Nitin Baibal Relnak

EXODUS 7:1

Bawipa nih khan Moses cu a thawh i, "Zohhmanh, nangmah cu Faro caah Pathian bantuk ah kan ser lai i na u Aaron nih na profet bantukin a sinah bia a chim lai.

EXODUS 7:2

Na tuah awk a si tiah kan chimhmi vialte kha Aaron cu na chimh lai i Aaron nih cun Faro kha, Israel mi cu hi ram hin chuahter hna, tiah a chimh lai.

EXODUS 7:3

Sihmanhsehlaw Faro cu a lung ka ṭhawnter lai i Izipt ram chungah hin khuaruahharmi thil tampi ka tuah lai nain

EXODUS 7:4

na bia a ngai duh lai lo. Cu tikah ka ṭhawnnak cu Izipt ram ah khan ka langhter lai i Izipt mi kha fak piin dan ka tat hna lai; cun ka ralkapbu, Israel mi kha Izipt ram cun ka chuahpi hna lai.

EXODUS 7:5

Izipt mi nih cun an cung i ka kut ka hler tik le Israel mi kha an ram chungin ka chuahpi hna tikah, keimah cu Bawipa ka si kha an hngalh lai," a ti.

EXODUS 7:10

Moses le Aaron cu Faro sinah khan an va kal i Bawipa nih a fial hna bang khan an va tuah. Aaron nih khan a ṭhiangṭhunh cu Faro hmaiah khan a hlonh i rul ah aa cang.

EXODUS 7:11

Cun Faro nih a mifim le camhthiam pawl kha a auh ve hna i annih zong nih cu bantuk cu an tuah khawh ve.

EXODUS 7:12

An ṭhiangṭhunh kha an hlonh ve hna i rul ah an i cang ve. Sihmanhsehlaw Aaron ṭhiangṭhunh nih khan a dolh dih hna.

EXODUS 7:14

Cun Bawipa nih Moses cu a thawh i, "Faro cu a lung a ṭhawng ngaingai i Israel mi hna kalter kha a duh lo.

EXODUS 7:16

Cun Faro cu, 'Hebru mi Pathian Bawipa nih, nangmah sinah a kan thlah i, "Thetse ram ah an ka biak khawh nakhnga ka mi cu chuahter hna," a ti tiah va chim a ka ti, asinain atu tiang na ngai duh lo.

EXODUS 7:17

Cucaah Bawipa chimmi cu, "Ka tuah laimi thil thawng hin Bawipa ka si cu na hngalh lai," ti hi a si. Zohhmanh, hi ṭhiangṭhunh hin tiva ti kha ka tuk lai i thisen ah a cang lai.

EXODUS 7:18

Nga kha an thi lai i tiva kha a thut in a thut lai caah Izipt mi nih an ding kho lai lo,' na ti lai," tiah a ti.

EXODUS 7:20

Moses le Aaron nih cun Bawipa nih a fial hna bang khan an tuah. Faro le a bawi hna hmaiah cun Aaron nih khan a ṭhiangṭhunh cu a hler i tiva kha a tuk, a chung ti vialte kha thisen ah an cang dih.

EXODUS 8:5

Cun Bawipa nih Moses cu, "Aaron kha, 'Na ṭhiangṭhunh cu tiva cung le tilak cung le tidil cungah khan hler law Izipt ram chungah khan utlak kha chuak hna seh,' tiah chim," a ti.

EXODUS 8:6

Cucaah Aaron nih cun a ṭhiangṭhunh cu ti cungah khan a hler i utlak kha an chuak ciammam i ram kha a khah in an khat.

EXODUS 8:8

Faro nih Moses le Aaron kha a auh hna i, "Bawipa sinah cun thlacam u law ka mi hna sin hin utlak hi la hna seh, cun nan mi hna cu Bawipa sinah raithawinak an pekchanh khawh nakhnga ka kalter hna lai," a ti.

EXODUS 8:13

Moses nih a nawl bantuk khan Bawipa nih cun a tuah i inn chung i a ummi le tual i a ummi le lo i a ummi utlak vialte kha an thi dih.

EXODUS 8:15

Faro nih thil cu a hung ṭha deuh ṭhan ti kha a hmuh tikah a lung a hak ṭhan i Bawipa nih a rak chim bantukte khan Moses le Aaron cu an bia ngaih kha a duh ṭhan hna lo.

EXODUS 8:17

Cuticun an tuah. Aaron nih khan a ṭhiangṭhunh cu a hler i vawlei kha a tuk. Leidip cu fikfa ah an i cang i mi le saṭil kha a zual in an zual hna.

EXODUS 8:18

Camhthiam pawl zong nih khan fikfa chuahter cu an i zuam ve, sihmanhsehlaw an tuah kho lo. Fikfa nih cun minung he saṭil he awlok an chawnh hna.

EXODUS 8:19

Camhthiam pawl nih khan Faro cu, "Hihi cu Pathian tuahmi a si," an ti. Sihmanhsehlaw Faro cu a lung a hak ko i Bawipa nih a rak chim bantuk te khan Moses le Aaron cu an bia a ngai duh hna lo.

EXODUS 8:22

Cu ni ah cun ka mi hna umnak Goshen ram kha cu ka zuah lai i cuka ah cun tho pakhat hmanh an um lai lo, zeicahdah cuticun a si lai ti ahcun, Faro nih keimah Bawipa nih hi ram ah rian ka ṭuan kha a hngalh khawh nakhnga caah a si lai.

EXODUS 8:24

Cuticun Bawipa nih a tuah taktak i tho cu bu ngan pipi in Faro siangpahrang inn le a bawi pawl inn le Izipt ram dihlak ah cun an lut i ram cu tho nih cun a hrawh dih.

EXODUS 8:25

Cun Faro nih khan Moses le Aaron kha a auh hna i, "Va kal u law hi ram chungah hin nan Pathian sinah cun raithawinak cu va tuah u," a ti.

EXODUS 8:27

Cucaah cun Bawipa kan Pathian nih a kan fial bantukin thetse ram chung ni thum lamkal ah kan kal hrimhrim awk a si lai i cuka ah cun Bawipa kan Pathian sinah khan rai cu kan vaa thawi lai," a ti.

EXODUS 8:28

Faro nih cun, "Lamhlapi nan kal lo ding ahcun, thetse ram ah khan Bawipa nan Pathian sin i raithawi awkah cun kan kalter ko hna lai. Thla ka campiak tuah u," a ti hna.

EXODUS 8:31

Bawipa nih cun Moses nih a nawl bantuk khan a tuah. Tho nih cun Faro le a bawi hna le a mi hna kha an kaltak hna i pakhat hmanh tang loin an kal dih.

EXODUS 8:32

Sihmanhsehlaw cu caan tiang zongah cun Faro cu a lung a hak ṭhan i mi kha a kalter duh hna lo.

EXODUS 9:6

A thaizing ah Bawipa nih a chim bantuk cun a tuah taktak i Izipt mi saṭil vialte cu an thi dih, sihmanhsehlaw Israel mi hna saṭil cu pakhat hmanh an thi lo.

EXODUS 9:7

Faro nih khan zeitindah thil umtuning a si ti kha a hal tik hna ah, Israel mi ta a simi saṭil cu pakhat hmanh an thi lo ti kha a hngalh. Sihmanhsehlaw Faro cu a lung a hak ṭhiamṭhiam i a kalter duh hlei hna lo.

EXODUS 9:10

Cucaah meiphu vutcam kha an i ṭhuam i Faro hmaiah cun an dir; Moses nih khan thli lakah cun a hlonh i minung cung le saram cungah hma kha an chuahter.

EXODUS 9:12

Sihmanhsehlaw Bawipa nih Faro kha a lung a hahter i Bawipa nih a rak chim bantuk khan a kalter duh ṭhiamṭhiam hna lo.

EXODUS 9:16

Sihmanhsehlaw ka ṭhawnnak kha nangmah cu kan hmuhsak khawh nakhnga kan nunter i cuticun ka minthannak nih vawleicung kha a cul dih lai.

EXODUS 9:23

Cucaah Moses nih a ṭhiangṭhunh kha van leiah a hler i Bawipa nih cun khua a ritter, rial le ṭek kha vawlei ah an tla. Bawipa nih rial cu Izipt ram cungah khan a tlakter.

EXODUS 9:25

Izipt ram chung dihlak ah khan leng i a ummi paoh cu minung he saṭil he rial nih cun a den dih hna. Lo chung thlai kung vialte kha a den dih hna i thingkung vialte kha a khiah dih hna.

EXODUS 9:28

Bawipa sinah cun thlacam u; hi khuari le rial hi kan ing kho ti hna lo. Nan kal lai, tiah bia kan kam hna, sau nan hngah a hau ti lai lo," a ti.

EXODUS 9:29

Cun Moses nih amah cu, "Khuapi chungin ka chuah cangka tein Bawipa sinah ka kut ka va hler lai. Vawlei hi Bawipa ta a si ti kha na hngalh naklai khuari cu a dai lai i rial cu a dih lai.

EXODUS 9:33

Moses nih Faro cu a kaltak i khuapi chung khan a chuak. Thlacamnak in Bawipa sinah a kut kha a hler i khuari le rial kha an dih i ruah kha a dong.

EXODUS 10:7

Faro cu a bawi pawl nih khan an thawh i, "Hi pa hi zei can dah harnak a kan pek lai? Va kal ko hna seh law Bawipa an Pathian cu va bia ko hna seh. Izipt ram a rawk cang hi na hmu kho rih lo maw?" an ti.

EXODUS 10:8

Cucaah Moses le Aaron cu Faro sinah khan an ratpi ṭhan hna i annih cu a thawh hna i, "Nan kal lai i Bawipa nan Pathian cu nan va biak lai. Asinain ahodah a kal ding cu nan si lai?" a ti.

EXODUS 10:10

Faro nih cun, "Bawipa nih in bawm hna seh! Nu le ngakchia cu nan i kalpi hna hnga lo, zeicahtiah harnak pakhatkhat tuah nan i tim ti cu a fiang.

EXODUS 10:11

Cucaah cun va kal i Bawipa biak kha nan duhmi a si ko ahcun, pa lawnglawng nan kal lai," a ti i cuticun Faro hmaika khan a ṭhawl in an ṭhawl hna.

EXODUS 10:13

Cun Moses nih a ṭhiangṭhunh cu a hler i Bawipa nih nichuahlei in thli kha cu ram cungah cun chun nitlak le zan khuadei a hranter. Zinglei ah cun khaubawk kha thli nih cun a chuahpi hna.

EXODUS 10:15

Ram kha a khuh in an khuh dih i cucaah vawlei cu nak dup in a um ko. Ram chung i a khomi thil vialte le rial nih a nganhmi thingthei kung vialte kha an ei dih. Izipt ram chung a dihlak ah thing hring pakhat siseh, ram hring pakhat siseh a taangmi an um lo.

EXODUS 10:16

Cu tikah Faro nih Moses le Aaron kha khulrang in a auh hna i, "Bawipa nan Pathian cung le nanmah cungah ka sual cang.

EXODUS 10:17

Cucaah atu voi khatte hi cu, ka sualnak kha ka ngaithiam u law hi thihnak dantatnak hi Bawipa nan Pathian nih a ka ṭhialpiak nakhnga amah sinah cun thla ka campiak u," a ti hna.

EXODUS 10:19

Bawipa nih thlitu cu nitlaklei kap in ṭhawng ngaiin a hranter i khaubawk cu a choih hna i Rili Sen ah khan a thlak dih hna. Izipt ram chung a dihlak ah khaubawk pakhat hmanh an tang lo.

EXODUS 10:22

Moses nih a kut cu van leiah khan a hler i Izipt ram chung dihlak ah cun ni thum chung muihnak a chah ngaingaimi a tlung.

EXODUS 10:24

Faro nih cun Moses kha a kawh i, "Bawipa biak ah cun va kal u, nan nu pawl le nan ngakchia hna zong kal ve hna seh, asinain nan tuu le nan meheh le nan caw bel hika ah hin nan chiahtak hna lai," a ti.

EXODUS 10:26

Kan saṭil cu kan sinah an kal ve hrimhrim a hau; pakhat hmanh kan kaltak hna lai lo. Bawipa kan Pathian biaknak caah cun saṭil kha kan thim hna a hau lai i cuka kan va phak hlanah cun kanmah hrimhrim zong nih Bawipa biaknak caah zei hi dah kan hman hna lai ti kha kan hngal rih lai lo," a ti.

EXODUS 10:27

Bawipa nih Faro cu a lung a ṭhawnter i kalter kha a duh hna lo.

EXODUS 11:5

Izipt ram chung i fater a simi paohpaoh kha an thi lai, Faro rocotu a bawiṭhutdan cung i a ṭhu dingmi fater thawk in facang rialnak lung i facang a rialmi salnu fater tiang an thi lai. Saṭil hna fater vialte zong an thi ve lai.

EXODUS 11:7

Sihmanhsehlaw Israel mi hna lakah cun uico nih minung siseh saṭil siseh a auh hna thawng hmanh a leng lai lo; cucaah Bawipa nih Izipt mi le Israel mi cu ka thleidan hna kha na hngalh lai,' a ti," tiah a ti.

EXODUS 12:6

Atu thla ni hleili ni tiang hi, nan i chiah hna lai i cu ni zanlei ah cun Israel mi vialte nih cu sa cu nan thah cio hna lai.

EXODUS 12:7

Cun an thi kha tlawmpal in nan lak lai i nan innka tung le nan innkaba ah khan nan nalh hna lai i inn chungah khan sa cu nan ei lai.

EXODUS 12:8

Cu zan ah cun sa cu a em in nan em lai i thilnu phulh lo changreu le ankha he nan ei lai.

EXODUS 12:11

Cun nan eining cu hi ti hin a si lai: nan puan kha nan i sawihnawt lai i nan kedan kha nan i danh lai i nan ṭhiangṭhunh kha nan i put lai, cuticun khulrang in nan ei lai. Cu puai cu Bawipa ca i Lanhtak Puai a si.

EXODUS 12:12

Cu zan ah cun Izipt ram ah khan kaa chawk lai i fater vialte kha minung si hna seh, saram si hna seh, ka thah dih hna lai. Izipt ram pathian vialte kha dan ka tat dih hna lai; keimah hi Bawipa cu ka si.

EXODUS 12:13

Thisen hi nannih nan umnak inn hmelchunhnak a si lai. Thisen kha ka hmuh tikah nannih cu kan lanhtak hna lai i Izipt ram ka hrem tikah dantatnak nih a chuahtermi rawhralnak cu nan cungah a tlung lai lo.

EXODUS 12:28

Israel mi cu an kal i mahticun an tuah; Bawipa nih Moses le Aaron a fial hna ning khan an tuah.

EXODUS 12:29

Zanṭim ah Bawipa nih Izipt ram fater vialte cu a thah hna; bawiṭhutdan cungah a ṭhu ding Faro fater thawk in thong chung i a ummi thongtla fater tiang an thi; saṭil fater vialte zong an thi.

EXODUS 12:31

Cu zan ṭhiamṭhiam ah cun Faro nih khan Moses le Aaron cu a auh hna i, "Nanmah le Israel mi hna cu khulrang in chuak u. Ka mi kha kaltak hna u law nan ti bangin nan Pathian cu va bia u.

EXODUS 12:27

nannih nih, 'Bawipa sinah pekmi lanhtak thawinak a si, zeicahtiah Izipt mi hna a rak thah hna ah khan Izipt ram i a um vemi Israel mi hna cu kan inn kha a lanhtak hna i kan inn cu a zuah hna,' tiah nan leh hna lai,' tiah a chimh hna. Mi zapi cu an khuk an i bil i Bawipa kha an biak.

EXODUS 12:37

Israel mi cu Rameses in an i thawh i Sukkoth ah an kal. Nu nau chim loin ke in a kalmipa thong za ruk tluk an si.

EXODUS 12:40

Israel mi cu Izipt ram ah khan kum za li le kum sawm thum an um.

EXODUS 12:41

Kum za li le sawm thum a tlin nite ah khan Bawipa ralkapbu vialte hna cu Izipt ram cun an chuak.

EXODUS 12:42

Cu zan cu Bawipa nih Izipt ram chungin chuahpi awkah hngilh loin a congh hna zan kha a si. Cu zan cu Bawipa sin i pekchanhmi zan a si i Israel mi nih chan khat hnu chan khat in hngilh loin an um awk hnga zan cu a si.

EXODUS 12:51

Cu ni hrimhrim ah cun Bawipa nih Israel mi hna cu an bu an bu cio in Izipt ram khan a chuahpi hna.

EXODUS 13:1

Bawipa nih Moses cu a thawh i,

EXODUS 13:2

"Fater, pa vialte cu keimah sinah nan ka pekchanh hna lai. Israel mi fater paohpaoh cu, minung an si ah, saram an si ah, keimah ta an si," a ti.

EXODUS 13:8

Cu ni ah cun nan fapa kha nan thawh hna lai i, 'Hi ti kan tuahmi vialte hi Izipt ram in kan rak chuah tikah khan Bawipa nih kan ca i a tuahmi philh lonak caah a si,' tiah nan chimh hna lai.

EXODUS 13:15

Hmailei ah nan fale nih, 'Hihi a sullam zeidah a si?' tiah an in hal hna ahcun, 'Sal i kan cannak inn, Izipt ram chung i fater vialte kha, minung he saram he, Bawipa nih a rak thah dih hna. Cu ruangah cun fater paohpaoh Bawipa sinah raithawinak i kan pekchanh hna hi a si i kan fater hna kan tlanh hna hi a si,' tiah nan leh hna lai.

EXODUS 13:17

An tuk awk a herhmi ral kha an hmuh hna tikah an lung i let in maw Izipt ram ah khan kir ṭhan hna lai, ti kha Pathian nih a phan caah, Faro nih Israel mi cu a kalter hna tikah khan, rili kam zulh in Filistia ram ah a hung kalmi lam kha a tawi bik a si ko nain, cu lam cu Pathian nih cun a zulhter hna lo.

EXODUS 13:19

Josef nih Israel mi cu fek tein bia a kamter hna bantuk khan, Moses nih Josef ruh cu a kalpi. Josef nih khan zeitindah a rak ti tiah, "Pathian nih an bawmh hrimhrim hna lai; cu tikah ka ruh cu hika hmun hin nan sinah nan i kalpi lai," a rak ti.

EXODUS 13:21

Chun ah Bawipa cu an hmaiah minmei tom in annih kha lam hmuhsak awkah a kal i zan ah an hmaiah mei tom in annih kha ceunak pek awkah a kal, cucaah cun zan zongah chun zongah an kal kho.

EXODUS 13:22

Minmei tom cu Israel mi hna hmaiah khan chun ah a um zungzal i mei tom cu zan ah a um zungzal ve.

EXODUS 14:5

Izipt siangpahrang Faro cu, Israel mi kha an kal cang, tiah an chimh tikah, amah le a bawi pawl cu ruahnak dang an hun ngei ṭhan i, "Zeidah kan rak tuah? Israel mi cu kan sal an sinak chung khan kan luatter hna ai!" an ti.

EXODUS 14:10

Faro nih khan a hun naih chin lengmang hna i cu lioah cun Izipt mi nih an hun nam cuahmah hna kha Israel mi nih cun an rak hmuh hna. An thin a phang i Bawipa sinah khan an au.

EXODUS 14:13

Moses nih khan mi zapi cu a leh hna i, "Nan thinphang hlah u! Fek tein dir u law nanmah khamh awkah Bawipa nih zeidah nihin ah a tuah lai kha zoh tuah u: cu a tuah laimi cu hihi a si lai, nihin i nan hmuhmi Izipt mi hna hi zeitikhmanh ah nan hmu ṭhan ti hna lai lo.

EXODUS 14:14

Bawipa nih nan ral cu an dohpiak hna lai, nannih cu zeihmanh nan tuah a herh lai lo," a ti.

EXODUS 14:31

Izipt mi hna cungah a liannganmi ṭhawnnak in Bawipa nih rian a ṭuan ti kha an hmuh i Bawipa kha an ṭih; Bawipa cungah khan zumhnak an ngei i a sal Moses cung zongah khan zumhnak an ngei ve.

EXODUS 14:15

Bawipa nih Moses cu, "Zeicahdah na ka auh len ko? Israel mi kha hmaiah kal u, ti hna.

EXODUS 14:16

Na ṭhiangṭhunh kha hler law rili cungah khan na kut samh tuah, cun rili kha aa ṭhen lai i Israel mi cu rili chung khan vawlei ro cungin an kal kho lai.

EXODUS 14:19

Israel bu hmaiah a kalmi vancungmi kha aa ṭhial i an hnu in a zulh hna. An hmai i a ummi minmei tom kha aa ṭhial i an hnuah a um.

EXODUS 14:21

Moses nih rili cungah khan a kut a hler i zan khuadei a ṭhawngmi nichuahlei thli kha a hrang i cu thli nih cun rili cu a nam i vawlei ro ah a canter. Ti cu aa ṭhen i

EXODUS 14:22

Israel mi cu rili chung khan vawlei ro cungin an kal, ti cu orhlei kam le kehlei kamah vampang bantukin aa chong.

EXODUS 14:24

Khuadei laite ah khin Bawipa nih cun minmei tom le mei tom chung khan Izipt mi kha a vun zoh hna i a tuaiter dih hna.

EXODUS 14:27

Cucaah Moses nih cun a kut cu rili cungah khan a hler i khua a dei ah khin ti cu amah ningkel bantuk khan a um ṭhan. Ti nih a hun naih cuahmah hna tikah cun Izipt mi cu chuah an i zuam i heh tiah an tli, sihmanhsehlaw Bawipa nih rili chungah cun a thlak dih hna.

EXODUS 14:31

Izipt mi hna cungah a liannganmi ṭhawnnak in Bawipa nih rian a ṭuan ti kha an hmuh i Bawipa kha an ṭih; Bawipa cungah khan zumhnak an ngei i a sal Moses cung zongah khan zumhnak an ngei ve.