Nitin Baibal Relnak

EZEKIEL 14:3

"Mipa, hi mi hna nih hin an siasal hna cu an lung in an i khihchih hna i an tluknak a sertu thil sual kha an i zohchih peng. Cu bantuk mi hna cu ka sinah bia ka chimter hna hnga maw?

EZEKIEL 14:4

Annih cu chawn hna law hihi Bawipa Pathian bia a si tiah chim hna: Israel mi ahohmanh, a lung chungin a siasal aa khihchih peng i a tluktertu thil sual aa zohchih pengtu paoh nih profet sinah a rat ahcun, a siasal kha tam ko hna hmanh seh law keimah Bawipa nih ka pum in ka leh hrimhrim lai.

EZEKIEL 14:5

Israel mi hna cu an dihlak in an siasal hna nih ka sinin ṭhen ko hna in mising siter ko hna hmanh seh law, ka lehnak hna bia nih an lungthin kha a tlaih hna lai.

EZEKIEL 14:6

Cucaah hihi Bawipa Pathian bia a si tiah Israel mi cu chim hna: Nan siasal kha mertak hna u, thil fihnung nan tuahmi vialte kha nan hnulei chit hna u.

EZEKIEL 14:7

Israel mi nih si hna seh, miphundang mi nih si hna seh, ahohmanh nih keimah kha an ka hlawt i an lung in siasal kha an i khihchih i anmah rilhnak a tluntertu thil ṭhalo kha an i zohchih peng i cu bantuk mi hna nih cun keimah kha chawnh awkah profet sinah an rat ahcun, keimah Bawipa nih annih cu ka pum in ka leh hna lai.

EZEKIEL 14:8

Cu hna cu ka hmai ka chiathnawh hna lai i anmah cu i zohchunh awk le serhsatnak bia ah ka ser hna lai; anmah cu ka mi hna chungin ka chuah hna lai. Cuticun Bawipa ka si kha nan hngalh lai.

EZEKIEL 14:11

Keimah sin i an ṭannak khan Israel mi cu zeitikhmanh ah an tlau ti lai lo i an cungah thurhhnawmhnak an i tlunter ti lai lo; annih cu ka mi an si cang lai i kei cu an Pathian ka si lai. Mah hihi Bawipa Pathian bia hrimhrim a si," tiah a ti.

EZEKIEL 14:13

Mah hihi Bawipa nih ka sin i a chimmi bia kha a si: A ka thawh i, "Mipa, ram pakhatkhat nih ka cung i zumh awk tlak loin a umnak thawngin a sual tikah ka kut kha ka samh lai i nifate a rawl kha ka ṭhumh lai. A cungah mangṭam ka tlunter lai i minung he saṭil he ka thah hna lai.

EZEKIEL 14:14

Noah, Daniel le Job, kha mi pathum hna hmanh kha nung rih hna seh law, anmah nunnak dah ti lo cu an dinnak nih khan ahohmanh a khamh kho hlei hna lai lo. Mah hihi Bawipa Pathian bia hrimhrim a si.

EZEKIEL 14:19

Asiloah, minung le saṭil kha hrawh awkah, cu ram chungah cun rai tlunter ning law, ka thinhunnak cu thisen in bung ning law,

EZEKIEL 14:20

cun Noah le Daniel le Job kha cuka ah cun rak um hna hmanh seh law, an fanule si hna seh, an fapale si hna seh, ahohmanh kha an khamh kho hna lai lo, an dinnak thawngin anmah lawng kha an i khamh kho lai tiah ka nun bangin ka chim, tiah Bawipa Pathian nih a ti.

EZEKIEL 16:3

Mah hihi Bawipa Pathian nih a sinah a chimmi bia cu a si, tiah chim: 'Kanaan ram hi na pupa chuahkehnak ram a si i khika ah nangmah zong hi hrin na si; na pa cu Amor mi a rak si i na nu cu Hit mi a rak si.

EZEKIEL 16:4

Zeitindah na chuah ah hin tuah na rak si ti ahcun, na chuah ah hin na laihri tan na rak si lo, kholhnak ding ti zong chiahpiak na rak si lo i kholh na si lo, cite thuh awk na rak simi kha thuh na si lo i nau hlawmnak puan zongin hlawm na si fawn lo.

EZEKIEL 16:5

Ahohmanh nih zei ah an in rel lo caah hi thil hi pakhat hmanh an in tuahpiak lo, ahohmanh nih an in zaangfah fawn lo; na chuah ni ah khan nangmah hnawmhne lakah vawlei ah khan hrilh na rak si ko.

EZEKIEL 16:6

Cu tikah kei cu na pawngah khan ka rak i chawk i na thi chung i na ke na rak chaih len ko kha kan hmuh; na thi chung i na um lioah khan kan chawnh i, nung tuah, kan ti.

EZEKIEL 16:7

A hring zungzalmi thing, lo lak i a ummi thingkung bantukin kan cawngh i na nung i na ṭhang. Na hung ngaknu, na hnuk hna cu an hung bom i na sam cu an hung sau, sihmanhsehlaw taklawng na si ko rih i na lang ko rih.

EZEKIEL 16:8

"Cun na pawngah ka ra ṭhan i va ngeih cu na si cang ti kha kan hmuh. Ka puan cu kan zawnh i na taklawng cu kan huh. Cun kan hamnak kha ka fehter i nupi ah kan ṭhit i keimah ta ah na cang, tiah Bawipa Pathian nih a ti.

EZEKIEL 16:9

Cu tikah ti in kan kholh i na thi kha ka ṭawl i chihriti kan thuh.

EZEKIEL 16:10

Ṭamhmi puan kha kan aihter i saphaw kedan kan danhter; puan hmangṭhia khan kan thuamh i pu puan kha kan aih.

EZEKIEL 16:11

Hlawn caah kutkhih kan khih i na hngawng ah ṭhi kan oih;

EZEKIEL 16:12

hnartonh kan tonh, hnatonh kan tonh i suiluchin kan chinh.

EZEKIEL 16:13

Na hlawn cu sui le ngun an si, na thilthuam cu puan hmangṭhia le pu le ṭamhmi puan an si. Na rawl ah changvut le khuaihliti le oliv chiti an si i na hun i dawh ngaingai i siangpahrangnu na hung si.

EZEKIEL 16:14

Naa dawh minthannak cu khuazakip ah a thang, zeicahtiah keimah nih kan thuamhnak sunparnak nih cun naa dawhnak cu a tlinter, tiah Bawipa Pathian nih a ti.

EZEKIEL 16:15

"Sihmanhsehlaw naa dawhnak cu naa zum ciammam i na minthannak cu hlawhhlannak ah na hman i khualtlawngmi kip kha na rak i duh hna.

EZEKIEL 16:19

Kan pekmi rawl, changvut, chiti le khuaihliti, nangmah kan cawmnak kha na lak i an hmaiah cun rim thaw ṭhawinak caah na hun hna. Mah hihi Bawipa Pathian bia hrimhrim a si.

EZEKIEL 16:22

Fih a nungmi zuanzamnak na tuahmi vialte hna ruangah hin hlanlio kong kha na philh i taklawng le pumro in na rak um i na thi chung i na ke na rak chaih len ko lio kha na hngal ti lo.

EZEKIEL 16:37

nangmah duhtu na fuhmi vialte hna, na duhmi vialte hna le na huatmi vialte hna kha, ka pumh hna lai. Annih cu khuazakip in ka pumh hna lai i an hmaiah khan na puan kan phoih dih lai i na takpum cu a dihlak in a lawng piin an in hmuh lai.

EZEKIEL 16:39

Cun annih sinah khan nangmah cu kan chanh lai. Annih nih na zaunak donhmi kha an chimh hna lai i na ṭhutdan sang kha an hrawh hna lai; cun na puan kha an in phoih lai i na hlawn sungsung kha an lak hna lai i taklawng le taklang in an in kaltak lai.

EZEKIEL 16:60

Sihmanhsehlaw na no lio i nangmah he ka tuahmi biakamnak kha ka philh lai lo i zungzal in a hmun laimi biakamnak cu nangmah he ka ser lai.

EZEKIEL 16:62

Cuticun ka biakamnak cu nangmah sinah ka fehter lai i Bawipa ka si kha na hngalh lai.

EZEKIEL 16:63

Na tuahmi vialte kha kan ngaihthiam dih hnuah cun, na lung a pem lai i na ning a zak lai i na lung a ar lai i voi khat hmanh na kaa na ang ṭhan ti lai lo. Mah hihi Bawipa Pathian bia hrimhrim a si," tiah a ti.

EZEKIEL 17:7

Mupi dang pakhat a um ve i thla ngan pipi a ngei i a hmul zong a chah ngai. Cun mitsur ruang nih khan a um lionak dum nakkhan ti tam deuh a ka pek khawh lai tiah a ruah caah mupi leiah cun a hram le a ṭe cu a mer hna.

EZEKIEL 17:8

A ngaingai ti ahcun, mitsur ruang kha vawlei a ṭhatnak ti a tamnak hmun, a hnah tampi a ngeih khawh i thei tampi a tlai khawh i mitsur ruang ṭha a si khawh nakding hmun ah khan cin a si ko cang.

EZEKIEL 17:19

Cucaah hihi Bawipa Pathian bia cu a si. A thawh i, "Ka nun bangin ka chim, keimah min chalh in chiat a sermi kha zei ah a rel lo i aa let caah dan ka tat lai.

EZEKIEL 17:22

Mah hihi Bawipa Pathian bia a si: Keimah zong nih sidar thingkung a hluai pakhat kha ka lak ve lai i tlang sang pakhat cungah ka phun lai.

EZEKIEL 17:23

Israel tlang sang bik ah ka phun lai. Nge tampi a hun ngei hna lai i thei an tlai hna lai i sidar thing dawh ngaingai ah a cang lai. Cuka ah cun va a phunphun kha an um lai i a thladem ah khan khua an sa lai.

EZEKIEL 17:24

Ram chung thing vialte nih khan, Keimah cu Bawipa ka si kha an hngalh lai. Keimah nih thingkung a sangmi kha ka hau hna i thingkung a niammi kha ka santer hna i a romi kha ka hrinter hna. Hihi Bawipa nih ka chim i ka tuah lai, tiah a ti.

EZEKIEL 18:2

"Mi nih Israel ram chungah an chim lengmangmi phungthlukbia 'Hringtu nu le pa hna nih mitsur thei thor an ei i an fale ha a za,' an rak timi kha a sullam zeidah a si?

EZEKIEL 18:3

Ka nun bangin ka chim, tiah Bawipa Pathian nih a ti, hi phungthlukbia hi zeitikhmanh ah Israel ram chungah hman a si ti lai lo.

EZEKIEL 18:4

A nungmi paoh cu keimah ta an si dih, an hringtu nu le pa si hna seh, an fale si hna seh, an dihlak in ka ta an si. A sualmi paoh cu a thi ko lai.

EZEKIEL 18:9

Dinlonak kha a hrial i pakhat le pakhat karlak ah aa buaktlak tein a um. Ka nawlbia kha a zulh hna i ka phungbia kha fel tein a tuah hna. Cu bantuk mi cu miding an si: amah cu a nung lai, tiah Bawipa Pathian nih a ti.

EZEKIEL 18:10

"Amah nih cun fapa pakhat a ngeih ko hnga i a fapa cu zaang-en hmangmi, lainawng, hi nawlbia zeihmanh i a rel lomi a si ko hnga.

EZEKIEL 18:13

a miak le a karh in lei a cawihmi, hi bantuk mi cu a nung lai lo. Hi thil fihnung vialte hi a tuah hna caah a thi lai i a thisen kha a lu cungah a tla ko lai.

EZEKIEL 18:14

"Hi miṭhalopa nih hin fapa a hei ngeih ve ko hnga i cu a fapa nih cun a pa sualnak vialte cu a hmuh dih ko hna hnga; a hmuh cu a hmu ko hna hnga nain pakhat hmanh a tuah hna hnga lo.

EZEKIEL 18:17

Biadinglo kha a hrial i a karh in siseh, dongtanh in siseh phaisa a cawih bal hna lo. Ka phungbia kha a zulh hna i ka nawlbia kha a tuah hna. Cu bantuk mi cu a pa sualnak ruangah khan a thi lai lo; a nung ko lai.

EZEKIEL 18:19

Nannih nih nan i thawh hnga i, 'A pa sualnak ruangah khan zeicahdah a fapa kha dantat a si lo?' nan ti hnga. Zeicahdah dantat a si lo ti ahcun, a dingmi le a hmaanmi thil kha a tuah zungzal i ka nawlbia kha ralring tein a zulh hna caah a si, cucaah cun a nung lai.

EZEKIEL 18:20

A thi ding cu midang si loin a sualmi kha a si lai; a fa nih a pa sualnak kha aa hrawm lai lo, a pa zong nih a fapa sualnak kha aa hrawm lai lo. Miding mi nih a dinnak theitlai kha a hmuh lai i miṭhalo nih a ṭhat lonak theitlai kha a zun ve ko lai.

EZEKIEL 18:21

"Cun miṭhalopa nih a ṭhat lonak vialte kha a hlawt hna hnga i ka nawlbia vialte kha a tuah hna hnga i a dingmi le a hmaanmi thil kha a tuah ko hna hnga. Cu pa cu a nung lai; a thi lai lo.

EZEKIEL 18:22

A tuahmi ṭhat lonak vialte kha philhpiak a si lai i dinnak a tuahmi ruangah khan a nung lai.

EZEKIEL 18:23

Miṭhalo mi thih cu maw ka duh? A ziaza kha aa remh i a nun kha ka duhmi a si deuh lo maw? tiah Bawipa Pathian nih a ti.

EZEKIEL 18:24

"Cun miding mipa nih a ziaza ding kha a hlawt ko hnga i miṭhalo mipa nih fihnung a phunphun a tuahmi kha a tuah ve ko hnga; mah hihi tuah buin a nung ko hnga maw? Nung hlah, dinnak a rak tuahmi vialte kha hngalhpiak a si lai lo; zumhawktlak loin a nung, a sual i cucaah cun a thi lai.

EZEKIEL 18:26

Miding mipa nih a dinnak a mertak i ṭhat lonak lam ah khan a kal i a thih ahcun, a thih cu, cu ziaza ṭhalo a tuah ruangah cun a si lai.

EZEKIEL 18:27

Cu bantukin miṭhalo mipa nih a ṭhat lonak kha a kaltak i a dingmi le a hmaanmi kha a tuah ahcun a nunnak kha a khamh lai.

EZEKIEL 18:28

A sualnak kha an sining tein a hmuh hna i a hnulei a mertak hna ahcun, a nung lai, a thi lai lo.

EZEKIEL 18:31

Thil ṭhalo nan tuahmi kha hlonh hna u law lungthin thar le thlarau thar i lak u.

EZEKIEL 18:32

Zeicahdah nan thih lai ee, Israel mi hna? Ahohmanh nan thih cu ka duh ṭung lo, tiah Bawipa Pathian hrimhrim nih a ti," tiah a ti.