Nitin Baibal Relnak

ROM 1:2

Cu Thawngṭha cu Pathian nih hlanpi in a profet hna sinin a rak kan kamh i Cathiang chung i a rak i ṭialmi kha a si i

ROM 1:4

thlarau lei in le a thiannak kong in ti ahcun, ṭhawnnak nganpi in thihnak in thawhter a sinak nih khan Pathian Fapa a si kha a langhter.

ROM 1:5

Amah thawngin Pathian nih lamkaltu sinak kha a ka pek i miphun kip chungmi kha zumhnak le Pathian nawlngaihnak i phakter awkah a ka fial;

ROM 1:6

cu hna lakah cun nannih, Rom khua ah a um i Pathian nih Jesuh Khrih ta si dingin an kawhmi hna zong nan i tel ve.

ROM 1:8

A hmasa bik ah, nan dihlak ruangah ka Pathian cu Jesuh Khrih thawngin ka lawmh; zeicahtiah vawlei khuazakip ah nan zumhnak thawng hi an rak theih dih cang.

ROM 1:9

Ka chimmi bia hi ahmaan tiah Pathian cu tehte ah kaa lak ngam — cu Pathian rian, a Fapa kong Thawngṭha chim hi ka lungthin dihlak in ka ṭuanmi cu a si.

ROM 1:10

Thla ka cam fate nannih kan hngalh zungzal hna cu Pathian nih a hngalh ko. Cun Pathian sinah cun, annih cu zei maw ti tal in ka hmuhter ko hna, tiin thla ka cam lengmang.

ROM 1:11

Zeicahtiah nanmah hmuh cu kaa ngaih hringhran i nanmah he thlarau thluachuahnak i hrawm i nanmah thazang pek cu ka duh ngaingaimi a si.

ROM 1:12

Ka chim duhmi cu, pakhat le pakhat kan i bawm cio hnga; ka zumhnak nih nannih an bawmh hna hnga i nan zumhnak nih kei zong a ka bawmh ve hnga, ti hi a si.

ROM 1:14

Miphun vialte hna sinah leiba ka ngei, a fimmi si hna seh, a hrutmi si hna seh, cathiammi si hna seh, cathiam lomi si hna seh, an dihlak cungah leiba ka ngei.

ROM 1:15

Cucaah cun nannih Rom khua i a ummi sin zong i Thawngṭha chim ka duhnak cu a si.

ROM 1:16

Thawngṭha hi ka zahpi lo, zeicahtiah a zummi vialte hna caah Pathian khamhnak hmual a si, Judah mi hna caah a si hmasa i cun Jentail mi hna ca zongah a hung si.

ROM 1:17

Cucu zeitindah a hung si ti ahcun, Thawngṭha nih cun Pathian nih zeitindah minung kha Amah he aa remter hna ti kha a langhter i Cathiang nih, "Zumhnak thawngin Pathian he aa remmi cu an nung lai," a ti bang khan, Pathian he i remnak cu a hram in a dong tiang zumhnak thawngin a si.

ROM 1:18

Sihmanhsehlaw Pathian thinhunnak cu vancung in a rung lang i minung sualnak le ṭhat lonak dihlak cungah khan a rung tlung; cu an ṭhat lonak cu biatak kha lang kho loin a dawntu an ṭhat lonak kha a si.

ROM 1:19

Minung cu Pathian kong hngalh khawh a simi thil hna kha Pathian hrimhrim nih fiang tein a hmuhsak ko hna nain

ROM 1:20

an hmu duh lo, cucaah dan a tat hna. Vawlei a ser hramthawkte khan Pathian nih cun, hmuh khawh a si lomi a sining, zungzal hmunmi a ṭhawnnak le a Pathian sinak kha, fiang tein a langhter ko. Cucaah i silhnalh khawhnak zeihmanh an ngei lo!

ROM 1:23

thih a thiam lomi Pathian tu kha bia loin thih a thiammi minung le va le saram le a lawn in a lawnmi thilnung he aa loin sermi milem tu kha an biak hna.

ROM 1:24

Cuticun minung cu, cu bantuk mihrut cu an si caah, Pathian nih khan, an lungthin nih tuah a duhmi thil fihnung kha a tuahter ko hna i pakhat le pakhat cungah ningzak thil kha an tuah.

ROM 1:26

Cuti an tuah caah cun, minung cu Pathian nih ningzak a simi pumsa duhnak ah khan a thlah hna. Nu hmanh nih khan ningcang tein hman awk a simi an nu sinak cu ningcang lo piin an hman i pakhat le pakhat kha an sual.

ROM 1:27

Cu bantuk ṭhiamṭhiam in pa zong nih khan ningcang tein nu he um awk cu an hlawt riangmang i anmah le anmah kha an sual. Cu bantuk ningzah awk thil cu pa nih khan an tuah caah cu bantuk thil ṭhalo nih hmuh awk a tlakmi dantatnak cu an hmuh.

ROM 1:32

Hi bantukin a nunning a simi cu thih awk a tlakmi a si, tiah Pathian nawlbia nih a timi kha an hngalh ko. Asinain hi bantuk thil cu anmah nih an tuah lengmang lawng si loin midang a tuah vemi zong kha an hnatlakpi hna.

ROM 2:1

Cucaah aho na si hmanh ah silhnalh khawhnak lam zeihmanh na ngei lo, zeicahtiah midang kha sual na phawt hna tikah, an tuahmi kha na tuah ve ko ṭung caah, nangmah lila sual naa phawt a si ko.

ROM 2:3

Sihmanhsehlaw nangmah nih, cu sual na phawtmi hna thil hrimhrim kha na tuah ve ko hna caah, Pathian sualphawtnak cu ka luat lai, tiah i ruat hlah.

ROM 2:4

A zaangfahnak a nganmi le a lungsaunak le a thinfualnak zong zeirello in um hlah. Pathian nih na cung i zaangfahnak a ngeih cu, i ngaichih seh ti aan duh caah a si ti cu na hngalh ko ṭung.

ROM 2:5

Asinain na lung cu a hak i a ṭhawng. Cucaah Pathian nih a thinhunnak le ding tein bia a ceihnak a phuan ni i na in laimi dantatnak cu na nganter chin men ko.

ROM 2:6

Pathian nih cun aho paoh kha an tuahmi ningin a rulh hna lai.

ROM 2:7

Micheu nih thil ṭha kha an tuah lengmang i sunparnak le upatnak le zungzal nunnak kha an kawl; cu hna cu Pathian nih zungzal nunnak kha a pek ko hna lai.

ROM 2:10

Sihmanhsehlaw ṭhatnak a tuahmi vialte cu Pathian nih sunparnak, upatnak le daihnak kha a pek hna lai; pek hmasami cu Judah mi kha an si lai i cun Jentail mi kha an si ve lai.

ROM 2:13

Zeicahtiah cun minung cu Pathian he remter a sinak cu Nawlbia theih thawngin si loin Nawlbia nih tuah u a timi tuah thawngin a si.

ROM 2:15

Nawlbia nih, tuah u, a timi cu an lung chungah aa ṭial ko ti kha an ziaza in an langhter. Cun anmah lungthin lila nih a zeimaw caan ah sual a phawt hna i a zeimaw caan ah thiam a coh hna caah, an lung chungah aa ṭial ko ti cu an chiaṭha thleidannak nih khan a langhter ko.

ROM 2:16

Cucaah Pathian nih Jesuh Khrih thawngin minung lungthli ruahnak kha bia a ceih Ni ah cun hi bantuk hin a si te lai ti hi ka chimmi Thawngṭha nih a chimning cu a si.

ROM 2:18

Pathian nih tuah hna seh ti an duhmi hna kha nan hngalh i ahmaanmi thil i thim awk kha Nawlbia thawngin nan hngalh;

ROM 2:19

mitcaw lam hruaitu kan si i mui lak i a ummi hna caah ceunak kan si nan ti;

ROM 2:20

a hrutmi cawnpiaktu le a nomi hna saya kan si nan ti; cun Nawlbia chungah hin hngalhnak le biatak cu tling tein kan hmuh nan ti.

ROM 2:21

Nannih midang a cawnpiaktu saya hna, zeicahdah nanmah cu nan i cawnpiak kun lo? "Fir hlah u," tiah phung a chimtu hna, zeicahdah nan fir kun?

ROM 2:24

Cathiang nih, "Nanmah Judah mi ruangah Jentail mi nih Pathian kha an thangchiat," a ti.

ROM 2:25

Nawlbia cu nan ngaih ahcun, nan cuarpar tannak cu san a tlai, sihmanhsehlaw nan ngaih ṭung lo ahcun i tan lo lawlaw in rak um u law a ṭha deuh hnga.

ROM 2:26

Cuarpar aa tan lomi Jentail mi nih Nawlbia kha a zulh ahcun, Pathian nih aa tan tluk ah a rel hnga lo maw?

ROM 2:28

A ngaingai ti ahcun, ahodah Judah mi taktak, a cuarpar aa tan taktakmi cu a si? Lenglei in Judah mi a si i a cuarpar aa tannak cu pumsa in a simi si loin

ROM 2:29

chunglei in Judah mi a si i a lung chungin cuarpar aa tanmi kha Judah mi taktak cu a si. Cucu ṭialmi Nawlbia rian ṭuannak kha si loin Pathian Thlarau rianṭuannak kha a si. Cu bantuk mipa cu minung sinin si loin Pathian sinin thangṭhatnak kha a hmu.

ROM 3:9

A si ahcun, kannih Judah mi hi tah, Jentail mi hna nakin kan dirhmun a ṭha deuh hlei kun maw? Ṭha deuh hlei nemmam hlah. Ka langhter cang bang khan Judah mi he Jentail mi he kan dihlak in sualnak ṭhawnnak tang i a ummi kan si.

ROM 3:10

Cathiang nih, "A dingmi ahohmanh an um lo,

ROM 3:11

Pathian a hngalmi ahohmanh an um lo, Pathian a kawlmi ahohmanh an um lo.

ROM 3:12

Minung nih an dihlak in Pathian kha an pialtak i a pingah an kal dih; Ṭhatnak a tuahmi ahohmanh an um lo, pakhat hmanh an um lo,

ROM 3:20

Nawlbia zulhnak thawngin ahohmanh Pathian hmai i thiam a co khomi an um lo. Nawlbia nih a tuahmi cu, an sualnak hngalhter kha a si ko.

ROM 3:21

Sihmanhsehlaw atu cu nawlbia he i pehtlaihnak thawngin si hleng lo tein Pathian he i pehtlaihnak lam kha kan caah a hung awng i cu lam cu nawlbia le profet hna nih ahmaan tiin tehte an khaanmi lam kha a si.

ROM 3:22

Cu lam, Pathian he i remnak lam cu Jesuh Khrih zumhnak thawngin a si i Jesuh Khrih a zummi ca paoh ah a si dih. Ahohmanh i thleidan ding a si lo,

ROM 3:23

zeicahtiah mi vialte cu kan sual dih cio ko i Pathian sunparnak kha kan bau dih cio ko.

ROM 3:24

Sihmanhsehlaw kannih a kan tlantu Jesuh Khrih thawngin Pathian nih a vel cu a lak tein a kan pek i amah Pathian he cun a kan remter.

ROM 3:25

Jesuh Khrih cu Pathian nih a thi in ngaihthiamnak sertu ah a tinhmi a si i cu ngaihthiamnak cu Jesuh Khrih zumhnak thawngin hmuh ding a si. Pathian nih cu bantukin minung he remnak a tuah cu a dinnak kha langhter a duh caah a si. Cu a langhterning cu hitihin a si: hlan lioah cun a lung a sau caah mi nih an tuahmi sualnak kha i hmuhter duh loin a um;

ROM 3:26

cun atu caan ah cun Pathian ding a si kha aa langhter i Jesuh Khrih a zummi paoh kha a luatter hna.

ROM 3:27

A si kun ahcun, kan i uan khawh awk zeital a um maw? Um hlah. Zei ruangah dah? Nawlbia kan zulh ruangah maw? Si hlah. Sihmanhsehlaw kan zumh ruangah a si.

ROM 3:28

Zeicahtiah minung cu Pathian he remter a sinak cu zumhnak thawng lawnglawng in a si, Nawlbia nih, tuah u, a timi tuahnak thawngin a si lo, tiah pei kan ti cang kha.

ROM 3:30

Pathian cu pakhat pei a si cu, Judah mi cu an zumhnak thawngin amah he cun a remter hna lai i Jentail mi zong cu an zumhnak thawng in a si ṭhiamṭhiam ve ko lai.

ROM 3:31

Cu ti kan ti tikah cun Nawlbia kha zumhnak in kan hlawt tinak a si maw? Si hrimhrim hlah, Nawlbia cu kan dirhṭhoh lehlam a si.

ROM 4:2

A tuahmi thil hna thawngin Pathian he remnak a hmuh a si ahcun, i porhlawt awk a ngei hnga. Sihmanhsehlaw Pathian hmaiah cun zeihmanh i uan awk a ngei lo.

ROM 4:3

Cathiang nih, "Abraham nih khan Pathian a zumh i cu a zumhnak ruangah cun Pathian nih miding bantukin a cohlan," tiah a ti.

ROM 4:4

Rian a ṭuanmi cu ṭuan man pek a si tawn; a nihlawh cu laksawng a si tiah tipiak a si bal lo, a ṭuan man i a hmuhmi a si.

ROM 4:5

Sihmanhsehlaw rianṭuannak si loin zumhnak tu a ngeimi nih cun, Pathian nih a sualmi cu a sual lo ah a chiah hna tiah a zumh i cu a zumhnak cu Pathian nih amah he remternak caah a lakpiakmi cu a si.

ROM 4:6

Pathian nih rianṭuannak tel loin, miding bantuk ah a cohlanmipa aa lawmhnak kong David nih a chim tikah, hihi pei a sullam a chim duhmi cu a rak si cu:

ROM 4:7

"Pathian nih an ṭhat lonak a ngaihthiam i an sualnak a khuhpiakmi hna cu an vaa lawm dah!

ROM 4:8

Pathian nih sualnak a tuahmipa, a sualnak sual i a relpiak lomipa cu a vaa lawm dah!"

ROM 4:10

Cucu zeitik ah dah a rak si? Abraham kha cuarpar aa tan hlanah maw aa tan hnuah dah? Aa tan hlanah a si, aa tan hnuah a si lo.

ROM 4:11

A cuarpar aa tan cu a hnuah a si, Abraham nih a cuarpar aa tannak cu a zumhnak ruangah Pathian nih cuarpar aa tan hlan in miding in a cohlan cang ti hmelchunhnak caah a si. Cucaah Abraham cu, Pathian a zum i an cuarpar an i tan lo nain Pathian nih miding in a cohlanmi vialte hna, thlarau lei an pa a si.

ROM 4:13

Pathian nih Abraham le a tefa hna cu, vawlei hi Abraham ta a si lai, tiin bia a kamh hna. Hiti in bia a kamh hna cu Abraham nih khan Nawlbia kha a rak zulh caah a si lo, sihmanhsehlaw Pathian kha a zumh i Pathian nih miding in a cohlan ca tu ah khan a si.

ROM 4:14

Zeicahtiah Nawlbia a zulmi lawng kha rocotu cu an si ahcun zumhnak cu pakpalawng a si ko hnga i biakamhmi thil cu pakpalawng men a si ko hnga,

ROM 4:16

Cu biakamnak cu velngeihnak thawng lawnglawng in a si i Abraham tefa vialte hna caah khan a si, Nawlbia a zulmi hna ca lawngah khan si loin Abraham zumh bantukin a zummi hna dihlak caah khan a si ti hngalhnak caah zumhnak cungah khan a hram cu bunh a si.

ROM 4:18

Ruahchan ding zeihmanh a um lo zongah hnabeisei ngaiin a rak zumh ṭhiamṭhiam caah khan Cathiang nih, "Na tefa hna cu arfi zat an si lai," tiah a ti bang khan "Miphun tampi hna pa" ah khan a cang.

ROM 4:19

Abraham cu kum za khat dengmang a si cang, sihmanhsehlaw mithi bantuk a si ko cangmi a pum le Sarah nih fa a hrin khawh lonak kha a ruah tikah a zumhnak cu a der hlei lo.

ROM 4:20

Pathian biakamhmi kha zum loin a um hlei lo, a zumhnak nih cun ṭhawnnak in a khahter i Pathian kha a thangṭhat ko.

ROM 4:21

Pathian nih bia a ka kamhmi cu a tuah khawh hrimhrim lai ti kha fiang tein a zumh.

ROM 4:22

Cucaah cun Abraham cu zumhnak thawngin "Pathian nih miding in a cohlan".

ROM 4:23

"Miding in a cohlan" ti bia hi Abraham ca lawngah ṭial a si lo.

ROM 4:24

Jesuh kan Bawipa thihnak in a thawhtertu a zummi, miding in cohlan ding kanmah ca zongah hin ṭial a si ve.

ROM 4:25

Amah cu kan sual ruangah thihnak phakter a si i Pathian he kan i remnak hnga dingah nunnak ah thawhter a si.

ROM 5:1

Atu cu zumhnak thawngin thiamcoter kan si caah kan Bawipa Jesuh Khrih thawngin Pathian he kan i rem.

ROM 5:2

Jesuh Khrih nih cun kan zumhnak thawngin Pathian velngeihnak chungah cun a kan luhpi i cu chungah cun atu hi kan um. Cucaah Pathian sunparnak kan i hrawm ve lai ti kan i ruahchan i kan tha a nuam.

ROM 5:3

Cun harnak kan inmi zongah hin kan i lawm ko, zeicahtiah harnak nih cun in khawhnak kha a kan ngeihter i

ROM 5:4

in khawhnak nih cun ziaza a kan ngeihter i ziaza nih cun ruahchannak kha a kan ngeihter; ruahchannak nih cun a kan deuh lo,

ROM 5:5

zeicahtiah a kan pekmi Thiang Thlarau thawngin kan lung chungah Pathian nih a dawtnak cu a toih in a kan toih.

ROM 5:6

Zeihmanh a tuah kho lomi kan si ko lioah khan, cu caan thengte ah cun mi ṭha lomi kan caah Khrih kha a thi.

ROM 5:8

Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi.

ROM 5:9

A thihnak hmanh nih Pathian he a kan remter ahcun zeitluk in dah Pathian thinhunnak chung cun amah nih cun a kan khamh chinchin lai.

ROM 5:10

Kannih cu Pathian ral kan rak si, sihmanhsehlaw a Fapa thihnak thawngin a hawi ah a kan ser cang. Atu cu Pathian hawikom kan si cang caah Khrih nunnak nih cun zeitluk in dah a kan khamh chinchin lai.

ROM 5:11

Cu lawng cu a si rih lo, kannih cu Pathian hawikom i a kan sertu kan Bawipa Jesuh Khrih thawngin Pathian ah cun kan i lawm.

ROM 5:12

Sualnak cu mipa pakhat thawngin vawlei cungah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.

ROM 5:13

Nawlbia a um hlanah khan vawlei cungah hin sualnak a rak um ko, sihmanhsehlaw nawlbia a rak um lonak hmun ah khan cun sualnak cu sual ah relpiak an si lo.

ROM 5:14

Asinain Adam caan in Moses caan tiang thihnak nih mi vialte kha a uk dih hna; Adam nih Pathian nawlbia a buarnak thawngin a tuahmi sualnak bantuk a tuah lomi zong kha a uk ko hna. Adam cu a ra lai dingmi hmanthlak a rak si.

ROM 5:15

Sihmanhsehlaw cu hna pahnih cu an i khat lo, zeicahtiah Pathian laksawng cu Adam sualnak bantuk kha a si lo. Kha mipa pakhat sualnak ruangah khan mi tampi an thi taktak ko. Sihmanhsehlaw kha pa ṭhat lonak nakkhan Pathian vel cu tam piin a ngan deuh i cu bantuk ṭhiamṭhiam cun mipa pakhat Jesuh Khrih vel thawngin mi tampi cungah a tlungmi Pathian laksawng cu a ngan deuh.

ROM 5:16

Cun Pathian laksawng le mipa pakhat sualnak kha an i lo lo. Kha sualnak a hun zultu kha cu, "Na sual," ti biakhiahnak a si; sihmanhsehlaw sualnak hi zat riamruam a hun zultu cu, kan phu kan tawk lopi a simi laksawng, "Na sual lo," ti biakhiahnak hi a si.

ROM 5:17

Mipa pakhat sualnak thawngin, cu mipa ruangah cun, thihnak nih khan minung cu uk hram a hun thawk hna. Sihmanhsehlaw mipa pakhat, Jesuh Khrih tuahmi chungin a chuakmi cu zeitluk in dah a ngan deuh! Mipa pakhat thawngin thihnak cu a um a si ahcun, Pathian velngeihnak duhdim le dinnak a laksawng a hmumi vialte hna cu, mipa pakhat Jesuh Khrih thawngin thlarau nunnak a ṭhawng chinchinmi an ngei lai.

ROM 5:18

Cucaah cun sualnak pakhat tuahmi nih mi vialte kha sual a phawt hna bantukin dinnak pakhat tuahmi nih mi vialte kha a luatter hna i nunnak a pek hna.

ROM 5:19

Mipa pakhat nawlngaih lo ruangah mi tampi kha misual i ser an si bantukin mipa pakhat nawlngaih ruangah mi tampi cu miding ah ser an si lai.

ROM 5:20

Nawlbia cu a rung um i palhnak kha a karh chinchin, sihmanhsehlaw sualnak a karhnak hmun ah khan Pathian vel cu a karh chinchin ve.

ROM 5:21

Cucaah sualnak nih cun thihnak kha hmang in a kan uk bantukin Pathian vel nih cun dinnak kha hmang in a kan uk i Jesuh Khrih kan Bawipa thawngin zungzal nunnak ah a kan kalpi.

ROM 6:1

A si ahcun zeitindah kan ti lai? Pathian vel cu karh chinchin seh tiah sualnak cu kan tuah chin lengmang lai maw?

ROM 6:2

Tuah naisai hlah. Sualnak ah cun kan thi cang, zeitindah cu chungah cun kan um peng khawh lai?

ROM 6:3

Khrih Jesuh he pehtlaihnak chung i tipil kan in ah khan a thihnak he i pehtlaihnak chungah kan i hnim ti kha nan philh dahra?

ROM 6:4

Cucaah tichung i tipilnak kan vung in ah khan amah he vui ṭi kan si i a thihnak ah khan kan thi ve; cu bantuk ṭhiamṭhiam in Khrih cu Pa sunparnak ṭhawnnak nih a thawhter bang khan kannih zong nunnak thar ah kan nung ve lai.

ROM 6:5

A thihnak ah amah he kan thih ṭi ahcun, nunnak i thawhter a sinak ah kannih zong thawh ṭiter kan si ve lai.

ROM 6:6

Kan minung hlun cu Khrih he vailam cungah thah a si cang ti kha kan hngalh. A sualmi kan minung hlun cu zeicahdah thah a si ti ahcun, sualnak sal kan si tinak hnga lo caah a si.

ROM 6:7

Cucu zeitindah a si ti ahcun minung cu a thih tikah cun sual ṭhawnnak chung khan a luat.

ROM 6:8

Kannih cu Khrih he kan thih ṭi cang ahcun, amah he kan nung ṭi lai ti zong kha kan zumh.

ROM 6:9

Zeicahtiah Khrih cu thihnak in thawhter a si cang i a thi ti lai lo ti kha kan hngalh — thihnak nih a cungah nawl ngeihnak zeihmanh a ngei ti lo.

ROM 6:10

A inmi thihnak cu voi khat ah za lakin sualnak ruang i a thih kha a si; cun atu i a nunmi nunnak cu Pathian ca nunnak a si.

ROM 6:11

Cu bantukin nannih zong nih, kannih cu sualnak ah kan thi cang i asinain Khrih Jesuh he i pehtlaihnak thawngin Pathian ah kan nung tiah nan i ruah awk a si.

ROM 6:12

Cucaah thih a hmangmi nan pum kha sualnak nih uk ti hlah seh law, pumsa duhnak kha in zulhter ti hna hlah seh.

ROM 6:13

Cun nan pum a zeihmanh kha thil ṭhalo tuahnak ding caah sualnak kha pe ti hlah u. Thihnak in nunnak ah thawhter ṭhanmi bantukin Pathian sin tu ah i pe u law dinnak tuahnak ding caah nan pum cu a ningpi in Pathian cu pe ko u.

ROM 6:14

Sualnak nih cun in uk hrimhrim ti hna hlah seh, zeicahtiah nawlbia tangah nan um ti ṭung lo, Pathian vel tangah pei nan um cang cu.

ROM 6:15

A si kun ahcun zeitin? Nawlbia tangah um ti loin Pathian vel tangah kan um cang caah kan sual awk a si lai maw? Si hrimhrim hlah.

ROM 6:16

Bawi pakhatkhat sinah na nawl kan ngaih lai, tiin nan i pek ahcun nannih cu cu bawi a nawl nan zulhmi sal cu nan si — cu bantukin sualnak cu a nawl nan zulh ahcun, sualnak sal cu nan si i sualnak nih a chuahpimi cu thihnak a si; cun cu bantuk ṭhiamṭhiam cun Pathian cu a nawl nan zulh ahcun, cu nawlngaihnak nih a chuahpimi cu Pathian he i remnak kha a si.

ROM 6:18

Sualnak chungin luatter nan si cang i dinnak sal ah khan nan i cang cang.

ROM 6:19

Hi bantukin tahchunhnak bia ka hman hi, nannih nih nan hngalh khawh deuh nakhnga ka duh caah a si. Hlanah cun a ṭha lomi thil tuah awkah thurhnawmhnak le ṭhat lonak sal nan rak si. Cu bantuk ṭhiamṭhiam in atu cu a thiangmi thil tuah awkah dinnak sal nan si awk a si.

ROM 6:20

Sualnak sal nan rak si ah khan dinnak chungin nan rak luat;

ROM 6:21

asinain zeital a miak nan hmu maw? Atu i nan i zahpimi thil hna dah ti lo hi cu, zeihmanh nan hmu lo. Cu hna an donghnak cu thihnak a si.

ROM 6:22

Sihmanhsehlaw atu cu sualnak chung khan luatter nan si cang i Pathian sal nan si cang; nan miakmi cu Pathian sinah pekchanhmi nunning a si i cu nih a chuahpimi cu zungzal nunnak a si.

ROM 6:23

Zeicahtiah sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.

ROM 7:4

Cu bantuk cu nannih zong nan si ve, ka naule hna. Nawlbia lei in ti ahcun nannih cu a thimi nan si cang, zeicahtiah Khrih pum chungah nan i tel cang; cun Pathian rian ah santlaimi kan si nakhnga, atu cu thihnak in thawhtermipa ta kha nan si cang.

ROM 7:5

Kan minung sining in kan rak nun lioah khan Nawlbia nih a cawlcanghtermi kan pumsa duhnak hna kha kan pum chungah hin rian an rak ṭuan i an theitlai cu thihnak a si.

ROM 7:6

Sihmanhsehlaw thong chungah a rak kan hrengtu Nawlbia ah khan kan thih cang caah Nawlbia khan kan luat cang. Cucaah ning hlun, ṭialmi nawlbia lam zulh khan Pathian rian cu ṭuan ti loin ning thar, Thlarau lam zulh in kan ṭuan cang.

ROM 7:7

A si ah zeitindah kan ti lai? Nawlbia cu a sual hnga maw? Sual hlah. Sihmanhsehlaw sualnak cu sual a si kha a kan hngalhtertu cu Nawlbia cu a si. Nawlbia nih, "Mi thil na mit va thi hlah," tiah ti hlah seh law, mi thil mitthit cu zeidah a si ti kha ka hngal hnga lo.

ROM 7:8

Nawlbia kha hmang riangmang in sualnak nih cun ka chungah mi thil mitthitnak a phunphun kha a chuahter. Zeicahtiah nawlbia um lo ahcun sualnak cu a thi ko.

ROM 7:9

Keimah hrimhrim zong hi hlanah cun nawlbia loin ka rak nung, sihmanhsehlaw nawlbia kha a rat tikah sualnak cu a tho i ka thi.

ROM 7:10

Cun nunnak chuahpitu ding i ruahmi nawlbia cu ka caah thihnak chuahpitu lehlam a si.

ROM 7:12

Cucaah Nawlbia cu a thiang i tuah awk timi cu a thiang ahmaan i a ṭha ko.

ROM 7:13

Cuti ti tikah cun a ṭhami nih ka thihnak a tlunter ti a si hnga maw? Si hlah. Thihnak a tluntertu cu sualnak a si. Sualnak nih cun, sualnak a sining taktak kha a langh nakhnga ṭhatnak kha i hman riangmang in ka cungah thihnak kha a tlunter. Cucaah nawlbia thawng khan sualnak a sual zia cu a lang chinchin.

ROM 7:14

Nawlbia cu thlarau lei thil a si, cucu kan hngalh ko. Sihmanhsehlaw kei cu titsa mi ka si, sualnak sal ah a zuarh in zuarhmi ka si.

ROM 7:15

Ka tuahmi hi a sullam ka hngal kho hna lo, zeicahtiah tuah ka duhmi kha ka tuah hna lo i tuah ka duh lomi tu kha ka tuah hna.

ROM 7:16

Tuah ka duh lomi ka tuah tikah hin, cu nih cun Nawlbia cu ahmaan ko ka ti ve, ti kha ka langhter.

ROM 7:17

Cucaah cu thil a tuahtu ngaingai cu keimah kha si loin ka chung i a ummi sualnak tu kha a si.

ROM 7:18

Ka chungah hin — ka minung sining ah hin — ṭhatnak a um lo ti kha ka hngalh. Zeicahtiah ṭhatnak tuah duhnak kha ka chungah um hmanh seh law ṭhatnak cu ka tuah kho lo.

ROM 7:19

Tuah ka duhmi ṭhatnak kha tuah loin tuah ka duh lomi ṭhat lonak tu kha ka tuah tawn.

ROM 7:21

Cucaah thil umtuning cu hitihin a si ti kha ka hngah: a ṭhami thil tuah ka duh tikah khan ṭhat lonak kha ka pawngte ah a rak um ko.

ROM 7:22

Ka chunglei mi cu Pathian phung ah khan aa lawm;

ROM 7:23

sihmanhsehlaw ka chung i phung dang a rak um ve kha ka hngalh — cu phung cu ka lung nih a ṭha a timi phung a rak dohtu kha a si. Cu phung nih cun, ka pum chung i rian a ṭuanmi sualnak phung sal ah khan a ka ser.

ROM 7:24

Mi lungrethei ka va si dah! Thihnak i a ka kalpitu pum chung hin aho nih dah a ka khamh lai? Pathian lawnglawng nih kan Bawipa Jesuh Khrih thawngin a ka khamh lai;

ROM 7:25

Pathian cu lawm ko u sih. Cucaah ka sining cu hihi a si ko: keimah lawngin ti ahcun, ka lung lawng in Pathian nawl cu ka zulh khawh, ka minung sining tu cu sualnak phung kha a zul ko.