SUAL NGAIHTHIAMNAK THAWNGṬHA LAWNG SI LOIN SUAL NGAIHCHIHNAK HE THAWNGṬHA PHUAN FIAL KAN SI..

Na ruat bal maw? Minung tampi nih cun sualngaihthiam hi kan duh dih cio i kan sualnak zong cu Jesuh Khrih thisen thawngin ngaihthiam cu kan si taktak. Amen! Sihmanhsehlaw biatak asimi cu asuallomi kan umlo caah sual ngaihchihnak tel loin sual ngaihthiamnak hi a tling kho lai maw ti hi asi. Jesuh Khrih nih thihnak in a thawhṭhan hnu ah a zultu sin i achimmi cu Keimah Min in Jerusalem thok in vawlei cung hmunzakip ah sual ngaihchihnak le sual ngaihthiamnak thawngṭha nan chimh hna lai ti hi asi. Amen! Minung leiin kan tuahawk kan rian cu kan sual kan i ngaihchih bak awk le kan sual kan phuan awk asi i Bawipa Jesuh nih a kan tuahpiak ve cangmi cu nan sual kaa cinken ti lai lo, nan sual kan ngaihthiam dih hna tihi asi ve. Amen! Bawipa duhning in sual phuanmi le sual ngaihchihnak nih a zulh zungzal mi cu na sualnak kan ngaihthiam dih tihi asi zungzal ko. Amen! 

Van fianter kan duhmi cu sual ngaihchihnak le sualphuannak kan ngeihmi vialte hi kan thinlung taktak in asi awk asi. Nihin bantuk Coronavirus ruangah ralrinnak phunkip na ngeih tluk tein na sual phuannak le naa ngaihchihnak cu kaltaknak in na langhterlo ahcun rai nih an phanh ve kho men. Rai na ṭih ruangah sualphuangmi le sual ngaihchihmi si loin Bawipa na zumh le na ṭih ruang tuah si ko seh. Sual ngaihthiamnak cu Jesuh Khrih thisen thawngin aummi asi i Jesuh zummi le cohlangmi nih kan hmuhmi asi. Jesuh Khrih zummi le cohlangmi nih sual phuannak le sual ngaihchihnak in kaltak nun kan ngei ve. Pathian fale zong rai nih a kan phanh ve ko lai nain Bawipa nawl kan ngaih buin rai nih a kan phanh ahcun Bawipa tinhmi cu aum hrimhrim ko caah Bawipa nih kanmah hmangin Bawipa sunparnak alang ko lai. 

Sual ngaihchihnak cu kan tuah tawnmi sualnak kha Jesuh Khrih thawngṭha kan theihmi ruangah mertak in sualnak tuahtilo hi ka chim duhmi asi i sualphuan cu kan rak tuahciami sualnak vialte hi kan theihmi Jesuh Khrih Thawngṭha ruangah kan kaa in kan tuahmi sualnak kha pakhat hnu pakhat in ka tuah, kan sual ti phuan hi kan chim duhmi asi. Sual ngaihthiamnak tu cu minung nih kan tuahkhawhmi chungah a umlomi asi i sihmanhsehlaw Pathian nih vawlei aummi minung hi a kan dawt tuk caah a Fapa ngaihchun te lawng a kan pekmi dawtnak thawng hin ngaihthiam dih cio kan si ti hi sual ngaihthiamnak phuanter fial kan simi cu asi. Sihmanhsehlaw ngaihthiamnak taktak ahmumi cu vawlei cung minung vialte hi kan si lai lo i Jesuh Khrih cu Pathian nih keimah Khamhtu le Bawipa(Uktu) ah arun thlahmi A Fapa asi tiin a zummi le acohlangmi lawnglawng sual ngaihthiamnak le Khamhnak cu pek kan si. Amen! Khamhnak taktak ka hmu maw ti hngalh na duh ahcun sualnak chungin na luat cang maw? timi nih alanghter. Sualnak na tuahrih ko maw? Sual phuannak tak nih ngaihchihnak taktak achuahpi i sual ngaihchihnak taktak cu Bawipa cohlanmi le duhmi asi.. Cucaah Thawngṭha chim fial ka si cu sual ngaihthiamnak kong lawng si loin sual ngaihchihnak zong kan ngeihchih ding he asi. Amen.

Minung tampi nih sualngaihthiam cu kan duh ngai nain sualngaihchih cu kan duh tuk lo. Sualngaihthiam kan ti lengmangmi cu Pathian vel(Grace) asi i sual ngaihchihnak kan ti mi cu Biatak(Truth) hi asi. Cucu Jesuh Khrih nih aratpimi Vel le Biatak cu asi. Amen. Thawngṭha chimtu tampi zong nih sual ngaihchihnak le ngeithiamnak kong hi hmunkhat ah kan chimṭi lengmang ahau. Jesuh Khrih azum i acohlangmi nun kan zoh tikah ngaihthiam cu kan duh tuk nain ngaihchihnak cu kan duh lemlo. Phundang in chim ahcun Vel cu kan duh tuk nain Biatak cu kan duhlo. Vawlei dongh tiang Thawngṭha biatak chim fial kan si mi cu sual ngaihchihnak in sual ngaihthiamnak hi an si. Sual ngaichihnak zong sual ngaihthiamnak tello ahcun san an tlailo i sual ngaihthiamnak zong sual ngaihchihnak tello in cun a tlam a tling ve ṭhiamṭhiam lo. Biatak cu ngaihthiamnak taktak na hmuh ahcun ngaihchihnak nun cu na ngei hrimhrim lai i ngaihchih nun taktak na ngeih ahcun ngaihthiamnak tling na hmu ruangah asi ve ko lai. Mah hna pahnih hi rian an ṭuanṭi zungzal mi an si i sual ngaihchihnak kan ngeih hnu ah sual ngaihthiamnak nih a van zulh ve, cu zong cu Jesuh Khrih thawng lawnglawng in asi. Amen! 

Chimduhbikmi cu sual ngaihchihnak le sualphuannak kan ngeihmi nih hin zeitlukin dah asualmi kan si timi a kan hngalhter i zeitlukin dah a sualmi kan si timi kan i hngalhnak nih Pathian nih zeitlukin dah a kan ngaihthiammi atam timi a kan hngalhter, Pathian nih zeitlukin dah a kan ngaihthiammi atam timi kan i hngalhnak nih zumhawktlak tein nun duhnak a kan pek. Zeitluk misual dah ka si ti kan i hngalh lo chung paoh cu zeizat remruam dah ngaihthiam ka si timi cu kan i hngal kho ve bal lai lo. Cucaah sawm kan duhmi cu zeitluk a sualmi na si kha sual ngaihchihnak le sualphuannak rak ngei law cu sual ngeihchihnak le sualphuannak na ngeihmi nih cun zeitluk thuk in dah sual ngaihthiamnak pek na si kha an hngalter lai i cu nih cun Bawipa sinah sualphuan le ngaihchih hau lengmangmi nun in an ṭhial lai i Biatak nun chungah an hruai lai. Amen! 
LUKA 24:47
cun amah min in sual ngaihchihnak le sual ngaihthiamnak kong kha Jerusalem khua in i thawk in miphun vialte hna sinah chim a si lai,' tiah aa ṭial.