Maw Bawipa ka nunnak hi ka lu in ka ke tiang, ka sining ka ruah lengmang i nitin tein ka tonmi thilkip le ka ngeihmi na thluachuah kip ka ruah tikah hin nangmah dah ti lo nih cun a ka lawmhter khomi le hnangamnak tling tein a ka pe kho zungzal mi hi zeihmanh an umlo. Maw Bawipa ka nun nih nangmah cu an hlam i ti hal in an haal, vawlei ro nih ti a duh bantukin ka thlarau nih Bawipa an duh. Bawipa nangmah lawng ka thlarau tihal diriamhtertu le nunnak ti pe khotu cu na si. Ka zangfah law na lawmhnak le na daihnak ka hrawmh ve ko, na lawmhnak cu ka lakkanh hlah. Nikhat hnu nikhat in na daihnak le hnangamnak cu ka tehter law kaa lawmhnak hi kan nun chung vialte Nangmah umpinak le Nangmah hrimhrim ah si ko seh.
Maw Bawipa nangmah tel loin kan nun hi a car i zeitikhmanh ah ti a hmuballomi leiro lak i a kheumi thinkung bantuk a si. Ka hnah cu a uai i ka kung an re, thei ka tlailo i duh ka nunnak zeihmanh an um lo. Nikhat hnu nikhat ka nun nih na sin in ka hmuhmi na lawmhnak le daihnak kha a hlam i na umpinak in a luangmi hnangamnak le Dawtnak cu ka thlarau le ka thinlung nih a hlam zungzal. Maw Bawipa ka nun nih nangmah cu an hlam i tihal in an haal, vawlei ro nih ti a duh bantukin ka thlarau nih Bawipa an duh.
Maw Bawipa ka nunnak le ka thinlung nih nangmah an hlam zungzal. Ka thlarau rawl a ṭam i ka thlarau tihal nih ka dang tiang a carter hna. Ka rawlṭam damnak le ka tihal diriamhnak cu ka kawl lengmang nain ka hmu lo. Aw zeizong vialte cu nangmang sin in a rami an si kha na ka hngalter! Ka zangfah law nangmah umpinak in a luangmi lawmhnak cu ka pe zungzal ko. Maw Bawipa ka nun nih nangmah cu an hlam i tihal in an haal, vawlei ro nih ti a duh bantukin ka thlarau nih Bawipa an duh.
Maw Bawipa nangmah telloin cun ka nun hi lawmhnak le daihnak, hnangamnak nih an ka kaltak i vawlei sualduhnak le Lungthin rihnak nih an ka rialdip cuahmah. Ka nun nih a phurhmi thilrit hi keimah hnak in a ngan deuh i a ka rihtuk ah ka inkhawhnak lung an dong cuahmah. Maw Bawipa na saihnam cu ka beiter law ka thilrit cu ka chang ko cang! Nang na seihnam cu lawmhnak le daihnak, hnangamnak le dawtnak hna hi an si. Maw Bawipa ka nun nih nangmah cu an hlam i tihal in an haal, vawlei ro nih ti a duh bantukin ka thlarau nih Bawipa an duh. Na Thiang Thlarau ruah cu vawlei cung mi vialte cungah sur cang sehlaw keimah le ka innchungkhar, ka miphun nih an i lawmhnak nganbik le an diriamhnak nganbik cu Nangmah umpinak in a luangmi dawtnak le lawmhnak, daihnak le hnangamnak hna hi ka thlarau le ka thinlung nunnak ti le rawl taktak an si. Maw Bawipa miphun vialte sinah Na Thlarau ruah surter ko cang. Amen!
Bawipa Nangmah umpinak loin cun ka nun a ba i ka khing a rit, ka lawmhnak an tlau i daihnak le hnangamnak in na ka hruai tawnmi cu an tlau cuahmah. Atu cu ka hngalh cang. Ka herhbikmi le ka duhbikmi cu Nangmah hrimhrim umpinak hi asi. Nangmah umpinak cu thli bantukin ka pawng na kalmi le khuaruahhar tuahkhawhnak in na ka hruaimi hnakin ka thinlung chungah dawtnak le lawmnak, daihnak le hnangamnak in na ka umpinak hi a sunglawibikmi le khuarauhhar tuahnak nganbikmi ka caah an si cang. Maw Bawipa thil tikhawhnak nih hin lawmhnak tling an phurlo i Nangmah nih kan thinlung chungah umpinak lawng nih lawmhnak tling an phurh ti ka hngalh cang. Ka thlarau le ka thinlung nih Nangmah umpinak cu a duhbikcem…
SALM 63:1
Maw Pathian, nangmah cu ka Pathian na si, nangmah cu kan ngai. Ka nunnak nih hin an hlam i ka thlarau nih tihal in an hal; vawlei ro nih ti a duh bantuk khin an duh.
Comments
Post a Comment