Nitin Baibal Relnak

2 CHANRELNAK 17:3

A pa nih a hlan deuh i a rak zulhmi lam kha a zulh caah Bawipa cu Jehoshafat sinah a um; amah nih Baal kha a kawl hna lo,

2 CHANRELNAK 17:4

sihmanhsehlaw a pa Pathian kha a kawl i Israel mi nih an zulhmi lam si loin a nawlbia kha a zulh.

2 CHANRELNAK 17:6

Bawipa lam leiah cun a lung kha a ral a ṭha i cuhleiah Judah ram chungin khuahrum bo hna le Asherim hna kha a ṭhial hna.

2 CHANRELNAK 17:7

A bawi kum thumnak ah a bawi Benhail, Obadiah, Zekhariah, Nethanel le Mikaiah kha Judah ram chung khua hna ah cawnpiaktu ah a thlah hna;

2 CHANRELNAK 17:9

Cun Judah ram chungah khan Bawipa phungbia cauk kha an i put i an cawnpiak hna; Judah ram chung khua vialte kha an ṭol i mi kha an cawnpiak hna.

2 CHANRELNAK 17:10

Cun Judah ram pawngkam i a ummi ram vialte cungah khan Bawipa ṭihnak kha a tlung i Jehoshafat kha an do lo.

2 CHANRELNAK 18:4

Cun Jehoshafat nih Israel siangpahrang cu, "Bawipa bia cu dothlat hmasa rih tuah hen," tiah a ti.

2 CHANRELNAK 18:5

Cu tikah Israel siangpahrang nih profet kha hmunkhat ah a pumh hna, za li an si, annih cu a thawh hna i, "Ramoth-gilead cu tuk awkah kan kal hnga maw, asiloah, kan i sum lai dah?" tiah a ti. Cun annih nih, "Hung kal ko, zeitintiah Bawipa nih siangpahrang kut chungah a pek," an ti.

2 CHANRELNAK 18:6

Sihmanhsehlaw Jehoshafat nih, "Hika ah hin kan hal khawh ding Bawipa profet a dang pakhat tal an um ti lo maw?" tiah a ti.

2 CHANRELNAK 18:8

Cun Israel siangpahrang nih bawi pakhat a auh i, "Imlah fapa Mikaiah kha khulrang in ratpi tuah," tiah a ti.

2 CHANRELNAK 18:13

Sihmanhsehlaw Mikaiah nih, "Bawipa a nun bangin, Bawipa nih ka sin i a chimmi cu, mah cucu ka chim ko lai," tiah a ti.

2 CHANRELNAK 18:16

Cun anih nih a thawh i, "Israel mi vialte cu khaltu a ngei lomi tuu bantukin tlang cung i an i ṭhek dih kha ka hmuh; cun Bawipa nih, 'Hi hna hi bawi an ngei lo, anmah le an inn cio ah dai tein kir hna seh,' a ti," tiah a ti.

2 CHANRELNAK 18:18

Cun Mikaiah nih cun, "Cucaah Bawipa bia cu thei tuah: Bawipa cu a bawi ṭhutdan cungah a ṭhut i vancung ralkapbu vialte a orhlei le a kehlei ah an dir kha ka hmuh;

2 CHANRELNAK 18:19

cun Bawipa nih a thawh i, 'Israel siangpahrang Ahab cu Ramoth-gilead ah hung kal i khika ah a thih naklai ahodah a lem lai?' tiah a ti. Cun pakhat nih thil pakhat a chim i a dang pakhat nih thil dang pakhat a chim ve.

2 CHANRELNAK 18:20

Cun thlarau pakhat cu a hung chuak i Bawipa hmaiah cun a dir i, 'Keimah nih ka lem lai,' tiah a ti. Cun Bawipa nih, 'Zei in dah na lem lai?' tiah a ti.

2 CHANRELNAK 18:21

Cun anih nih, 'Ka va kal lai i a profet vialte hna kaa chungah nal thlarau ka va si lai,' tiah a ti. Cun anih nih, 'Na va lem hrimhrim lai i na va lem khawh taktak lai; va kal law cu bangin va tuah,' tiah a ti.

2 CHANRELNAK 18:33

Sihmanhsehlaw pakhatpa nih tinh setsai loin a li cu a koih sawhsawh i Israel siangpahrang cu a thir ngaphaw angki le a ṭangphaw karlak ah a khen; cucaah a rangleng a mawngtu cu, "I mer law hi i tuknak chung hin ka chuahpi tuah, zeicahtiah an ka hliam ai," tiah a ti.

2 CHANRELNAK 18:34

Cun cu ni cu an i tuknak kha a fak ngaingai i Israel siangpahrang cu Siria mi hna lei hoih in a rangleng chungah khan zanlei tiang doh chom in a um; cun nitlak ah a thi.

2 CHANRELNAK 18:31

Cun rangleng ralbawi hna nih khan Jehoshafat kha an hmuh tikah, "Amah hi Israel siangpahrang cu a si ko," tiah an ti. Cucaah amah tuk awkah khan an i mer; cun Jehoshafat cu a au i Bawipa nih a bawmh.

2 CHANRELNAK 18:32

Rangleng ralbawi hna nih khan amah cu Israel siangpahrang a si lo ti kha an hmuh tikah amah dawinak khan an i mer ṭhan caah Pathian nih a sinin kaa dang leiah a hnuh hna.

2 CHANRELNAK 19:1

Judah siangpahrang Jehoshafat cu Jerusalem i a inn ah him tein a tlung ṭhan.

2 CHANRELNAK 19:4

Jehoshafat cu Jerusalem ah khua a sa; cun Beersheba in Efraim tlangram tiang mi hna sinah khan a kal i an pupa hna Pathian, Bawipa sinah khan a ratpi ṭhan hna.

2 CHANRELNAK 20:1

Hi hnuah hin Moab mi hna le Ammon mi hna cu Meunim mi a cheukhat hna he Jehoshafat tuk awkah an i thawh.

2 CHANRELNAK 20:3

Khi tikah Jehoshafat cu a thin a phang i Bawipa kawl awk kha aa tim i Judah ram chung vialte ah khan rawl ulhnak a thanh.

2 CHANRELNAK 20:5

Cun Judah ram mi le Jerusalem mi aa pummi hna chungah cun; Jehoshafat cu Bawipa inn chungah, tual thar hmaiah khan a dir i,

2 CHANRELNAK 20:9

'Kan cungah ṭhat lonak, vainam maw, biaceihnak maw, rai maw, mangṭam maw a tlun ahcun, hi inn hmaiah le nangmah hmaiah hin kan dir lai, zeicahtiah na min cu hi inn chungah hin a um i kannih nih kan harnak chungin nangmah cu kan in auh lai i nang nih na kan theihpiak lai i na kan khamh lai,' tiah an ti.

2 CHANRELNAK 20:15

Cun anih nih a thawh i, "Judah mi vialte le Jerusalem mi hna le Siangpahrang Jehoshafat hna, thei tuah u: Bawipa nih hi bangin nan sinah, 'Hi mibu nganpi ruangah nan thinphang in nan lung dong hlah u; zeicahtiah hi raldohnak cu nanmah ta a si lo, Pathian i a si.

2 CHANRELNAK 20:17

Hi i tuknak chungah hin nannih nih nan tuk a hau lai lo; nan um hmun kha i tlaih u law dai tein dir ko u law nanmah ca i Bawipa nih teinak an tuahpiakmi hna kha zoh ko u, maw Judah le Jerusalem hna,' a ti. Nan thinphang hlah u, nan lungdong hlah u; thaizing ah chuahhnawh hna u law Bawipa cu nan sinah a um lai," tiah a ti.

2 CHANRELNAK 20:22

Cun annih nih hlasak le thangṭhat kha an thawk tikah Bawipa nih Ammon, Moab le Seir Tlang mi, Judah tuk awk i a rami hna kha lamhruang a ahter hna i cucaah an sung dih.

2 CHANRELNAK 20:23

Zeitintiah Ammon mi le Moab mi hna nih khan Seir Tlang mi kha an tuk hna i an hloh cikcek hna, cun Seir i a ummi hna cu an thah dih hna hnuah anmah le anmah cu an i nawng dih.

2 CHANRELNAK 20:24

Judah mi cu ramlak i ralvennak innsang kha an phak tikah, mibupi cu an hei zoh hna i zohhmanh, annih cu an thi i vawlei ah khan an ril liangluang ko; pakhat hmanh an luat lo.

2 CHANRELNAK 20:25

Cun Jehoshafat le a mi hna kha hranchaw lak awkah an rat tikah saṭil tampi, thilri, hnipuan man sungmi thilri, an hmuh hna i an i phorh khawh ti lo tiangin an i lak hna. Hranchaw laknak ah cun ni thum tiang an rau, a tam hringhran ko. 

2 CHANRELNAK 21:4

Jehoram cu a pa bawi ṭhutdan cung i a kai i a feh tikah, a unau vialte cu vainam in a thah hna i Judah ram bawi a cheukhat zong kha a thah hna.

2 CHANRELNAK 21:12

Cun a sinah profet Elijah sinin ca pakhat a ra i, "Hi bangin, Bawipa, na pa David i a Pathian nih, 'Na pa Jehoshafat lam kha na zulh hna lo i Judah siangpahrang Asa lam zong kha na zulh hna lo i,

2 CHANRELNAK 21:13

sihmanhsehlaw Israel siangpahrang hna lam kha na zulh hna i Ahab innchungkhar nih Israel mi an pialter hna bang khan nangmah nih Judah ram mi hna le Jerusalem mi hna kha na pialter hna i nangmah nakin a ṭha deuhmi na unau hna, na pa innchungkhar mi a simi hna kha na thah hna caah,

2 CHANRELNAK 21:14

zohhmanh, na mi hna le na fale hna le na nupi hna le na ngeihmi vialte cungah Bawipa nih rai nganpi a tlunter lai i

2 CHANRELNAK 21:15

nangmah cu paw fah zawtnak a fakmi na ngei lai i ni khat hnu ni khat in na ril cu cu zawtnak ruangah cun a chuak lai,' a ti," tiah a ti.

2 CHANRELNAK 21:16

Cun Ethiopia mi hna pawng i a ummi Filistin mi hna le Arab mi hna thinhunnak cu Jehoram cungah khan Bawipa nih a thawhter i

2 CHANRELNAK 21:17

Judah cu an hunhnawh i an chim i siangpahrang inn chung thil a si tiah an hmuhmi vialte le a fapa hna le a nupi hna zong kha an kalpi dih hna i a fapa hniang bik Jehoahaz dah ti lo kha cu fapa pakhat hmanh an nganh ta lo.

2 CHANRELNAK 21:18

Cun mah hi thil vialte dih hin Bawipa nih a paw ah a dam kho lomi zawtnak a tlunter.

2 CHANRELNAK 21:19

Cun kum hnih hnuah cu zawtnak ruangah cun a ril cu an chuak i nganfak ngaingai in a thi. A mi hna nih, a pupa hna ca i rak tuahmi meiphu bantuk kha an tuah lo.