Abaraham cu
Pathian kawh auhnak in Haran khua in a chuah tikah Lot zong ai kalpi ve. Kanaan
ram an phanh tikah Pathian nih thluachuah apek hna i an rum ngaingai, Satil
tampi le sui le ngun tampi an ngei hna. Nikhat cu an satil cawngtu hna kha an i
sik lengmang ruangah le an umnak ram nih an satil atlum ti hna lo caah Abraham
le Lot cu ram an i then i lot nih cun ram tthatnak Jordan nelrawm cu a ningpi
in ai thim. Lot cu Abaraham he ram an i then hnu ah Sodom khua ah cun khua asa
i Pathian nih thluachuahnak zong tampi apek. Voikhat cu Lot umnak Sodom cu ral
nih an rak tuk hna i an tei hna caah Lot le a innchungkhar zong cu Siangpahrang
pali hna nih an kalpi hna kha Abraham cu an chim i minung (318) he an va dawi
hna. Pathian sinah akal hlan ah thlacamnak te he a kal i Bawipa nih a umpi caah
an va tei hna i Lot te innchungkhar zong cu an khua teah akirpi than hna. Ral
teinak in atlungpah ah Salem Siangpahrang Melkhizedek, Cung Nung Bik Pathian
tlangbawi zong a simi nih khan Abraham cu changreu le mitsur zu a rak phorh i
thluachuah a pek. Na ral an teitertu Cung Nung Bik Pathian cu thangṭhat si ko seh
a ti. Cun Abram nih hranchaw a lakmi vialte cheuhra cheukhat a pek ve. Sodom
Siangpahrang zong cu a ral ateipiak caah aa lawm tuk ve i na lakmi thliri poah
hi ilak dih, ka minung dah ti lo cu tiah ati sihmanhsehlaw Abraham nih ka
Pathian sinah chiatserh tein bia ka kam cucaah cun zei hmanh ka la lai lo i
nangmah zong nih keimah thawng in a rum na ti kho ve lai lo tiah ati.
Bawipa cu
Abraham sinah Mamre i thingzarh hna lakah khan a lang. Abaraham cu khua a cuanh
lio ah khan mipa pathum an dir ko kha ahmuh hna i a va don hna. A khuk aa bik i
Bawipa ka inn ah tang ta loin kei na salpa hi ka lanhtak sawh hlah tiah anawl.
Cu ti cun Abaraham inn ah cun an i din i ti le rawl thawthaw zong a timhtuah
piak hna. Alengtu hna nih cun Sarah nih hmaikum atu tikah fapa angeih piak lai
nak kong zong kha an chimh hna. Sihmanhsehlaw Sarah nih atheih tik ah nuphung
hmanh ka hngal ti lo i asi kho bal lai lo tiah anih achuak. Bawipa nih cun
Abaraham cu athawh i zei ruangah dah Sarah nih a nih i hi tluk i ka tar hnuah
hin fa cu ka ngei kho ngai hnga maw? ati tiah ati. Bawipa caah hin zei thil
poah hi ahar tuk mi aum maw? kumvoi atu tikah nan sinah ka rak than lai i Sarah
nih fapa angeih lai tiah ati. Ati bang cun fapa Isak cu angeih taktak. A tefa
hna cu a ngan i a ṭhawngmi miphun ah an cang lai i vawlei cung miphun vialte hna
nih hin Abraham thluachuahnak ka pekmi bantuk kha kan pe ve tiah an ka hal lai.
A hmaanmi le a dingmi thil tuah hi ka nawlbia zulh a si ti kha a fale le a hnu
i a ra laimi a tefa hna kha a cawnpiaknak hna hnga, amah cu ka thim cang. Cun
bia kaa kammi vialte kha ka tuahpiak lai," tiah a ti.
Abraham sin in
Bawipa a kal lai ah khan thil ka tuah dingmi hi Abaraham chim loin ka um kho lo
tiah ati. Bawipa nih Abaraham cu athawh i Sodom le Gomorrah hi an thang achia
ngaingai ko i an sualnak cu a ngan ngaingai ko tiah ati. Cucaah cun Abaraham
sinah cun Bawipa cu atang i Vanmi pa (2) tu cu Sodom le Gomorrah khua zoh ah
cun an lan. An sualnak cu angan ngaingai caah le Pathian duh lo ning in nu le
pa sualnak, pa le pa sualnak te hna, nu le nu sualnak te hna an tuah caah
Bawipa nih hrawh ding in bia akhiah cang. Bawipa nih ahrawh lai ti kha Abraham
nih atheih tikah Bawipa a sual lomi cu asualmi
hna sinah cun na hrawh chih ko hna lai maw? asual lomi minung (50) um
hna sehlaw na hrawk lai maw? Sawm (50) khamh awk ah cun khua cu na zuah hnga lo
maw? tiah ahal. Bawipa nih cun a thawh i minung (50) ading mi an um ah cun khua
cu aningpi in ka zuah ko lai tiah aleh. Abraham nih cun ai thawh tthan i kei cu
leidip le vutcam si ko hmanh ning law, Bawipa nangmah cu ngamh ngaiin kan
chawnh hi ka ngaithiam ko. Minung (45), (40), (30), (20) le (10) lawng hi asual
lomi um hna sehlaw teh khua cu na hrawk lai maw? tiah ati i Bawipa nih cun
asual lomi minung (10) tiang hmanh an um ah cun ka hrawk lai lo tiah lungsau
tein Abaraham thlacamnak cu aleh. Sihmanhsehlaw Sodom le Gomorrah khua ah hin
adingmi minung (10) hmanh an rak um lo i Pathian nih Noah chan i Buanchucho in
vawlei ahrawh bantuk khan Sodom le Gomorrah cu zei hmanh tang loin mei in
ahrawh dih cikcek.
Zaanlei sangah
vancung mi pa (2) cu Sodom khua an va luh tikah Lot nih arak hmuh hna, a tho
zau i an hmai ah cun a kun i ka bawipa le hna, kan inn rak ka tlung ulaw ka inn
ah riak ko u tiah a nawl hna. Sihmanhsehlaw vanmi hna nih cun kan riak lai lo
an ti nain a nawl lengmang hna i Lot inn ah cun cu zaan cu an riak. Khua cu
ahung tlai diahmah tikah Sodom khuami Pa tar in Mino tiang nih cun Lot inn cu
an rak kulh i Lot na khual tlung hna pa (2) kha rak chuahpi hna law kan sualpi
hna lai tiah an au. Lot nih cun a thaw hna i zei kan ti hnga mah bantuk sualnak
cu tuah sawh hlah uh, pa a hngal rih lomi fanu pa (2) ka ngei i mah hna cu kan pek hna lai. Nan duh
poah in rak ihpi ko hna uh, an nih tu cu ka khualtlung an si i ka huhphenh hna
awk bak ka rian asi tiah a leh hna. Abaramham le Lot nun kan zoh tikah hin
Pathian an duh lawng si loin khuatlung dawt in thluachuah tampi an rak i ham.
Sodom le Gomorrah khua hi kan zoh tikah atu vawlei pi hi kan hluan chin
lengmang ko. Baibal atling cuahmah mi cu nu le nu sualnak le pa le pa sualnak
hi a karh tuk cang i an duh tuk cang. Lot a fanu le sualpi hngak khan vancungmi
pa (2) sualpi kha an duh deuh caah an inn boah kha an zalh. Cu tikah Vancungmi
hna nih cun Lot cu inn chungah an van hnuh i inn leng i a ummi mitha lo vialte
kha an mit an cawtter hna.
Vancungmi pa
(2) nih khan hika ah hin fanu, fapa dang le khua chung i na mi asi mi poahpoah
kha chuahpi hna, zeicahtiah hi khua hi asualnak Bawipa sin a phan cang i hrawh
awk ah aruah cang tiah an ti. Lot nih hin rualchan le mi zong a ngei bak ve hna
lo i a fanu le va ding tu kha a va chimh hna nain an rak zum lo. Khua cu ahung
dei tikah vancungmi nih cun i hnawh tuah, nai hnawh loah cun khua rawh tikah na
thi sual lai tiah an ti. Asinain Lot cu aa nuainai i sihmanhsehlaw Bawipa nih a
zangfah hna caah vancungmi hna nih cun khua lengah an chuahpi hna. Nan nunnak
hnga tlang ah khin tli ulaw hnu lei ah i mer hlah u, nan i mer ah cun nan thi
lai tiah an ti ta hna. Lot nih cun ai thawh i Bawipa kan nunnak na kan khamh hi
na kan zangfah caah cun asi ko, cucaah cun tlang cu kan caah ahlat tuk kan
phanh manh hlah ah rawhnak nih a kan phanh ko lai. Cucaah cun Zoar khua ah kan
kalter ko tiah a nawl. Bawipa nih cun atha ko va kal ko, khi khua cu ka hrawk
lai lo tiah a leh. Ni a chuah ah khin Zoar khua cu an phanh tikah Bawipa nih
kat mei in a surter i Sodom le Gomorrah khuami, nelrawn le zeizong vialte cu
pakhat hmanh tang loin a hrawh dih cikcek. Sihmanhsehlaw Bawipa nih an zam lai ah
hnu lei nan i mer ah cun nan thi lai timi kha Lot nupi nih a ngaih lo caah a
hnu lei ai mer i cite kungah a cang. Pathian nawl ngaih hi nunnak le damnak,
luatnak asi bang in ngaih ve loah cun thinak arak si ko.
Cu ti cun Lot
le a fanu le pa hnih he cun Zoar khua i um kha an ngamh lo caah tlang ah an i
thawn i lungkua chungah khua an sa. A hlan chan ah hin Pa le phun maw? phun
tlau lai le fa ngeih lo in um hi an rak tih tuk. Cucaah cun Lot a fanu le pahnih
zong nih khan ka pa atar cang caah le vawlei cung minung an um ti lo caah an ti
i Lot cu fa an ngeihpiak. Cucaah cun Pathian nih Lot cu a philh ve lo i Lot i a
tefa kan van hmuh khawh mi cu Moab miphun le Ammon miphun hna hi asi. Moah le
Ammon miphun hna Hringsortu cu Lot hi a si. Bawipa nih kan dihlak caah
thluachuahnak kan pek piak ko seh.
Note: Genesis 13:1 in Genesis 19:38 tiang chirhchan lak in tialmi
asi. Kan thiam ruang le kan tling caah si loin Bawipa that ruangah le Thlarau
in nun kan i cawmnak cio ah si hram ko seh. Nan rel tikah Chambaunak kawl loin
Pathian bia asi caah Pathian zoh buin thazang rak la cio hram uh tiah kan nawl
hna. Bawipa nih tlhuachuahnak in pe ko hna seh.
Comments
Post a Comment