PATHIAN A DAWMI LE HNGALMI LAWNG HUHPHENH LE KHAMH KAN SI!

Minung tampi nih mah Baibal cang te hi kan duh tuk ciomi le kan rel lengmang ciomi te asi. Mah Baibal ka rel dih i a dang rel kai tinh ah Thiang Thlarau nih ka thinlung chungah a chiahmi cu a rel lawng nan rel i nan cungah a tling lo timi bia hi asi. Cutikah ka kir tthan voi (2) hrawng ka rel tthan tikah ka hmuhmi a phi cu hihi asi: A ka dawmi le a ka hngalmi cu ka khamh hna lai i ka huhphenh hna lai ti hi asi. A sullam cu Hrinthanmi, Jesuh Khrih a ngeimi (Thiang Thlarau) in a chungah tehte a ngeimi ca lawngah mah Baibal thluachuah hi hmuh ding a rak si tinak asi. Amen! Hi Baibal chung thluachuah hi hmuh na duh ve maw? Na duh ahcun Hrinthan ve ko... 

      Asiah cun Pathian cu na daw in na hngal ve taktak cang maw???? Daw naisai in hngal naisai hlah! Zeitindah Jesuh Khrih hngalh loin Pathian hi dawt khawh cu asi rua hnga? Jesuh Khrih Thawngtha theih loin cun zeitindah na hngalh khawh lai? Jesuh Khrih thawngtha na theihmi hi zumhnak in na cohlan lo ahcun zeitindah Jesuh Khrih cu na hngalh khawh in na chungah cun a um khawh lai? Jesuh Khrih na chung a um lo ahcun zeitindah Pathian cu na dawt in na hngalh khawh lai? Jesuh Khrih na ngeih le ngeihlo Bawipa nih na nun in dahter ve ko seh! Jesuh Khrih zumnak loin Thiang Thlarau co khawh asi lo i Thiang Thlarau lo cun Pathian hngalh khawh asi ve lo! Kan herhmi cu Jesuh Khrih zumnak thawngin Thiang Thlarau kan co hnu lawngah Pathian he pehtlaihnak kan ngei kho. Amen! Kan herh mi cu Fapa zumhnak in Thiang Thlarau kan ngei lai, Thiang Thlarau hruainak thawngin Pathian kan hngalh khawh in kan dawt khawh ve cang lai. Amen! 

         Nihin minung tampi nih hin Khamhnak thawngtha a phortu Jesuh Khrih kong hi kan thei bal taktak lo maw? ti ahcun mikip nih hin kan theih cio ko nain zumhnak taktak he kan cohlan lo caah nihinni tiang Khamhnak kongah kan buai i Khamhnak chungah a phanlomi le khamhnak ahmu lomi tampi kan um! Baibal chung i biakamnak le thluachuahnak vialte hi mi ca lawngah si loin nangmah le keimah ca zongah asi ve i na chungah a tlin awk hrimhrim ding asi. Cucu Pathian duhmi le laksawng cu asi i cucaah cun pei Baibai nih Khrih thawngin na sualnak ngaihthiam dih le Khamh na si cang a ti caah zumhnak in kan cohlan hi Baibal chim ning tein kan chunngah Jesuh Khrih nih Thiang Thlarau in tehte a van khannak in a nungmi Pathian asinak cu a langhter fawm i Khamh cang kan sinak cu a tlinter cu. Amen!

      Atu hi Khamhnak hmuh ni asi cang caah na lungthin dihlak in Jesuh Khrih hi rak zum ve law rak cohlang ve cang. Amen! Sawm kan duhmi cu Jesuh Khrih hi vanram ca le thluachuah hmuhnak ca lawngah rak cohlang hlah! Nai chuah sual dipdep lai! Na Bawipa, na Pathian, na Khamhtu, na nunnak ngeitu, na sual ngeihthiamtu, na biaceihtu, na tlangbawi, le na zeizong vialte ngeitu le na uktu ah rak zumh in rak cohlang ve cang. Amen! Na zeizong vialte Amah pe ko, Amah sin na phanh ahcun nangmah tein naa zuam lengmang mi hnak let tampi in na tlamtling ko lai. Amen! Jesuh Khrih cu na thinlung dihlak in na zumh i na cohlan ahcun na chungah a um lai i Pathian cu na hngalh khawh ve cang lai. Amen! Pathian na hngalh lawng si loin na dawt khawh ve cang lai. Amen! Pathian na hngalh i na dawt taktak ve ko ahcun an khamh lai i an huhphenh lai, harnak na ton tikah an umpi lai i harnak chungin an chuah hlei ah upatnak an pek lai, thlacamnak in na auh tikah an leh lai. Amen! Cu hleiah nun saunak laksawng chap rih na si lai. Amen! Bawipa nih sunparnak co zungzal ko seh. Amen! Abiakam bantukin a zummi vialte nan cungah a thluachuahnak cu tlinter chin ko seh. Halleluijah. Amen!

SALM 91:14

Pathian nih, "A ka dawmi cu ka khamh hna lai i a ka hngalmi cu ka huhphenh hna lai.

SALM 91:15

An ka auh tikah ka leh hna lai i harnak an in tikah ka umpi hna lai. Ka chuah hna lai i ka upat hna lai.

SALM 91:16

Laksawng ah nun sau ka pek hna lai i ka khamh hrimhrim hna lai," a ti.