KA SINING TAKTAK KAA HMUH TIKAH PATHIAN HMAI KAN KHAP TAWN LO!

Minung hi sualci in hrim kan si i nihinni tiang hrimhrim zong hi sualnak cu kan chungah riantuan ai tim lengmang ko. Ka lungthin dihlakin Bawipa hi ka thangthat lengmang ve ko ka ti nain ka nun hi ka zoh lengmang tikah ka minung hawi sin hmanh ah zumhtlak in ka nun khawh hrim rihlomi hi ka hmuh tikah ka Pathian hmai ka khaap lo i ka ngeih achia tawn. Zei ruang kan ti asiah cun ka sualnak vialte thenhpiaktu le a ka Khamhtu nih hin tlanh le Khamh ka si cu keimah duhning le ruahning in nung lengmang ding si loin Amah duhning tuin nung ding caah Khamh ka rak si. Hiti ka ti tikah hin ka tuahsernak kaa bochan asi lo i ka sining te tuin tehte ka khan khi asi. Ka unau hawi sin hmanh ah zumhtlak asi ve rihlomi nih cun zeitindah ka Patthian caah cun zumhtlak cu ka va si ve hnga? Minung hi dawtu taktak kan ngei cio i ngeihchiat, lawmh kan ton caan le kan herhmi poah a kan bawmtu hna nih bawmh an herh ve tik le bawmh an kan hal tikah bawmh lo kha a duh in kan duh loin ka si khawh leng hmanh in bawmh kha kan i zuam tawn! Bawmh lo dingin kanruah sual hmanh ah an hmai kan khap hrimhrim hna lo. Chimduhmi cu Jesuh Khrih nih tlanh le Khamh asi cangmi keimah zong hi mahtlukin a thuk a sangmi a dawtnak hi ruat loin ka taksa duhnak deuh in ka kal tawn le ka nun tawn ka hmuh tikah ka Pathian a hmai ka khaap tawn lo i ka celh tawn lo. Sihmanhsehlaw ka hngalh cuahmah ko bu le a hmai ka khap loh ka ti cuahmah ko bu zongah hin nichiar tein zumhtlak ka si lonak hi kaa hmu lengmang ko. Minung hmanh pei a ka dawtu mithmai kan zoh tawn tiah, Pathian hmai cu ka zoh chinchin dingmi pei asi cu!

        Zeicaah tiah Khamh ka si i Thawngttha phurtu ka si hi kaa lawng siloin nunnak le nunziatu he Thawngtha chim fial ka rak si. Amen! Nunnak in Thawngtha chim cu biakinn i pulpit cung lawngah si loin nichiar te hi Jesuh Khrih nun i ken zungzal le a nunzia i nunchin lengmang hi asi i cu lawngah Mikip nih Bawipa dawtnak taktak cu kanmah nun zoh in an hmuh khawh lai. Amen! Culawng siloin ka chungah Bawipa nih a chiah ning bak in Thawngtha zong hi ka chim ding asi. Ataktak le ngaingai tiah cun Pathian fa asi cangmi keimah hi a ka theimi zong nih a ka thei ve rih lo mi hna zong nih biakinn chung i ka um ah siseh leng i ka um ah siseh nitin tein ka lamhmi vawlei ah zeibantuk nun in dah ka nun i zei muisam dah ka cuan hi an thleidan khawh awk in ka nun dingtu khi asi. Cucu Jesuh Khrih nih a kan tlanh hnawhmi nunning cu asi i Amah lo chin lengmang ding le a nunzia in nun chin lengmang ding ka si hi ka nun nih a philh tawn i ka philh lo hmanh ah ka tuah kho hrim tawn lo. Sinain mah vialte Nunnak in Thawngtha chim khawhnak le zumh awktlakmi sinak cu Jesuh Khrih Thlarau tthawnnak thawng lawng in ngeih khawh asi. Amen! Maw Bawipa na Thlarau huham tthawnnak in ka dirpi chin ko mu. Amen!

        Ka nunnak ah aum tukmi Baibal Bia cu hihi asi: Jesuh Khrih le zultu hna zong nih damh khawh lomi khuachia nih tuahmi hngakchiapa i a pa kong hi an si. Ngahchia pa i a pa nih Jesuh Khrih a hmuh tikah a bawk i Na ka bawmh khawh ahcun ka fapa hi damter ko tiah a nawl. Jesuh Khrih nih a lehmi cu zumhnak na ngeih ah cun zeithil poah hi asi kho ko tiah a leh. Mizaw pa i a pa nih Bawipa ka zumh ko nain a za lo, ka bawm ko law tiah a nawl. Zumhnak in thla kan cammi a kan lehlonak cu kan zumh taktak lo caah asi (or) kan halmi hnak ttha deuh in Bawipa nih timhpiakmi a kan ngeih caah lehlo kan si. Nihin zumtu kan dihlak hin satan nih sualnak tthawnnak in kan kehleng phelh dingin le Thlarau in thei tampi kan tlai khawh lonak dingah le zumh awktlak in kan nun khawh lonak dingah, zumh ngamnak ngei kho loin kan lung aw ttawmter ding in rian a tuan zungzal ve. Hihi kan hngalh tikah kanmah sinak in heh tiah kan doh lengmang tawn ve ko nain kan i harh ngaingai tawn. Kanmah tthawnnak si ti loin Jesuh Min zumhnak tu he doh cang hna usih. Jesuh Khrih Min zumhnak ah hin tthawnnak le nunnak a um i kannih cu a Thlarau in umpi zungzal mi kan si hleiah Amah chungah a nungmi le a ummi kan si ve. Amen! 

          Zumhnak ka ngei kan timi hi kanmah sin tiang lawng maw asi, Jesuh Khrih sin tiang a phanmi zumhnak dah asi ti hi biapi bikmi cu asi. A kan Khamtu caah zumhtlakmi kan si khawhnak dingah Jesuh Khrih tthawnnak lila hi kan herh i cu tthawnnak kan ngeih khawhnak dingah cun kan zumhnak hi Bawipa sin a phanmi zumhnak si ko seh. Amen! Cucaah cun nunnak in Thawngtha chim le Jesuh Khrih caah zumhtlak tein nun rak i tim ve cang. Amen! Na zumh ning tein zumh awktlak ah an ser khotu Jesuh Khrih nih na lungthin a dih um ek in in thleng ko seh. Bawipa Thlarau nih in pemhter ko seh. Amen! Bawipa zeizong vialte na tuah khawh ko ti hi “Ka zumh ko, sihmanhsehlaw ka zumh khawh taktak lo mi cungah ka bawm ko”. Ka zumhnak lengin na tthawnnak in na ka dirkamh zungzal caah kan thangtthat. Amen! Mah thawngtha a relmi vialte Bawipa Thawnnak cu nan chungah riantuan ve ko seh. Amen!

MARKA 9:23

Jesuh nih, “Na kan bawmh khawh ahcun na ti maw? Asi, zumhnak a ngeimi caah cun zei paoh a si kho ko,” tiah a ti.  

MARKA 9:24

Cun a pa cu a au i, “Ka zumh ko, sihmanhsehlaw a za lo, ka bawm tuah!” tiah a ti.