EZEKIEL 1:1
Kum sawm thum kum, thla linak thla, ni nga ni ah cun, saltangmi hna sinah Khebar tiva pawngah khan ka um i van kha aa hung i Pathian langhnak kha ka hmuh hna.
EZEKIEL 1:3
Khaldi mi hna ram i Khebar tiva pawngah khan Buzi fapa tlangbawi Ezekiel sinah khan Bawipa bia cu a phan; cun khika ah Bawipa kut cu a cungah khan a um.
EZEKIEL 1:28
Ruahpi a sur ni ah khuadawm lak i chuncha a chuah bantuk khin a velchum i a ceumi cu a um. Bawipa sunparnak a muisam cu cu bantuk cu a si. Cucu ka hmuh tikah ka bawk i aw pakhat ka theih.
EZEKIEL 2:1
Cun a ka thawh i, "Mipa, dir tuah, bia kan ruah lai," tiah a ti.
EZEKIEL 2:2
Bia a chim lioah cun ka chungah thlarau kha a lut i ka ke in a ka dirter i bia a chimmi cu ka ngaih.
EZEKIEL 2:3
A ka thawh i, "Mipa, nangmah cu Israel mi hna sinah khan kan thlah lai, annih cu ralthawh hmang miphun, keimah a ka doh tawnmi miphun an si.
EZEKIEL 2:5
Cun annih cu na thawh hna i, "Mah hihi Bawipa Pathian bia a si," na ti hna tikah, annih cu mi doh hmang an si caah annih nih cun an ngai duh theng hnga maw, an ngaih duh ah siseh, an ngaih duh lo ah siseh, an lakah profet pakhat an ngeih kha an hngalh lai.
EZEKIEL 2:6
Sihmanhsehlaw mipa, annih cu ṭih hna hlah, an chimmi bia zong kha ṭih hlah, nangmah dohtu le miṭhalo si ko hna hmanh seh law ṭih hna hlah, tlangngaikuang cung i a ṭhumi bantuk si hmanh law, ṭih hna hlah. Ral thawh hmangmi si ko hna hmanh seh law an chimmi siseh, an muisam siseh, ṭih awk zeihmanh a um lo.
EZEKIEL 2:7
Annih cu ral thawh hmangmi an si ko caah hin an ngaih duh zongah an ngaih duh lo zongah ka bia cu na chimh ko hna lai.
EZEKIEL 2:8
Sihmanhsehlaw mipa, nang tu cu ka bia hi ngai law anmah bantukin ral thawh duhmi si ve hlah. Na kaa kha ang law kan pekmi hi ei tuah," tiah a ti.
EZEKIEL 2:10
Cun kut pakhat cu keimah leiah a hun i samh kha ka hmuh i cu kut nih cun cazual pakhat aa put. Ka hmaiah cun cazual cu a samh i a kap hnih in aa ṭial dih, mithi ngaihnak hla le ṭahnak hla le ngaihchiatnak bia in aa ṭial dih.
EZEKIEL 3:1
Cun a ka thawh i, "Mipa, na hmai i a ummi kha ei tuah, hi cazual hi ei tuah; cun va kal law Israel mi kha bia va chim hna," tiah a ti.
EZEKIEL 3:2
Cucaah ka kaa cu ka an i ei awkah cazual cu a ka pek.
EZEKIEL 3:3
Cun aa thawh i, "Mipa, kan pekmi ca zual hi dolh law khim tein um tuah," tiah a ti. Cucaah ka ei i khuaihliti bantukin a thlum.
EZEKIEL 3:4
A ka thawh i, "Mipa, Israel mi sinah va kal law chimh ka duhmi hna kha va chim hna.
EZEKIEL 3:5
An holh a hrang i a harmi hna sinah thlah na si lo, Israel mi sinah thlah na si ko.
EZEKIEL 3:6
Miphun ngan pipi, an holh a hraan tuk ca le a har tuk ca i an chimmi zei a si tiah a sullam na hngalh khawh lomi hna sinah kan thlah lo. Annih sin tu ah khan rak in thlah ning law cu, annih nih cun na bia kha an rak ngaih ko hnga.
EZEKIEL 3:8
Sihmanhsehlaw nangmah cu anmah he aa tluk ah kan ser lai. Ningzah an hngalh lo tluk le an lung a khon tlukin nang zong kan hahter ve lai i kan khonter ve lai.
EZEKIEL 3:9
Na cal cu ṭeklung nak hak deuh in ka ser lai. Ral thawh hmangmi si hna hmanh seh law zeitikhmanh ah ṭih hna hlah, zeitikhmanh ah na thin in phanter hna hlah seh," tiah a ka ti.
EZEKIEL 3:11
Na phunhawi sal i a tangmi hna sinah khan va kal law bia va chim hna. An ngaih duh ah siseh, an ngaih duh lo ah siseh, 'Hi hi Bawipa Pathian bia a si,' tiah va chim hna," tiah a ti.
EZEKIEL 3:14
Thlarau nih a ka cawi i a ka zuanpi i lunglawmhnak he khat in ka kal i Bawipa kut cu ka cungah ṭhawng ngaiin a um.
EZEKIEL 3:15
Cucaah saltang hna sinah cun Tel-abib ah ka phan i annih cu Khebar tiva pawngah an rak um. Ni sarih an sinah ka ṭhu i ka ar ko.
EZEKIEL 3:17
Ni sarih a donghnak ah cun Bawipa bia cu ka sinah a ra phan i, "Mipa, nangmah cu Israel mi hna vengtu ah kan ser cang. Ka bia kha an sinah na kalpi lai i annih cu ralrinnak na pek hna lai.
EZEKIEL 3:18
Miṭhalopa cungah thihnak ding bia khiahnak ka chim zong a si sual kho ko, a ziaza a ṭha lomi kha a hlawt i a nunnak kha khamh awkah ralrinnak kha na pek lo ahcun sualnak cu amah ta a si ko; a ṭhat lo ruangah a thi ko lai, sihmanhsehlaw a thihnak ruangah khan nangmah cu kan mawhchiat lai.
EZEKIEL 3:19
Sihmanhsehlaw ralrinnak na pe nain a ziaza ṭhalo kha a tuah lengmang ṭhiamṭhiam ko ahcun, a ṭhat lonak ruangah khan a thi lai i sihmanhsehlaw nangmah tu cu na luat kho lai.
EZEKIEL 3:20
Asiloah, miding mi pakhatkhat cu a pial kho ko i palhnak kha a tuah khawh ko, cucu a rilhnak a chuahtertu ka siter ko lai; nangmah nih ralrinnak na pek lo caah a thi lai. A sualnak ruangah a thi lai; dinnak a rak tuahmi kha relpiak a si lai lo i a thih ruangah khan nangmah cu kan mawhchiat lai.
EZEKIEL 3:21
Sihmanhsehlaw miding mi kha sual lo awkah ralrinnak na pek hna i sual lo in an um ahcun annih nih ralrinnak kha an hmuh caah an nunnak kha an i khamh lai i nangmah zong nih na nunnak kha naa khamh ve lai," tiah a ti.
EZEKIEL 3:22
Bawipa kut cu ka cungah a phan i a ka thawh i, "Tho tuah, nelrawn ah khin vung kal law khika ah bia kan chimh lai," tiah a ka ti.
EZEKIEL 3:24
Cun thlarau ka chungah a rung lut i a ka dirter i
EZEKIEL 3:25
"Va kal law na inn chungah inn vaa hrenhkhumh. Mipa, nangmah cu hri in khih le ṭem na si lai i mi zapi sinah na chuak kho lai lo.
EZEKIEL 3:26
Na lei cu na dang cunglei ah ka hren chih lai i bia na chim kho lai lo; annih cu ral thawh hmangmi an si ko nain, a situ ding hna cu nangmah cu na si lai lo.
EZEKIEL 3:27
Sihmanhsehlaw nangmah kha chimh awk thil ka ngeih tikah bia chim khawhnak kha kan pek ṭhan lai. Khi tikah na thawh hna lai i, 'Mah hihi Bawipa Pathian bia a si,' tiah na ti hna lai. Ngaih a duhmi nih ngai ko hna seh, a duh lomi nih duh lo ko hna seh; Zeicahtiah annih cu ral thawh hmangmi cu pei an si fam cu," a ka ti.
EZEKIEL 4:4
"Cun atu cu na kehlei hrap in it tuah, Israel mi hna ṭhat lonak cu na cungah ka chiah lai; na kehlei hrap in na ih chung caan kha an ṭhat lonak cu na in lai.
EZEKIEL 4:5
Ni khat cu an ṭhat lonak kum khat caah khan tuak in an ṭhat lonak cu kum za thum le kum sawm kua ing dingin kan khiah; cu can cu Israel mi hna ṭhat lonak cu na in lai.
EZEKIEL 4:6
Mah hi vialte hi na lim tikah na orhlei hrap in na it ṭhan lai i Judah ṭhat lonak cu ni sawm li na in lai; ni khat cu kum khat caah rel a si lai.
EZEKIEL 4:8
Sifahnak na inmi caan cu na lim hlantiang khattelei hrap in khattelei hrap ah naa mer khawh nakhnga lo, zeitindah hri in kan ṭem cu va hngal ko.
EZEKIEL 4:13
Bawipa nih hi ti hin a ti, "Hi thil hna hi Israel mi hna ramdang i ka ṭhek tik hna ah Phung i khammi rawl an ei a herh te lainak kha hngalhternak a si."
EZEKIEL 4:14
Sihmanhsehlaw kei nih kaa thawh i, "Maw Bawipa Pathian, zeitikhmanh ah kaa thurhhnawmh bal lo, amah tein a thimi maw, sa nih a sehmi maw, zeitikhmanh ah ka ei bal lo; sa thurhnawm ka kaa chungah a lut bal lo," tiah ka ti.
EZEKIEL 4:15
Cucaah minung ek can ah khan caw ek cu ka changreu rawhnak caah khan hman a ka sianh.
EZEKIEL 4:17
Pakhat le pakhat an i hmuh tikah an hnabei a dongh tiangin, an rawl le an ti cu a ṭum lai i an ṭhat lonak ruangah khan an lo ral dih lai," a ti.
EZEKIEL 5:1
Cun a ka thawh i, "Mipa, nam a har ngaingaimi, lumettu nam bantuk kha i lak law na lu le na khahmul kha i met tuah. Cun cuaithlainak kha la law ṭhen thum ah sam cu ṭhen hna.
EZEKIEL 5:2
Ral hrennak a dih tikah sam cheu thum cheu khat cu khuapi laifang ah khan khang; cun cheu thum cheu khat cu nam in sam law khuapi velchum ah cun hlonh; cun cheu thum cheu khat cu thlitu lakah khan hlonh hna law vainam zuh cia he ka zulh hna lai.
EZEKIEL 5:5
Mah hihi Bawipa Pathian bia cu an si: "Hi khua Jerusalem khua hi miphun hna lakah an laifang ah ka chiah i ramdang nih an dum,
EZEKIEL 5:7
Cucaah Bawipa Pathian nih, "Na velchum i a ummi miphun dang hna nak hmanh in i lawm lo deuh in na um i ka nawlbia bantukin um na duh lo i ka phunglam kha na zul hna lo i na pawngkam ah a ummi miphun phunglam hna hmanh kha na zulh duh hna lo caah, atu cu nangmah doh kha ka caan a si ve cang lai, tiah Bawipa Pathian nih a ti;
EZEKIEL 5:10
Cucaah maw Jerusalem, na chungah hin pale nih an fale kha an ei hna lai i fale nih an pale kha an ei hna lai; na cungah hin biakhiahnak ka tuah lai i na chung i a tangmi hna paoh cu khuazakip ah ka ṭhek dih hna lai.
EZEKIEL 5:12
Na mi cheu thum cheu khat cu na chungah rai le mangṭam in an thi lai; cheu thum cheu khat cu na pawngkam ram ah vainam in an thi lai; cun cheu thum cheu khat cu khuazakip ah ka ṭhek hna lai i phawi cia vainam he ka zulh hna lai.
EZEKIEL 6:1
Mah hihi Bawipa nih ka sin i a chimmi bia a si:
EZEKIEL 6:2
A ka thawh i, "Mipa, Israel ram tlanglei khi hei zoh law bia chimhnawh hna:
EZEKIEL 6:3
'Israel ram tlang hna, Bawipa Pathian bia hi ngai tuah u,' ti hna. Mah hihi tlang hna sin le fing hna sin le nelrawn hna sin le horkuang hna sin i ka chim duhmi bia cu an si; nan cungah vainam kha ka tlunter lai i nan khuahrumbo vialte kha ka hrawh dih hna lai.
EZEKIEL 6:7
thahmi hna kha nan pawng i an rilh liangluang tikah Bawipa ka si kha nan ka hngalh lai.
EZEKIEL 6:8
Sihmanhsehlaw annih cu an thih tikah, miphun hna lakah khan vainam thahnak in a luatmi tlawmpal cu kan zuahpiak hna lai.
EZEKIEL 6:9
Nannih cu ram dang i ṭhek nan si tikah, hi ka zuahmi hna, miphun dang hna sin i sal i a tangmi hna nih hin, an lungthin cu zeihmanh ruat loin ka sinin an i mer i an mit cu siasal duh ah a pingah an kal ruangah, zeitluk in dah ka lungthin a fah kha an hngalh lai. Khi tikah ṭhat lonak an tuahmi vialte le fihnung an tuahmi vialte ruangah khan anmah le anmah an i fih lai.
EZEKIEL 6:10
Cucaah annih nih keimah cu Bawipa ka si kha an hngalh lai i an cungah ṭhat lonak ka tlunter lai ka ti tikah khan a ṭhih in a kan ṭhih men lo, ti kha an hngalh lai," tiah a ti.
EZEKIEL 8:1
Kum ruknak kum, thla ruknak thla, ni nganak ni ah inn ah ka ṭhu i Judah upa hna kha an ka leng.
EZEKIEL 8:3
Kut bantuk a simi khi a hun samh i ka calsam in a ka tlaih. Thlarau nih van le vawlei karah a ka cawi i Pathian langhnak in Jerusalem ah a ka kalpi i chaklei hoihmi chungchin kutka luhnak ah khan a ka chiah; khika ah cun Hornak Siasal kha a um i cucu hornak lungthin thawhternak caah a si.
EZEKIEL 8:5
Bawipa nih cun a ka thawh i, "Mipa, chaklei khi zoh tuah," tiah a ka ti. A chim bang cun chaklei cu ka zoh i biakṭheng kutka chaklei ah cun, luhnak ah khan, Hornak siasal cu a um.
EZEKIEL 8:7
Cun siangpahrang inn pawl umnak luhnak ah khan a ka kalpi i kulhnak vampang ah cun awng pakhat a um kha ka hmuh.
EZEKIEL 8:8
A ka thawh i, "Mipa, awng kha khoih tuah," tiah a ka ti i
EZEKIEL 8:9
a ka ti bantukin ka khoih i mitlum ah a cang. "Vung lut law hika ah an tuahmi thil fihnung hna kha vung zoh tuah," tiah a ka ti.
EZEKIEL 8:10
Cucaah ka vung lut i khika ah a lawn in a lawnmi saram hna le fihnung a simi saram hna le rungrul cangcel hna hmanthlak hna kha ka hmuh hna; cun Israel mi siasal hna cu vampang ah khan an i suai liangluang ko.
EZEKIEL 8:12
A ka thawh i, "Israel mi upa hna nih mui lak i an tuahmi khi na hmu maw? Anmah cio nih an i suaimi milem an chiahnak ah hmunthiang cio i an tuahmi khi? Annih nih cun Bawipa nih a kan hmu lo tiah an ruah i ram hi a hlawt cang, tiah an ruah.
Comments
Post a Comment