TAKSA DUHNAK TEI KHAWHNAK AH A TTHABIK MI....

Atu ah Bawipa zangfahnak thawngin ka unau asimi nangmah sinah ka chungah a kang in a kangmi le chimlo, ttiallo in ka um khawhlo mi Thlarau Bia hi ka mipum in si loin ka lungthin le thlarau telhchih in ka nun kan hrawmhmi hi na rak rel ve caah ka lunglawmhnak le ka ngeihmi zumhnak le Thawnnak hi na tingco ve ko lai tiah ka Bawipa Jesuh Khrih kaa bochan. Nihin ah minung tampi nih cun Pathian Bia kan chim tikah bia dawhnak le mi duhnak kawl in kan chim tuk i Thlarau biatak hnakin minung nih an duhmi biatha le biadawh nih Pathian Biatak a vaivuanhter chin lengmang ko hi na hmuh ko lai dah. Khrihfa kan sinak le Pathian biatu kan sinak langhtertu cu hihi na tuah lai, khakha na tuah lai lo timi ca chungah ttialmi zoh in si loin chunglei ttialmi Thiang Thlarau hruainak in asi ko kha naa cinken ko lai dah. Nang cu na chungah a nungmi Jesuh Khrih le a kangmi Pathian Bia tu hi rak chim law Biatak tu kha rak dirpi ko tiah kan nawl. A tuah ka nunnak ah tthawng ngaiin rian a ttuanmi bia hi kan ruah hmanh lai muh! Ka bia nih tthawnnak le lawmhnak, ruahchannak hleiah Biatak asimi Jesuh Khrih cungah fek tein an dirter chinchin lai ti zong zumhnak ka ngei i cucu ka ruahchan ca zongah hin ttial lo awkttha loin ka chungah a hung nungmi biatak cu ka van in hrawmhnak asi. 

               Cucu Jesuh Khrih ni (40) rawl a ulh lio i a tonmi tukforhnak kong pakhat chung ta te hi asi. Hi kong hi nangmah le keimah caah sullam ngei tein le bawmtu dingah a rak kan cawnpiaknak asi. Kan theih ciami Pathian bia hi kan nun ah kan hman thiam ahcun cucu kan luatnak le kan tthawnnak hram taktak hlei ah kan teinak hrampi an rak si. A tu i ka van ttial laimi hi thukpiin ka ruahpi ve law na nunah rak i hman ve ti hi ka duh. Pathian biatak hi theihnak lawngin si loin zumhnak he tuahnak le nunpinak lawng in Pathian kamhmi hmun ah covo kan ngeih cu na hngalh ko khah! Jesuh Khrih ni (40) chung ti le rawl loin rawl ttam ngaiin a um lio ah satan cu a sinah ara i Pathian Fapa na si ahcun hi lung hi changreu ah canter law ei ko ca tiah a rak tukforhnak kan hmuh. Sihmanhsehlaw Jesuh nih cun a duh in a duh hrim lo i minung nunnak taktak hi ti le rawl ah si loin Pathian nih a chimmi bia tu hi Nunnak asi tiah a leh. A sullam fianter deuh ka duhmi cu ti le rawl hi khim phikphek in na ei hmanh ah Pathian nih na thih caan asi cang timi bia hin na thi ko lai ti hi ka van fianter duhmi cu asi. Phundang in ka chim rih si ahcun Thlarau in na nung lai timi lawng Khamhmi kan si i Nunnak petu cu Jesuh Khrih asi i Nunnak  taktak cu Thlarau hi asi ko ti hi asi.

                Jesuh Khrih nih amah taksa chikhat awr diriamnak menmen hnak cun Pathian nawl zulh kha ai thim deuhmi kong te hi ruah kan duhmi taktak cu asi. Nangteh nangmah taksa duhnak maw naa thim peng rih ko lai, Thiang Thlarau duhnak dah na thim ve cang lai? Pathian fapa asimi nih hin lung cu changreu ah a canter kho taktak ko hnga lo maw? Canter kho tuk hme teh! Sihmanhsehlaw rawl hnak in a duh deuhmi cu a Thlahtu Pa duhnak tuah le fialmi rianlim hi asi ko. Amen! Nangta zeidah na thim ve rih lai??? Ni (40) rawl ulh lio ah hin a rawl a ttam in rawl ei hi a duh tuk ve ko hnga lo maw? Duh tuk lai ta! Nain zei ah a rel lo i a kaltak diam ko hi teh! Taksa duhnak hna a kan hnawhtu vialte hi Thiang Thlarau tthawnnak he rak that law rak kaltak diam law hnulei chittak diam ve cang ko. Amen! Jesuh nih amah taksa duhnak, awr diriamhnak sawhsawh men hnak cun Pathian nawl zulhnak in rawl ttam fahnak tu aa thimnak cu nangmah le keimah nih kan i cawn awk ah a kan hmuhsakmi asi i A sullam taktak cu na taksa duhnak hnak in Keimah duhnak tuah tu hi rak i thim deuh ve ko seh ti hi a duh caah asi ko. Thlarau ram ah tthawng ngaiin kan kal khawhnak dingah cun taksa duhnak hi kan tei hrimhrim an hau. Zumtu asi cangmi caah cun taksa duhnak le Thlarau duhnak cu aa ralkah kha na hngalh ko khah. Sihmanhsehlaw zumtu tampi cu an taksa duhnak nih a uk hna, Thiang Thlarau tu nih uk dingmi tu kha! Tukforhnak na cung i a tlun tikah Jesuh Khrih nih a Pa duhnak ai thim bangin taksa duhnak kha Thlarau in rak that law Khrih duhnak tu i thim in Amah nawltu rak i cawng ko tiah kan nawl. Tukforhnak na cung i a tlun tikah teinak na hmuh hlan tiang thlacam law na tei hrimhrim ko lai. Taksa duhnak a teitu cu Jesuh Khrih a chungah a ngeimi le Thiang Thlarau a ngeimi lawng an si ko kha nawlh tthan rih ka duh. 

               HI CA KAN KUAT HNAWHCHAN TAKTAK CU NA TAKSA DUHNAK HI MAW NA TEITER PENG KO LAI TIMI LE THIANG THLARAU THAWNNAK IN DAH NA TEI CANG LAI TI HI ASI. JESUH NIH AMAH DUHNAK SI LOIN A PA NAWL ZULHNAK, THIH TIANG AA THIM BANTUKIN NANG ZONG NA THIH TIANG KHRIH NAWL ZULHNAK LE THIANG THLARAU TTHAWNNAK IN NA TAKSA DUHNAK VIALTE HI RAK THAT VE LAW TIAH KAN NAWL. NA TAKSA DUHNAK AH NA TLAK PENG KO AHCUN PATHIAN HMANRUA CU NA SI HRIMHRIM LAI LO TIAH RALRINNAK KAN PEK! NAA AU SEK KO LAI NAIN THIANG THLARAU TTHAWNNAK NIH AN ZUL BAL LAI LO. KAN BIAKMI KAN PATHIAN HI A NAWL ZULH TTUNGLO I AU LEN HNAK CUN A NAWL ZULH BUIN AU LAWNG A DUHMI PATHIAN ASI. AMEN! NA NUN AH NA RAK I TTHITCHIH AHCUN NA THLARAU A DAM LAI I PATHIAN HE NAN I PEHNAK AH THLARAU IN A RUMMI NA SI ZUNGZALKO. AMEN!

MATTHAI 4:3

Khuachia cu a sinah a ra i, "Nangmah cu Pathian Fapa na si ahcun, hi lung hi changreu ah canter hna ngat," tiah a ti.

MATTHAI 4:4

Jesuh nih cun, "Cathiang nih pei, 'Minung hi rawl lawngin a nung kho lo, sihmanhsehlaw Pathian nih a chimmi bia paoh cu a nunnak a si lai,' a ti kha," tiah a ti.