Nitin Baibal Relnak

1KORIN 1:2

Nannih cu Pathian mithiang si awkah kawh nan si i Khrih Jesuh he nan i pehtlaihnak thawngin Pathian ta nan si. Cun Jesuh Khrih cu kan Bawi zong a si i an Bawi zong a si ve bantukin kan Bawipa Jesuh Khrih min in thla a cammi paoh cu khuazeika i a ummi an si hmanh ah Pathian ta cu an si ve.

1 KORIN 1:4

Khrih Jesuh thawngin an pekmi hna a vel ruangah hin ka Pathian cu ka lawmh zungzal.

1 KORIN 1:9

A Fapa Jesuh Khrih kan Bawipa he hawikomhnak ngeih awkah an kotu hna Pathian cu zumhawktlak a si ko.

1 KORIN 1:10

Ka u le ka nau hna, kan Bawipa Jesuh Khrih min in kan nawl hna: nan dihlak in pakhat le pakhat lungnge tein um tuah u, i ṭhen hlah u. Lungthin khat, ruahnak khat in um u.

1 KORIN 1:12

Ka chim duhmi cu: a cheu nih, "Kannih cu Paul a ṭanhmi kan si," nan timi le, a cheu nih, "Kannih cu Apollo a ṭanhmi kan si," nan timi le a cheu nih, "Kannih cu Peter a ṭanhmi kan si," nan timi le, a cheu nih, "Kannih cu Khrih a ṭanhmi kan si," nan timi hi a si.

1 KORIN 1:13

Khrih cu a cheuh in nan i cheu dih. Nan ca i vailamtahnak ah a thimi kha Paul dahra a si? Tipil nan in kha Paul zultu si awkah dahra a si?

1 KORIN 1:17

Khrih nih hin, tipil va pe hna, tiah a ka thlah lo, Thawngṭha kha va chim hna, tiah a ka thlah i cucu minung fimnak bia i bochan dingin a si lo. Zeicahtiah vailamtahnak i Khrih a thih kha minung fimnak bia in chim ahcun a hmual a lolak sual hnga.

1 KORIN 1:18

Vailamtahnak i Khrih a thihnak kong hi a tlau lio lengmangmi hna caah cun pakpalawng bia a si ko, sihmanhsehlaw khamh lio lengmangmi hna kannih caah cun Pathian hmual a si.

1 KORIN 1:21

Minung nih anmah fimnak in Pathian hngalh khawh lo ding kha Pathian nih a fimnak in a rak tuahmi a si. Kan chimmi "hruh bia" tu hin Pathian nih zumhnak a ngeimi cu khamh a duh hna.

1 KORIN 1:22

Judah mi nih cun, ahmaan maw hmaan lo ti hngalh khawhnak ding caah khuaruahharnak um kha an duh, cun Grik mi hna nih cun fimnak kha an kawl,

1 KORIN 1:23

sihmanhsehlaw kannih nih cun vailamtahnak cung i thahmi Khrih kong kha kan chim i cu kong cu Judah mi caah cun tluknak lung a si i Grik mi hna caah cun hruhnak bia a si.

1 KORIN 1:24

Sihmanhsehlaw Pathian nih a kawhmi hna caah cun, Judah mi an si zongah Jentail mi an si zongah, cu bia cu Khrih kha a si i Khrih cu Pathian hmual le Pathian fimnak kha a si.

1 KORIN 1:30

Sihmanhsehlaw Pathian nih cun kannih cu Khrih Jesuh he a kan pehtlaihter cang i Pathian nih Khrih cu kannih fimnak caah a ser cang; amah thawng cun kannih cu Pathian he kan i rem i Pathian mithiang ah kan cang i a luatmi kan si.

1 KORIN 1:31

Cucaah cun Cathiang nih, "Porhlawt a duhmi cu Bawipa nih a tuahmi kha i porhlawtpi ko hna seh," a ti bang khan, porhlawt a duhmi nih cun Bawipa nih a tuahmi tu kha an i porhlawt awk a si.

1 KORIN 2:2

Zeicahtiah nan sin i ka um lioah khan Jesuh Khrih le vailam i an thahnak kong dah ti lo cu a dang zeihmanh ruah le khah kaa timhmi a um lo.

1 KORIN 2:4

kan cawnpiaknak hna le ka phungchimmi ah khan nan lung an pemtu hna cu minung fimthiamnak holh dawhdawh kha si loin Pathian Thlarau ṭhawnnak tu kha a si deuh.

1 KORIN 2:5

Cucaah cun nan zumhnak cu minung fimnak ah aa bunhmi si loin Pathian ṭhawnnak i aa bunhmi tu a si deuh.

1 KORIN 2:6

Asinain nutling patling a si cangmi hna sinah cun fimnak bia kha ka chim ko. Sihmanhsehlaw cu ka chimmi fimnak bia cu, hi a liam lio lengmangmi chan fimnak hi a si lo, hi a liam lio lengmangmi chan a uktu hna ṭhawnnak fimnak zong a si lo;

1 KORIN 2:7

ka chimmi fimnak cu Pathian biathli fimnak, minung hngalh lomi, vawlei ser hlan hrimhrim in Pathian nih kan sunparnak ding ca i a rak timhmi fimnak tu kha a si.

1 KORIN 2:10

Cu biathli cu Pathian nih a Thlarau in kannih sinah khan a phuan. Thlarau nih cun zeizong vialte kha a dah a hriah dih, Pathian nih aa tinhmi a thukmi hmanh kha a coih dih hna.

1 KORIN 2:11

Minung cu a chung i a ummi amah a thlarau nih khan a konglam cu a dihumnak in a hngalh; cu bantukin Pathian zong cu Pathian Thlarau lawnglawng nih a konglam kha a dihumnak in a hngalh ve.

1 KORIN 2:12

Kannih kan hmuhmi thlarau cu hi vawlei thlarau hi a si lo, Pathian nih a kan pekmi vialte cu kan hngalh khawh nakhnga, Pathian nih a run thlahmi Thlarau cu kan hmuh cang.

1 KORIN 2:13

Cucaah Thlarau a ngeimi hna sinah thlarau lei biatak kha a sullam kan chim tikah minung cawnpiakmi bia kha hmang loin Thlarau cawnpiakmi bia tu kha kan hman.

1 KORIN 2:15

Thlarau a ngeimi nih cun zeizong vialte kha an ṭhat an chiat an khing an thlai khawh, sihmanhsehlaw anmah tu cu ahohmanh nih sual an phaw kho hna lo.

1 KORIN 2:16

Cathiang nih, "Bawipa cu aho nih dah a lungthin an hngalh? Amah cu aho nih dah ruahnak an cheuh khawh?" a ti bangin a si taktak. Sihmanhsehlaw kannih cu Khrih lungthin a ngeimi kan si.

1 KORIN 3:2

Nannih cu hnuk in kan cawm hna a herh ko rih, rawl hak pek nan cut rih lo caah rawl hak kan pe kho rih hna lo. Cun atu tiang hmanh ah hin nan cu rih lo,

1 KORIN 3:3

hi vawleicung mi bantukin pei nan um ko rih cu. Pakhat le pakhat nan i nahchuah i pakhat le pakhat nan i sik tikah hin nannih cu hi vawleimi nan si le hi vawlei ning in nan nunning a si kha a lang ko lo maw?

1 KORIN 3:4

Pakhat nih nan i thawh i, "Kei cu Paul lei ṭang ka si," nan ti; a dang pakhat nih, "Kei cu Apollo lei ṭang ka si," nan ti; hiti nan ti ah hin, nan umtuning cu hi vawleicung umtuning bantuk a si ti nan langhter a si ko lo maw?

1 KORIN 3:5

A ngaingai ti ahcun, Apollo cu ahodah a si? Paul cu ahodah a si? Pathian sal pei kan va si ko cu, Pathian an zumhtertu hna kha. Bawipa nih a kan pekmi rian cio kha pei kan hei ṭuan ko cu:

1 KORIN 3:6

Kei nih a ci ka tuh, Apollo nih a kung kha ti a toih, sihmanhsehlaw a ṭhantertu cu Pathian a si.

1 KORIN 3:8

A tuhtu le a toihtu kha cu zeihmanh an i dannak a um lo; an ṭuanning cio khan Pathian nih laksawng a pek ko hna lai.

1 KORIN 3:9

Zeicahtiah kannih cu Pathian ca i hmunkhat ah rian a ṭuan ṭimi kan si i nannih cu Pathian lo nan si. Nannih cu Pathian inn zong nan si fawn.

1 KORIN 3:10

Pathian nih pahrang a ka pekmi kha ka hman i inn sak a thiam ngaingaimi bantukin inn saknak ding a hram kha ka bunh, cun a dang pakhat nih a cungah khan a run sak. Sihmanhsehlaw zeitindah kan sak ti kha ahohmanh kan i ralrin awk cio a si,

1 KORIN 3:11

zeicahtiah Pathian nih Jesuh Khrih lawnglawng cu a hram caah khan a chiah cang i hram dang zeihmanh chiah awk ding a um ti lo.

1 KORIN 3:12

Cu hram cung i saknak thilri caah cun a cheu nih sui maw, ngun maw, lungvar mansung maw, an hman hna lai; cun a cheu nih thing maw, di maw, capawl maw, an hman hna lai.

1 KORIN 3:13

Cun an sakmi cio cu zeidah an lawh taktak ti kha Khrih Ni nih a langhter te hna lai. Zeicahtiah cu Ni mei nih cun an rianṭuanmi kha a hneksak cio hna lai i zeidah an lawh taktak ti cu mei nih cun a langhter lai.

1 KORIN 3:14

Inn saknak hram cungah pakhatpa nih inn a sak i cu a sakmi cu mei nih khan a hrawh khawh lo ahcun, cu pa nih cun laksawng a hmuh lai.

1 KORIN 3:15

Asinain ahohmanh a sakmi inn cu a kangh dih ahcun, cu inn cu a sung ko lai; mei chungin luat bantuk khi a si lai nain amah cu khamh a si ko lai.

1 KORIN 3:16

Pathian biakinn nan si kha nan hngalh i Pathian Thlarau nan chung i a um zong kha nan hngalh.

1 KORIN 3:17

Cucaah ahohmanh nih Pathian biakinn cu a hrawh ahcun, amah cu Pathian nih a hrawh ve lai. Zeicahtiah Pathian biakinn cu a thiangmi a si i nanmah hrimhrim cu biakinn cu nan si.

1 KORIN 3:21

Cucaah cun ahohmanh nih minung tuah khawhmi thil kha kan i porhlawt awk a si lo. A ngaingai ti ahcun zeizong vialte hi nanmah ta tu an si dih:

1 KORIN 3:22

Paul siseh, Apollo siseh, Peter siseh, hi vawlei hi siseh, nunnak siseh, thihnak siseh, atu caan hi siseh, hmailei caan khi siseh, hi vialte hi an dihlak in nanmah ta an si i

1 KORIN 3:23

nannih cu Khrih ta nan si i Khrih cu Pathian ta a si.

1 KORIN 4:1

Kannih cu Khrih sal, Pathian biathli kengtu ah khan nan kan ruah awk a si.

1 KORIN 4:2

Cu bantukin thil ken fialmi a rian biapi bik cu a bawipa sin i zumh awk tlak te i um kha a si.

1 KORIN 4:3

Cucaah cun nannih nih ka kong nan rak ka ceih len ah khan ka zei a poi lo, vawleicung biaceihnak zung zong nih ka ceih hna seh law ka zei a poi lai lo; keimah hmanh nih keimah kong hi kaa ceih kho lo.

1 KORIN 4:5

Cu a si caah a caan a phak hlanah ahohmanh na sual, na thiam va ti hna hlah u. Donghnak biaceihnak cu Bawipa a rat tik lawnglawng ah a si te lai, zeicahtiah mi nih an lungthli tein an rak i tinhmi le a muihnak ah an thuhmi an biathliruk vialte kha amah nih cun a phuan dih hna lai i cu tikah cun mi vialte nih hmuh awk an i tlakmi thangṭhatnak kha Pathian sinin an hmuh cio te lai.

1 KORIN 4:7

Midang nakin cungnung deuh ah aho nih dah an ser? Pathian pek a si lomi na ngeihmi zeital a um maw? Cucaah cun nan hmuhmi cu a lakin hei hmu hlah u law cu bang, zeitindah nan i porhlawt khawh?

1 KORIN 4:10

Kannih cu Khrih ruangah mihrut kan si; nannih tu cu Khrih chungah mifim nan si! Kannih cu kan der, nannih cu nan ṭhawng, kannih cu nautatnak kan hmu, nannih cu upatnak nan hmu.

1 KORIN 4:12

kan paw i cawmnak dingah kan kut in fak piin rian kan ṭuan.

1 KORIN 4:13

Chiat an kan serh tikah thluachuah le vanluh kan pek hna; an kan hrem tikah kan in, biaziar in an kan ti tikah bia nem in kan leh hna. Kannih cu kuthnawm hnawhnak puanchia kan si ko; nihin ni tiang hrimhrim hin vawlei cung hnawmtinphor kan si ko.

1 KORIN 4:15

Zeicahtiah Khrih chung i nan nunning ah hin zohkhenhtu cu thong hra hmanh ngei hna u law pa cu pakhat lawnglawng nan ngei. Thawngṭha nan sin i ka ratpi thawngin Khrih Jesuh chung i nan nunnak ah hin keimah hi nan pa cu ka si ko.

1 KORIN 4:20

Zeicahtiah Pathian Pennak cu holh sawhsawh le bia sawhsawh men hi a si lo, Pathian Pennak cu thil ti khawhnak ṭhawnnak pei a si cu.

1 KORIN 5:1

Nan lakah nu le pa sualnak, lawkihmi hmanh nih an i zahpi dingmi sualnak a um ti kha ka theih. Mipa pakhat cu a pa nupi he an um ṭi, an ti.

1 KORIN 5:2

Zeitindah nan i porhlawt khawh ṭheo rih ee? Ngaihchiatnak in nan khah awk tu a si nain; cu bantuk thil a tuahmi cu nan bu chungin nan chuah awk a si.

1 KORIN 5:5

hi pa cu a thlarau kha Bawipa Ni ah khamh a si nakhnga a pum cu hrawh awkah amah cu Satan sinah khan pek awk a si, ka ti.

1 KORIN 5:7

Sualnak thilnu hlun cu nan chungah rian a ṭuan. Nannih cu a thar tein rawhmi changreu nan si nakhnga cu thilnu hlun cu hlonh u. Khrihfa nan si bantukin nannih cu thilnu telh lomi Lanhtak puai changreu cu nan si; zeicahtiah kan Lanhtak puai tuufa Khrih cu raithawinak ah pek a si cang caah kan Lanhtak puai cu aa thawk taktak cang.

1 KORIN 5:8

Cucaah kan puai cu thilnu hlun, sualnak le ṭhat lonak thilnu hlun he cawhmi changreu he khan si loin thilnu aa tel lomi changreu, thiannak le biatak changreu he khan tuah u sih.

1 KORIN 5:9

Ca kan kuatmi hna chungah khan, misual mi hna he i kom hlah u, tiah ka ti.

1 KORIN 5:11

ka rak in chimh duhmi hna cu, Khrihfa ka si ve aa ti ṭung i sualnak a tuahmi, a hak a kaumi, siasal a biami, mi congoih a hmangmi, zu a rimi, mifir a simi, hi hna he hin nan i kom lai lo ka ti duhnak a si; cu bantuk mi hna he cun rawl hmanh hmunkhat ah ei ṭi hlah u.

1 KORIN 6:2

Vawlei hi Pathian mi hna nih bia an ceih lai ti kha nan hngal lo hlah maw? Vawlei hmanh hi a bia a ceihtu ding nan si ahcun, thil hme tete cu nan ceih kho lo maw?

1 KORIN 6:3

Vancungmi khi kanmah nih an bia kan ceih hna lai ti hi nan hngal lo dahra? Hi vawlei cung kan nun lio thil chinchin cu kan ceih awk pei an si cu.

1 KORIN 6:6

Nannih nih cuticun tuah loin, unau le unau cu taza nan i cuai i a zum lomi tu kha nan biathlektu ah nan hman hna.

1 KORIN 6:9

Miṭha lomi nih cun Pathian Pennak cu an co lai lo ti kha fiang tein nan hngalh ko. Nanmah le nanmah kha i hleng len hlah u; misual mi le siasal a biami le vacung pa duhmi le nu nih nu he sualnak, pa nih pa he sualnak a tuahmi le,

1 KORIN 6:10

mi thil a chutmi le hak a kaumi le zu a rimi le mi congoih a hmangmi le mifir a simi hna nih cun Pathian Pennak cu an co lai lo.

1 KORIN 6:11

A cheu cu cu bantuk cu nan rak si. Asinain sualnak in thianh nan si cang; Pathian sinah pekchanh nan si cang; Bawipa Jesuh Khrih min le kan Pathian Thlarau thawngin Pathian he remter nan si cang.

1 KORIN 6:13

Cun a cheu nih nan i thawh ṭhan i, "Rawl cu paw caah a si, paw cu rawl caah a si," nan ti; a si taktak, sihmanhsehlaw Pathian nih a donghter veve hna lai. Minung pum hi sual tuahnak caah hman ding a si lo, Bawipa rianṭuannak ca tu ah hman ding a si deuh, Bawipa zong nih pum caah rian a ṭuan ve.

1 KORIN 6:14

Pathian nih Bawipa cu thihnak in a thawhter i kannih zong a ṭhawnnak cun a kan thawhter ve lai.

1 KORIN 6:15

Nan pum cu Khrih pum a ṭengnge a si kha nan hngalh. Khrih pum a ṭengnge cu i lak riangmang in hlawhhlangnu pum a ṭengnge ah cun ka ser hnga maw? Naisai hlah!

1 KORIN 6:17

Sihmanhsehlaw Bawipa he aa pehmi cu Bawipa he thlarau in pakhat an si.

1 KORIN 6:18

Nu le pa sualnak kha hrial ko u. Sualnak dang nih cun mi hi a pum kha a hnorsuang lo, asinain nu le pa sualnak a tuahmi nih cun amah pum cung hrimhrim ah khan sualnak a tuah a si.

1 KORIN 6:19

Nan pum cu Thiang Thlarau biakinn a si kha nan hngal lo maw? Cu Thlarau cu nan chungah a um i Pathian nih an pekmi hna a si kha nan hngal lo maw? Nannih cu nanmah ta nan si lo, Pathian ta nan si;

1 KORIN 6:20

a man in cawkmi nan si. Cucaah nan pum cu Pathian sunparnak caah hmang u.

1 KORIN 7:2

Sihmanhsehlaw sualpalhnak a tam tuk hringhran caah hin, pa nih mah nupite i ngeih seh law nu nih mah vate i ngeih seh.

1 KORIN 7:3

Pa nih a nupi cungah a tuah awk a simi rian kha tlamtling tein tuah seh law nu zong nih a va cungah tuah ve seh; an herhnak ah khan an lung i riamhter ciocio hna seh.

1 KORIN 7:4

Nu hi amah pum bawi a si lo, a pum bawi cu a va kha a si; cu bantuk ṭhiamṭhiam in pa zong cu amah pum bawi a si ve lo, a pum bawi cu a nupi kha a si.

1 KORIN 7:5

Kan caan cu thlacamnak ah hman kan duh tiin pakhat le pakhat kha i reem hlah u; nan pahnih in caan khatkhat chung kha cuticun kan um lai tiah hnatlaknak nan ngeih hmasa ṭung lo ahcun; cu hmanh ah nan i sum khawh lo sual i Satan tukforhnak chungah nan tlak nakhnga lo, nu le va sinak kha thawk ṭhan ko u.

1 KORIN 7:7

A taktak ti ahcun, keimah bantuk hin um dih u law ka duh deuh; sihmanhsehlaw Pathian nih a kan pekmi laksawng kan hmuhmi cu an i dang dih cio.

1 KORIN 7:10

Aa ṭhi-um ciami caah hi bia hi chim awk ka ngei, keimah bia hmanh a si lo, Bawipa bia tu a si: nu nih a va kha a kirtak hrimhrim lai lo;

1 KORIN 7:11

a kirtak ahcun va ngei loin um lan ko seh, asilole a va he cun i rem ṭhan ko hna seh; cun pa nih a nupi kha ma hrimhrim hlah seh.

1 KORIN 7:13

Cun khrihfa nu pakhatkhat nih zumtu a si lomi va a ngeih i a va nih um ṭi kha a lung a si ko ahcun, kirtak hlah seh.

1 KORIN 7:14

Zeicahtiah a zummi a si lomipa cu a nupi he an i pehtlaihnak thawng khan Pathian cohlan awk tlak ah a cang i zumtu a si lomi nu cu a va Khrihfa a simi he an i pehtlaihnak thawngin Pathian cohlan awk tlak ah a cang. Hitihin rak si hlah seh law an fale cu lawkih fale bantuk an rak si hnga; asinain atu cu Pathian cohlan awk tlakmi an si.

1 KORIN 7:17

Ahohmanh Pathian nih laksawng an pek hna ning le Pathian nih an auh hna i nan sining cio khan um ko u. Hihi khrihfabu kip ah ka cawnpiakmi hna a si.

1 KORIN 7:20

Ahohmanh Pathian auhnak nan rak cohlan lio i nan sining khan um ko u.

1 KORIN 7:22

Zeicahtiah Bawipa nih a kawhmi sal cu Bawipa miluat a si cang; cu bantuk ṭhiamṭhiam in miluat a rak simi, Khrih nih a kawhmi, cu Khrih sal a si ve.

1 KORIN 7:23

Pathian nih man in an cawkmi nan si; cucaah minung sal ah cun i cang hlah u.

1 KORIN 7:24

U le nau hna, Pathian nih an kawh hna i nan siningte khan Pathian he i hawikomhnak chungah cun um ko u.

1 KORIN 7:32

Nan lungrethei hlah u ti kan duh hna. Nupi ngei lo pa cu Bawipa duhnak tuah kha aa zuam caah Bawipa rian ah khan lungrethei tein a ṭuan,

1 KORIN 7:33

sihmanhsehlaw nupi ngeimipa cu a nupi duhnak kha tuah aa zuam caah vawleicung thilri kha a lungre aa theihpi hna i

1 KORIN 7:34

cucaah cun kap hnih in hnuh a si. Va a ngei lomi an si ah, ngaknu thiang an si ah, pum he thlarau he Bawipa sinah khan i pek an duh caah Bawipa rian cu lungthin tak tein an ṭuan; sihmanhsehlaw va a ngeimi nu cu a va duhnak kha tuah a duh caah vawlei cung thilri ah khan a lung a um.

1 KORIN 8:2

Zeizong ka hngal ve ko, tiin aa ruatmipa nih hin a hngalh awk tlukin a hngal tawn lo.

1 KORIN 8:3

Sihmanhsehlaw Pathian a dawmipa kha Pathian nih a hngalh.

1 KORIN 8:4

Cucaah bawlnak sa ei kong ah cun hitihin ka ruah: siasal cu pakpalawng men an si ko, pathian an si lo, Pathian cu pakhat lawnglawng a si ti kha kan hngalh.

1 KORIN 8:6

sihmanhsehlaw kannih caah cun Pathian cu pakhat lawnglawng a um i amah cu kan Pa, zeizong vialte Sertu kha a si i kannih hi amah ca i a nungmi kan si; cun Bawipa cu pakhat lawnglawng a um i cucu Jesuh Khrih kha a si i amah thawng cun zeizong vialte kha ser an si i amah thawng cun kannih zong hi kan nung.

1 KORIN 8:9

Asinain ralring te tu in um u law nan luatnak kha zumhnak a dermi sualnak chung i a tlaktertu siter sual hlah u.

1 KORIN 8:10

A biana ah, mipa pakhat, a chiaṭha thleidannak a dermipa nih, siasal biaknak inn i nannih "hngalhnak a ngeimi hna" rawl nan ei cu an hmuh hna; cu nih cun bawlnak sa cu ei awk a si ko tiah a forh lai lo maw?

1 KORIN 8:11

Cucaah hi miderthawmpa, Khrih nih a thihhnawh vemi nan unaupa hi, nanmah "hngalhnak" ruangah cun a rawk lai!

1 KORIN 8:12

Cuticun nan unau hna cung i sualnak nan tuahnak thawng le a derthawmmi an chiaṭha thleidannak nan hliam hna ruangah cun Khrih cungah sualnak nan tuah a si.

1 KORIN 8:13

Cucaah rawl nih ka unau kha a sualter nakcha cun sa zeihmanh ka ei ti lai lo, ka unaupa ca i tluknak a chuahtertu si cu ka duh lo.

1 KORIN 9:1

Kei cu ka luat lo dahra? Lamkaltu ka si lo dahra? Kan Bawipa Jesuh cu ka hmu lo dahra?

1 KORIN 9:6

Barnabas le keimah lawng hi maw mah nunnak caah mahte in rian aa ṭuanpah ding cu kan si?

1 KORIN 9:7

Ralkap aho nih dah ralkap chung i an um lioah anmah tein an paw an i cawm bal? Lothlopa ahodah a lo chungin a chuakmi mitsur thei ei loin a um bal? Tuukhal ahodah a tuurun chungin a hmuhmi tuu hnuk ding loin a um bal?

1 KORIN 9:10

Asiloah a ti duh taktakmi cu kanmah dah kan si hnga? Chim hau loin, kanmah hi kan si ko. Lei a thuangtu nih siseh, rawl a ṭuantu nih siseh, kan co awk a um ve lai ti ruahchan in an ṭuan.

1 KORIN 9:12

Midang nih nan sinin cu bantuk hmuh awk kha an i ruahchan ahcun, kannih nih cun kan i ruahchan chinchin awk a si hnga lo maw? Sihmanhsehlaw kannih nih cun, cuticun kan in ti duh hna lo. Khrih kong thawngṭha hi, zeilo nih maw dawn sual lai tiin zeizong vialte kha a in tu in kan in.

1 KORIN 9:14

Cu bantuk ṭhiamṭhiam in thawngṭha a chimtu hna nih thawngṭha chim in an paw an i cawm awk a si ti cu Bawipa cawnpiakning a si.

1 KORIN 9:16

Thawngṭha ka chim ruang menmen ah hin kaa porhlawt awk a si lo. A ngaite ti ahcun, va chim, tiah fial pei ka si cu. Thawngṭha cu chim loin rak um ning law zeitluk in dik ka caah a poi hnga!

1 KORIN 9:18

A si ahcun ṭuan man zeidah ka hmuh? Ka hmuhmi cu, thawngṭha ka chimnak ka rian ah hin, cucu ka hmuh awk, khakha ka hmuh awk ti loin, alak tein ka chim i cu ka chimnak thawngin lungriamhnak ka hmuhmi hi a si.

1 KORIN 9:19

Kei cu miluat ka si, aho sal hmanh ka si lo, asinain mi tam deuh ka lak khawh hna nakhnga ti in mi kip sal ah kaa ser.

1 KORIN 9:22

Zumhnak lei i a dermi hna sinah, anmah cu ka lak khawh hna nakhnga anmah bantuk i a dermi ah kaa cang. Cucaah zeimaw ti tal in ka khamh kho hna hnga maw tiin mi kip sinah an sining paoh in ka um ve.

1 KORIN 9:23

Hi vialte hi tiin ka tuah cu thawngṭha ruangah khan a si, cu thawngṭha cu mi vialte ka hrawm khawh hna nakhnga ka duh caah a si.

1 KORIN 9:24

Tlik zuamnak ah an dihlak in tlik cu an i zuam nain laksawng a hmumi cu pakhat lawng a si ti kha nan hngalh. Cucaah laksawng hmu ding tein tli u.

1 KORIN 9:25

Zuamnak ah tel a duh vemi nih cun timhtuahnak ah khan fel tein an um tawn. Cuti i an um cu a uai khomi pangpar lukhimh hmuh awk caah khan a si; asinain kannih tu cu zeitikhmanh i a uai lomi pangpar lukhimh hmuh awk caah khan a si.

1 KORIN 9:26

Kei cu ka tlik tikah tinhmi kawl fiang tein ka ngei; kaa thongh tikah a ping a pang a thongmi bantuk ka si lo.

1 KORIN 9:27

Zuamnak hmun ah rak i zuam u tiah midang kha sawm lengmang ṭung in a sawmtu keimah kha hlawtmi si sual lai ing ti phang in ka pum cu ka hrem i fek tein ka uk.

1 KORIN 10:2

Annih nih Moses zultu si awkah minmei chung le rili chungah khan tipilnak an in.

1 KORIN 10:3

An dihlak in thlarau changreu kha an ei i

1 KORIN 10:4

an dihlak in thlarau ti kha an din. An sin i a kal lengmangmi thlarau lungpi chung khan ti cu an din i cu lungpi cu Khrih kha a si.

1 KORIN 10:8

An lak i a cheu nih an rak tuah bang khan nu le pa sualnak kha kan tuah awk a si lo, cu ruangah cun ni khat ah thong kul le thong thum an rak thi.

1 KORIN 10:9

A cheu nih Bawipa an rak hneksak bantuk khan kan hneksak ve awk a si lo, cu ti an tuah caah khan rul nih a rak cuk hna.

1 KORIN 10:10

A cheu an rak phunzai bantuk khan nan phunzai awk a si lo, cu ti an tuah caah cun Thihnak Vancungmi nih a rak thah hna.

1 KORIN 10:11

Hi vialte an cung i a tlungmi hi midang nih i zohchunh awk caah a si i kan i ralrinnak ding caah ṭial an si. Zeicahtiah kannih kan caan hi donghnak a phak dengmangnak caan a si.

1 KORIN 10:13

Tukforhnak nan cung i a tlungmi hi midang zong nih an in cio tawnmi an si ko. Pathian nih a biakamnak cu a zulh ko lai i nan in khawh leng tiangin tukforhnak cu nan cungah a tlunter lai lo. Tukforhnak nan in tikah in khawhnak thazang an pek hna lai i chuah khawhnak lam zong an serpiak hna lai.

1 KORIN 10:16

Thluachuahnak hrai ca i Pathian kan lawmh tikah, hi hrai kan din tikah hin Khrih thi kha kan i hrawm a si lo maw? Cun changreu kan ei ṭimi hi tah: hi changreu kan ei ah hin Khrih pum kan i hrawm a si lo maw?

1 KORIN 10:17

Changreu kan i phawtmi cu hlum khat a si bantukin kannih cu kan tampi nain pum khat kan si; zeicahtiah kan dihlak in cu changreu hlum khat cu kan i hrawm.

1 KORIN 10:18

Hebru mi kha ruat hna hmanh u, raithawinak ah pekchanhmi sa a eimi paoh cu Pathian biakṭheng rianṭuannak ah khan an i tel ve.

1 KORIN 10:21

Bawipa hrai le khuachia hrai cu nan din kep kho hna lai lo; Bawipa cabuai le khuachia cabuai zong nan hman kep kho hna lai lo.

1 KORIN 10:24

Ahohmanh nih kanmah ca ṭha ding lawng kha kan zoh awk a si lo, midang ca ṭha ding tu kha kan zoh awk deuh a si.

1 KORIN 10:28

Sihmanhsehlaw pakhatkhat nih, "Hi rawl hi siasal dohdanghnak rawl a si," tiah an chimh ahcun, an chimtupa ruangah le chiaṭha thleidannak ruangah, cu rawl cu va ei hlah.

1 KORIN 10:29

Cu chiaṭha thleidannak ka timi cu, nangmah lungthin kha si loin an kotupa lungthin kha ka ti duhnak a si. Mi a cheu nih nan i thawh i, "Zeicahdah midang chiaṭha thleidannak nih cun ka luatnak cu a ka dawnhkhanh lai?

1 KORIN 10:31

A si ko, sihmanhsehlaw zei nan tuah hmanh ah, nan ei ah siseh, nan din ah siseh, nan tuahmi cu a dihlak in Pathian thangṭhatnak caah siter ko u.

1 KORIN 10:33

Ka tuahningte khan tuah ve u; ka tuahmi thil paohpaoh ah hin midang lawmhtertu si kha kaa zuam tawn; keimah ca ṭhatnak ding kha ruat loin mi vialte ṭhatnak ding tu kha ka ruat deuh; cu ti ka ruah cu khamhnak an hmuh khawh nakhnga caah a si.

1 KORIN 11:3

Sihmanhsehlaw hngalhter kan duhmi hna cu Pathian cu Khrih lu a si bantukin pa cu nu lu a si i Khrih cu mi vialte lu a si.

1 KORIN 11:6

Nu nih a lu aa khuh lo ahcun i met lawlaw ko seh. Lukongh le lumeh cu nu caah cun ningzah awk a si caah a lu kha i khuh ko seh.

1 KORIN 11:7

Pa cu a lu i khuh a herh lo, zeicahtiah pa cu Pathian mui a kengmi a si i Pathian sunparnak thlalang a si. Nu tu cu pa sunparnak thlalang men a si.

1 KORIN 11:8

Zeicahtiah pa cu, nu chungin ser a si lo, nu tu kha pa chungin sermi cu a si.

1 KORIN 11:9

Cun pa cu, nu caah ser a si fawn lo, nu tu kha pa ca i sermi cu a si.

1 KORIN 11:11

Bawipa chung i kan nunning tu ah hin cun, nu hi pa caah a herh bantukin pa zong nu caah a herh ve.

1 KORIN 11:12

Nu cu pa chungin ser a si bantukin pa zong cu nu chungin a chuakmi a si ve; zeizong vialte hram cu Pathian a si.

1 KORIN 11:14

Thil umtuning ah hin, sam sau cu pa caah cun ningzak a si,

1 KORIN 11:15

sihmanhsehlaw nu caah cun i chawr awk thil a si. A sam sau cu i khuhnak ding ca i pekmi pei a si cu.

1 KORIN 11:17

Hi ti kan chimhmi hna lakah hin kan thangṭhat khawh hna lonak pakhat a um: nan i pumhnak nih hin ṭhatnak nakin chiatnak a chuahter deuh.

1 KORIN 11:18

A hmasa bik ah, nan i pumhnak ah a bubu in nan i ṭhen ti ka theih i cucu ahmaan pah ṭheo lai tiah ka zumh.

1 KORIN 11:20

Hmunkhat i nan i pumh ah khan Bawipa Zanriah ei awk i nan i pumh a si ṭung lo.

1 KORIN 11:21

Zeicahtiah nanmahle nan rawl cio pei nan ei i a cheu cu rawlṭam in nan um i a cheu cu nan rit ko kha.

1 KORIN 11:24

Pathian sinah thla a cam hnuah a cheu i, "Hihi ka pum a si, nanmah caah a si. Keimah philh lonak ah tuah u," a ti.

1 KORIN 11:25

Cu bantuk ṭhiamṭhiam in zanriah ei dih in hrai kha aa lak i, "Hi hrai hi Pathian biakamnak thar, ka thi in ka fehtermi a si. Hi hrai nan din fate keimah philh lonak caah ding u," a ti.

1 KORIN 11:26

Cucaah hi chang nan ei i hi hrai nan din fate, Bawipa a rat hlantiang a thihnak kong kha nan chim a si.

1 KORIN 11:27

Cu bantuk ve in Bawipa thangchiatnak dingin a chang cu nan ei i a hrai cu nan din ahcun, cu bantukin a tuahmi paoh cu Bawipa pum le thi cung i sualnak a tuahmi nan si.

1 KORIN 11:28

Cucaah ahohmanh nih amah le amah kha a lungthin i dap cikcek seh law cu hnuah chang cu ei seh law hrai cun ding seh.

1 KORIN 11:29

Zeicahtiah chang kha a ei i hrai in a din tikah Bawipa pum sullam kha a hngalh lo ahcun a ei a din ah khan biaceihnak aa ei aa din chih.

1 KORIN 11:30

Cucaah cun pei mi tampi nan zawt nan fah i a thih zong tlawmpal cu nan thihphah kha a si cu.

1 KORIN 11:31

Kanmah le kanmah kha ṭha tein kan i dah hmasa ahcun Pathian biaceihnak kha kan huat lai lo.

1 KORIN 11:32

Sihmanhsehlaw Bawipa nih bia a kan ceih i dan a kan tat cu vawlei sinah sualphawt chih kan si nakhnga lo caah a si.

1 KORIN 12:1

Thiang Thlarau sinin kan hmuhmi laksawng kong ah hngalhter kan duhmi hna a um.

1 KORIN 12:4

Thlarau laksawng hi a phunphun in a um, sihmanhsehlaw cu laksawng vialte a petu hna cu Thlarau ṭhiamṭhiam kha a si.

1 KORIN 12:5

Rian ṭuan hi a ning tampi a um, sihmanhsehlaw a rian kan ṭuanmi cu Bawipa ṭhiamṭhiam kha a si ko.

1 KORIN 12:7

Thlarau kan chung i a um kha phun khatkhat in a lang cio i cucu kan dihlak ca i ṭhatnak ding caah khan a si.

1 KORIN 12:8

Thlarau nih cun pakhat cu fimnak bia chim thiamnak a pek i pakhat cu hngalhnak biathuk fiang lak in chim thiamnak a pek.

1 KORIN 12:9

Cu Thlarau ṭhiamṭhiam nih cun pakhat cu zumhnak a pek i pakhat cu damter khawhnak ṭhawnnak a pek.

1 KORIN 12:10

Pakhat cu khuaruahhar tuah khawhnak a pek; cun pakhat cu Pathian bia chim thiamnak a pek i pakhat cu Thlarau sinin a rami laksawng a si maw si lo ti thleidan khawhnak a pek. Cun pakhat cu holhtheihlo in holh khawhnak kha a pek i pakhat cu cu holhtheihlo in chimmi leh khawhnak a pek.

1 KORIN 12:11

Hi thil vialte a tuahtu hi Thlarau pakhat a si, a duhning bantukin mi kha laksawng phun dangdang cio a pek hna.

1 KORIN 12:12

Khrih hi nge tampi a ngeimi pum bantuk a si; nge cu tampi an si ko nain pum cu pakhat a si ko.

1 KORIN 12:13

Cu bantukin kannih vialte zong hi, Judah mi kan si ah, Jentail mi kan si ah, sal kan si ah, miluat kan si ah, kan dihlak in pum pakhat chungah khan Thlarau pakhat nih tipil a kan pek i kan dihlak in Thlarau pakhat kha din awkah pek kan si.

1 KORIN 12:17

Pum hi a dihlak in mit va si tuah seh law, zeitindah khua a theih khawh lai? Hna va si dih seh law, zeitindah rim a theih khawh lai?

1 KORIN 12:18

Sihmanhsehlaw atu i a sining bantukte hin, Pathian nih amah duhning tein, anmahle an um nakhnga ding cio ah khan a chiah hna.

1 KORIN 12:22

A ngaingai ti ahcun, kan pum chung i a santlai deuh lo kan timi hna tel loin kan si khawh ṭung lo;

1 KORIN 12:24

aa dawh set lomi kha pei ṭha khun in kan thuamh hna cu. Kan pum aa dawhnak zawn nih cun ṭamh zong cu an herh ṭung lo. Pum cung i hmaizahnak kan baunak zawn nih khan hmaizahnak a hmuh khun nakhnga Pathian nih cuticun a tuah.

1 KORIN 12:25

Cucaah pum chungah cun i ṭhennak a um lo, a nge dangdang hna nih khan pakhat le pakhat zawn i ruahnak an ngei cio.

1 KORIN 12:26

Pum chung nge pakhatkhat nih fahnak a in ahcun a dang nge vialte zong nih khan an rak inpi ve; cun pakhatkhat nih khan thangṭhatnak a hmuh ahcun a dang vialte zong nih khan aa lawmhnak cu an rak i hrawm ve.

1 KORIN 12:27

Cucaah nannih cu nan dihlak in Khrih pum kha nan si i pumpak cio ah a nge kha nan si.

1 KORIN 12:28

Cu bantukin khrihfabu chungah hin Pathian nih mi cu an um nakhnga ding cio ah khan a chiah hna: a hmasa bik ah lamkaltu pawl, a pahnihnak ah profet pawl, a pathumnak ah cawnpiaktu pawl, cun cu hna a hun zultu ah khuaruahhar a tuahtu pawl, cun cu hna a hun changtu ah damter khawhnak pek a simi pawl, asiloah mi bawmh khawhnak pek a simi pawl, asiloah mi hruai khawhnak pek a simi pawl, asiloah holhtheihlo in holh khawhnak pek a simi pawl,

1 KORIN 12:29

An dihlak in lamkaltu lawnglawng an si dih lo, profet lawnglawng an si dih lo, cawnpiaktu lawnglawng an si dih lo. An dihlak in khuaruahhar tuah khawhnak kha an ngei dih lo,

1 KORIN 12:30

an dihlak in zawtnak damter khawhnak kha an ngei dih lo, an dihlak in holhtheihlo in holh khawhnak kha an ngei dih lo, an dihlak in holhtheihlo in chimmi leh khawhnak kha an ngei dih lo.

1 KORIN 13:2

Phungchim thiamnak laksawng ka hei ngei ko hnga i hngalhnak phun tling ka hei ngei ko hnga i biathuk vialte ka hei hngalh dih ko hna hnga; cun tlang ṭhial khawhnak zumhnak zong ka hei ngei ko hnga, sihmanhsehlaw dawtnak ka ngeih lo ahcun zeihmanh ka si lo.

1 KORIN 13:3

Ka ngeihmi thil vialte, mi ka hei ṭhenh dih ko hna hnga, cun ka pum hmanh khangh awkah ka vaa pe ko hnga, sihmanhsehlaw dawtnak ka ngeih lo ahcun ka caah ṭhathnemnak zeihmanh a um lo.

1 KORIN 13:4

Dawtnak cu thlachiat a ruat i mi cungah zaangfahnak a ngei. Dawtnak cu a nah a chuak lo, a lung a puam lo i aa porhlaw lo.

1 KORIN 13:5

Dawtnak cu tlabulbal in khua a sa lo i amah zawn lawng aa ruat lo; a thin a tawi lo, palhnak kha aa cinken peng lo.

1 KORIN 13:6

Dawtnak cu midang sualnak cungah khan diriam in a um lo, biatak tu ah khan aa lawm.

1 KORIN 13:7

Dawtnak cu a lung a dong bal lo, zumhnak a ngei, ruahchannak a ngei, a lung a sau i a thin a fual.

1 KORIN 13:8

Dawtnak cu dongh a thiam lo. Profet biachimnak cu um hmanh seh law cucu a dih lai. Holhtheihlo a um maw? Cucu a dong lai. Hngalhnak kan ngeihmi zong a dih lai.

1 KORIN 13:12

Atu i kan hmuhmi hi cu, thlalang fiang lo chung i kan mui maw chialchual in kan hmuhmi bantuk khi a si, sihmanhsehlaw cu tikah cun hmaitonh tein kan hmuh lai. Atu i ka hngalhmi hi cu a cheuchum lawnglawng a si, sihmanhsehlaw cu tikah cun Pathian nih a ka hngalhnak a tlin bantukin ka hngalhnak zong a tling ve lai.

1 KORIN 12:31

Cucaah laksawng biapi deuh a simi hna tu kha nan i tinh awk a si. Cun cu hna lak hmanh ah a ṭha bik cu atu i ka hun chim dingmi hi a si:

1 KORIN 13:13

A hmun zungzalmi thil pathum an um, cu hna cu zumhnak le ruahchannak le dawtnak an si, cu hna lak i a ngan bik cu dawtnak a si.

1 KORIN 14:1

Cucaah dawtnak hi biapi bik ah chia u. Thlarau laksawng hmuh awk kha i zuam hna u law cu hna lakah cun Pathian bia chimnak laksawng kha hmuh i zuam khun u.