Atang hmanthlak ka zoh ah hin acelh in ka celhlo, Na fale na vuak tawn hna le fak deuh in na chimhhrin tawn hna kha na mitthlam a cuang ve maw? Fale hi zeitindah kan chimhhrin cio hna tihi fak deuh in kan ruah ahau cang. Kan lung an kan tonlo tik le kan thin an kan hanter tikah diriam tuk in kan fale kan chimhhrin hna in fak tuk in kan vua sual hna maw? Mah hmanthlak na zohnak nih hin na thinlung ah bia tampi a chim lai i tampi an cawnpiak lai tiah zumhnak ka ngei. Kan fale hi kan duhtuk ko hna i kan dawttuk ko hna nain kan ing apuang cio cang ahcun duhtawk tein vuak hmangmi kan si hi apoi ngai tawn tiah ka ruah. Fale hi duh an nungtuk i an sungtuk hringhran. A can tampi ahcun ka fale ka zoh hna i ka lung an si tuk ruangah hin mitthli thlak buin anlu cungah kutchuang in Bawipa sinah lunglawmhnak ka chim tawn. Nangta na fale hi na lung an si tuk ve ko lo maw? An lu cungah kut chuangin mitthli he thlacam lawmhnak na chim ve maw?
Baibal zong nih kan fale hi Khrihfa ziaza in cawnpiaknak tu he ṭhanter hna uh tiah fial kan si. Khrihfa ziaza in cawnpiak hna uh tiah a kan fialmi cu Pathian dang aum lo, nihin i nangmah le keimah nih kan biakmi Pathian lawnglawng hi Pathian nung cu asi tihi asi i a nungmi Pathian asi timi cawnpiaknak lawng khi si loin an thinlung chungah Pathian anun tiang an zumh i an ngeihnak hnga lam nan hmuhsak hna lai tihi asi. Na fanu hna le fapa hna hi Baibal relnak le Pathian bia cawnpiaknak he na ṭhanter ko hna ahcun thinhung tuk in chimhhrin an hau hrimhrim lai lo. Innchungkhar ah a biapi bikmi cu fale si loin Nu le Pa nih Pathian dawtnak hi thukpi in kan hngalh a herh. Nu le Pa nih Pathian dawtnak a hngalmi fale cu vuak hau lengmang cu an si hrimhrim lai lo. Aruang cu Fale hna nih hin Nu le Pa kan ṭhuṭ/dir ning tein le kanmah ziaza tein an ṭhang (Nu le Pa nan ṭhaṭ ko ahcun fale an ṭha hrimhrim ko lai). Nu le Pa nih Pathian Fa na silo ahcun zeitluk in na vuak hna i na chimhhrin hna zongah an upat tikah cun an tlau thotho ko lai (or) Na fale cu na dawt tuk ko hna lai i na vua in na si bal hna lai lo nain an upat tikah cun an tlau thotho ko lai. Nu le Pa nih fale kan dawt taktak hna ahcun vuak le raknak sawhsawh si loin Pathian fanu le fapa sinak tu hi Nu le Pa nih kan ngeih khawhnak hnga zuanhnawh hna sihlaw kan fale zong hi Khrih an ngeih tiang in aduhnak zulh an thiam thiang he ṭhanpi hram hna usih.
Na fale caah Ro ṭhabik na khonpiak khawhmi hna cu nangmah na nun zohchunh awktlak tein Pathian sinah na nunmi te hi asi. (vawlei chawva ro hna hi cu ahmum lomi an si i ahmunmi cu Jesuh Khrih lawng asi). Zumhawktlak tein na nunmi theitlai nih cun na fale cungah thluachuahnak aphurh lai i na ngeihmi Jesuh Khrih cu na fale chung zongah a lut ve lai. Amen! Kan ceunak cu kan fale le kan innchungkhar nih pei an hmuh hmasa awk le an tinco hmasa awk cu asi cu tiah... Ro vialte lakah aṭha bikmi Ro cu Jesuh Khrih hi asi ko. Na fale nih vawlei cungah asungbikmi Ro, Jesuh Khrih an ngeih khawhnak dingah timhtuahnak rak ngei ve cang. Nu le Pa nih Jesuh Khrih nan ngeih ko ahcun Fale zong nih an ngeih hrimhrim lai timi hi rak i cinken ve muh. Fanu le fapa hna nunzia dawh tein le Pathian duhning in ṭhang hna seh ti na duh ahcun nu le pa nih kan Pathian kong theihnak tiangah nung ve ti loin ngeihnak in nung ve cang law Amah he thlacamnak in hawikomhnak le umṭinaktu he kal ko, Bawipa he hawikomhnak in na kalṭi ko ahcun na fale vialte zong nih a nganbikmi Pathian he hawikomhnak thluachuah cu an van hmuh ve te lai. Amen. Bawipa nih in umpi chin seh....
EFESA 6:4
Nu le pa hna, nan fale kha an thin hung seh tiin ti hna hlah u. Khrihfa ziaza le cawnpiaknak he tu khan ṭhanter hna u.
Comments
Post a Comment