Nitin Baibal Relnak

ISAIAH 38:1

Cu caan lio hrawngah cun Siangpahrang Hezekiah kha a zaw i a thi dengmang. Profet Isaiah Amoz fapa kha amah zoh ah cun a va kal i, "Bawipa nih, 'zeizong vialte kha ningcang tein chia dih seh, zeicahtiah a dam ṭhan ti lai lo,' a ti. Cucaah cun thih awkah i tim ko," tiah a va ti.

ISAIAH 38:2

Hezekiah cu vampang leiah khan aa mer i thla a cam.

ISAIAH 38:3

"Bawipa, na rian zumhawktlakte le lungthin tak tein ka ṭuan kha philh hlah. Cun tuah seh ti na ka duhmi tuah kaa zuam zungzal zong kha philh hlah," tiah a ti i lunghno ngaiin a ṭap.

ISAIAH 38:4

Cun Bawipa nih Isaiah cu,

ISAIAH 38:5

Hezekiah sinah khan va kal law, "Na pu David i a Pathian Bawipa keimah nih na thlacamnak kha ka theih i na mitthli kha ka hmuh, kum hleinga kan nunter rih lai.

ISAIAH 38:6

Nangmah le hi khua Jerusalem khua hi Assiria siangpahrang kut chungin kan khamh hna lai i hi khua hi ka huhphenh lai," a ti, tiah va chim tiah a fial.

ISAIAH 38:7

Isaiah nih cun a leh i, "Bawipa nih a biakamnak cu a tuah lai ti hngalhnak caah hmelchunhnak pakhat an pek lai.

ISAIAH 38:9

Hezekiah cu a zawtnak khan a dam ṭhan i hi thangṭhatnak hla hi a phuah:

ISAIAH 38:11

Minung mi hna vawlei cungah hin, Bawipa si seh, a nungmi si hna seh, ka hmu ti rua hna lai lo, ka rak ti.

ISAIAH 38:16

Bawipa, nangmah ca lawnglawng ah ka nung ko lai; ka damter law, ka nunter ko.

ISAIAH 38:17

Ka chungvanghnak cu daihnak ah a cang lai. Nangmah nih ka nunnak cu ṭihnung chungin na khamh, ka sualnak vialte kha na ka ngaihthiam.

ISAIAH 38:19

Atu i keimah nih kan thangṭhat bantukin nangmah an thangṭhatmi cu minung hi an si. Zeitluk in dah zumhawktlak na si kha pale nih an fale kha an chimh hna.

ISAIAH 39:3

Khi tikah profet Isaiah cu Siangpahrang Hezekiah sinah khan a va kal i, "Hi mi hna hi khuazei in dah an rat i zeidah an in chimh?" tiah a va hal. Hezekiah nih cun, "Ram hlapi, Babilon ram in an ra," tiah a leh.

ISAIAH 39:5

Cu tikah Isaiah nih siangpahrang cu a thawh i "Ralkapbu Bawipa nih,

ISAIAH 39:6

'Na siangpahrang inn chung i a ummi thil a dihlak, na pupa hna nih nihin tiangin an rak khonmi kha, Babilon ram i kalpi an si dih lai caan kha a phan lai,' a ti. A tangmi zeihmanh a um lai lo.

ISAIAH 39:7

Nangmah na tefa hrimhrim kha a cheu an kalpi hna lai i Babilon siangpahrang inn i rianṭuantu ah an til an dit hna lai," tiah a ti.

ISAIAH 40:2

"Jerusalem khuami cu lunglawmhnak pe hna u law, 'Cu caan an in cu a za cang i atu cu an sualnak kha ka ngaihthiam cang hna,' a ti tiah chim hna u. An sualnak ruangah a za in dan ka tat cang hna," a ti.

ISAIAH 40:4

Horkuang vialte cu chilh an si lai i tlang vialte cu chimh an si lai. Tlang cu hmun rawn ah an cang lai i a bingbomi hmun cu rawn didiai in an um lai.

ISAIAH 40:5

Cun Bawipa sunparnak cu a lang lai i mi vialte nih an hmuh lai. Hi biakamnak cu Bawipa hrimhrim nih a tuahmi a si," a ti.

ISAIAH 40:6

Aw pakhat nih, "Thanh tuah," tiah a ti. Kei nih, "Zeidah ka thanh lai?" tiah ka leh. "Minung vialte hi ram bantuk men an si, ramlak pangpar nakin an chan a sau hlei lo.

ISAIAH 40:7

Bawipa nih thli a chemter hna tikah ram cu an car i pangpar cu an uai. Minung hi ram bantuk men cu an si taktak ko.

ISAIAH 40:8

Asi, ram cu a car i pangpar cu a uai, sihmanhsehlaw kan Pathian bia cu zungzal in a hmun.

ISAIAH 40:10

Bawipa nih ṭhawnnak in a uk hna lai i a khamhmi kha aa ratpi hna lai..

ISAIAH 40:11

A tuurun kha tuukhal nih an tuu an zohkhenh hna bangin a zohkhenh hna lai; tuufa tete kha a pumh hna lai i a kut in a cawi hna lai; an nule kha nem tein a hruai hna lai.

ISAIAH 40:21

Nan hngal rih lo maw? Nan thei rih lo maw? Hlan piin an rak in chim cang hna lo maw? Vawlei cu zeitindah hram aa thawk ti kha nan thei bal lo maw?

ISAIAH 40:22

Vawlei leng le van pin i a bawiṭhutdan cung i a ṭhumi nih khin vawlei cu a ser; a cung i a ummi hna cu khaubawk bantuk men an si. Van cu puanzar bantukin a zam i mi umnak thlam bantukin a samh.

ISAIAH 40:27

Israel, a si kun ahcun, zeicahdah Bawipa nih ka harnak hi a hngal lo i ka caah hin thil a rem in a chia lo, tiah na zai?

ISAIAH 40:29

A dermi le a bami kha thazang a pek hna.

ISAIAH 40:30

A nomi hmanh kha an tha a der tawn i tlangval hmanh kha an tha a ba kho.

ISAIAH 40:31

Sihmanhsehlaw Bawipa aa bochanmi cu thazang thar an la. Mupi bangin an zuang lai; an tlik tikah an baa lai lo, an kal tik zongah an tha a di lai lo.

ISAIAH 41:4

Hi thil a umtertu hi ahodah a si? Tuanbia kalning hi hi bantukin si seh tiah aho nih dah a rak ti? Bawipa cu a hramthawknak i a rak ummi kha ka si i Bawipa cu a donghnak i a um laimi zong ka si.

ISAIAH 41:8

"Sihmanhsehlaw Israel ka sal, nang cu keimah nih kan thimmi miphun na si i ka hawi Abraham tefa na si.

ISAIAH 41:9

Vanhramdeng khin kan ratpi; vawlei cung a hlatnak bik hmun in kan kawh i, 'Nang cu ka sal na si,' kan ti. Kan hlaw lo, a thim in kan thim lehlam.

ISAIAH 41:10

Na thin phang hlah — na sinah ka um ko, Keimah cu na Pathian ka si — zeihmanh ṭih hlah. Kan ṭhawnter lai i kan bawmh lai; kan huhphenh lai i kan khamh lai.

ISAIAH 41:13

Keimah cu Bawipa nan Pathian ka si i ṭhawnnak kan pek hna; 'Nan thinphang hlah u, kan bawmh hna lai,' tiah keimah nih ka ti," a ti.

ISAIAH 41:14

Bawipa nih aa thawh i, "Israel, na hmete ko i na der ngai ko nain na thinphang hlah. Kan bawmh lai. Keimah Israel Pathian thiang hi nangmah an khamhtu cu ka si.

ISAIAH 41:17

"Ka mi hna cu tihal in ti an kawl i an dang a car tikah, Bawipa nih an thlacamnak cu ka leh hna lai; Israel Pathian nih ka hlaw bal hna lai lo.

ISAIAH 41:18

Tlang car ah tiva ka luanter hna lai i nelrawn ah cerhti ka putter hna lai. Thetse ram kha tidil ah ka ser hna lai i ramcar kha a luangmi cerh ah ka ser hna lai.

ISAIAH 41:19

Thetse ram ah khan sidar thing le anri thing le lenhmui le oliv kha ka khohter hna lai. Ramcar ah tupi an um lai, far thing tupi le saipres thing tupi le thal thing tupi an um lai.

ISAIAH 41:20

Mi nih khan cucu an hmuh lai i Bawipa nih ka tuahmi a si kha an hngalh lai. Cu thil a umtertu cu Israel Pathian thiang ka si kha an hngalh lai," a ti.

ISAIAH 42:1

Bawipa nih aa thawh i, "Hi ka sal hi ka dawmhtlaihmi ka sal a si — ka thim i a cung i ka lung a tlingmi a si. Amah cu ka ṭhawnnak in ka khahter i miphun vialte cungah dinnak a tlunter lai.

ISAIAH 42:3

A derthawmmi cungah khan nem tein a um lai i bawmtu a ngei lomi kha a zaangfah hna lai. A hmunmi dinnak kha mi vialte cungah a tlunter lai.

ISAIAH 42:6

"Vawlei cungah hin dinnak a len nakhnga, Bawipa nih nangmah cu kan kawh i ṭhawnnak kan pek. Nangmah thawng in miphun kip he biakamnak ka ser lai i nangmah thawngin miphun kip sinah ceunak ka tlunter lai.

ISAIAH 42:7

Mitcaw cu an mit na auter hna lai i a muimi thonginn chungah a ṭhumi cu na luatter hna lai.

ISAIAH 42:16

A mit a cawmi ka mi cu, an kal bal lonak lam khan ka kalpi hna lai. Muihnak cu ceunak ah ka canterpiak hna lai i an hmai i lam bingbo cu lam mil ah ka ser hna lai. Hi thil hi tlolh lo tein ka tuah hrimhrim hna lai.

ISAIAH 42:21

Bawipa cu mi khamh a duhmi Pathian a si, cucaah a cawnpiaknak kha upat hna seh, ti a duh.

ISAIAH 42:24

Aho nih dah Israel cu thil chuttu hna kut chungah khan a chanh? Bawipa hrimhrim kha a si, a cung i sualnak kan tuahmi Bawipa kha a si. Cuticun nung hna seh a kan tining in kan nung duh lo, a kan cawnpiakmi zong kha ka ngai lo.

ISAIAH 43:1

Israel, nangmah an sertu Bawipa nih hitihin a ti: "Na thinphang hlah, kan huhphenh lai. Nangmah cu na min in kan auh, keimah ta na si.

ISAIAH 43:2

Ti thuk na tan tikah na sinah ka um lai, harnak na inmi nih an tei lai lo. Mei alh na tan tikah an kangh lai lo, harnak na inmi nih an hliam lai lo.

ISAIAH 43:3

Zeicahtiah keimah cu Bawipa na Pathian ka si, nangmah an khamhtu Israel Pathian thiang cu ka si. Nangmah luatternak ding caah Izipt cu ka hlawt lai i Ethiopia le Seba zong ka hlawt ko hna lai.

ISAIAH 43:4

Na nunnak khamh awkah miphun pipi zong kha ka hlawt ko hna lai, zeicahtiah nangmah cu ka caah a sungmi na si i upatnak kan pek i kan dawtmi na si.

ISAIAH 43:5

Na thinphang hlah — na sinah ka um ko. A hlatmi nichuahlei ram le a hlat bik nitlaklei ram in, na mi cu inn ah ka tlunpi hna lai.

ISAIAH 43:7

Annih cu keimah mi an si i keimah sunparnak petu dingah ka sermi an si," a ti.

ISAIAH 43:10

"Israel mi hna, ka tehte cu nanmah hi nan si, tiah Bawipa nih a ti; ka sal si awkah ka thimmi cu nanmah hi nan si, cucaah cun nan ka hngalh i nan ka zumh awk a si, keimah lawnglawng hi Pathian cu ka si ti kha nan hngalh awk a si. Keimah hleiah pathian dang zeihmanh an um lo, an rak um bal lo i hmailei zongah an um bal lai lo.

ISAIAH 43:11

Keimah lawnglawng hi Bawipa cu ka si, keimah lawnglawng hi nanmah an khamh khotu hna cu ka si.

ISAIAH 43:14

Nanmah an khamhtu hna Bawipa, Israel Pathian thiang nih aa thawh i, "Nanmah khamh awkah Babilon cu ralkapbu pakhat ka tukter lai; khuapi kulhnak kutka kha ka chimh hna lai i mi an au khuannak kha ṭahnak ah a cang lai.

ISAIAH 43:18

Sihmanhsehlaw Bawipa nih cun, "A um ciami mi thil kha i tlaih peng hlah u, hlanpi i a rak um cangmi lawng kha tuak peng hlah u.

ISAIAH 43:19

Thil thar ka tuah ding tu kha i ngiat u. Cucu atu ah hin a um lio cang, a hmuh hmanh nan hmuh khawh ko lai. Ramcar chungin lam pakhat ka kalter lai i cuka ah cun tiva luang kan pek hna lai.

ISAIAH 43:20

Ka thimmi ka mi hna ti pek awk caah ramcar chung i tiva ka luanter hna tikah cun, ramlak saram hmanh nih khan an ka upat lai, ram-ui le ostrik va hmanh nih khan an ka upat lai.

ISAIAH 43:21

Ka thimmi ka mi hna cu keimah ca i kaa sermi an si — anmah nih ka thangṭhatnak hla cu an sak hna lai," a ti.

ISAIAH 43:22

Bawipa nih, "Asinain, Israel mi hna, nan biakmi cu keimah ka si lo; kei nih cun kan nor cang hna.

ISAIAH 43:23

Khangh thawinak caah nan hmanmi tuu cu keimah nan ka pe lo; raithawinak nan tuah tikah nan upatmi cu keimah ka si lo. Laksawng ka pe u tiah thilrit kan khinh hna lo zihmui ka pe u ti zongah kan ti fawn hna lo.

ISAIAH 43:25

"Asinain nan sualnak an hnawhpiaktu hna cu keimah ka si, keimah cu keimah ka si ruangah hi bantukin ka tuah cu a si; nan sualnak cu kan cinkenpiak hna lai lo.

ISAIAH 44:2

Nanmah an sertu hna cu Bawipa ka si, nan nunnak a hram a thawknak khan keimah nih kan bawmh hna. Nan thinphang hlah u; nanmah cu ka sal nan si, ka dawtmi ka mithim nan si.

ISAIAH 44:3

"Ti a halmi ram kha ti ka pek lai i thetse ram ah khan tiva ka luanter hna lai. Nan tefa cu ka lianhngannak ka toih hna lai i nan ciruang cu ka thluachuahnak ka toih hna lai.

ISAIAH 44:4

Ti ṭha tein toihmi ram le tiva kam i a khomi inhliam kung bantukin an hninghno lai.

ISAIAH 44:5

"Midang zong nih, pakhat hnu pakhat in, 'Kei cu Bawipa mi ka si,' an ti lai i Israel mi chungah khan an i fon lai. An ban ah khan Bawipa min hmelchunhnak kha an ser lai i 'Kei cu Bawipa mi ka si ve,' an ti lai," a ti.

ISAIAH 44:22

Nan sualnak cu khuadawm bantukin ka chem dih cang. Ka sinah ra kir u, nanmah an khamhtu hna cu keimah ka si," a ti.

ISAIAH 44:28

Sairas cu ka thawh i, 'Keimah aiawh in uktu a si ding cu nangmah na si; tuah seh ti kan duhmi kha na tuah lai: Jerusalem cu sa ṭhan u tiah nawl na pek hna lai i Biakinn cu a hram ser u, tiah na ti hna lai,' ka ti," tiah a ti.