Nitin Baibal Relnak

EZEKIEL 28:2

"Mipa, Tair bawi sinah cun va chim law, hihi Bawipa Pathian bia a si, va ti: Porhlawt ruamkainak in naa thawh i, 'Kei cu pathian ka si, Rilipi cungah pathian bantukin bawiṭhutdan cungah ka ṭhu,' na ti. Nang cu minung na si ko i pathian na si lo nain pathian tluk ah naa ruat.

EZEKIEL 28:6

Mah hihi Bawipa Pathian bia cu a si: Pathian tluk ah naa ruah caah

EZEKIEL 28:7

Na cungah ramdangmi kha ka tlunter hna lai; Annih cu miphun hna lakah a puarhrang bik an si i Na fimnak ṭhaṭha kha vainam in an sam lai i Naa porhlawtnak cu leidip lakah an hrilh lai.

EZEKIEL 28:12

Mah hihi Bawipa nih ka sinah a chimmi bia an si. A ka thawh i, "Mipa, Tair siangpahrang cu hi mithi hla hi lawh law, amah cu hihi Bawipa Pathian bia a si, tiah chim tuah: Nangmah cu tlinnak leiah zohchun awk tlak na rak si, Na fimnak cu a tlingmi a si i naa dawhnak zong a tling.

EZEKIEL 28:13

Pathian dum Eden dum chungah khan na rak um i Lungvar a phunphun in naa ṭamh: Naa ṭamhnak lungvar hna cu sardin le khrisolaih le lunghring le topaz le karnelian le jasper a hringmi le lapis lazuli le safaiar le karbankal le emeral an si. A ring cherhmarhmi na ṭhi cu sui an si i Naa menhmi na hniar hna cu hrin na si ni i an in serpiakmi kha an si.

EZEKIEL 28:14

Nangmah cu an cawngtu dingah a sangmi cherub kan chiahpiak; Pathian tlang thiang cungah khan na um i Mei bantukin sen himhiam in a linmi lung lakah khan porhlaw ngaiin naa chawk.

EZEKIEL 28:15

Na chuah ri in na ṭhat lonak a langh ni tiang, Nang cu thil na tuahmi paoh ah soisel awk zeihmanh na um lo.

EZEKIEL 28:16

Na chawlehnak kha a ngan tuk cang i phung zulh duh lonak kha na lung chungah a khat i a pingah na kal, Cucaah ningzahnak in Pathian tlang cung khan kan ṭhumh i Nangmah cawngtu cherub nih khan an dawi i, Mei bantukin sen himhiam in a linmi lunglak khan an ṭhawl.

EZEKIEL 28:17

Naa dawhnak nih khan na lung an puamter i Upatnak na hmuhmi karhter chinnak caah na fimnak kha a ping in na hman. Vawlei ah khan kan hlonh i siangpahrang dang zohchun awkah khika ah khan kan kaltak.

EZEKIEL 28:25

Mah hihi Bawipa Pathian bia an si: Israel mi hna cu an i ṭheknak miphun hna chungin ka pumh ṭhan hna tikah, cu thawng cun miphun hna mithmuh ah ka thiannak kha ka langhter lai. Ka sal Jakob ka rak pekmi, an vawlei te ah khan khua an sa lai.

EZEKIEL 28:26

Khika ah khan lungdai tein an um lai i inn an sak hna lai i mitsur dum an ser hna lai; annih a nihsawhtu hna an pawngkam i a ummi hna cungah khan biaceihnak ka tuah tikah, annih cu lungdai tein an um lai. Cuticun keimah cu Bawipa an Pathian ka si kha an hngalh lai.

EZEKIEL 29:12

Izipt ram cu chuahtakmi ramlak i ramking bik ah ka ser lai; a khua hna cu a rawkmi khua hna lakah kum sawm li chung an ṭiaotakmi khua an si lai. Cun Izipt mi cu miphun hna lakah ka ṭhek hna lai i ram kip ah ka ṭhio hna lai," a ka ti.

EZEKIEL 29:13

Mah hihi Bawipa Pathian bia cu an si: Kum sawm li a donghnak ah Izipt mi hna cu an i ṭheknak miphun hna sin khan ka pumh hna lai.

EZEKIEL 29:14

Izipt cu a vanṭhatnak kha ka pek ṭhan lai i an chuahkehnak ram Pathros ah khan ka kirpi ṭhan lai, cuka ah cun pennak hmete an si lai.

EZEKIEL 29:18

A ka thawh i, "Mipa, Babilon siangpahrang Nebukhadnezzar nih Tair dohnak ah a ralkap hna cu raltuknak hmun ah saupi a chiah hna i cucaah an lu zong a kolh dih i an liang zong a kok dih. Sihmanhsehlaw amah nih siseh, a ralkap hna nih si hna seh, cu ti i Tair saupi an dohnak thawng in zeihmanh a miak an hmuhmi a um lo.

EZEKIEL 29:19

Cucaah hihi Bawipa Pathian bia cu a si: Izipt ram cu Babilon siangpahrang Nebukhadnezzar ka pek lai. A chaw vialte kha a kalpi dih lai i a hrawh lai i a ramh lai i cu cun a ralkap cu lahkhah a pek hna lai.

EZEKIEL 29:20

Tair a doh man ah khan Izipt ram cu ka pek lai, zeicahtiah amah nih ka rian kha a ṭuan. Mah hihi Bawipa Pathian bia hrimhrim a si.

EZEKIEL 29:21

"Khi tikah Israel nih nge no a corh ṭhan lai i annih lak i biachim khawhnak kha ka pek ṭhan lai i cun annih nih Bawipa ka si kha an hngalh lai," a ti.