Nitin Baibal Relnak

LAMKALTU 12:2

Johan unau Jeim kha vainam in a thahter hna i

LAMKALTU 12:3

hi nih hin Judah mi kha an lung a lawmhter hna ti kha a hmuh tikah Peter zong kha a tlaihter fawn hna. (Mah hihi Thilnu Phulh Lo Changreu Puai lioah khan a si).

LAMKALTU 12:5

Cucaah Peter cu thong chungah khan an chiah ko, asinain khrihfabu chungmi hna nih cun a caah khan thla fak piin an cam.

LAMKALTU 12:6

Herod nih zapi hmaiah ka chuahpi cang lai tiah a timi caan a phak lai zan ah khan, Peter cu ralvengtu ralkap pahnih hna karlak ah khan a it. Thirhri pahnih in an hren i thonginn kutka cu ralvengtu nih an cawngh.

LAMKALTU 12:7

Chikkhatte ah khin Bawipa vancungmi pakhat kha khika ah cun a hung dir i thonginn chung cu a ceu. Vancungmi nih cun Peter cu a liang in a hninh i a ṭhangh, "Khulrang in tho tuah!" tiah a ti. Hmakhatte ah Peter kut cun thirhri cu an tla.

LAMKALTU 12:8

Cun vancungmi nih cun a thawh i, "Na taisawm i sawmh law na kedan i danh tuah," tiah a ti. Peter nih cu bantuk cun a tuah i vancungmi nih cun, "Na puan kha i aih law hung ka zul," tiah a ti i,

LAMKALTU 12:9

Peter nih cun thonginn lengah khan a hei zulh. Asinain vancungmi nih a tuahmi cu a taktak a si rua ti awk a hngal lo, langhnak ka hmu rua tiah a ruah.

LAMKALTU 12:10

Ralvengtu hna umnak hmasa bik le a pahnihnak kha an hei lonh i khua chung vung lanhnak thir kutka kha an phan. Kutka cu amah tein a rak i hung i annih cu an chuak. Lam kha an vun zul i vancungmi nih khan Peter cu, duak tiah a kaltak.

LAMKALTU 12:11

Khi tikah Peter cu a lung a hung fim i, "Atu cu hihi ahmaan tiah ka hngalh cang! Bawipa nih a vancungmi kha a run thlah i Herod kut chung le Judah mi nih ka cungah an i ruahchihmi vialte chungin a ka khamh," tiah a ti.

LAMKALTU 12:14

Peter aw a si ti kha a hngalh tikah a lung aa lawm tuk i innka cu hung loin a kir i, Peter kha lengah a dir ko, tiah a chimh hna.

LAMKALTU 12:15

"Na molh," tiah an rak ti, sihmanhsehlaw a si hrimhrim ko, tiah a ti peng hna tikah khan, "A vancungmi a si lai," an ti.

LAMKALTU 12:16

Cu lioah cun Peter nih cun innka cu a kingh lengmang ko. Annih nih an va hun i amah cu an hmuh tikah an khuaruah a har.

LAMKALTU 12:17

"Dai tein um u," tiah a kut in a hmuhsak hna i Bawipa nih zeitindah thonginn chungin a chuahnak kha a chimh hna. "Mah hihi Jeim le kan unau dang hna kha va chim hna u," tiah a ti hna i kaa dang ah a kaltak hna.

LAMKALTU 12:18

Cun zinglei a hung si tikah khan Peter hi zei nih dah a ti hnga tiin ralvengtu hna cu awlokchong in an i tuai.

LAMKALTU 12:21

An ni tinh ni ah Herod cu a siangpahrang thuam khan aa thuam i a bawiṭhutdan cungah khan a ṭhu i mizapi sinah cun bia a chim.

LAMKALTU 12:22

"Bia a chimtu hi minung a si lo, pathian a si," tiah an au.

LAMKALTU 12:23

Herod nih Pathian kha upatnak a pek lo caah Bawipa vancungmi nih chikkhatte ah a vun tuk. Amah cu tholung nih an ei i a thi.

LAMKALTU 13:1

Antiok khua khrihfabu chungah khan profet hna le cawnpiaktu saya hna tlawmpal an um, cu hna cu Barnabas, Simeon (Simeon cu Pa Nak ti zongah an ti), Sairin mi Lusias, Mangki bawi Herod khukṭhi Manaen le Saul kha an si.

LAMKALTU 13:2

Annih nih Bawipa kha an biak i rawl an ulh lioah khan, Thiang Thlarau nih a thawh hna i, "Barnabas le Saul hi, ka thiahmi hna rian kha an ṭuan nakhnga, a dang tein ka chiahpiak hna u," tiah a ti.

LAMKALTU 13:47

Zeicahtiah Bawipa nih a kan pekmi nawlbia cu: 'Nannih cu Jentail mi ca i ceunak si awk le Vawlei cung dihlak ca i khamhnak lam si awkah kan chiah hna,' ti hi a si," tiah a ti.

LAMKALTU 13:3

Rawl an ulh i thla an cam dih in an cungah an kut an chuan i an thlah hna.

LAMKALTU 13:4

Barnabas le Saul cu Thiang Thlarau nih a fial hna bang khan Seleusia khua ah khan an vung kal i cuka cun Saipras tikulh ah tilawng in an kal.

LAMKALTU 13:6

Cu tikulh cu Pafos khua tiangin an hei ṭol i khika ah khan camhthiam a min Bar-Jesuh a simi kha an va ton, amah cu Judah mi a si i profet ka si tiah aa timi a si.

LAMKALTU 13:7

Amah cu cu tikulh a uktu bawi Sergius Paulus an timi, mifim ngaingaimipa i a hawikom a si. Uktu bawi nih cun Pathian bia kha theih a duh caah Barnabas le Saul kha a auh hna.

LAMKALTU 13:8

Sihmanhsehlaw annih cu camhthiam Elimas (cucu a Grik min a si) nih khan a rak al hna i uktu bawi kha Pathian cu zum hlah seh tiah kham aa zuam.

LAMKALTU 13:9

Khi tikah Paul ti zongah ti a simi Saul, Thiang Thlarau in a khatmi nih khan camhthiampa cu dengteo in a zoh i,

LAMKALTU 13:10

"Khuachia fa! Nangmah hi a ṭhami thil paohpaoh dohtu na si; nangmah hi hlennak ṭhalo a phunphun in na khat, Bawipa biatak hi lih i canter naa zuam zungzal.

LAMKALTU 13:11

Bawipa kut cu atu ah na cungah a tlung lai, na mit a caw lai i caan tlawmpal chung cu chun ceu na hmu lai lo," tiah a ti. Chikkhatte ah khin Elimas mit cu minmei nak nih a zelh i a kut in a hruaitu dingmi kawl ah i dap lengmang in aa chawk.

LAMKALTU 13:12

Thil a hung ummi kha a hmuh tikah uktu bawi cu a zummi ah a cang i Bawipa kong an cawnpiakmi nih khan a lung a sukhai ngaingai.

LAMKALTU 13:14

Perga cun an hei kal i Pisidia ram Antiok khua kha an phan; cun Sabbath ni ah pumhnak inn ah khan an kal i an ṭhu.

LAMKALTU 13:15

Cuka mi hna nih Moses Nawlbia Cauk chungin le profet hna caṭialmi chungin an rel hnuah pumhnak inn uktu hna nih cun an i thawh i, "U le nau hna, mizapi caah forhnak bia chim awk nan ngeih ahcun chim tuah hna u," tiah an ti hna,

LAMKALTU 13:16

Paul cu a dir i a kut in dai u tiah a hmuhsak hna i biachim hram aa thawk: "Ka phunhawi Israel mi hna le Pathian a biami Jentail mi hna, ka bia hi ngai tuah u.

LAMKALTU 13:19

Kanaan ram chungah miphun phun sarih kha a hrawh hna i a mi hna cu ram ngeitu ah khan a ser hna.

LAMKALTU 13:20

cucu kum za li le kum sawm nga lio hrawngah khan a rak si. "Cun cu hnuah cun profet Samuel chan tiang khan biaceihtu kha a pek hna.

LAMKALTU 13:21

Cun annih nih siangpahrang kan pe tiah an hal tikah Pathian nih Saul, Benjamin phun chungmi Kish fapa kha, kum sawm li chung an siangpahrang si awkah a pek hna.

LAMKALTU 13:22

Amah cu a phuah hnuah Pathian nih cun David kha an siangpahrang ah a ser. Amah kongah Pathian nih a chimmi cu, 'Jesse fapa David hi ka duhmi phun a si, amah hi tuah tiah ka fialmi a tuah duh dingmi a si,' ti hi a rak si.

LAMKALTU 13:23

Hi pa tefa chung hin, Pathian nih bia a rak kam cang hna bangin, Israel mi cu khamhtu Jesuh kha a pek hna.

LAMKALTU 13:24

A rat lainak kha Johan nih a rak timhtuah chung i a timhtuahnak ah cun Israel mi vialte kha nan sualnak i ngaihchih u law tipilnak ing u, a ti hna.

LAMKALTU 13:27

Zeicahtiah Jerusalem i a ummi hna le an hruaitu hna nih khan amah cu Khamhtu a si kha an hngal lo i cuhleiah Sabbath fate an rel lengmangmi profet bia hna zong kha a sullam an hngal hna lo. Sihmanhsehlaw Jesuh an thahnak thawng khan profet bia kha an tlinter hna.

LAMKALTU 13:29

Amah kongah Cathiang nih a chimmi vialte an tuah dih hnuah vailam cung khan an ṭhumh i thlan ah an vui.

LAMKALTU 13:30

Sihmanhsehlaw Pathian nih mithi hna sin khan a thawhter i

LAMKALTU 13:31

amah sin i Galilee in Jerusalem tiang khual a tlawng tawnmi hna sinah khan voi tampi a lang. Annih cu Israel mi sin i a tehte an si.

LAMKALTU 13:32-33

Cun atu hi, hi Thawngṭha hi nannih sin phakpi awkah hika i kan ratnak cu a si. Kan pupa hna sinah, ka tuah lai, tiah Pathian nih bia a rak kammi kha, kannih an tefa hna sinah hin atu cu a tuah cang, cucu Jesuh a nunter ṭhan hi a si. Cucu Salm fung hnihnak chung i 'Nangmah cu ka Fapa na si, nihin ah na Pa ka si cang,' tiah aa ṭial bantuk khan a si.

LAMKALTU 13:38-39

Ka u le ka nau hna, nan dihlak in nan hngalh awk cu, Jesuh thawng hin pei sual ngaihthiamnak bia nan sin i chim hi a si cu; Moses Nawlbia nih an luatter khawh lomi hna sualnak khan pei amah a zummi paohpaoh cu a luatter hna cu.

LAMKALTU 13:43

Zapi cu pumhnak khan an ṭian hnuah Judah mi a tampi le Judah phung a zulmi Jentail mi mi tampi hna nih khan an zulh hna. Lamkaltu hna nih khan annih cu an chimh hna i Pathian vel chung i um camcin awk kha an forh hna.

LAMKALTU 13:47

Zeicahtiah Bawipa nih a kan pekmi nawlbia cu: 'Nannih cu Jentail mi ca i ceunak si awk le Vawlei cung dihlak ca i khamhnak lam si awkah kan chiah hna,' ti hi a si," tiah a ti.

LAMKALTU 13:48

Jentail mi hna nih cu bia cu an theih tikah an i lawm i Bawipa cu, cu bia ruangah cun an thangṭhat; cun zungzal nunnak hmu dingah thim a simi hna nih khan an zumh i

LAMKALTU 13:49

khika hrawngah khan Bawipa bia cu a kenkip ah aa ṭhek.

LAMKALTU 13:52

Antiok khua i a ummi zultu hna cu lunglawmhnak le Thiang Thlarau in an khat.

LAMKALTU 14:1

Cu bantuk ṭhiamṭhiam cun Ikonium khua zongah a si: Paul le Barnabas cu Judah mi pumhnak inn ah khan an va kal i bia kha an chimh hna i Judah mi le Jentail mi mi tampi kha zumtu ah an i cang.

LAMKALTU 14:2

Sihmanhsehlaw a zum duh lomi Judah mi hna nih khan Jentail mi kha an forh hna i unau pawl kha an huatter hna.

LAMKALTU 14:3

Khika ah lamkaltu hna kha saupi an cam. Bawipa kong kha ralṭha ngaingai in an chim i a velngeihnak kong an chimmi kha ahmaan ti hmuhsaknak caah khuaruahharnak tuah khawhnak kha a pek hna.

LAMKALTU 14:8

Listra khua ah cun kebeimipa pakhat a rak um; amah cu a chuah kate in a beimi a si i a kal kho bal lo.

LAMKALTU 14:9

Khika ah cun a ṭhu ve i Paul bia kha a ngai ve. Paul nih cun, hi pa nih hin ka chimmi hi a zumh i damh khawh a si lai, ti kha a hmuh caah amah cu dengteo in a vun zoh i 

LAMKALTU 14:10

aw thangpi in, "Na ke in ding tein dir tuah," tiah a ti. Mipa cu a hun i hlawk i aa chawk kho ai.

LAMKALTU 14:11

Paul nih a tuahmi kha mibupi nih cun an hmuh tikah an Likaonian holh in an au i, "Minung bantuk ah pathian cu an i cang i kan sinah an rung ṭum," tiah an ti.

LAMKALTU 14:15

"Zeicahdah mah hihi nan tuah? Kannih zong minung sawhsawhte kan si ve ko, nanmah bantuk minung kan si ve ko. Hika i kan ratnak cu nannih kha hi santlailo thil hna hi hlawt i van le vawlei le rili le a chung i a ummi thil vialte a sertu Pathian lei i mer awkah Thawngṭha ra chim kha a si.

LAMKALTU 14:16

Hlanah cun mi vialte kha anmah duhning cio lam zulh kha a onh ko hna.

LAMKALTU 14:17

Sihmanhsehlaw amah a um kha thil ṭha a tuahmi in a langhter zungzal ko: van in ruah an pek hna i a caan hmaan te ah thlaiti an pek hna; rawl kha an pek hna i lunglawmhnak in an khahter hna," tiah a ti.

LAMKALTU 14:19

Pisidia ram Antiok khua le Ikonium khua in Judah mi tlawmpal kha an ra i mizapi cu anmah leiah an ṭanter khawh hna, Paul kha lung in an cheh i a thi cang rua tiah an ruah caah khua lengah khan an hnuh.

LAMKALTU 14:20

Sihmanhsehlaw zumtu hna nih khan an hun pumhhnawh tikah a tho i khua chungah khan a lut ṭhan. A thaizing ah Barnabas he Derbe khua ah an kal.

LAMKALTU 14:21

Paul le Barnabas nih Derbe khua ah cun Thawngṭha kha an chim i zultu tampi an hmuh hna. Cun Listra ah khan an kir i cuka cun Ikonium le Pisidia ram Antiok khua ah khan an kal.

LAMKALTU 14:22

Zumtu hna kha thazang an pek hna i nan zumhnak ah khan fek tein hmun ko u, tiah an forh hna. "Pathian Pennak chung luh awkah hin harnak tampi kan ton a hau," tiah an cawnpiak hna.

LAMKALTU 14:23

Khrihfabu kip ah khan khrihfa upa an chiah hna i thlacamnak le rawl ulhnak he, an i bochanmi Bawipa kut chungah khan, an chiah hna.

LAMKALTU 15:1

Judea ram in mi cheukhat kha Antiok khua ah khan an ra i, "Moses Nawlbia nih a kan cawnpiak bangin, nan cuarpar nan i tan lo ahcun khamhnak nan hmu kho lai lo," tiah unau pawl kha an cawnpiak hna.

LAMKALTU 15:3

Khrihfabu nih khan an hei thlah hna i Foinisia le Samaria an hei tanpah ah khan zeitluk in dah Jentail mi hna nih Pathian leiah an i mer tinak kong kha an chimh hna; cu thawng nih cun unau vialte kha a lawmhter ngaingai hna.

LAMKALTU 15:7

Saupi an ceih hnuah Peter a dir i, "Ka u le ka nau hna, nannih nih nan hngalh bantukin, Jentail mi hna nih Thawng Ṭha kha an theih i an zumh khawh ve nakhnga, an sin i cu Thawng cu va chim awkah hlan deuhpi ah khan Pathian nih keimah cu nanmah lakin a rak ka thim.

LAMKALTU 15:8

Cun minung lungthin a hngaltu Pathian nih Jentail mi a cohlan hnanak cu, kanmah a rak kan pekmi bantuk tein Thiang Thlarau a pek ve hnanak ah hin a lang.

LAMKALTU 15:11

Asilo, kannih zong kha kan zumh i pei Bawipa Jesuh vel thawng cun khamhnak kan hmuh kha, annih zong cu cu bantukte cun pei an si ve ko cu," tiah a ti.

LAMKALTU 15:15

Profet nih an rak chimmi bia cu hi bia he hin aa kheng ngaingai. Cathiang chungah zeitindah a um tiah:

LAMKALTU 15:16

'Hi hnuah hin ka ra kir ṭhan lai i David inn a tlumi kha ka tun ṭhan lai. A rawhnak kha ka remh lai i ka sak ṭhan lai.

LAMKALTU 15:17

Cucaah miphun dang vialte, ka mi si awk ca i ka auhmi Jentail mi vialte hna nih khan Bawipa cu an ka kawl lai.

LAMKALTU 15:18

Cuticun Bawipa, hlanlio piin thil a rak chimtu nih cun a ti.'

LAMKALTU 15:28

Hi a herhmi nawlbia hlei in a dang zeihmanh nan cungah khin lo ding kha Thiang Thlarau le kannih kan hnatlaknak a si:

LAMKALTU 15:29

siasal pekchanhmi rawl kha ei i sum u, thi ei kha i sum u, hngawngdih sa ei i sum u, cun nu le pa sualnak kha i sum u. Hi thil hna tuah hi nan i sum ahcun nan caah a ṭha lai. Dam tein," tiah an ti.

LAMKALTU 15:36

Cu hnu caan tlawmpal ah khin Paul nih Barnabas cu a thawh i, "Va kal ṭhan u si law Bawipa kong kan chimnak khua paoh ah khan kan unau hna kha va tlawng ṭhan hna u si law zeitindah an um ti kha va zoh hna u sih," tiah a ti.

LAMKALTU 15:37

Barnabas nih khan Johan Marka kha i kalpi ṭhan a duh;

LAMKALTU 15:38

sihmanhsehlaw an khual tlawnnak a dongh tiang a rak zulh hna lo i Pamfilia in a rak kirtak hna caah khan Paul nih i kalpi awk cu a ṭha tiah a ruat lo.

LAMKALTU 15:39

Fak piin an i al i pakhat le pakhat an i ṭhen. Barnabas nih Marka kha aa lak i Saipras tikulh leiah lawng in an kal;

LAMKALTU 15:40

cun Paul nih Silas kha aa thim i unau pawl nih khan Bawipa velngeihnak chungah an sanh hna hnuah an kal.

LAMKALTU 16:5

Cucaah khrihfabu cu zumhnak ah an ṭhawng chinchin i ni fate in an karh chin lengmang.

LAMKALTU 16:6

Asia ram chungah Thiang Thlarau nih Thawngṭha kha chim awkah a onh hna lo caah Frizia le Galatia ram chungah khan khual cu an tlawng.

LAMKALTU 16:7

Misia ramri an va phak ah khan Bithinia ram chungah luh an i zal i sihmanhsehlaw Jesuh Thlarau nih khan a onh hna lo,

LAMKALTU 16:9

Cu zan ah cun Paul nih langhnak pakhat a hmuh i cu ah cun mipa pakhat, Masidonia mi a simi kha a dir i, "Masidonia leiah hin ra law ra kan bawm," tiah a ti lengmangmi kha a hmuh.

LAMKALTU 16:10

Paul nih hi langhnak a hmuh cangkate in Masidonia lei kal awkah khan kan i tim, zeicahtiah cuka i a ummi hna sin i Thawngṭha chim awkah khan Pathian nih a kan auh tiah kan ruah.

LAMKALTU 16:12

Cuka cun ram chungah khan kan lut i Filipi khua kan phan, Filipi khua cu Masidonia ram chung i a um vemi peng peng khat a khualipi a si; cun Rom mi hna ram thar zong a si fawn. Cu khua ah cun ni thum li kan cam.

LAMKALTU 16:13

Sabbath ni ah khua chung cun kan chuak i tiva kamah kan kal, cuka ah cun Judah mi hna thlacamnak hmun a um lai tiah kan ruah. Kan ṭhu i aa pummi nu kha bia kan ruah hna.

LAMKALTU 16:14

Cu hna lak i kan bia a theimi pakhat cu Lidia a si, amah cu Thiatira khuami a si i maimaw puan a zuarmi a si. Amah cu Pathian a biami nu a si i Paul nih a chimmi bia ngaih awk caah khan Pathian nih a lungthin kha a hunpiak.

LAMKALTU 16:15

Amah le a innchung i a ummi hna nih khan tipilnak an in. Cun a kan thawh i, "Keimah cu Bawipa zumtu taktak ah nan ka ruah a si ahcun, ra u law ka inn ah ra ka tlung u," tiah a kan sawm.

LAMKALTU 16:16

Ni khat cu thlacamnak hmun i kan va kal ṭhan tikah khan lim khuavang a ngeimi sal ngaknu pakhat nih a kan ton i cu a lim khuavang nih cun hmailei thil um ding kha a chimter khawh. Cu bantukin hmailei thil kong a chimnak cun a bawile kha tangka tampi a hmuhter hna.

LAMKALTU 16:17

Amah nih cun Paul le kannih kha a kan zulh i, "Hi hna hi Cung Nung Bik Pathian sal an si i anmah nih hin zeitindah khamh nan si khawh lainak kha an in thanh hna," tiah a au.

LAMKALTU 16:18

Cuticun ni tampi a au lengmang hnuah Paul cu a ing a puanh i a hnulei ah aa mer i khuavang cu, "Jesuh Khrih min in amah chung khan chuak kan ti," tiah a ti. Cu cangka cun khuachia cu a chung khan a chuak.

LAMKALTU 16:19

A bawile nih kan tangka hmuhnak caan ṭha a dih cang ti kha an hmuh tikah Paul le Silas kha an tlaih hna i zapi pumhnak ah bawi hmaiah an chuahpi hna.

LAMKALTU 16:22

Cu bantukin velh an zalh hnanak ah khan mizapi kha an i ṭom ve i bawi hna nih khan Paul le Silas cu an puan kha an phoih hna i tu hna u tiah ralkap kha an fial hna.

LAMKALTU 16:23

Fak piin an tuk hna hnuah thong ah an thlak hna i thonginn bawi cu fek tein na hrenh hna lai tiah nawl an pek.

LAMKALTU 16:25

Zanṭim hrawngah khin Paul le Silas cu thla an cam i Pathian sinah thangṭhatnak hla an sa i thongtla dang nih khan an ngaih hna.

LAMKALTU 16:26

Chikkhatte ah khin li a hun i hnin i thonginn cu a hram tiangin a hninh dih. Hmakhatte ah innka vialte kha an i hung dih i thongtla pawl thir cikcin vialte kha an i phoih dih.

LAMKALTU 16:27

Thonginn bawi kha a hun i hlau i thong innka an i hun kha a hmuh tikah thongtla vialte kha an chuak dih cang tiah a ruah caah a nam kha aa zuh i amahle amah kha thah aa zal.

LAMKALTU 16:28

Sihmanhsehlaw Paul cu fak piin a au i, "Nangmah le nangmah fahnak i pe hlah, kan dihlak in kan um ko," tiah a ti.

LAMKALTU 16:29

Thonginn bawi nih khan mei rak pu u tiah a ti hna i khulrang in a lut i Paul le Silas kehram ah cun ther lengmang in a bawk.

LAMKALTU 16:30

Cun annih cu a thawh hna i, "Ka bawipale hna, khamhnak hmuhnak dingah zeidah ka tuah lai?" tiah a ti.

LAMKALTU 16:31

"Bawipa Jesuh kha zum law, nangmah he na innchungkhar he khamh nan si lai," tiah an ti.

LAMKALTU 16:32

Cun Bawipa bia cu amah le a innchung i a ummi vialte kha an chimh hna.

LAMKALTU 16:33

Cun cu zan ṭhiamṭhiam ah cun thonginn bawi nih khan a kalpi hna i an hma kha a ṭawlpiak hna; chikkhatte ah amah le a innchungkhar dihlak in tipilnak an ing colh.

LAMKALTU 16:34

Paul le Silas cu a inn ah a hun kalpi hna i rawl a pek hna. Amah nih Pathian kha a zumh caah amah le a innchungkhar cu lunglawmhnak in an khat.

LAMKALTU 16:37

Sihmanhsehlaw Paul nih palik bawi pawl kha a thawh hna i, "Kannih cu kan sualnak zeihmanh an kan hmu lo, asinain zapi hmaiah fung in an kan tuk — Rom mi kan si ve ṭung! Cun thong chungah an kan thlak. Cun atu cu a thli tein kalter an kan duh. A si kho lai lo. Rom bawi pawl cu anmah hrimhrim ra hna seh law ra kan chuah hna seh," tiah a ti.

LAMKALTU 16:39

Cucaah an va kal i ngaihthiam an va hal hna; thong chung cun an chuah hna i kan khua hin kaa dang ah kal u, tiah an nawl hna.

LAMKALTU 17:1

Amfipolis khua le Apollonia khua kha an hei palpah hna i Thesalonika khua kha an phan; khika ah Judah mi pumhnak inn pakhat a rak um.

LAMKALTU 17:2

Paul nih a tuah tawn bantukin pumhnak inn ah khan a va kal. Khika ah Sabbath ni ni thum chung, mi hna he khan Cathiang chung bia kha an i al i

LAMKALTU 17:3

Messiah cu thihnak a in awk le a thawh ṭhan awk a sinak kong kha Cathiang cun a langhter i a fianter. Paul nih cun a thawh hna i, "Hi kan chimhmi hna Jesuh hi Messiah cu a si," tiah a ti hna.

LAMKALTU 17:4

A cheu cu an lung a pem i Paul le Silas sinah khan an i fon; cun Pathian a biami Grik mi mi tampi hna le nu upa tampi hna zong kha an i fon ve.

LAMKALTU 17:5

Sihmanhsehlaw Judah mi kha an nah a chuak i khualak i a vak sawhsawhmi zeiruaramlo minung pawl kha an pumh hna i cu hna cu an au an khuang i khua kha a ning piin hnahnawhnak an tuah. Jason inn kha an va nam i an i ruahnak ah cun khika ah khan Paul le Silas kha an rak um lai i mizapi hmaiah kan chuahpi hna lai an ti.

LAMKALTU 17:10

Zan a si cangka tein unau pawl nih khan Paul le Silas cu Berea khua ah an kalter hna. Khika an va phak tikah Judah mi pumhnak inn ah khan an kal.

LAMKALTU 17:11

Khika mi hna cu Thesalonika khuami nakkhan an lung a kau deuh. An chimmi kha lungtho ngaiin an ngaih i Paul nih a chimmi kha a si taktak maw si taktak lo ti hngalhnak caah nifate in Cathiang chung kha an kawl.

LAMKALTU 17:12

Annih lak i mi tampi nih khan an zumh; cun Grik mi nu tampi mirum le upa a simi hna le Grik mi pa tampi zong nih khan an zumh ve.

LAMKALTU 17:16

Paul cu Athens khua i Silas le Timote a rak hngah lio hna ah khan cu khua cu siasal in a khah kha a hmuh i a awlok a chong.

LAMKALTU 17:17

Cucaah pumhnak inn ah khan Pathian a biami Judah mi hna le Grik mi hna he khan bia an i al lengmang i zapi tonnak hmun zongah khan khika i a rami paoh he ni fate an i al lengmang.

LAMKALTU 17:19

Cucaah Paul cu Areopagas an timi pumhnak hmun ah khan an sawm i an chuahpi. An i thawh i, "Na chim lengmangmi cawnpiaknak thar kong hi hngalh kan duh.

LAMKALTU 17:20

Na chimmi kan theihmi a cheukhat hi kan caah khuaruahhar a si i an sullam zeidah a si ti kha kan hngalhter law kan duh hnga," an ti.

LAMKALTU 17:23

Zeicahtiah nan khua chung i kaa chawh i nan biaknak hmun kha ka zoh hna tikah biakṭheng pakhat cu a cungah "Hngalh lomi Pathian Caah" tiin aa ṭial kha ka hmuh. Cu nan biakmi cu, a hngalh cu hngal hmanh hlah u law, nan sin i kan thanhmi hna hi a si.

LAMKALTU 17:24

Vawlei le a cung i a ummi thil vialte a sertu Pathian hi vancung le vawlei Bawi a si i minung sermi biakinn chungah a ummi a si lo.

LAMKALTU 17:25

Cuhleiah Pathian cu minung kha nunnak le thaw le zeizong vialte a petu a si caah minung nih an tuahpiak khawhmi kha a herhmi pakhat hmanh a um lo.

LAMKALTU 17:26

Minung pakhat chungin miphun vialte kha a ser hna i vawlei cungah hin khua a sakter hna. A hlankan in an caan le an umnak hmun kha a khiahpiak hna.

LAMKALTU 17:27

Hihi zeicahdah a tuah ti ahcun, amah kha an kawl i an dah lengmang tikah khan a hmuh tal an hmu phum hnga maw ti caah a si. Asinain Pathian cu aho kan sin hmanh hin aa hlat lo;

LAMKALTU 17:28

mi a cheukhat nih, "Amah chungah kan nung, kan cawl kan cang i khua kan sa,' an ti bantuk le, nan hla phuahtu hna nih, 'Kanmah zong a tefa kan si ve,' an ti bantuk khan a si.

LAMKALTU 17:30

Pathian nih hin, minung nih an rak hngalh lo lio caan kha cu hmu duh loin a rak umpiak ko hna, sihmanhsehlaw atu cu khuazeika i a ummi minung hmanh, nan nuncan ṭhalo kha mertak cang hna u, tiah a ti hna.

LAMKALTU 17:31

Zeicahtiah a thimmipa thawngin vawlei cung dihlak hi dinnak in biaceih awkah ni a khiah cang. Cucu a si ṭheo lai ti kha mi vialte sin i langhternak caah cu mipa cu thihnak in a thawhter," tiah a ti.

LAMKALTU 17:34

Asinain mi cheu cu amah sinah khan an i fon i a chimmi kha an zumh; cu hna cu Areopagas i biaceih bawi a simi Dionisias tehna, nu pakhat a min Damaris a simi tehna, mi dang tlawmpal kha an si.