Nihin riantuan ka kal pah ah ka Baibal ka van rel i cahmai kau kaa timh ah khin "TUKFORHNAK" timi tlangtar kha ka hmuh tikah lanhtak awk tthalo in ka chungah rel duhnak a ra. Ka van rel tikah Bawipa sinin fiannak ka hmuhmi le thazang kaa lakmi te hi hrawmhlo in kan um khawh lo caah ka van in hrawmh muh. Nihin i na sinah ca ka ttialmi te hi kan thih hnu zongah bia a van chim lengmang ding asi caah ka caan hi a sawhsawh hman hnak cun ka unau zumtu sin i ttanh awktlak Lam le Biatak le Nunnak asimi Jesuh Khrih ka chung ah a nung i rian a tuannak kong hi tehte khang lengmang ko ning. Satan nih tukforhnak i a hmanmi cu kan mah pum te le taksa duhnak te a hman ko ti hi ka hmuhmi cu asi. Ahman dingmi cu na mit zong asi kho ko i na kut le ke, na kaa tiang zong an si kho ko. Sihmanhsehlaw mah vialte tukforhtu cu Satan asi i kanmah taksa duhnak te kha hmang in kan thih tiang hlen a kan timh lengmang ko. Nang cu na taksa duhnak hlennak cungah naa ciah peng rih ko maw, na ciah peng rih ahcun Satan hlennak chungah naa zi len ko tinak asi.
Mah thawngtha hi Jesuh Khrih le a zultu khual an tlawm cuahmah lio i a ho dah a nganbik timi biahalnak in ai thokmi asi. Jesuh Khrih nih a lehmi hna cu a nganbik si a duhmi cu mi vialte sal bantukin a nauta bik hngakchia ah aa ser ahau ti hi asi. Ka min in hi bantuk hngakchia a cohlangmi nih cun Keimah an ka cohlang asi i Keimah a ka cohlangmi nih cun a ka thlahtu Pa an cohlang asi tiah Jesuh Khrih nih a chimmi kha Johan nih a theih tikah kanmah bu chung asi lomi pa nih na min in khuachia a tthawl mi kha kan hmuh i kanmah bu chungmi asi lo caah tuah ti hlah tiah kan thlauhmi hi kan palh ko lo maw ti kha a van i hngal. Jesuh Khrih zong nih a van chapchihmi cu thlauh ti hna hlah uh, ka min in khuachia a tthawlmi hna cu ka ral an si ballo i nanmah bantukin ka riantuantu an si ve ko tiah a ti hna. Zumtu vialte hi pakhat le pakhat i cohlang ulaw lungkhat tein ka rian van ttuanti uh ti khi a sullam cu asi. Amen! A van chap rihmi cu nanmah le nanmah nan i cohlang lawng si loin ka riantuantu an cohlangtu poah hna cu laksawng pe loin ka um hrimhrim hna lai lo ti hi asi. Amen!
Mahtlukin Keimah riantuantu a cohlangmi le a dawtu hna thluachuahnak pek dingin bia kan kamh ko hna nain Satan nih hmang in a ka zummi ka fale a pialtertu an um ko lai. Cubantuk Keimah a kan zummi hngakchia a pialtertu si hnak cun fang rialnak lung a hngawng ah thlaih i rili chungah thlakmi si kha a tha deuh tiah a ti (Hngakchia cu kanmah zumtu hi Pathian fale hngakchia cu kan si ko). Sihmanhsehlaw an pialtertu le Hell an tlaktertu cu nanmah taksa duh thimnak te kha asi ko lai tiah a ti hna (Hell hi minung caah tuahmi asi lo i satan le nawl ngailomi vancungmi caah tuahmi asi). Amen! Satan nih hin kanmah taksa duhnak hmang riangmang in pialter le hrawh a kan timh zungzal caah Jesuh Khrih nih Keimah duhnak in an pialtertu hna poahpoah cu tan law hlonh ko, khoih law hlonh ko tiah biacah kan si. Amen! Tukforhnak chungah kan luhnak cu kanmah taksa duhnak ruangah asi i satan nih tukforhnak le tlukternak ah a hmanmi thil pathum an um. Cu hna cu na mit, na ke le na kut hna hi an si. Jesuh Khrih nih a kan cahtak bantukin na mit nih sualnak chungah an luhpi ahcun na zoh tawnmi kha zoh ti lo in ngol ko cang. Na kut le na ke nih sualnak chungah an kalpi i sualnak an tuah asi ahcun kalter ti hlah law tuahter ti hlah (Hell tlak hnak cun sual tuah ngol diam kha a tha deuh ko lo maw). Chim duhmi cu na zohlo ahcun zeitindah kalnak cu na hmuh khawh lai, na kal lo ahcun zei tindah sualnak cu na tuah khawh lai, sualnak na tuah lo ahcun zei ruang ah dah Hell ahcun na tlak lai. Sihmanhseh law na sual ruangah si loin na zumh lo ruang tuah hin Hell ah na tla ko lai (sualnak ruangah Fapa thah asi cang cu ta). Na taksa duhnak na tuah lengmang mi sullam cu Jesuh Khrih na zumh taktak lo caah na chungah Thiang Thlarau a umlo caah asi (Thiang Thlarau na chungah aum lo ahcun sualnak sal cu pei na si fawm cu na tuah peng ko lai ta). Na taksa duhnak hmangin an pialtertu le an thattu cu Satan asi.
Thawngtha cu hi hi asi: Jesuh Khrih a zum i a cohlang mi poahpoah cu Thiang Thlarau in zungzal nunnak pek kan si lai timi hi biakamh asi. Cu biakamhmi a tingco mi cu Mei in Cite bantukin altermi cu kan si. Halleluijah! A sullam cu a alnak a lo kho ti lomi Cite (a rawk kho ti lomi Nunnak) bantukin Thiang Thlarau in Nunnak pek kan si ti hi asi . Cite bantuk in a kan altertu cu Jesuh Khrih asi = Zungzal Nunnak a kan petu cu Jesuh Khrih asi. Sihmanhsehlaw Cite cu a alnak a lo ahcun zeitindah alter tthan khawh a si ti lai timi bia hi daithlanh awk a tha lomi asi. A sullam cu Keimah a ka zummi cu zungzal nunnak pek thai an si ko nain zei tindah nan rawh tthan khawh ning hi asi ti khi a sullam cu asi. Cucaah cun pei ka ding ko, ka ttha ko ai timi caah ka ra loh, a sualmi khamh awk ah ka ra a tinak kha asi cu! Cu hnak in ka duh deuhmi cu Jesuh Khrih nih mitcaw pa a damter hnu i Farasi mi hna sinah a chimmi hi asi. Nan mit cu rak caw taktak sehlaw cu sual phawh nan si hnga loh, nan mah nih kan mit a caw loh nan ti ruangah hin sual phawt na sinak cu a tang peng rih ko a tinak hi asi. Chim duhmi cu Thlarau in kan mit a caw ti hi i theih ulaw nan thlarau mit cu ka deiter ko hnga i nan sualnak cu ngaihthiam nan si ko hnga ti khi a sullam cu a si. Amen! Alter tthan khawh lo ding minung cu ka zum ve ko, ka hrintthan ve ko ti ttung i Thiang Thlarau a ngeilo mi pawl hi an si. Alter tthan khawhlomi cazin ah na telnak hnga lo, nangmah caah hi Thawngtha hi van ttial chin asi. Amen! Zungzal Nunnak asi mi Thiang Thlarau kha i ngaih ve law mi vialte caah zohchunh awk tlak in nun ve ko cang. Amen. Bawipa nih sunparnak co ko seh...
AL PIALTERTU CU SATAN ASI I CITE BANG THLARAU IN AN ALTERTU CU JESUH KHRIH ASI. AMEN!
MARKA 9:49
"A mi kip kha mei in cite bantukin alter an si lai.
MARKA 9:50
Cite hi a ṭha. Sihmanhsehlaw a alnak kha a loh ahcun zeitindah na alter ṭhan khawh ti lai? Nan chungah cite kha i ngeih u law pakhat le pakhat kha i rem tein um u," tiah a ti.
Comments
Post a Comment