Pathian nih Abram auhnak le Thluachuah peknak

             Vawlei cung mi vialte hi Noah fapa le hna nih hrinthlak mi lawngte kan si. Noah fapa pathum lak ah hin upa bik Shem hin thluahchuahnak le Pathian nih thim khunmi asi nak alang. Adam nih fapa angeihmi ah Seth hlan ah Kain aum ko nain fa upa rocotu ah Seth hi Pathian nih athim bantuk in Noah fale zongah hin Upabik Shem hi ahlei in thluachuah pek dingah athim ve. Chim duhmi cu Seth cii ruang chung in Noah a chuak i Shem chung hin Abram te pawl zong an chuak ve. Pathian nih Noah le fapa hna cu thluachuahnak apek hna i fa tampi an ngei, vawlei ah cun an karh chin lengmang. Buanchukcho in kum hnih hnuah Shem nih fapa angeih, Shem a fapa hi kum 403 anung. Cu ti cun an fapa le upa bik changchang cun an van izul i Shem in Peleg chan, chan 5 nak ah hin cun kum 209 lawng an nung cang. Cu cu Pathian nih minung hi kum 120 cung nung ka sianh ti hna lo ati mi kha a van tling cuahmah. Shem in Abram pa Terah tiang hi chan (10) arau i Terah cu kum 205 a nung ve. Terah Pa Nahor hna kha cu kum (119) lawng anung ve. Abaraham chan ah hin cun minung hi kan chan atawi deuh ngai cang i kum (175) lawng anung.

            Terah nih hin fapa pathum angeih ve hna i Pathian nih Abram lawnglawng hi athim ve mi asi. Terah nih Ur khua in Kanaan ram kal dingah athawhpi hna nain Kanaan phan loin Haran khua tuah um hmun an khuar. Nikhat cu Bawipa nih Abram cu a thawh i, "Na ram le na rualchan le na pa inn kha chuahtak hna law kan hmuhsak laimi ram ah kal tuah. Tefa tampi kan pek lai i miphun nganpi ah an cang lai. Nangmah cu thluachuah kan pek lai i na min kan thanter lai, cucaah na min cu thluachuah peknak ah an hman lai tiah ati. Abram cu kum (75) a si tikah, Bawipa nih a chimh bantuk khan, Haran khua cun aa thawh; Lot kha a sinah a kal ve. Kanaan ram an phanh tikah Bawipa nih Abram cu achawnh i hi ram hi na tefa ka pek hna lai kan ti mi ram cu asi tiah ati. Pathain nih hin Abram he an i ton poah ah thluachuah kan pek lai ti mi hi anawlh lengmang i a va ton lengmang. Abram le Lot cu Pathian nih thluachuah apek hna i an rum ngaingai cang. Satil tampi le sui le ngun tampi an ngei hna. Nikhat cu an satil cawngtu hna kha an i sik lengmang ruangah le an umnak ram nih satil atlum ti hna lo caah Abram le Lot cu ram an i then i lot nih cun ram tthatnak Jordan nelrawm cu a ningpi in ai thim. Ram an i then hnuah Bawipa nih Abram cu achawnh i Na umnak hmun khan, nichuah nitlak chaklei thlanglei vialte cuan tuah hna; na hmuhmi ram vialte kha nangmah le na tefa cu kan pek hna lai i a zungzal in nan ta a si lai.Tefa tampi kan pek lai i an tam tuk ah hin leidip cu ahohmanh nih an rel khawh hna lo bantuk khi an si lai tiah ati.

            Nikhat cu Abram nih langhnak ahmuh i Bawipa nih Abram na thin phanghlah, keimah cu phaw bantuk in an huhphenhtu ka si tiah ati. "Na laksawng cu a nganpi asi lai" tiah ati sihmanhsehlaw A bram nih Bawipa kei cu fa na ka pe lo i zei tindah laskawng nganpi cu na ka pek khawh lai, ka rocotu cu kan salpa Eliezer hi pei asi ko lai cu tiah ati. Bawipa nih a van leh tthanmi cu na rocotu cu nangmah chungchuak fapa hrimhrim asi lai tiah ati. Bawipa nih cun lengah a chuahpi i, "Van khi zoh law na rel khawh ahcun arfi khi rel tuah hna. Na tefa cu khi arfi zat khi an si lai," a ti. Cucaah cun nihin i zumtu poahpoah hi Khrih thawng in Abram tefa kan si nak le Pathian biakamnak ahungtlingnak cu asi. Abram nih Bawipa cu a zumh i cu a zumhnak cu Bawipa nih a dinnak ah a cohlanpiak. Hi ram hi nangmah pek awkah Khaldi ram Ur khua in chuah an fialtu cu Bawipa hi ka si tiah ati sihmanhsehlaw Abram nih athawh ve i ka ta asi ti cu zei tin dah ka hngalh khawh lai tiah aleh. Cun Bawipa nih athawh i Saram in raithawinak ka pe tuah tiah ati i afial bang cun Abram nih cu atuah dih i Pathian cu Saruak kam cun ahngah. Ni tlak  cuahmah tikah Abram cu aa hngilh i  a cungah tihnak nganpi atlung. Bawipa nih cun athawh i na tefa hna cu ramdang (Egypt) ram ah sal an va si lai i kum (400) chung hremnak an ing lai. Asinain a hremtu miphun cu Keimah nih dan ka tat hna lai i Na tefa hna cu chan (4) hnuah an rak kir tthan lai, cu ram in an chuah tikah chawva tampi he ka chuahter hna lai tiah ati. An um laimi ram, Miphun hna hi dantat awktlak taktak an si hnu lawngah ka thawl hna lai tiah ati. Mah vialte a hung tlinnak cu Moses le Jeshua chan ah hin Pathian biakam cu ahung tling.

            Sarai nih Abram cu athawh i kei cu Bawipa nih fa ngeih a ka  sianh lo caah ka salnu Hagar hi ihpi law fa a kan ngeih piak ko hnga dah khawh tiah ati. Sarai nih ati bang cu Abram nih atuah i Hagar nih cun fapa Ishmael a hrinpiak. Sihmanhsehlaw Pathian nih Rocotu cu nangmah fa hrimhrim in asi lai tiah atimi biakam ning kha arak si loh. Cucaah cun Minung khuakhan ning le Pathian tinh ning hi arak i dang peng ko. Abram kum (86) asiah Ishmael a ngeih i kum (99) asi ah Bawipa cu a sinah alang i keimah cu Lianngan Bik Pathian ka si. Na nun chung vialte cu ka nawl ngai law soi awk zei hmanh um lo in um, Nangmah he "Biakamnak" ka ser lai i tefa tampi kan pek lai tiah ati. Hi biakamnak hi nangmah cu kan pek, nangmah cu miphun hringsortu na si lai i na min cu Abraham na si cang lai, zeicahtiah Miphun tampi hringsortu ah kan ser cang tiah ati. Tefa tampi kan pek lai i Siangpahrang zong an um lai, an tam tuk lai caah miphun phun ah an i chuah lai tiah ati. Ka biakamnak cu zungzal hmunmi caah nangmah le na tefa hna sinah ka fehter lai i nangmah na Pathian le na tefa hna Pathian ka si lai tiah ati.Cun Pathian nih Abaraham cu athawh i nangmah zong nih Keimah he kan biakamnak hi na zulh ve hrimhrim lai. Cucu nangmah le na tefa vialte pa poahpoah nih nan cuarpar nan i tan dih lai tiah ati. Cuarpar tan nih hin Pathian le Abaraham karlakah biakamnak aum kha alanghter i cu nih cun zungzal hmunmi biakamnak asi kha nan cungah hmelchunhnak in alanghter tiah ati. Cu ve bang cun na nupi Sarai cu Sarah tiin thleng asi ve cang. Zeicahtiah thluachuahnak ka pek lai i fapa pakhat an hrinpiak lai i miphun hna nu asi lai tiah ati. Abraham nih cun kan tar tuk cang i nau kan ngei kho ti lai lo tiin a lungchung in aruah caah ka  fapa Ishmael hi tha tein ka zohkhenh piak ko tiah anawl. Sihmanhsehlaw Pathian nih cun na palh, na nupi Sarah nih fapa an hrinpiak lai i a min ah Isak na sak lai tiah ati. Amah le a tefa hna sinah hin ka biakamnak cu ka fehter lai tiah ati. Cuticun Pathian nih ati bang cun a kumvoi ah Sarah nih cun Isak cu ahrin piak taktak. Sarah nih cun aa thawh i, "Pathian nih lawmhnak le nihnak a ka pek. Cu kong a theimi paoh nih an ka nihpi lai," a ti. Isak cu atthang i a nu nih a hnuk athlai ni ah puai nganpi Abraham nih atuah piak.

            Nikhat cu Isak le Ishmael kha lente an i celh kha Sarah nih ahmuh tikah hi salnu le fapa hi tthawl hna, Zeicatiah ka fapa Isak nih a co hnga dingmi na chawva vialte hi, hi salnu fapa nih a tinco ve  awk hrimhrim  lo asi tiah ati. Mah bia cu Abaraham nih atheih tikah a lungre athei ngaingai. Aruang cu Ishmael zong cu a fapa thiamthiam asi ve caah asi. Sihmanhsehlaw Bawipa nih Abaraham cu thazang a van pek i mah nufa hna kongah hin lungre thei in um hlah. Sarah nih an chimh ning in tuah ko, zeicahtiah tefa kan kamhmi cu Isak chung hin achuak lai tiah ati. Cun Ishmael zong tefa tampi thluachuahnak ka pek ve ko lai, na fapa pei asi ve cu tiah Pathian nih ati. Pathian nih afial bang cun Hahar le Ishmael cu Abraham nih a kalter hna i Pathian nih an nih zong cu aphilh hna lo i a umpi ve hna i thuachuahnak zong tampi apek ve hna.

            Pathian nih Abaraham kha a hneksak i Na fapa, fapa pakhat lawngte na ngeihmi Isak na dawtmi kha i lak law Moriah ram ah va kal. Cuka ah cun kan hmuhsak laimi tlang cungah khangh thawinak ah na khangh lai," tiah ati. A thaizing ah Bawpia nih afialnak hmun lei kal cu a sinum pahnih hna le Isak he cun an i thawh. Nithumnak ni ah ahmun cu lam hlapi khin ahei hmuh, cu tikah a sinum pawl kha hi ka ah hin rak um ulaw khika ah hngakchiapa le keimah lawng nih Pathian cu kan va biak lai i kan dih in nan sin ah kan rak kir te lai tiah ati hna. Cu ti cun a dawtmi a fapa cu khangh thawinak thing kha a phurhter i a mah nih nam le mei kha aput hna. Isak nih cun ka pa mei le thing cu aum nain tufa ta khua zei ah dah aum tiah ahal. Abaraham nih cun ka fa Bawipa nih a khan te ko lai tiah aleh. Pathian nih a chimnak hmun aphanh tikah Isak cu a pa nih atem i biaktheng cungah achiah. Cun ka thah lai tiah nam a vun i lak ah khin Bawipa vancungmi nih a run auh i "Ngakchiapa kha fahnak zeihmanh pe hlah, a cungah zeihmanh zong tuah fawn hlah. Fapa pakhat lawngte na ngeihmi hmanh pek sian loin na ka um lo caah Pathian nawl ngaih cu na duh ngaingai ti kha ka hngalh," tiah a ti. Abraham cu khua a hei hoi i tuukawng pakhat burbuk lak i a ki in a rak taan ko kha a hmuh. A hei fuh i a va lak i a fapa can ah khanghthawinak ah cun a thawi. Cucaah cun cu tlang cu Abaraham nih Bawipa tlang cungah cun Bawipa nih akhan ko tiin amin asak. Abaraham sinah cung avoi (2)nak van cungmi cu arak lang tthan i keimah nih keimah min hrimhrim in biakamnak ka ser lai, fapa pakhat te hmanh pek sian loin na um lo caah thluachuahnak tampi kan pek lai i na tefa hna cu van arfi zat le rili kam thetse zat an si lai. Na tefa hna nih cun an ral kha an tei hna lai tiah ati. Hi vialte thuachuah hi nangmah nih ka nawl na ngaih caah pek na si tiah ati.

            Cu ticun Pathian thluachuah an rel cuahmah lio ah cun a dawt cukmak mi anupi Sarah nih mual aliam tak. Sarah hi kum (127) anung. Sarah vuinak caah cun Abaraham nih Makpelah lungkua kha acawk i cu ka hmun ah cun a vui. Mah hnu ah Nupi dang Keturah a tthit tthan i fa tampi a ngeih piak tthan. Sihmanhsehlaw Pathian biakamnak cu Pakhat sin lawngah asi i Isak sin lawnglawng hin a si. Cu ve bang cun Fapa Jesuh Khrih thawng lawnglawng in mikip nih khamhnak kan hmuh lainak le biakamnak atlinter kho tu taktak asinak hmelchunhnak cu alanghter. Abaraham hi kum (175) tiang anung ve i a nupi Sarah sin ah a fapa Isak le Ishmael nih an vui. Abram cu Kanaan ram ah hin mipem sinak in a thih tiang a vak lengmang ko nain alung adong hrimhrim lo, Pathian nih bia akamhmi nih cun alawmhter i a chuahkehnak ram ah kir loin a fapa Isak zong a salpa sinah na kirter hrimhrim lai lo i amah caah cun ka rualchan nu na tthitpiak hrimhrim lai tiah biakamnak a tuahter. Bawipa nih sunparnak co ko seh!

Note: Genesis 11:10 in Genesis 25:10 tiang chirhchan lak in ttialmi asi. Bawipa nih sunparnak co ko seh. Kan thiam ruangah le kan theih ruangah si loin Pathian he kan i pehtlaihnak ah bawmchantu le thazang ka laknak ah ka hman ve nak asi caah asi.