Bawipa bochan a ka thiamtertu cu Thiang Thlarau asi i Thiang Thlarau ka ngeihnak cu Jesuh Khrih zumhnak in comi Nunnak asi. Thiang Thlarau nih cun inkhawhnak le lungsaunak a ka ngeihter i Inkhawhnak le lungsaunak nih cun teimaknak an ka pek, teimak duhnak nih cun Pathian kha thuk piin a ka hngalhter. Pathian thuk piin hngalhnak nih cun a biakam zeitik hmanh ah a let lotu asi nak kha a ka pemhter i a biakam let lotu a sinak pemhnak nih cun hnangamnak an ka pek. Hnangamnak nih cun lunglawmhnak lam ah an ka hruai i lung lawmhnak nih cun ruahchannak ah an ka kalpi. Ruahchannak hram Pathian nih cun a ka deuh loi thazang thar a ka pek taktak. Amen!
Minung phun hi mi rum he mi sifah he dam he damlomi he, mino he upa he kan dihlak in lungre thei phun le kan tonmi thil ruangah lungdongh a fawimi phun kan si. Kan i ruahning le kan i tinhning thil a hung cang lo tik le harnak le damlonak nih a kan nenh tuk tik ahcun Pathian kan i bochan ko kan timi kha a zawr diahmah i lungdonghnak lei ah kan kal cuahmah. Kan tonmi thil nih lungre theihnak nganpi a kan pek tikah lung lawmhnak cu a tlau diahmah i Pathian bochannak kan rak ngeihmi kha a tlau diamah ve tikah a sinah kan zai cang. Sihmanhsehlaw Pathian nih a kan lehmi bia cu hi hi asi: Pathian nih kan harnak a hngalh lo, kan caah thil a rem in a chiah lo nan timi hi zeidah asi, A dermi le a bami kha thazang petu Pathian ka si hi na hngal lo maw ti hi asi. Amen! Nang zong keimah chungah na um ko, a caan a phanh rih lo caah asi i nanmah caah nan hmuh kho lomi thilttha tampi kan chiahpiak ko hna ti khi a sullam cu asi. Amen! Sihmanhsehlaw minung na si chung poah cu na no pek na tar pekah na bat caan le damlo caan a um ko lai i na dertthawm caan le lungre thei in na um caan, lung awttawm in na um caan a um ko lai nain lung dong loin Pathian na bochannak ko ahcun lungtthawnnak in na khat tthan lai i thazang thar pek tthan na si ko lai ti hi biakamhmi cu asi. Amen! Sihmanhsehlaw na lung a dongh i hnulei na kir ahcun a thar in na awt tthan lengmang a hau ko lai i vawlei na nun chung ca he Thlarau ram na kalnak ca he aa tthangmi na si bal lai lo. Phun dang deuh in ka chim ahcun Jesuh Khrih a ngei taktak mi cu zeitik hmanh ah kan lung a dong thai ballo ti hi chim ka duhmi cu asi. Nangteh na lung a dong thai bal maw? Pathian bochannak he na taisawmh caah Pathian Biakam fek tein i sawmh ve ko. Amen!
ISAIAH 40:27
Israel, a si kun ahcun, zeicahdah Bawipa nih ka harnak hi a hngal lo i ka caah hin thil a rem in a chia lo, tiah na zai?
ISAIAH 40:29
A dermi le a bami kha thazang a pek hna.
ISAIAH 40:30
A nomi hmanh kha an tha a der tawn i tlangval hmanh kha an tha a ba kho.
Moses zong Israelmi hruainak dingah kum(80) a hngah, David zong a miphun dihlak uknak dingah kum (7 1/2) lung dong lo tein Pathian timhmi caan a tlin hlan tiang a hngak i an vakvai ko. Lung dong loin Pathian tthawnnak aa bochanmi cu a cawisan zungzal ko hna i a huhphenh zungzal ko hna timi biatak thawng hin thazang kaa laknak asi zungzal. A tu ka si ning te hi ka caah chim ve te awk tehte tthabik an si ko lai timi ruahchannak nih a ka lawmhter i Bawipa kan bochannak nih hin zeitik hmanh ah ka lung a donghter ballo. Ka lung a dongh ballo nak sullam cu ka chungah Jesuh Khrih na nung tinak asi i ka chung na nunnak nih cun na biakamnak vialte cu a tling hrimhrim lai timi hmelchunhnak a langhter hlei ah bochantlak Pathian na sinak kha a ka hmuhsak tu an si. Amen! Kei nih kan bochannak cu hi tihin ka langhter lai: lung dong loin na tthawnnak in bawmhnak kan hngahnak hin ka langhter lai....... Bawipa sin in thazang thar lak na duh ve ahcun lung dong loin Bawipa i bochan law cucu thazang thar laknak ah a tthabikmi sii asi ko. Amen! Bawipa naa bochanmi cung i na lung a dongh lengmang ahcun na timhmi na phan kho bal lai lo. A dongh tiang naa tinhmi thil cungah na hmuh hlan tiang Pathian cu i bochan lawlaw ko tiah kan sawm. Thihnak hmanh in pei thawhpi kan si i Amah cu a sining tein kan ton te lai tiah kan zumh cu. Vawlei na nun chungah Amah bochan thiam law tthawnnak in na khat lai i Amah nih an hruai ko lai. Amen! Bawipa bochan thiam cu lung dongh lo in Amah tthawnnak hngah hi asi.... Amen! Na lung dong lo ahcun tthawnnak he an hruai lai i thazang thar an pek hrimhrim ko lai. Amen!
ISAIAH 40:31
Sihmanhsehlaw Bawipa aa bochanmi cu thazang thar an la. Mupi bangin an zuang lai; an tlik tikah an baa lai lo, an kal tik zongah an tha a di lai lo.
Comments
Post a Comment