Jesuh Khrih nih tlangcung ah mipi a cawnpiakmi hna cu Bawipa, Bawipa nan ka ti nain ka chimmi cu nan tuah ttung loh tiah a ti hna (cucaah pei Bawipa, Bawipa a timi nih Pa sin an phan lai lo a tinak kha asi cu). Nihin zumtu tampi zong hi kan kaa cun Bawipa kan ti taktak ve ko nain kan nun in kan tuahmi nih lih na chim ti kan si. Phundang in ka chim ahcun kaa cun Bawipa asi nain thinlung chung van zoh tikah Bawipa muisan a um hrim lo. Minung poah nih kan thinlung a ummi te hi kan tuah deuhmi le kan chim deuhmi asi caah na chim deuhmi le na tuah takmi hi na thinlung tak in na rak ruahmi asi.. Nan tuah ahcun lung cung innsa mi nan si, nan tuah lo ahcun tthase cung inn sa nan si tiah ati hna. Lung cung inn cu a hmun i tthase cung sakmi inn cu a rawk. Sihmanhseh zumtu tampi cu khamh ka si cang timi mah le mah i hlennak in kan duh poah in kan nung i tthase lakah sakmi inn bantuk kan si. Zeidah naa thim deuh hnga. A hmunmi inn maw na si? A rawk mi inn dah?
Tuah a fialmi hna cu hi hna hi an si:
1) Mi nih thangtthat duh hlah uh. Satan hlennak asi.
2) An hautu hna nan dawt hna lai, thla cam piak hna.
3) Mi nih thil an in hal hna ahcun va tthen hna uh, Nan thil an i lak ahcun va hal tthan ti hna hlah uh.
4) Mi do va coih hna ulaw ka hmuh tthan lai tiah vaa ruat hlah uh. Pathian nih thluachuah an pek hna lai.
5) Mi sifak kha thil va pe hna ulaw Pathian nih thluachuah a let in an pek hna lai.
6) Nangmah sualnak zoh hmasa loin mi sualnak va tah hlah. Nangmah sualnak kha i thianh hmasa.
7) Zumtu taktak cu an theitlai in nan hngalh khawh hna lai, a ho hmanh i hlenter hna hlah uh.
8) Na kaa in na chim lengmang mi hi na lung chung i a khatmi na chimmi asi. Pathian kong maw na chim peng, a dang kong dah.
Mah vialte a tuahmi hna cu Lung cung innsa (KHRIH CUNGAH NUNNAK) a dirhmi bantuk kan si. Mah hi hrintthanmi hna nih tuah dingmi asi. Nihin zumtu tampi thluachuah kan hmuh lonak a hram bik cu Bawipa nih fialmi tuah loin Khamhnak tlangah kan i vel lengmang caah asi. Zumhnak in khamh na co cang ahcun thluachuah hmu ding tein le thei tlai ding tein na nun uk ko law hmailei ah kal chin ko. Amen! Mah na tuahnak thawngin Khamhnak na hmu lai lo, Khamhnak cu tuahnak si loin Zumhnak tuin comi asi. Amen! Lung cung innsak cu zeitluk in dah a har lai timi hi na ruat bal maw? Inn tung van phunnak hmun lung van cawh cu a har lai ning. Si... minung tuah awk ahcun lung cung i innsak cu a harbak ko lai. Cubantuk cun Pathian kan zumhnak ah tuah a kan fialmi vialte hi minung taksa sinak in cun a fawimi pakhat hmanh a um loh. Thlarau le taksa duhnak cu aa ralkah i Pathian duhnak naa thim ahcun na taksa duhnak kha na kaltak, na tuah kho lo tinak asi. Minung nih hi tlukin taksa duhnak tuah le zulh a nuammi hi kaltak khawh ding cu a fawi hrimhrim lo....
Hihi minung lei in kan ruahning le tuak ning asi i Thlarau lei mit in kan zoh ahcun LUNG cu JESUH KHRIH a rak si diam ai. Amen! Lung cung innsak a hartuk ti a sullam cu: Taksa duhnak kan tei kho bal lai lo, Pathian nih a kan fialmi a har tuk, kan tuah kho bal lai loh kan rak timi vialte hi an si i a kan teipiaktu cu Jesuh Khrih kan zumhnak nih a hrinmi Amah Thlarau tthawnnak lila tu a rak si. Amen! Mah vialte kan tuah khawhnak dingah a kan fialmi cu zumhnak in Amah i bochan hi asi. Amen! Jesuh Khrih nih khamhnak (a hmunmi rawl) kong a cawnpiak ciaman hna i khamhmi si kha an duh tuk tikah khamhnak kan hmuh khawhnak dingah zeidah kan tuah lai tiah an hal i a lehmi hna cu zeidah asi hnga tiah na ruah? A lehmi hna cu Pa nih khamhnak nan hmuhnak dingah tuah hna seh ti an duhmi hna cu a thlahmi Fapa zumh hi asi tiah a leh hna.(Johan 6:29) Lung cungah innsak kan timi cu taksa zuamnak nih a tei khawhmi asi lo i Jesuh Khrih cu Pathian Fapa asi ti zumhnak nih a hrinmi Thiang Thlarau tthawnnak thawng lawngin sak khawhmi asi. Amen!
Fapa zumhnak in Thiang Thlarau bawmtu pek kan si tikah taksa kan sining nih a kaltak khawhlomi le a tuah khawhlomi cu chung lei in Thiang Thlarau nih kanmah pum le thinlung hmangin a kan tuahpi. Amen. Cucaah pei Paul nih a tu i a nungmi hi keimah ka si ti loh, ka chung i a nungmi Khrih tu asi deuh a tinak kha asi cu. Halleluijah... Zumhnak i kar na hlannak ah harnak le taksa duhnak nih hnahnawhnak tampi an pekmi chungah Thiang Thlarau tthawnnak he lung dong lo tein Amah na bochanmi cungah Pathian biatak thukpi in an hngalhter lai i biatak na hngalhnak nih cun zumhtlak asinak kha thuk deuh in an hngalhter. Zumhtlak a sinak thuk deuh in na hngalhnak nih zumh awktlak si duhnak lam ah an hruai lai i Khrih caah zumh awktlak si duhnak nih cun teimak duhnak le inkhawhnak an in pek lai. Inkhawhnak nih a chuahpimi cu Thlichia le tilet zong nih hrawh khawh ti lomi Lungcung Innsa mi na si cang timi tehte a langhter lai. Amen! Bawipa nih sunparnak caah si dih ko seh..
KHRIH CUNGAH NUNNAK A DIRHMI SI CIO KO HNA USIH... TAKSA IN LUNG CUNGAH INNSAK NAA ZUAM AHCUN NA SA KHO BAL LAI LO I LUNG ASIMI JESUH KHRIH THLARAU TTHAWNNAK TUIN NA SAK KHAWH LAI. AMEN! THIANG THLARAU NGEILOMI ZUMTU POAH CU AN RAWK KO LAI... KHRIH CAAH ZUMHTLAKMI LAWNG THEI TAMPI AN TLAI I KHRIH CAAH ZUMH AWK TLAK IN A NUNGMI HNA CU HARSATNAK LE HNEKSAKNAK TAMPI AN TUAR VE...
LUKA 6:46
"Zeicahdah nannih nih, 'Bawipa, Bawipa,' nan ka ti len ko i kan chimhmi hna cu nan tuah ṭung lo?
LUKA 6:47
Ka sinah a ra i ka bia a ngai i a zulmi cu zei he dah aa lawh ti kha kan hmuhsak hna lai.
LUKA 6:48
Amah cu inn a sami bantuk a si: thuk piin a cawh i a hram kha lungpi cungah a bunh. Tiva cu a hung lian i inn cu a hun den, sihmanhsehlaw fek tein sak a rak si caah a hninh in a hnin kho lo.
LUKA 6:49
Sihmanhsehlaw ka bia a thei i a zul ṭung lomi cu a hram ṭha tein ser hmasa loin inn a sa menmi bantuk a si; tilian nih cu inn cu a hun den tikah chikkhatte ah a pur i a tlu ruangmang ko," a ti.
Comments
Post a Comment