale kan si cang i Khrih he cun unau kan si hna. Amen! Khrih hmanh kan unau asi cang i ka unau hna tiah auh hi aning azak hrimhrim lo ti hi Bible chungah kan hmuh khawh. Vawlei cung mi vialte hi Khrih an zumhnak thawng in khamh asi ve mi poah cu unau taktak kan si. Amen! Pathian nih zei ruangah dah taksa in chuahpi unau hi arak ser tiah cun Minung hi Khrih thawng in khamh kan si tik ah Khrih Jesuh hi kan unau taktak asi ti kan theih khawhnak ding caah arak si i cu nih arak sawh duhmi cu Thlarau in kan unau Jesuh Khrih a muithlam hi arak si ko. Cuccah cun kan nih taksa in unau taktak kan si lo nain Khrih thawng in Thlarau ah unau taktak kan si dih hna. Amen! Khrih nih Van akai lai ah a kan cah tahmi Bawmtu ding i arun thlahmi Thiang Thlarau thawng cun unau taktak bantuk in i dawh hna usih. Amen! Cun ruahnak khat, thinlung khat in le pakhat le pakhat hi i theithiamnak ngei hna sihlaw zangfahnak le toidornak in i sengtlai dih in i dawh dih ko hna sih. Amen! Kan lu asimi Khrih thawng in dawtnak tu hi i hruk zungzal in kan unau sinah langhter izuam zungzal ko hna usih. Amen! Cucu Pathian nih a kan duhpiak bikmi mi le vawlei i arat hnawhchan cu asi. Amen! Dawtnak taktak kan ngeih loah cun khamh/hrintthan kan si kan ti ciomi zong hi pakpalawng lawngte an si ti hi rak philh citcet cio hlah uh. Aruang cu Pathian cu dawtnak Pathian asi. Amen! Pathian nih akan duhpiak bikmi cu dawtnak in vawlei ah khuasak hi asi i cucu Pathian duhnak tuahnak in lawmhnak ahung tling khawhnak cu asi. Amen! Pathian duhnak tuah hi kan damnak le lawmhnak tling pe khotu cu asi ko. Lawmhnak le hnangamnak tling hmuh na duh ve ahcun Pathian duhnak tuah hi rak i thim law dawtnak nih na zeizong vialte hi uk dih ko seh. Amen! Bawipa nih sunparnak co ko seh!