PATHIAN KAWL SEHCHIHNAK LE TTIHNAK HI KHUA AWNG PEMHNAK ASI!

Uzziah siangpahrang cu Pathian kawl kha aa sehchih chung le a kawl chung poah cu khua awng a tong i a tlam a tling cuahmah, a ngan i a tthawng chin lengmang. Bawipa bochan le kawl duhnak, tanh duhnak lungthin nih khua awng a pemhter i thluachuah phunza hmuhnak asi. Kan Pathian hi bochantlak asinak fiang tein a rak hngalmi Israel siangpahrang hna cu a cawisan zungzal ko hna. Nangteh cawisan na duh ve ko lo maw? Jesuh ngei ve law Amah bochan nun i hruk in i aih ve hmanh an cawisan ve hrim lai i na bochan rup tein na cungah thluachuahnak he rian a tuan ko lai. Bawipa nih thluachuahnak in pe ko seh!                                    

             Uzziah cu a tthawn tikah aa porhlaw ciammam i a rian asi lomi tlangbawi rian zihmui khangh ai timh caah a calpadar ah a thih tiang thinghmui nih a tlunh. Kannih zumtu tampi zong Bawipa nih a kan cawisan ve tik le a kan tthawnter tikah kan pial sualnak hnga lo ralrinnak caah lam a kan hmuhsak tu asi. Minung tampi hi kan thancho tikah kan i porhlaw i cawisantu Pathian kan daithlanh tawn. Kan nih porhlawtpi awk kan ngei lo, Jesuh Khrih le vailam lawng hi porhlawtpi ko hna usih. Kan thihhlan tiang Bawipa duhnak tuah le zulh, Bawipa fialmi rian lim hi kan rawl thawbik si ve ko seh. Amen! 

2 CHANRELNAK 26:1

Cun Judah ram mi vialte nih khan kum hleiruk a timi Uzziah kha an lak i a pa Amaziah hmun ah khan siangpahrang ah an ser.

2 CHANRELNAK 26:5

Bawipa ṭihnak kha a cawnpiaktu Zekhariah chan ah khan, Pathian kawl kha aa sehchih i Bawipa a kawl chung vialte cu Pathian nih khua awng a pemhter.

2 CHANRELNAK 26:7

Pathian nih, Filistin mi hna le Gurbaal i a ummi Arab mi hna le Meunim mi hna lakah khan amah cu a bawmh.

2 CHANRELNAK 26:8

Ammon mi hna nih Uzziah cu ngunkhuai an pek i amah cu a ṭhawn ngaingai caah Izipt ramri tiang hmanh in a min a thang.

2 CHANRELNAK 26:15

Cun thal le lung ngan pipi a kap khotu seh zungthiam pawl nih an sermi hna kha, Jerusalem ah cun innsang le a kil ah khan a chiah hna. Cun amah cu a ṭhawn tiang khuaruahhar in bawmh a si caah a min cu khuazakip ah a thang.

2 CHANRELNAK 26:16

Sihmanhsehlaw a hung ṭhawn tikah aa rawknak dingah a hun i porhlaw. Bawipa a Pathian sinah zumhtlak loin a um i zihmui biakṭheng i zihmui khangh awkah khan Bawipa biakinn ah cun a lut.

2 CHANRELNAK 26:17

Sihmanhsehlaw tlangbawi Azariah nih Bawipa tlangbawi a ral a ṭhami sawm riat he a hnu in an zulh;

2 CHANRELNAK 26:18

cun Siangpahrang Uzziah cu an donh i, "Uzziah, nangmah nih Bawipa sinah zihmui khangh cu na tuah awk a si lo, sihmanhsehlaw Aaron fapa hna tlangbawi hna zihmui khangtu ding i thiantermi hna lawnglawng nih khan an tuah awk a si. Thil hmaan lo na tuah caah hmunthiang chung hin chuak tuah, cun hi nih hin Bawipa Pathian sinin upatnak zeihmanh an tlunh lai lo," tiah an ti.

2 CHANRELNAK 26:19

Khi tikah Uzziah cu a thin a hung. Zihmui khanghnak ding cengceh pakhat aa put i tlangbawi hna cungah a thin a hun tikah khan, Bawipa inn chung, zihmui biakṭheng pawng, tlangbawi hna hmaika ah khan a cal ah thinghmui hma a chuak ko.