Nitin Baibal Relnak

EZEKIEL 9:4

"Khua chungah khan vaa chawk tuah, Jerusalem khua chungah khan vaa chawk tuah, khika i thil fihnung an tuahmi ruang i a ṭapmi hna le a ngaih a chiami hna kha an cal ah hmelchunhnak va khenh hna, tiah Bawipa nih a ti," tiah a ti.

EZEKIEL 9:5

Cun a dang hna cu, "Khua chungah khan zul u law zaangfahnak um loin that hna u, ngan hna hlah u.

EZEKIEL 11:13

Bia ka chim lengmang lioah cun Benaiah fapa Pelatiah cu a thi; cun ka bawk i fak piin ka ṭap i, "Maw Bawipa Pathian, a tangmi Israel mi vialte kha an donghnak na phakter dih ko hna lai maw?" tiah ka ti.

EZEKIEL 11:15

Bawipa bia cu ka sinah a ra i, "Mipa, annih cu na unau an si, atu ah Jerusalem khua i a ummi hna nih, 'Bawipa sinin ram hlapi ah an um cang, ram cu kanmah ta si awkah pek kan si cang' tiin an timi hna Israel mi vialte hna hi an ning piin na unau le na rualchan lawngte an si dih.

EZEKIEL 11:17

Miphun dang hna chung khan ka pumh ṭhan hna lai i ka ṭhek hnanak ram chung khan ka khawmh ṭhan hna lai, cun Israel vawlei cu ka pek ṭhan hna lai.

EZEKIEL 11:18

Annih cu a chung i an luh tikah ṭhat lonak an tuahmi vialte le thil fihnung an tuahmi vialte kha an hlawt lai.

EZEKIEL 11:19

Lungthin dang ka pek hna lai i an chungah thlarau thar ka khumh lai; an pum chungin lung bantukin a hakmi lung an ngeihmi kha ka chuah lai i titsa bantukin a nemmi lung kha ka pek hna lai.

EZEKIEL 11:20

Cun ka phung kha an zulh lai i ka nawlbia kha an tuah lai. Annih cu ka mi an si lai i kei cu an Pathian ka si lai.

EZEKIEL 11:21

Sihmanhsehlaw ṭhat lonak an tuahmi le thil fihnung an tuahmi cung i a lung a chia ṭheo rihmi tu cu an tuahmi kha zeicahdah an tuah tiah ka chimter hna lai, tiah Bawipa hrimhrim nih a ti," tiah a ti.

EZEKIEL 11:24

Cun thlarau nih a ka cawi i Khaldia-ram i saltangmi hna sinah khan a ka kalpi. Hi thil vialte hi Pathian nih a run thlahmi langhnak khan a rami a si i ka hmuhmi langhnak nih cun a ka kaltak.

EZEKIEL 11:25

Bawipa nih ka sin i a phuanmi vialte cu saltangmi kha ka chimh hna.

EZEKIEL 12:1

Bawipa bia cu ka sinah a ra phan i,

EZEKIEL 12:2

"Mipa, na umnak mi hi ralthawh hmangmi an si. Mit an ngei nain khua an hmu lai lo i hna an ngei nain khua an thei lai lo, zeicahtiah mi dohhmang an si.

EZEKIEL 12:3

Cucaah mipa, an mit hmuh hrimhrim ah chun ah lam ca i na herh ding kha i tim law khualtlawn ah cun i thawh tuah. Na inn kha na kaltak i an hmuhhngan ah ral taannak chungah na kal tikah hin, annih nih mi dohhmang kan si ti kha an hei hngalh hmanh hnga maw.

EZEKIEL 12:5

Cun an hmuh hngan ah cun vampang kha pem law cu a pemnak chung cun na thilri kha kalpi hna.

EZEKIEL 12:6 

Cun khua a muih tikah, na thil cu na liang ah i khinh law an hmuh hngan ah cun chuahpi, cun vawlei kha na hmuh khawh nakhnga lo na hmai kha i khuh. Nangmah cu Israel mi hna ca i ralrinnak hmelchunhnak ah kan ser lai," tiah a ti.

EZEKIEL 12:11

Nangmah cu an caah ralrinnak hmelchunhnak na si kha chim hna; na tuahmi cu an cungah tuah a si lai, annih cu ral taannak le sal taannak ah an kal lai.

EZEKIEL 12:22

Bawipa bia cu ka sinah a ra phan i, "Mipa, Israel ram chung i atu lio caan i a leng ngaimi phungthluk bia, 'Caan cu a liam lengmang ko, langhnak hna cu an lo dai lengmang ko,' timi hi zeidah a si?

EZEKIEL 12:23

Annih cu thawh hna law mah hihi Bawipa Pathian bia a si, tiah chim hna: Hi phungthluk bia hi ka donghter cang lai; Israel ram chungah theih a si ṭhan bal ti lai lo, a ti. Cun annih cu, 'Cu caan cu a nai ngaingai cang i langhnak cu a tling taktak lai,' tiah chim hna, a ti.

EZEKIEL 12:28

Cucaah hihi Bawipa Pathian bia a si tiah chim hna: Ka bia cu pakhat hmanh kha a rau lai lo i ka chim lio hmanh ah hin tuah a si lai. Mah hihi Bawipa Pathian bia hrimhrim a si," tiah a ti.

EZEKIEL 13:2

"Mipa, Israel mi profet hna kha chim hna; chim hna law anmah an lungchung chuak bia a chimmi hna kha chim hna, Bawipa nih a chimmi hi thei tuah u, ti hna: Bawipa Pathian bia cu hihi a si:

 EZEKIEL 13:3

Maw profet ṭhalo, mihrut rual hna, lungthawhnak kan hmuh nan timi cu nanmah lungchung in a chuakmi men a si i langhnak zeihmanh nan hmu lo.

EZEKIEL 13:5

Bawipa ni i ral tuk tikah fek tein an dir khawh nakhnga, Israel velchum i a ummi ralhau a rawkmi kha a rawhnak cu hung thlop awkah an hung kal lo.

EZEKIEL 13:6

Lih lawng kha an chim i ahmaan lomi langhnak lawng kha an hmu. 'Mah hihi Bawipa bia hrimhrim a si,' an ti, asinain Bawipa nih annih cu a fial hna lo, asinain an bia cu Bawipa nih a tlinter ko lai, tiah an ruah. Nan profet hna nih hin hlennak langhnak a si lo maw an hmuhmi hi?

EZEKIEL 13:8

"Cucaah hi tu hi Bawipa Pathian ka bia cu a si: 'Nan bia cu ahmaan lomi bia a si caah le nan hmuhmi langhnak cu lih an si caah, nannih cu kan ral hna, tiah Bawipa Pathian nih a ti.

EZEKIEL 13:10 

Cuticun nannih nih Bawipa ka si kha nan hngalh lai. Zeicahdah hi bantuk hin dantat an si lai ti ahcun, ka mi hna kha a pingah an hruai hna caah a si, zeizong vialte a ṭhat lo ko zongah khan, zeizong vialte a ṭha dih ko, an ti hna. Zei he dah aa lawh ti ahcun, vampang pakhat chong hna seh law, cu vampang an chon tikah cun fek tein mirang vawlei in sengh loin a lengin sirang nalh men hna seh law, cu he cun aa lo.

EZEKIEL 13:13

Cucaah hihi Bawipa Pathian bia a si: Zeizong vialte kha a rawh dih hlantiang, ka thin nan ka phawh caah thli chia kha ka hranter lai, ka thin hun in ruahpi fak piin ka surter lai i ka thinlinh in lung tlukin a hakmi rial kha ka tlakter hna lai.

EZEKIEL 13:14

Si rang nan thuhmi inn cu ka chimh lai i vawlei ah ka hrilh lai i a hram kha an lang dih lai. A tlu lai i cu chungah cun nannih zong hrawh nan si chih lai; cuticun Bawipa ka si kha nan hngalh lai.

EZEKIEL 13:15

Inn cungah cun ka thinhunnak kha ka hman lai i sirang a thuhtu hna cung zongah khan ka hman lai; cun mi nih an i thawh lai i

EZEKIEL 13:16

Inn kha a um ti lo, a satu hna zong kha an um ti lo, Jerusalem khua sin i bia a chimtu profet hna, daihnak a um na lo i, daihnak a um, tiah a chimtu hna kha an um ti lo,' an ti lai. Mah hi Bawipa bia hrimhrim a si," tiah a ti.

 

EZEKIEL 13:19

Nannih nih ka mi hna hmaiah barli pei khat ruang le changreu pelpawi ruangah nan ka thurhhnawmh cang, nannih nih lihbia ngaih a duh ngaimi ka mi hna sinah lih nan chimnak thawngin, a thi hnga lo ding kha nan thihter hna i a nung hnga lo ding kha nan nunter hna.

EZEKIEL 13:22

Miding mi cu an cungah ṭhat lonak tuah ka tim lo nain an lung nan donghter hna i cu bantuk ṭhiamṭhiam in miṭhalo mi hna cu an lam ṭhalo kha hlawt i khamh an si nakhnga tu si loin thazang nan pek lehlam hna;