Skip to main content

Nitin Baibal relnak

ISAIAH 34:16
Thilnung kong ṭialnak Bawipa cauk chungah khan kawl tuah u law zeidah a chim ti kha rel tuah u. Hi thilnung vialte hna hi pakhat hmanh a baumi an um lai lo i pakhat hmanh keptu ngei lo zong an um lai lo. Cu bantukin si seh tiah Bawipa nih a ti i amah hrimhrim nih hmunkhat ah cun a umter hna lai.
ISAIAH 34:17
Ram a phawtu hna cu Bawipa a si i amah nih an covo cio kha a pek hna lai. Ram chungah cun chan khat hnu chan khat an um lai i anmah ta a si zungzal cang lai.
ISAIAH 35:1
Ramlak le ramcar hna cu an i lawm lai i Thetse ram cu a par lai.
ISAIAH 35:2
Thetse ram cu hla a sa lai i lawmhnak in a au lai; Lebanon Tlang bantukin aa dawh lai i Karmel Tlang le Sharon nelrawn lo bantukin a ṭha lai. Mi kip nih Bawipa sunparnak le kan Pathian a lianhngannak le a ṭhawnnak kha an mit in an hmuh lai.
ISAIAH 35:3
A tha a bami cu an kut ṭhawnter hna u law a khuk a thermi cu thazang pe hna u
ISAIAH 35:4
A lung a dongmi cu, "Na thinphang hlah, lungṭhawng in um ko! Pathian cu nangmah chanh awkah a ra lai, na ral kha na phu a hlam hna lai," ti hna u.
ISAIAH 35:5
Mitcaw nih khua an hmuh lai i hnachet nih khua an theih lai.
ISAIAH 35:6
Kebei cu an pet an lam lai i a holh kho lomi kha lunglawmhnak in a au in an au lai. Thetse ram chungah khan tiva a luang lai;
ISAIAH 35:7
a kangh in a kangmi thetse kha tidil ah an i cang lai i hmun car kha cerh an khat lai. Ram-ui an rak um tawnnak hmun ah khan cerh ram le phaikung an kho lai.
ISAIAH 35:8
Cuka ah cun lam nganpi pakhat a um lai i a min ah "Thiannak Lam" ti a si lai. Hi lam cu misual mi nih an zul lai lo i hi lam a zulmi cu mihrut nih an pialter kho hna lai lo.
ISAIAH 35:9
Chiandeih zeihmanh an um lai lo, saram ṭihnung zeihmanh an i chawk lai lo. Bawipa nih a luattermi hna cu hi lam hin inn ah an tlung lai.
ISAIAH 35:10
Jerusalem cu lunglawm tein an phan lai i hla an i sak pah lai i lawmhnak in an au lai. Zungzal in an i lawm lai i ngaihchiatnak le lung retheihnak an ing ti lai lo.

ISAIAH 36:5
A thawh hna i, "Bia nih hin ralkap lei ṭhawnnak le thiamnak hi a tei khawh tiah dahra nan zumh? Keimah doh hi aho nih khin dah a kan bawmh ngam hnga tiah nan ruah?
ISAIAH 36:7
Cun a bia cu a vun peh i, "Asiloah, 'Bawipa kan Pathian pei kan i bochan,' nan ti hnga maw? Cu nan Pathian cu, Hezekiah nih a biakṭheng vialte a hrawhpiak dih i Judah ram mi le Jerusalem khuami hna cu, biakṭheng pakhat lawngah Pathian nan bia cang lai, tiah a timi hna kha a si ṭung.
ISAIAH 36:10
Nan ram ka ra doh i ka ra hrawh hi Bawipa bawmhnak tel loin a si tiin dahra nan ruah? Bawipa hrimhrim nih pei nan ram doh le hrawh hi a ka fial cu," a ti.
ISAIAH 36:15
Bawipa kha i bochan u, tiah an lem hnanak kha i zumh hlah u, Bawipa nih a kan khamh lai i Assiria mi kha kan khualipi hi a lakter hna lai lo, tiah i ruah sual hlah u.
ISAIAH 36:18
Bawipa nih a kan khamh lai, ti in Hezekiah kha i hlenter hlah u. Ram dang pathian hna nih tah an ram cu Assiria siangpahrang kut cun an khamh kho hna maw?
ISAIAH 36:20
Hi ram pathian vialte hna nih hin an ram cu zeitik tal ah dah kan bawipa kut chungin an khamh khawh? Cu ti a si ko ṭung ahcun, zei nih dah, Bawipa nih Jerusalem khua cu a khamh lai, tiah an ruahter hna?" a ti.
ISAIAH 37:1
Siangpahrang Hezekiah nih an chimhmi bia kha a theih cangka, a ngaihchiatnak langhternak ah a puan kha a thleh i buri puan kha aa aih i Bawipa Biakinn ah a kal.
ISAIAH 37:3
Hi bia hi Isaiah nan va chimh lai, a timi hna cu a si: "Nihin hi temhinnak ni a si; dantatnak kan in ni a si i hmaichia in kan um ni a si. Zei he dah kan i lawh tiah a fa a chuak dengmang cang na i chuahternak thazang a ngei lomi nu bantuk kan si.
ISAIAH 37:6
hitihin a leh: "Bawipa nih, 'Assiria mi nih an ka serhsat ruangah na zei hmanh rak poi hlah! an ti.

Labels:

Comments

Post a Comment

Popular posts from this blog

ISRAEL MI HNA NIH MOSES LE PATHIAN AN LAWMHTER HNA LO

        Israel miphun hna cu Izipt ram in an chuah hnu kumhnih le thlahnihnak, nikhatnak ni ah Bawipa nih Moses cu Sinai ramlak ah a chawnh i milu a relter than. Bawipa fial bangin an rel hna i sing ruk, thong thum, za nga le sawm nga an si. Mah hnu ni (20) hnu ah puan Biakinn cung Minmei cu aa tthial tikah Israel pawl zong an i thawh ve i Paran ramlak ah khan an kal. Cun Bawipa minmei cu, an riahhmun in an i thawh fate chun ah annih cungah a um i kuang cu aa thawh fate Moses nih, "Tho tuah, maw Bawipa, na ral kha i ṭ hek dih hna seh law, nangmah an huatu hna cu na hmaiah zaam hna seh," tiah a ti. Cun aa dinh tikah, "Ra kir tuah, maw Bawipa, Israel mi a thong a sang hna sinah hin," tiah a ti.             Israel mi hna cu Bawipa theih ah an sifah retheih an innak ruangah an zai hawi tthan i Bawipa thinhunnak cu a alh i riahhmun kiang i aummi riahbuk a cheukhat cu a kangh hna. Cu tikah Moses nih thla a campi...
Post a Comment
Read more

Sazuk nih rial tidai a ngaih bang in ka nun nih Bawipa an ngai

Sazuk nih rialtidai a ngaih bangin kei ka nun zong nih Bawipa an ngai. Minung hi Pathian he kan i peh hnuah cun Bawipa he nunti le umtti hi a nuamh theih tuk asi, kan ti a hal tuk caan i ti kan din i kan di ariam bantukin Thlarau in Bawipa he hawi komhnak kan ngeih caan le Thlarau in kan khah caan i Bawipa kan thangtthat tikah sazuk bangin Thlarau nun in kan di ariam taktak ve. Minung hi sualnak he kan i tthen kho tawn lo i sualnak kan tuah tikah le Thlarau rawl ei loin le lungthin takin thla cam loin caan sau kan um tikah kan nun a hul i Thlarau ti le rawl ka hal tuk tawn. Pathian nih a kan hlat si loin kanmah tu nih kan hlat a rak si. Kan nun a hul deuhdeuh i kan dar a car deudeuh tikah cun a celh in kan celh lo lio caan theng teah Nunnak ti asimi Thlarau ti le rawl lei panh in sual phuannak kan neih tikah Bawipa nih thangthat lawmhnak a kan pek tthan i sazuk nih rialti dai a din i a di riamh bangin Thlarau ti le rawl in kan di a rian ve tawn. A taktak le ngaingai tiah cun a zungzal...
Post a Comment
Read more

Pathian nih Abram auhnak le Thluachuah peknak

             Vawlei cung mi vialte hi Noah fapa le hna nih hrinthlak mi lawngte kan si. Noah fapa pathum lak ah hin upa bik Shem hin thluahchuahnak le Pathian nih thim khunmi asi nak alang. Adam nih fapa angeihmi ah Seth hlan ah Kain aum ko nain fa upa rocotu ah Seth hi Pathian nih athim bantuk in Noah fale zongah hin Upabik Shem hi ahlei in thluachuah pek dingah athim ve. Chim duhmi cu Seth cii ruang chung in Noah a chuak i Shem chung hin Abram te pawl zong an chuak ve. Pathian nih Noah le fapa hna cu thluachuahnak apek hna i fa tampi an ngei, vawlei ah cun an karh chin lengmang. Buanchukcho in kum hnih hnuah Shem nih fapa angeih, Shem a fapa hi kum 403 anung. Cu ti cun an fapa le upa bik changchang cun an van izul i Shem in Peleg chan, chan 5 nak ah hin cun kum 209 lawng an nung cang. Cu cu Pathian nih minung hi kum 120 cung nung ka sianh ti hna lo ati mi kha a van tling cuahmah. Shem in Abram pa Terah tiang hi chan (10) arau i Terah cu kum 205 a ...
Post a Comment
Read more