Nitin Baibal Relnak

ROM 14:1

Zumhnak lei i thazang a dermi kha nan bu chungah rak cohlang ko hna u, an pumpak ruahnak kha rak al len hna hlah u.

ROM 14:2

Mipa pakhat cu a zumhnak nih zei ei paoh a onh ko, sihmanhsehlaw zumhnak a dermi nih cun anhringso lawng kha a ei.

ROM 14:3

Zeipaoh a eimi nih khan cu bantukin a ei ve lomi kha a zawmhtaih awk a si lo, cun zeipaoh a eimi kha anhringso lawng a eimi nih a soi awk a si ve lo, zeicahtiah Pathian nih cun a cohlan veve ko hna cu ta.

ROM 14:5

Mi pakhat nih, ni pakhat cu ni dang nakin a biapi deuh tiah a ruah, cun a dang pakhat nih, ni cu an i khat cio ko, tiah a ruah ve. Anmah le an ruahning cio kha fiang tein an ruah awk a si ko.

ROM 14:7

Ahohmanh mah ca lawngah kan nung lo, ahohmanh mah ca lawngah kan thi lo;

ROM 14:8

kan nun ahcun Bawipa caah kan nung i kan thih ahcun Bawipa caah kan thi. Cucaah kan nun ah siseh, kan thih ah siseh, Bawipa ta kan si.

ROM 14:9

Zeicahtiah Khrih a thih i a thawh ṭhan cu a nungmi he a thimi he an Bawi si awkah a si.

ROM 14:11

Zeicahtiah Cathiang nih, "Ka nun bangin, mi vialte nih ka hmaiah an khuk an i bil lai i Mi vialte nih keimah cu Pathian a si an ka ti lai, tiah Bawipa nih a ti," a ti bang khan a si lai.

ROM 14:12

Cucaah kan dihlak hin Pathian hmaiah kan kong kan i chim cio a herh lai.

ROM 14:13

Cucaah pakhat le pakhat i soi lengmang kha ngol u sih. Nan unau tlukrilhternak le sualnak chung i tlakternak ding caah zeihmanh tuah lo ding tu kha i zuam u.

ROM 14:15

Zeilo na ei ruangah na unau kha a lung na fahter ahcun, cu na tuahmi cu dawtnak chungin a chuakmi tuahnak a si ti lo. Na eimi rawl cu Khrih nih a thihhnawhmipa rawhnak ah canter hlah.

ROM 14:16

Na ca i a ṭhami thil kha congoihnak phortu ah canter hlah.

ROM 14:17

Zeicahtiah Pathian Pennak cu ei le din menmen hi a si lo, Thiang Thlarau pekmi dinnak le daihnak le lawmhnak tu hi a si deuh.

ROM 14:18

Cu bantukin Khrih rian a ṭuanmi paoh cu Pathian nih a lawmh hna i minung nih an thangṭhat hna.

ROM 14:19

Cucaah daihnak a chuahtertu thil le pakhat le pakhat thazang i peknak a bawmtu thil kha kan i tinh awk an si.

ROM 14:20

Rawl ruang menmen ah Pathian thil tuahmi kha rawk hlah u. Rawl vialte hi ei awk an si ko lai, sihmanhsehlaw midang kha sualnak chungah a tlukrilhtertu rawl ei cu zei rawl a si hmanh ah sual a si.

ROM 14:22

Cu kong ah cun nangmah nih na ruahning tein va ruat ko, Pathian le nangmah lawnglawng nih va hngal ko uh. Tuah awk a si ti i a ruahmi thil a tuah tikah a lung nih sual a phawt lomi cu lunglawmmi a si.

ROM 14:23

Sihmanhsehlaw a eimi kha a ei tikah lungawṭawm in a ummi cu Pathian nih sual a phawt, zeicah tiah a tuahmi cu zumhnak thawngin a si lo. Cun thil zeipaoh zumhnak thawngin tuah a si lomi cu sual a si.

ROM 15:1

Zumhnak ah thazang a ṭhawngmi kannih nih a dermi kha an thilrit phorh kan bawmh hna awk a si. Kanmah duhnak kha kan kawl awk a si lo.

ROM 15:2

Kan unau hna cu an ṭhatnak ding kha kan tuah awk a si, zumhnak ah an ṭhan khawh nakhnga kan ruah awk a si.

ROM 15:4

Cathiang nih lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si.

ROM 15:5

Khrih Jesuh lam hmuhsakmi nan zulhnak thawngin nannih lakah lungthin khahnak a um khawh nakhnga, lungsaunak le lungthin ṭhawnnak hram Pathian nih in bawm ko hna seh.

ROM 15:6

Cuticun lungkhat tein kan Bawipa Jesuh Khrih i a Pa Pathian cu nan thangṭhat khawh lai.

ROM 15:7

Khrih nih an cohlan hna bangin, Pathian nih sunparnak a hmuh nakhnga pakhat le pakhat i cohlang cio u.

ROM 15:8

Ka chim duhmi cu hihi a si: Khrih kha Judah mi hna ṭuankan i a can cu, Pathian nih an pupa hna sinah a tuahmi biakamnak kha fehter a si nakhnga caah a si i cu nih cun Pathian nih a bia a let lo ti kha a langhter.

ROM 15:12

Isaiah nih khan aa thawh ṭhan i, "Jesse tefa pakhat a ra lai i Jentail mi hna uktu ah ser a si lai, Cun annih nih amah cu an i bochan lai," a ti bang khan a si.

ROM 15:13

Thiang Thlarau ṭhawnnak thawngin nan i ruahchannak cu a ṭhan lengmang nakhnga, ruahchannak hram Pathian nih cun, amah nan zumhnak thawngin lunglawmhnak le daihnak he in khahter ko hna seh.

ROM 15:16

Khrih Jesuh sal sinak nawl a ka pekmi ruangah hin a si. Jentail mi cu Pathian cohlan awk tlakmi raithawinak an si nakhnga le Thiang Thlarau thawngin Pathian sin pekmi an si nakhnga, Pathian sin i a rami Thawngṭha ka chimnak ah hin tlangbawi bantuk ka si.

ROM 15:17

Cucaah cun Khrih Jesuh he kan i pehtlaihnak thawngin Pathian rian ka ṭuanmi cu ka hmai a hngal.

ROM 15:20

Ka saduhthah cu Khrih an theih bal lonak hmun i Thawngṭha chim kha a si zungzal, zeicahtiah midang i a hram an rak thawk cianak hmun i va sak cu ka duh lo;

ROM 15:24

atu cu kan tlawng kho cang rua hna lai tiah ruahchannak ka ngei. Spain ram i ka kalpah ah hin in hmu hna ning law ti cu ka duh i nan sinah tlawmpal ka cam hnuah cuka kal cu ka bawm te u law ka ti.

ROM 15:25

Sihmanhsehlaw atu hi cu Jerusalem khua ah ka va ka ta lai, khika i a ummi Pathian mi hna rian ka va ṭuanpiak ta hna lai.

ROM 15:26

Cucu zeidah a si tiah, Masidonia ram le Grik ram i a ummi Khrihfabu hna nih Jerusalem khua i a ummi Pathian mi hna lak i sifakmi hna bawmhnak ah anmah lungtho tein an thawhmi thawhlawm a um.

ROM 15:27

Cucu anmah hrimhrim nih kan tuah lai an timi te a si. Asinain, a ngaingai ti ahcun, cu misifak hna bawmh cu an rian zong a si ve ko; Judah mi nih hin thlarau lei in an hmuhmi thluachuahnak cu Jentail mi kha an hrawm ve hna bantukin Jentail mi zong nih Judah mi cu thilri lei i thluachuahnak an hmuhmi kha an hrawm ve hna awk a si ko.

ROM 15:29

Nan sin ka rat tikah Khrih thluachuahnak kha tlamtling tein kan phorh hna lai ti kha ka hngalh.

ROM 16:17

Cheunak a chuahtertu hna le zumhnak a tuaitertu, nannih nih nan hmuh ciami cawnpiaknak a ralchanhmi hna kha i ralring hna u tiah kan forh hna; annih cu hrial ko hna u.

ROM 16:18

Zeicahtiah cu bantuk rian a ṭuanmi cu kan Bawipa Khrih rian an ṭuan kha a si lo i anmah duhnak tu an tuah kha a si deuh. An hmurka ṭha le an mi hloi thiamnak in lungmawng zaran vialte kha an hlen hna.

ROM 16:19

Thawngṭha kong i zumhawktlak nan si kha a mi kip nih an theih i cucaah cun nan kongah hin ka lung aa lawm. Ṭhatnak leiah cun mifim si u ti kan duh hna, sihmanhsehlaw chiatnak leiah cun ngakchia cuampual si ko u ti kan duh hna.

ROM 16:20

Cun Pathian, kan daihnak tihna nih cun, Satan kha nan ke tangah a rial tuan lai. Kan Bawipa Jesuh vel cu nan sinah um ko seh.

ROM 16:25

Pathian cu sunparnak pe u sih. Ka chimmi Khrih kong Thawngṭha le kan hnulei chan tampi chung aa thupmi biathli kha phuan a sining in, Pathian nih cun nan zumhnak ah fek tein an dirter khawh hna lai.

ROM 16:26

Atu cu kha biatak kha profet hna ṭial bang khan phuan a si cang i zungzal hmunmi Pathian nawl bangin, mi vialte nih an zumh i a nawl cu an ngaih nakhnga, miphun dihlak sinah chim a si cang.

ROM 16:27

Amah lawnglawng Pathian a si i Amah lawnglawng zeizong vialte a hngal dihtu a simi cu, Jesuh Khrih thawngin zungzal in zungzal tiang thangṭhat si ko seh. Amen