Khamhnak kan hmuh cu a thisen in kan zeizong vialte a kan cawtu Pa kan zumhnak thawngin kan caah a tuahmi vialte le a inmi vialte biakamnak fehtertu hi kan chungah a tlinter i Khamh ciami kan sinak le Amah ta kan sinak aamahkhan caah Thiang Thlarau in ka chungah tehte a khannak hin a fale kan sinak cu a fehter. Amen! Cucaah kan sualnak le palhnak phuang loin kan um khawh lonak a ruang cu Thiang Thlarau in kan chung in kan chungah rian a tuan cang caah keimah dinnak timi kha a hloh i Amah dinnak tuah a kan dirter cang caah hin asi. Amen!
Nihin hrinthannak a hmumi kan nih vialte hna hi sual ngeihchihnak le kan sual kan phuan caah maw Khamhnak hi kan hmuh! Sihlah! Sualphuannak kan ngeih khawh cu ka sining vialte a kan hmuhtertu Jesuh Khrih kan chungah a nung cang caah asi. Amen! Sual phuan a sullam cu khamh rih lomi hna caah si loin Khamhnak a hmu cangmi hna nun i Khrih Thlarau riantuannak a langhtertu hmelchunhnak tu a si. Amen!
Asiah cun zeicaahdah Baibal nih hin sual phuannak le sual ngeihchihnak hi a chim lengmangnak hi asi ne hnga? Chim duhmi taktak cu Jesuh Khrih kan zumhnak in kan chungah Thiang Thlarau rian a hung ttuan ciammam i a tlingtuk i a rak i ruatmi kha kan tlinglo kan van i hmu, a ttha tuk i kan rak i ruahmi kha kan tthatlo tuk kha kan van i hmu i a tlingmi Pa Jesuh Khrih he i ton cang ahcun a tlinglo mi minung phuhrunnak le palhnak kha ai hmuh dih hirhiar tikah sual phuan lo le palhnak chimlo in umkhawh asi ti loh. Amen! Thawngtha taktak cu Jesuh Khrih kan zumhnak nih ka dingfel ve ko tinak le Nawlbia nih tuah uh timi tuahnak thawngin dinnak ka hmu timi vialte vanpang kha a boah dih i Khrih kan zumhnak thawngin dingfelmi ah rel kan sinak le kanmah dinnak timi ah dir ti loin Khrih tlinnak tu bochan in kan nung cang. Amen! Cucaah a thihnak ah thihpi kan si i a nunnak ah kan nung ve lai timi le Amah pum bantuk in thuam kan si ve lai ti mi tu hi kan i ruahchannak a hram thok in a dongh tiang lawmhnak hrampi cu asi. Amen!
Minung nih Jesuh Khrih tello taktak hin sual chirnak le sual phuannak taktak hi a ngei kho hnga maw? Kan hei phuan ve ko hmanh ah Khrih tthawnnak tello cun chikhat lawng nai chir lai i na phuan ko lai nain can rau lo teah nangmah ning tein na tuah tawnmi ah khan na kir than ko lai. Cucaah Jesuh Khrih na chungah a um ahcun sual ngeihthiam cang na sinak le na palhnak cinkenpiak ti lo na si cangmi tu khan na lawmhnak a sang chin lengmang nak cu asi ko lai. Amen! Jesuh Khrih thawngin kan sualnak a kan cinken piak lotu kan Pathian hi thangthatnak le upatnak hi pe zungzal ko hna usih. Amen! Nang te na sual cinken piak ti lo na si hi na hngal taktak ve cang maw?
SALM 32:1
A sualnak ngaihthiam a si i a palhnak maimilh a simi cu a lung aa lawm.
Nikhat cu Unau hna pahnih an um i a Pa nih thiang hirhiar tein a kholh hna. An Pa nih a cahta mi hna cu a tu cu nan thiang cikcek cang nain nan umnak hmun hi a thurhnawmhnak hmun asi caah nan hnawnh tukah nanmah tein nan i kholh lai i nan van i thenhnak ding caah tiin ti le taval a pek ta hna. Cu ticun thiang tein an um cang caah a khing a zang i an ilawm tuk. Cu ticun caan a hung sau deuhdeuh tikah a Pa nih a chim bang khan an pum cungah cun hnawm an kai diahmah ai, duhsah tein hnawm cu an takpum ah a tam deuh tikah an lawmhnak le khing zannak vialte kha a tlau cuahmah. A Pa nih a chimhmi hna kha pakhat deuh nih a tuah lo tikah a tak cung i hnawm nih cun khingrihnak le retheihnak a pek i a takpum ca tiang hmanh ah damlonak hma a chuahpi cang. Cucu a sullam cu David zong Pathian sinah a sual thuh in a phuan lo ruangah chunzan in Bawipa dantatnak a cungah a tlung i a thlarau a car tikah a thinlung a zaw i aa lawm ti loh. A thinlung a zawt caah a taksa thazang tiangin a zor i a ttap zungzal ko. Nangteh na sual hi na thuh peng ko lai maw? Thlarau, thinlung le taksa in dam le lawmh na duh ahcun na sual rak thup ti hlah las na Pathian sinah thlacamnak he rak phuang ve cang. Amen!
SALM 32:3
Ka sualnak kha ka phuan hna lo tikah chun nitlak in ka ṭap.
SALM 32:4
Bawipa, chunzan in dan na ka tat i ka thazang cu a dihlak in a zor, ṭhal ni lin nih khua a roter bantuk khin ka thazang cu a ro dih. Selah
Sihmanhsehlaw unau lak i pakhat tu nih cun a Pa nih a rak chimhmi te kha a van i cinken i a takpum cungah hnawm a van kai bak khan ai khawlh colh i a Pa nih a rak kholh hna lio bantuk te khan zang hirhiar tein le lawmhnak he a khat zungzal ko. Amen! Cu ve bantukin David nih a sual thup ti loin Pathian sinah a sual phuan in thla a cam tikah ngeihthiamnak a hmu i lawmhnak in a khat tthan. Amen! Zumtu taktak cu thlarau in kan dam tikah kan thinlung ai lawm i kan taksa ca tiangin damnak kan hmu. Amen! Vawlei kan nun chung cu ahme, a ngan sualnak he kan i tthen khawh lo caah kan sualnak hi a ning cang tein Thlarau, thinlung le taksa kan damnak dingah Pathian sinah phuang zungzal ko hna usih. Amen! Cuti ka tikah zei bantuk sualnak poah kan tuah ding asi ti si loin Pathian nih a fapa hman in a kan khamh cang caah le Khrih he Thlarau in pakhat kan si cang caah kan thinlung in sualnak kan tuahmi hmanh nih hin kan thlarau lawmhnak tampi a hrawh. Sualnak le hi vawlei kan teinak cu Jesuh Khrih kan zumhnak thawngin le kan chungah a nungmi a Thlarau tthawnnak thawngin asi. Amen!
SALM 32:5
Khi tikah ka sualnak cu nangmah sinah ka phuan hna; ṭhat lonak ka tuahmi cu ka thup hna lo. Nangmah sinah khan ka phuan dih hna i ka nawlbuarnak vialte cu na ka ngaihthiam dih. Selah
SALM 32:7
Nangmah cu kaa thuhnak hmun na si, harnak chungin na ka khamh lai. Nangmah nih na ka huhphenh caah fak piin na khamhnak cu hla in ka thangṭhat. Selah
Sual na phuan ruangah khamh na si lo i Khamh cangmi na si hmelchunhnak tuah sual na phuan hi a si deuh. Amen! KHAMH CIAMI KAN SI HMELCHUNHNAK CU KAN SUAL KAN PHUAN PENGNAK HIN A LANGHTER!
Comments
Post a Comment