Isak cu Abraham thih hnuah Bawipa nih Thlachuahnak apek

        Abraham cu atar ngaingai cang i zei thil atuahnak cung poah ah Bawipa nih thluachuah apek. A sal upa bik pa kha ka phei tangah na kut chia law van le vawlei sertu Pathian min in ka fapa Isak caah Kanaan nu ka tthi hrimhrim lai lo tiah bia ka kam ti kan duh. Ka chuahkehnak ram ah na va kal lai i ka rualchan hna chung khan ka fapa caah nupi na va thit lai tiah ati. Abraham cu Pathian nih kanaan ram hi a kamhmi le thluachuah kan pek lai ati mi asi caah a tefa hna nih an chuahkehnak kir kha asianh bak hna lo ti kha kan hmuh khawh i ram dang nupi thit zong kha a duh bak fawn lo ti zong kan hmuh chih khawh. Asalpa nih cun atha ko, na rualchan nu ka thit piak ko lai. Amah belte ka tthit mi ngaknu nih khan hi ka ram ah hin rat duh hlah seh law zeitindah ka tuah lai tiah a hal. Vancung Pathian Bawipa nih a vancungmi kha na hmaiah a thlah hna lai i ka pa inn le ka sahlawh rualchan vialte hna sinah ka fapa nupi ding cu na va hmuh ko lai tiah aleh. Abraham he biakamnak an tuah dih thaizing ah thil aa tiim i nupi thit dingah cun ai thawh. A va phanh tikah Bawipa sinah bawmh hal in thla a cam, a thlacamnak in a halmi vialte cu Bawipa nih a rak leh i Abraham rualchan asi mi Rebekah he khan a tonter hna. Cun Abraham salpa nih cun a khuk aa bil i Bawipa kha a biak. Cun aa thawh i, "Ka bawipa Abraham i a Pathian, ka bawipa sin i a biakam let lo tein a ummi cu thangṭhat si ko seh. Bawipa nih ka bawipa i a unau inn ah ding tein a ka hruai ko," tiah a ti. Cu ti cun Rebekah cu Isak caah cun atthit piak i Isak sinah aratpi, Rebekah cu a dawt ngaingai i cucaah a nu thih hnuah Rebekah nih khan Isak cu a hna a ngamter ṭhan.

            Abraham nih Sarah thih hnu ah nupi dang a ngeih tthan i fa tampi a ngeih hna. Sihmanhsehlaw Pathian nih biakamnak afehterhnak cu Isak cungah hin asi. Abraham cu kum (175) chantling cikcek anung hnuah athi. Abraham nih a thih tak hnuah Bawipa nih Isak cu thluachuah tampi a pek. Rebekah cu fa angeih khawh lo caah Isak nih thla a campiak i a thlacamnak cu a leh caah nau a pawi. Nau a pawi mi cu faphir an si i a nu pawchungah cun an i nam len tawn. Mah tiin an i nam lengmang tikah a nu cu a ngeih achia i Bawipa sinah a sullam hal awk ah akal. Bawipa nih cun a rak thawh i na chungah hin miphun pahnih an um, aa ralmi miphun phun hnih na hrin hna lai i a nau cu a tthawng deuh lai i a u nih a rianh lai tiah ati. A ni thla atlin tikah Esau le Jakob a hrim hna. Isak nih Rebekah a tthit ah hin kum 40 asi i Esau le Jacob an ngeih hna ah hin kum (60) asi. Cu ti cun an unau cun an hung tthang lengmang ve i Esau hi sakah athiam ngaingai caah apa cu sa a kah piak lengmang i a pa nih adawh deuh. Sihmanhsehlaw Jacob cu midai, mi holhtlawm asi i inn lawngah ai benh pengmi asi ve tikah a nu nih a dawt deuh ve. Nikhat cu Esau ram veihnak khan a rak tlung i arawl atam ngaingai, Jacob nih cu rawl thaw tein arak chumh kha ahmuh tikah ka nau ka pe ve tiah ahal. Sihmanhsehlaw Jacob nih cun Fater sinak kha na ka pek ah cun kan pek ko lai tiah arak leh, cu tikah Esau nih ai thawh i cu fater sinak ko cu kan pek tiah ati. Cucaah cun kan theih tawn bangin Esau nih Upa rocotu sinak cu rawl voikhat ei ah azuar an ti lengmang nak cu asi. Ataktak le ngaingai tiah cun anu pawchung an um lio in Bawipa nih anu sinah arak chim diam cangmi le Rocotu cu Jacob asi lai kha arak i fiang cang. Cucu Bawipa khuakhan ning le tinhning cu a rak si.

            Voikhat cu mangttam atlung ciamman i Isak le a innchungkhar vialte cu Filistin mi Siangpahrang Abimalek sin Gerar khua ah an va kal. Bawipa nih Isak cu a chawnh i Izipt ram ah cun vung kal hlah, um kan tinak hi ka ram tuah hin um ko law thluachuahnak tampi kan pek lai i hi ram vialte hi nangmah le na tefa kha kan pek hna lai. Na pa Abraham sin i biakamnak kha ka let lai lo i ka fehter lai tiah ati. Abraham sin i arak chim tawn bang khan na tefa cu van arfi zat an si lai i nangmah thluachuah kan pek bantuk hin vawlei mi nih thluachuahnak kan pe ve tiah an ka hal lai tiah ati. Pathian nih cu athawh tthan i na Pa Abraham nih ka nawl angaih i ka nawlbia vialte kha azulh dih caah nangmah cu thluachuahnak kan pek lai tiah achap rih. Kan fanu le fapa thluachuah hmuh kan duh ve ko ah cun Pathian nawl ngaih le nawl zulh hi Abraham bang in kan tuah ve cang awk asi.
Pathian nih um a fial bang in Gerar ram ah cun aum, Isak nih thlaici a tuh i cu kum ah cun a tuhmi thlaici a let za khat in a zun; cucu Bawipa nih thluachuah a pek caah a si. A ṭhangcho chin lengmang i mirum ngaingai ah a cang.  Aumnak rammi nih khan Bawipa nih thluachuah tampi a pek kha an hmuh tikah kan kal tak ko cang, kan mah hnak in na tthawng deuh cang tiah an ti i Gerar nelrawn ah ai tthial. Gerar nerawn cun Beersheba ah ai tthial tthan, Cu zan ah cun Bawipa kha a sinah a lang i, "Kei cu na pa Abraham Pathian kha ka si. Na thinphang hlah, keimah nih kan umpi ko. Ka sal Abraham ruangah thluachuahnak kan pek lai i tefa tampi kan pek lai," a ti. Cuka hmun ah cun Biakttheng a ser i Bawipa cu a biak.

                        Isak cu a tar ngaingai cang i a mit zong khua a hmu ti lo. Esau cu athaw i ka tar ngaingai cang i ka thi chawm cang lai. Cucaah cun sa va ka kahpiak law ka duhmi rawl kha thaw tein ka chumhpiak law rak ka pe. Ka thih hlan ah ka thluachuahnak hmanung bik cu kan pek lai tiah ati. Cu ti i an pa fa bia an i ruahmi cu Rebekah nih arak theih ve tik ah Jacob kha na pa le na u hmanung bik thluachuah pek dingin khua an khanmi kha ka theih, cucaah cun arannak in ka fialmi vialte hi tuah law kan chimh bang in na tuah ah cun na pa hmanung bik thluachuahnak cu na co lai tiah ati. Anu nih afial bang cun Isak nih cun a tuah dih i a nu Rebekah nih cun rawl cu thaw tein a chuanpiak. Jacob nih cun apa sin ah cun a va put i a pa nih cun arak ei. A ei duh hnuah Isak nih Jacob cu hmanung bik thluchuahnak vialte le Fa upa rocotu sinak thluachuah cu apek. Mah hnu tlawmpal ah cun Esau cu ram veihnak in arak tlung i rawl thaw tein a chuang mi cu a pa sinah cun aratpi ve. Sihmanhsehlaw Isak nih thluahchuahnak vialte cu Jacob sinah arak pek dih cang ai. Isak nih an ka deh ti kha atheih tikah athin ahung ngaingai i atherh in a therh. Esau nih fa upa ro vialte le thluachuahnak vialte cu Jacob pek dih asi cang ti kha atheih tikah lung hno ngaiin atap i kei zong na thluachuahnak cu ka pe ve ko tiah ati, Sihmanhsehlaw Isak nih cu athawh i Jacob cu ka thluachuahnak donghnak kha ka pek cang i cucaah cun amah ta asi zungzal ko cang lai tiah ati.

            Jacoh nih Esau thluachuahnak vialte cu a chuh caah khan Esau cu a nau cungah cun athin ahung ngaingai. Ka pa hi athi deng cang i ka pa athih in cun Jacob hi ka thah lai tiah aruahmi kha a nu Rebekah nih a theih tikah Jacob cu athawh i na u nih phuhlam an timh caah na pu Laban sinah va zam law na u a thimhun adam tikah na rak kir than te lai  tiah ati. Isak nih Jacob cu  a kawh i Kanaan mi nu cu na u Esau bangin  tthi hrim hna hlah, na pu sinah va kal law na pu fanu pakhat khat cu vaa thi hna tiah ati. Na kalnak le na nupi thitnak ah Bawipa nih in umpi sehlaw fa tampi thluachuahnak le miphun tampi hna pa ah in ser seh tiin thluachuahnak a pa nih cun apek. Abraham thluachuah a pek bantuk khan nangmah le na tefa hna cu thluachuah in pe hna seh law, atu i na umnak ram, Pathian nih Abraham a pekmi ram hi nangmah ta si seh," tiah a ti. A pa nih thluachuahnak apek dih hnuah a pu laban sinah cun a kal. Caan saupi azaam hnuah Jacob cu Kanaan ah a tefa hna he an rak kir than i a pa Isak cu Mamre ah khan arak um. Isak cu kum (180) anung. A pa Abraham te an vuinak lungkua ah khan Esau le Jacob nih an vui. Isak hi Pathian nih  Abraham dihfelnak le Pathian nawl zulhnak ruangah thluahchuahnak tampi ahmu ti hi kan hmuh khawh ngaingai.  Cu lawng si loin Pathian nih Abraham bia arak kamhmi cu Isak cungah hin fehter ding in atimhmi cu arak si bang i Isak fapa Jacob chung hin Pathian nih thluachuah pek ding le thimmi Israel ah ahun sernak hna cu asi. Bawipa nih reltu nan dihlak cungah thluahchuahnak kan pek piak ko seh.

Note:  Genesis 24:1 in Genesis 35:29 tiang chirhchan lak in tialmi asi. Kan thiam ruang le kan tling caah si loin Bawipa that ruangah le Thlarau in nun kan i cawmnak cio ah si hram ko seh tiin ka tialmi asi. Nan rel tikah Chambaunak kawl loin Pathian bia asi caah Pathian zoh buin thazang rak la cio hram uh tiah kan nawl hna. Bawipa nih tlhuachuahnak in pe ko hna seh.