Nitin Baibal Relnak

SALM 41:1

Sifak zawn a ruatmi cu lunglawmmi a si, harnak chung i a um tikah Bawipa nih a bawmh lai.

SALM 41:2

Bawipa nih a huhphenh lai i a nunnak kha a zuah lai; ram chungah lunglawm in a umter lai i a ral hna kut chungah a kaltak lai lo.

SALM 41:3

A zawt tikah Bawipa nih a bawmh lai i a damter ṭhan lai.

SALM 41:4

"Nangmah cungah ka sual cang, Bawipa ; ka zaangfah law ka damter ko," ka ti.

SALM 41:10

Bawipa, ka zaangfah law damnak ka pe ṭhan ko; cun ka ral cu teirul ka cham ṭhan hna lai.

SALM 41:11

Cu tikah ka cungah na lung aa lawm ti le ka ral nih an ka tei lai lo ti kha ka hngalh lai.

SALM 42:1

Sazuk nih rial tidai a ngaih bantukin Maw Pathian nangmah cu kan ngai.

SALM 42:2

Maw a nungmi Pathian, nangmah cu tihal in kan hal; zeitik ah dah na umnak ah ka hun khawh lai i kan biak khawh lai?

SALM 42:4

Hlanlio kong kha ka ruah tikah ka lung a leng; Pathian inn i mi zapi he kan rak kal i kan kal tikah keimah i ka rak hrui hna i Pathian thangṭhat in lunglawm le thanuam in hla kan rak sak i kan rak au kha ka ruah tikah ka lung a leng hringhran.

SALM 42:5

Zeicahdah ka ngaih a chiat? Zeicahdah ka lungre a theih? Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai.

SALM 42:8

Bawipa nih a dawtnak fek cu nifa kan sinah langhter ko seh! Amah cu zan fate in hla in thangṭhat ning law ka nunnak a ka pe ṭhantu Pathian sinah cun thlacam ko ning.

SALM 42:11

Zeicahdah ka ngaih a chiat? Zeicahdah ka lungre a theih? Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai.

SALM 43:3

Na ceunak le na biatak cu run thlah hna law, ka hruai hna seh na tlang thiang Zion ah cun ka kalpi ṭhan hna seh law na umnak na biakinn ah cun ka hruai hna seh.

SALM 43:4

Cun Pathian, nangmah nih lunglawmhnak le thanuamnak na ka pek caah, na biakṭheng ah cun ka hung kal lai; ka tingtang cu kaa tum lai i nangmah thangṭhatnak cu hla in ka sa lai, Maw Pathian, ka Pathian.

SALM 43:5

Zeicahdah ka ngaih a chiat? Zeicahdah ka lungre a theih? Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai.

SALM 44:1

Maw Pathian, hlan lio pi ah na rak tuah bantukin kan pupa hna chan ah thil lianngan na tuahmi kha kan hna hrimhrim in kan theih i kan pupa hna zong nih an kan chimh:

SALM 44:2

Cu thil lianngan na tuahmi hna cu, zeitindah nangmah hrimhrim nih hi ram chung lawkihmi kha na dawi hna i an ram ah cun na mi kha nan umter hna ti le zeitindah phundang mi cu dan na tat hna i na mi tu cu na ṭhanchoter hna, ti hi a si.

SALM 44:3

Hi ram cu na mi nih an nam in an teimi a si lo, anmah ṭhawnnak in an teimi zong a si lo; nangmah lianhngannak le ṭhawnnak in a si i nangmah nih na dawt hna langhternak caah an sin i na umhnawh hnanak tu nih khan hi ram cu a tei.

SALM 44:4

Nangmah cu ka siangpahrang le ka Pathian na si; nangmah nih na mi cu teinak na pek hna.

SALM 44:6

Keimah Khamhtu dingah ka li kha kaa bochan lo i ka thal zong kaa bochan lo

SALM 44:7

sihmanhsehlaw nangmah nih kan ral hna sinin na kan khamh i a kan huatu kha na kan teipiak hna.

SALM 44:26

Tho law kan bawm tuah! A fekmi na dawtnak ruangah kan khamh tuah!

SALM 45:1

Hi hla siangpahrang ka phuah ah hin, ka lungthin cu holh dawh in a khat; ka lei cu ca ṭial thiammi cafung bantuk a si.

SALM 45:4

Biatak le biading kha hmunhter awkah na tei tiang lianhngannak in hmailei ah kal tuah. Na ṭhawnnak nih teinak ngan pipi an hmuhpiak lai.

SALM 45:6

Pathian nih an pekmi bawiṭhutdan cu zungzal in a hmun lai! Na ram cu dinnak in na uk;

SALM 45:7

a hmaanmi thil ṭha kha na duh i a ṭha lomi thil kha na huat. Cucaah cun Pathian, na Pathian nih khan a rak in thim i midang nakin tam deuh in lunglawmhnak kha an toih.

SALM 45:16

Ka siangpahrang bawipa, nangmah nih fapa tampi na ngeih hna lai i na pupa hna cu an hmun an rolh hna lai; nangmah nih vawlei dihlak uktu ah khan na ser hna lai.

SALM 45:17

Na minthannak cu ka hla nih a nunter zungzal lai i mi kip nih zungzal thluangthluan in an in thangṭhat lai.

SALM 46:1

Pathian cu kan i dornak le kan thazang a si, harnak caan ah a kan bawm zungzaltu a si.

SALM 46:2

Cucaah cun vawlei cu i hnin in tlang cu rili chungah tla hna hmanh seh law ka thin a phang lai lo;

SALM 46:4

Pathian khua, Cung Nung Bik Pathian inn thiang ah lawmhnak a ratpitu tiva pakhat a um.

SALM 46:5

Pathian cu khuapi chungah cun a um i zeihmanh nih a hrawk bal lai lo; zingka tein amah bawmh awkah a ra lai.

SALM 46:8

Ra law zohhmanh, Bawipa i a tuahmi hi; Zohhmanh zeitluk khuaruahhar thil hna dah leicung ah hin a tuah.

SALM 46:10

"Raldohnak kha ngol u" a ti hna, "Cun keimah cu Bawipa ka si hi hngal tuah u, miphun vialte hna a uktu cu ka si i, vawlei pumpi ah a ngan bikmi cu ka si," a ti.

SALM 46:11

Lianhngannak he a khatmi Bawipa cu kan sinah a um; Jakob Pathian cu kan himnak a si. Selah

SALM 47:1

Mi vialte hna, lunglawm in nan zapei beng tuah u, hla dawhdawh in Pathian cu thangṭhat u!

SALM 47:2

Cung Nung Bik Bawipa cu ṭih awk a si, amah cu a liannganmi siangpahrang vawlei cung vialte uktu a si.

SALM 47:3

Mi kip kha kan tangah a chiah hna i miphun hna uknak kha a kan pek.

SALM 47:9

Miphun dang hna an uktu bawi hna cu, Abraham Pathian mi hna bang khan hmunkhat ah an i pum. Ralkap vialte hna phaw cu Bawipa ta an si; amah nih zeizong vialte kha a uk dih.

SALM 48:8

Lianngan Bik Bawipa kan Pathian khualipi chungah, Pathian nih a tuahmi thil cu a theih in kan rak theih. asinain atu cu a hmuh in kan hmuh cang; khuapi cu him tein a zohkhenh zungzal lai.

SALM 48:14

Pathian cu a zungzal in kan Pathian a si i hmailei i a ra ding caan vialte ah a kan hruai lai, tiah nan chimh khawh hna lai.

SALM 49:7

Minung nih cun zeitikhmanh ah amah le amah aa tlan kho lo; a nunnak man kha Pathian a cham kho lo;

SALM 49:8

zeicahtiah minung nunnak man cu a sung tuk. A pek khawhmi cu

SALM 49:9

thlan chungin a luattertu le zungzal in a nuntertu ah a zaa bal lai lo.

SALM 49:10

Hihi philh hlah: mifim zong mihrut bantukin an thi ve ko lai i an chaw le an va cu an fale kha an roh ve ko hna lai.

SALM 49:15

Sihmanhsehlaw kei cu Pathian nih a ka khamh lai; thihnak ṭhawnnak chungin a ka chuah lai.

SALM 50:9

Nan lo chung nan cawtum hna le nan meheh run chung meheh hna kha ka herhmi an si lo,

SALM 50:10

zeicahtiah ramlak i a ummi saram vialte hi keimah ta an si dih i tlang thong khat cung i a tlongmi saṭil vialte khi keimah ta an si dih.

SALM 50:11

Ramlak i a ummi va vialte cu keimah ta an si i lo lak i a ummi thilnung vialte zong keimah ta an si dih.

SALM 50:12

"Ka rawl ṭam seh law kan chim hna lai lo, zeicahtiah vawlei le a cung i a ummi thil vialte cu keimah ta an si dih.

SALM 50:14

Pathian sinah lawmhnak chim cu nan raithawinak si seh law Lianngan Bik cu kan in pek lai tiah nan i kammi pekchanh awk vialte kha pechan ko u.

SALM 50:15

Harnak a phak tikah ka au u, kan khamh hna lai i nan ka thangṭhat lai," a ti.

SALM 50:23

Lawmhnak chim hi keimah upatnak thawinak cu a si, ka nawl a ngaimi cu ka khamh hrimhrim hna lai," a ti.

SALM 51:1

Pathian, a fekmi na dawtnak ruangah ka cungah zaangfahnak ngei ko; na zaangfahnak a ngan caah ka sualnak cu ka thianhpiak ko hna.

SALM 51:4

Ka sualnak cu, nangmah cungah, nangmah cung hrimhrim ah a si i a ṭhalo ah na ruahmi kha ka tuah. Cucaah cun bia na ka ceih tikah na hmaan ko i sual na ka phawt tikah na ding ko.

SALM 51:5

Sual cia in hrin ka si, ka nu nih a ka pawi ah khan, misual ka si cang.

SALM 51:6

Zumhawktlak lungthin hi na duhmi a si, ka lung chung hi na fimnak in khahter ko.

SALM 51:7

Ka sualnak cu ka hnawhpiak law ka thiang lai, ka ṭawl law hawhra nakin ka rang deuh lai.

SALM 51:10

Maw Pathian, ka chungah hin lungthin thar ka serpiak law a thar le zumhtlak a simi ruahnak ka chungah chia ko.

SALM 51:12

Na khamhnak chungin a chuakmi lawmhnak kha ka pe ṭhan law ka lungthin cu nangmah nawl zulh duhmi ah ser ko.

SALM 51:16

Raithawinak hi na duhmi an si lo, rak si hna seh law cu ka rak in pek ko hnga; na lawmhmi cu khangh thawinak zong hi a si lo.

SALM 51:17

Ka raithawinak cu toidornak lungthin hi a si, maw Pathian, toidornak lungthin le nawl ngaimi lungthin hi na hlaw lai lo.