PATHIAN NAWL NGEIHLO DANTATNAK

DEUTERONOMI 28:15

"Sihmanhsehlaw nihin ah kan pekmi hna phungbia le nawlbia vialte kha fel tein ulh awkah Bawipa nan Pathian bia cu zeirello in nan um ahcun hi chiatnak vialte hi nan cungah a tlung lai i an zulh hna lai.

DEUTERONOMI 28:16

Khua chungah chiat nan tong lai, lo chungah chiat nan tong lai.

DEUTERONOMI 28:17

Nan bawm le nan chang nennak kheng hna cu chiat an tong lai.

DEUTERONOMI 28:18

Nan pum theitlai le nan vawlei theitlai le nan saṭil karhnak le nan tuurun fano hna cu chiat an tong lai.

DEUTERONOMI 28:19

Nan luh leiah chiat nan tong lai, nan chuah leiah chiat nan tong lai.

DEUTERONOMI 28:20

"Nan ka hlawt caah, cu ṭhat lonak nan tuahmi ruangah, nan rawk i khulrang in nan loh hlantiang, zeizong nan tuahmi kip ah khan Bawipa nih nan cungah chiatnak le hnahnawhnak le hnabeidonghnak a tlunter lai.

DEUTERONOMI 28:21

Co awkah nan luhhnawhmi ram in an thianh hna hlantiang, Bawipa nih rai kha nannih sinah a behter lai.

DEUTERONOMI 28:22

Bawipa nih ngornak, taklinhnak, phinnak le niritnak, rocarnak, thutnak le buarnak in an hrem hna lai; nan rawk hlantiang an in dawi hna lai.

DEUTERONOMI 28:23

Cun nan lu cung van hna khi dar an si lai i, nan tanglei vawlei hi thir a si lai.

DEUTERONOMI 28:24

Nan loh dih hlantiang Bawipa nih nan ram ruah cu leidip ah a canter lai i van in nan cungah thetse a sur lai.

DEUTERONOMI 28:25

"Bawipa nih nannih cu nan ral hna hmaiah khan an sunghter hna lai; annih doh awkah lam pakhat in nan kal lai i an hmai in lam pasarih in nan zam lai; vawleicung pennak vialte hna mithmuh ah tuksapur nan si lai.

DEUTERONOMI 28:29

mitcaw nih mui lakah aa dah lengmang bantukin chun lai ah nan i dap lai i, nan lam ah khua awng nan pem lai lo. Hrem le ramh lawnglawng nan si thluangthluan ko lai i an bawmtu hna ahohmanh an um lai lo.

DEUTERONOMI 28:30

Nupi nan ham lai i midang nih an ihpi lai; inn nan sak lai i nan umnak lai lo; mitsur dum nan ser lai i a theitlai cu nan ei lai lo.

DEUTERONOMI 28:32

Nan fapa hna le nan fanu hna cu miphun dang kha pek an si lai; chun nitlak in anmah ngaih ah nan mit hram fak in khua nan cuan lai, sihmanhsehlaw zeihmanh nan tuah kho ṭung lai lo.

DEUTERONOMI 28:33

Nan hngalh lomi miphun nih nan vawlei le nan rianṭuanmi theitlai cu an ei dih lai i, nannih cu hrem le lamhchih lawng nan si lai;

DEUTERONOMI 28:36

"Nanmah nih siseh nan pupa hna nih siseh nan hngalh bal lomi miphun sinah, nanmah le nan cungah nan chiahmi nan siangpahrang cu Bawipa nih ah kalpi hna lai i, khika ah thing le lung in sermi khuazing dang kha nan biak hna lai.

DEUTERONOMI 28:44

An in coih hna lai i nannih tu nih cun nan coih hna lai lo; lu an si lai i nannih cu mei nan si lai.

DEUTERONOMI 28:45

A phungbia hna le a nawlbia hna an pekmi hna kha ulh awkah Bawipa nan Pathian aw cu nan ngaih lo caah, nan rawk dih hlantiang hi chiatnak vialte cu nan cungah an tlung lai i, an in zulh hna lai i an in phanh hna lai.

DEUTERONOMI 28:46

Nanmah le nan tefa hna cungah zungzal in hmelchunhnak le khuaruahharnak caah an um lai.

DEUTERONOMI 28:47

"Zeizong vialte nan ngeih tengtung zong i Bawipa nan Pathian cu lunglawmhnak le thanuamhnak he a rian nan ṭuan lo caah,

DEUTERONOMI 28:48

cucaah Bawipa nih an thlahhnawhmi hna nan ral hna cu rawlṭam tihal, puan lo le zeizong vialte herhbau cukmak in nan rianh hna lai i, an hrawh hna hlantiang thir hngawngkual nan hngawng ah an banh hna lai.

DEUTERONOMI 28:49

Bawipa nih lamhlat piin, vanhramdeng in, mupi a zuan bantuk i a khul a rangmi, an holh nan theih lomi,

DEUTERONOMI 28:50

tar zei ah a rel lo i no zong a duh hlei lomi, zaangfahnak ngei lomi miphun cu nan cungah a tlunter lai.

DEUTERONOMI 28:53

Nan ral hna nih vansang au in an in hren hna lai caah, Bawipa nan Pathian nih an pekmi hna nanmah pum chung chuakmi hrimhrim, nan fanu hna le nan fapa hna sa cu nan ei lai.

DEUTERONOMI 28:54

Nanmah lak i mi nunnem bik le mitluangtlam bik zong nih a unau kha siseh, a dawtmi a nupi siseh, a tang rihmi a fale hna si hna seh, rawl kha a sianh hna lai lo;

DEUTERONOMI 28:55

nan ral hna nih nan khua kip ah vansang au in an in hren hna lai caah, a ei liomi a fale sa kha ahohmanh kha a pe hna lai lo, zeicahtiah a caah zeihmanh a taangmi a um ti lo.

DEUTERONOMI 28:57

Ral nih an khua kha an hren tikah ei awk zeihmanh a um lai lo caah a hrintharmi a fano le a phei le a phei kar in a chuakmi a hlam hmanh kha a thli tein a ei hna lai.

DEUTERONOMI 28:61

Nan rawk dih hlantiang, hi phungbia cauk chungah aa ṭial lomi zawtnak phun kip le temhinnak phun kip zong Bawipa nih nan cungah a tlunter hna lai.

DEUTERONOMI 28:62

Bawipa nan Pathian aw kha nan ngaih lo caah, van i arfi zat a rak si tawnmi kha tlawmte lawng nan tang lai.

DEUTERONOMI 28:63

Cun Bawipa nih nan ca i ṭhatnak tuah le nanmah karhter kha a rak duh tawn bangin, nanmah cung i rawknak tlunter le nanmah hrawh ah Bawipa cu aa lawm lai i; co awkah nan va luhhnawhmi ram chungin phawi nan si lai.

DEUTERONOMI 28:67

Nan lung nih a ṭih laimi ṭihnung le nan mit nih a hmuh laimi thil hna ruangah cun zinglei ah, 'Zanlei hei si seh law dah!' nan ti lai i zanlei ah, 'Zinglei hei si seh law dah!' nan ti lai.

DEUTERONOMI 28:68

Nan kal bal ti lai lo tiah bia kan kam cangmi hna lam ah khan Bawipa nih Izipt ah lawng in an kalpi ṭhan hna lai i khika ah nan ral hna sinah salpa le salnu caah nan i zuar lai, sihmanhsehlaw ahohmanh nih an in caw hna lai lo,' tiah a ti hna.