VANCUNG PENNAK CHUNGAH NA LUT CANG MAW?

Vawlei cung hmunzakip ah a ummi ka miphun vialte hna Bawipa nih nan umnak hmun cioah Amah dawtnak thukpi in intheihter chin hna sehlaw biathli in ruah cio ko hna seh. Atu i thawngṭha ka ṭialmi Vancung Pennak chungah na lut cang maw? timi hi fak deuh in rak ka ruahpi ve tiah kan sawm. Biatak cu Vancung Pennak hi tuahṭuannak in le nunthiannak men in kan hmuhkhawhmi asi hrim lo tihi voi tampi chim ka duh. Vancung Pennak kan luhkhawhnak dingah cun lamkhat lawng aum i cucu Jesuh Khrih zumhnak lawng bak in asi. Pathian Fapa Jesuh Khrih kan zumhnak thawngin Ti le Thlarau in kan hrinṭhan lawnglawng ah Vancung Pennak chungah kan lut kho tihi fakpi in chim ka duh. 

Tangdornak na ngeih ruangah le na nun a thianhlin ruangah, na ṭhat ruangah si loin Vancung Pennak chung na luh cang ruang tu ah tangdornak le nun thianhlinnak, ṭhatnak na ngeih tu asi deuh. Kanmah ṭhatnak le tuahnak ruangah khamh kan si lo bantukin kanmah thianhlim ruangah le mah chambaunak kan i hmuh ruangah Vancung Pennak kan luh asi hrimhrim ve lo, Pathian Fapa Jesuh Khrih kan zumhnak ruangah kan zumhnak cu cohlan kan si i cohlan kan sinak thawng cun ti le Thlarau in kan hrinṭhhan, Ti le Thlarau in kan hrinṭhannak in Vancung Pennak chungah kan lut tihi biatak asi mi Pathian Fapa Jesuh Khrih nih a kan cawnpiakmi cu asi. Bawipa nih sunparnak co ko seh. Vancung Pennak ka ti lengmang mihi Vancung Khua le hmundang kaa dang khi si loin kanmah chunglei hrimhrim ah Bawipa Jesuh Khrih nih a dirhmi Pennak tu hi ka chim duhmi asi.

Bawipa Jesuh Khrih nih a zultu hna sinah Mirum mi hna Vancung Pennak chung luh hnakin ṭhimka chung i kalauk luh hmanh a fawi deuh lai tiah a zultu a rak chimh hna lio ah khan a zultu hna cu an khuaruah a rak hartuk i Ahodah khamhnak cu a co kho ne lai tiah Bawipa Jesuh cu an rak hal. (Matthai 19:23-26). Zultu vialte nih an rak ruah lengmangmi cu khamhnak le Pennak chung luhnak hi tuahnak in an rak ruah lengmang caah asi. Kan tuah lengmangmi le ṭuan lengmang ruangah khamh le Pennak chung kan luh si hrim loin Khamhnak le Pennak chung kan um cang ruang tuah chungleiin Thiang Thlarau fialnak in kan tuahmi le ṭuanmi an rak si deuh. Jesuh Khrih nih a lehmi hna cu minung caah cun asi kho lo sihmanhsehlaw Pathian caah cun asi kholomi zeihmanh aum lo tiah arak leh hna. Jesuh Khrih bia fakpi in ka ruah lengmang mi pakhat cu ka Pa nih lam aserpiak hna dah ti lo ahcun ahohmanh ka sinah nan ra kho bal lai lo tiah a timi hi asi (Johan 6:65). Cubantuk ṭhiamṭhiam in Jesuh Khrih nih Keimah sinin dah ti lo ahcun ka Pa sin phanhnak lam dang a um ve lo tiah ati ve (Johan 14:6). Jesuh Khrih nih ka Pa nih lam an serpiak hna dah ti lo ahcun kan sin phanhnak lam aum lo bantukin ka Pa sin phanhnak lam zong Keimah sinin dah ti lo ahcun lamdang aum ve lo tihi asi. Biatak cu khamhnak le Vancung Pennak kan ti lengmang mi zong hi Pathian le Fapa Jesuh Khrih nih dah an kan tuahpiak lo ahcun lamdang aum hrimhrim lo tihi fiang tein chim ka duhmi asi. 

Khamhnak hi tuahnak in kan hmuhkhawhmi asi lo ti hi voi tampi kan theih lengmang ko bantukin vancung pennak zong hi tuahnak in kan hmuh khawhmi pakhat hmanh a um hrimhrim ve lo ti hi chim taktak ka duhmi cu asi. Jesuh nih Vancung Pennak kong a chim i a zultu hna nih khamhnak kong in an cohlan ve ko. Biatak cu ti le Thalrau in hrinnak aum lo ahcun Vancung Pennak chung cu na lut bal lai lo i Vancung Pennak chung i na um cang ahcun tuahnak thawng cun luh nai tim bal ti lai lo. Zumtu taktak nih kan nun chungah aum cangmi nunzia cu tuahnak in kan hmuhmi si ti loin kan ngeih cangmi Jesuh Khrih chungin a luangmi nunzia tu kha chungleiin lenglei tu ah kan van langhter tu khi asi deuh. Nunzia kan ngeih ka timi zongah hin biatak tein chim ka duhmi cu kanmah nih kan tuahmi ruangah ngeihmi si hrim loin Fapa Jesuh Khrih zumhnak thawngin kan hmuhmi Thiang Thlarau nih kan nun ah a kan pekmi nunzia tu khi ka chim duhmi asi. Hrinṭhan taktak cu nunhlun loh i nunthar le ziathar neih khi asi (2Korin 5:17).

Bawipa Jesuh nih Vancung Pennak cu lungvar a ṭha phun he a tahchunh. Lungvar a ṭha phun a kawlmipa nih a hmuh tikah angeihmi vialte kha a zuar i lungvar cu a cawk tiah ati (Matthai 13:45). Vancung Pennak a kawl taktakmi na si ahcun lamdang aum hrimhrim lo. Vancung pennak kawl ka ti tikah hin kawlnak hi tuahnak in ka chim duhmi si loin na zumhnak nih na thinlung chungah kawlduhnak a van hrin hnu i na kawlmi khi ka chim duhmi asi. Bawipa Jesuh Khrih hi na nunnak dihlak, na thinlung dihlak, na ruahnak dihlak, na ṭhawnnak dihlak in zum law daw ko, zeizong vialte kaltakin Thawngṭha hi zum ve cang law lungvar ṭha phun a kawlmipa bantukin na ngeih vialte zuar in le na duhmi a ṭhalomi vialte hlaw in lungvar ṭha phun Vancung Pennak hi i cawk ve ko. Vancung Pennak hi cawk khawhmi asi tinak khi ka chim duhmi si loin na theih lengmangmi khamhnak thawngṭha hi theihnak tiang le fiannak tiang lawngin siti loin na nunnak dihlak in zumhnak le zeizong vialte Bawipa nih a duhlomi na tuah cangmi sualnak kha ngeihchihnak le kaltaknak he rak zuanhnawh in Thawngṭha hi rak cohang cang timi hi kan sawm duhmi cu asi. 

Jesuh Khrih nih Vancung Pennak hi neihmi vialte hloh in cawkphu bak asi tiah a kan cawnpiak. Vancung Pennak hi Fapa Jesuh Khrih nih a pum hrimhrim in minung kan thinlung chungah Pathian umnak inn, Pathian biakinn adirhmi Pennak cu asi. Biatak cu minung vialte hi khamhnak kan co taktak tunglo ahcun kan ngeihmi vialte hi kan kaltak dih cio ko lai. Mah belte Ti le Thlarau hrinthannak in Vancung Pennak chung na luh ahcun na ngeihmi chawva le zeizong vialte hi a rawk kho ti lomi Vancung Khua ah chaw naa khonnak ah na hman khawh hna lai. Amen. Bawipa nih sunparnak co ko seh. Vancung pennak hi lungvar ttha phun asi i Vancung Pennak a kawl taktak mi nih cun neihmi vialte le duhnak atthalomi kaltaknak in zuanhnawh phu asi tihi Bawipa nih a kan cawnpiakmi asi. 

Nikhat Cu ka naunu pakhat bia ka hal i Vancung Pennak chungah na lut cang maw? tiah ka hal. A ka lehmi cu keimah te hna nih zeitindah Vancung Pennak chung ahcun kan luh khawh lai tiah a ka leh. Na hrintthan cang maw? tiah ka hal tthan. Ka hrinthan cang tiah a ka leh. Mahbantuk hin hmunkakip ummi zumtu zong nan si cio lai ka zumh, aruang cu Vancung Pennak chungah aummi hna cu an ttha lai, an nun athiang lai, Baibal an rel lai, thla an cam zungzal lai i rawl an ulh zungzal lai tiah kan ruah caah asi. Biatak tein ka chim dingmi cu hihi asi: Ti le Thlarau in hrinthan na si hi Vancung Pennak chung na luhnak ding caah pei asi cu tihi fiang tein chim ka duhmi asi. Hrinthannak kan ti lengmang mi hi hnatheihnak tiang in azami si loin cunglei Pathian tthawnnak he Thlaurau in hrin ahaumi asi, ruahnak le theihnak, fiannak tiang nih cun a phan naisai lo. Bawipa Jesuh Khrih nih athisen le nunnak bakin pekmi Khamhnak a kan serpiakmi hi hnatheih tiang le mi nih chimchinnak tiang cun aza hrimhrim lo, Nangmah hrimhrim nih na chungah Thlarau in hrin na si hi naa hngalh hrimhrim awk asi. Nau apawi mi nih cun a paw chungah zeidah aum ti cu an hngalh bantukin na hrinthan taktak ahcun na chungah zeidah aum ti cu na hngalh ve hrimhrim ko lai. Biatak cu Ti le Thlarau in na hrinthan taktak ko ahcun Vancung Pennak chungah na lut hrimhrim ko lai. Ka nawlhrih lai muh: Pathian Pennak chung luhnak ding caah cun pei hrinthan kan herh cu..... 

Jesuh Khrih nih a chim tthanmi cu Bawipa Bawipa atimi paoh nih Vancung Pennak chungah an lut dih lai tinak asi lo, Vancung Khua i aummi ka Pa nih tuah hna seh ti aduhmi atuahmi lawnglawng kha an lut lai tiah a ti ve (Matthai 7:21). Mah ka zawn zongah hin Vancung Khua ti loin Vancung Pennak tiah achim. Pathian nih tuah hna seh ti a duhmi kha an hngalh khawhnak hnga Jesuh Khrih nih tlang cungah a cawnpiak hna nain an nun ah tuah duhnak taktak le a chimmi zulh duhnak an ngeih lo caah Jesuh Khrih nih Bawipa Bawipa a ka timi paoh nih Vancung Pennak chungah nan lut lai tinak asi lo tiah achimnak hi asi. Asullam cu Bawipa cawnpiaknak athei ko nain a zul duh lomi hna cu Bawipa Bawipa tiah kaa in au lengmang ttung i Pathian duhnak a zullomi hna hibVancung Pennak chungah a lut lomi le lung cungah inn asa lomi cu an si (Matthai 7:24-27). Biatak cu theihnak in fiannak, fiannak in hngalhnak tiang zong hin Pathian duhnak cu kan tuah kho bal lai lo. Pathian duhnak taktak a tuah khomi cu Fapa Jesuh Khrih lawng asi i Jesuh Khrih sin in Thiang Thlarau kan hmuh ve lawnglawng ah Pathian duhnak taktak cu kan tuah kho ve lai. Judah mi hna nih Pathian nih ttuan hna seh ti a kan duhning in kan ttuan ahcun zeidah kan ttuan lai tiah Bawipa Jesuh Khrih kha an rak hal, alehmi hna cu Pathian nih tuah hna seh tiah an duhmi hna rian cu athlahmi Fapa Jesuh Khrih zumh hi asi tiah a rak leh hna (Johan 6:28-29). Pathian nih tuah hna seh ti a kan duhmi kan tuah khawhnak ding ahcun lamdang aum lo i minung le Pathian karlak ah lamkaltu asimi le remnak a kan serpiaktu pakhat sin lawnglawng in asi i cucu Jesuh Khrih hrimhrim hi asi. Cubantuk tthiamtthiam in tlangcung cawnpiakmi vialte (Matthai 5:1-7:29) zong hi Jesuh Khrih zumhnak thawngin Bawmtu Thiang Thlarau lo cun kan theih ko le kan hngalh ko zongah kan tuah kho bal lai lo. Kan tuah khawhnak le kan teinak ding cu Bawipa Thlarau thawng lawnglawng in asi ko lai. Amen!  Jesuh Khrih sin in dah ti lo ahcun Pahtian duhnak hi hngalh khawhnak lam aum lo i Pathian duhnak tuah khawhnak ding zongah aherh hmasa bikmi cu Thawngtha theih kha asi, Cu thawngtha na theihmi kha zumhnak in na cohlan tikah fiannak le hngalhnak tiang lawng hmanh si loin Ti le Thlarau in hrinthannak tiang a kan pek hnu ah Thiang Thlarau bawmhnak in Pathian duhnak cu kan tuah kho lai i Jesuh Khrih cawnpiaknak vialte zong hi Thiang Thlarau bawmhnak thawngin kan zulh khawh hnga. Amen! Pathian nih hin minung vialte hi Amah sin phan viar hna seh tihi a kan duhbik i Amah sin kan phanhkhawhnak ahcun lamdang aum lo caah tuah hmasa hna seh tiah a kan duhmi cu kanmah ca bakah arun thlahmi Fapa zumhnak in Ti le Thalrau in hrinthan, Ti le Thlarau hrinthannak in Vancung Pennak chung luh hi asi. Amen! Vancung Pennak chungah na um cang hnu ahcun achung ummi na si cang caah na tuah ttuan dingmi rian le Pathian duhnak zulh le tuah ccu a dong bal ti lai lo. Company pakhat na luh i rian na ngeih peng bantuk khi asi ko lai...

1. A hohmanh a hrin tthan lo ahcun Pathian Pennak a hmu kho lai lo.. Na hrinthan lo ahcun Pahian Pennak = Vancung Pennak kha na hmu kho lai lo ti hi asi.

2. Ti le Thlarau in na hrin tthan lo ahcun Pathian Pennak= Vancung Pennak chungah  na lut kho lai lo. Minung kan si khawhnak ding ahcun minung in hrin kan hau i Thlarau hrin kan sinak ding ahcun Thlarau in hrin kan hau ve..

3. Hrinthannak nih a tinhmi hi zei cem dah asi hnga tiah na ruah? Van kainak ah hin maw kan ruah zungzal ko hnga? Ataktak asimi cu Pathian Pennak= Vancung Pennak chung luhnak ding ca tu ah a si..

4. Na hrintthan ahcun Vancung Pennak = Pathian Pennak chungah na lut lai tihi Jesuh nih bia a kan kamhmi cu asi.

5. Jesuh nih vawlei ah a rat hnawhchan mi cu vawlei i a Pennak dirh hi asi. Cu a Pennak cu minung kan chungah a hrintthanmi kan dihlak chungah a dirh.. Cu Pennak cu Pathian Pennak= Vancung Pennak tiah kan auhmi cu asi..

6. Jesuh zumhnak in kan hrintthan tikah Pathian Pennak = Vancung Pennak chungah kan lut. Vancung Pennak = Pathian Pennak chungah kan um ti kan hngalhnak cu Thiang Thlarau kan chungah a umnak hin asi..

7. Pathian Pennak= Vancung Pennak cu minung kan chungah Jesuh Khrih nih Pathian biakinn a saknak hin asi. Cucaah cun pei Pathian biakinn nan si, Thiang Thlarau Biakinn nan si, Pathian Thlarau zong nan chungah a um kha nan hngalh a tinak asi cu...

8. Pathian Pennak= Vancung Pennak cu hmuh khawh dingin a ra lai lo, zeicatiah Pathian Pennak = Vancung Pennak cu nan chungah pei a um cu tiah ati. Amen.

9. Nawlhchih ka duhmi cu hrinthan na hauh cu Pathian Pennak = Vancung Pennak chung i na luh khawhnak ding caah asi ti hi asi. Na hrinthan hnu ah Pathian Pennak = Vancung Pennak chungah na lut tinak asi. Pathian Pennak =Vancung Pennak chung na um tikah zungzal nunnak cu nangmah ta asi ti kan hngalh. A ruang cu Pathian biakamnak vialte pek kan si lai Aamakhan caah Thiang Thlarau cu kan chungah pek kan si cang caah asi. Amen! Thih hnu ah si loin kan nun chung hrimhrim in zungzal nunnak cu kan co cang, cu kan co cang ti Aamakhan cu Pathian Pennak chungah kan um cang caah asi. Amen!

——

JOHAN 3:3

Jesuh nih cun, "Biatak tein kan chimh: Ahohmanh hrin ṭhan a si lo ahcun Pathian Pennak kha a hmu kho lai lo," tiah a leh.

JOHAN 3:5

Jesuh nih cun, "Biatak tein kan chimh: ahohmanh ti le thlarau in hrin a si lo ahcun Pathian Pennak chungah cun a lut kho lai lo.

1 KORIN 3:16

Pathian biakinn nan si kha nan hngalh i Pathian Thlarau nan chung i a um zong kha nan hngalh.

1 KORIN 6:19

Nan pum cu Thiang Thlarau biakinn a si kha nan hngal lo maw? Cu Thlarau cu nan chungah a um i Pathian nih an pekmi hna a si kha nan hngal lo maw? Nannih cu nanmah ta nan si lo, Pathian ta nan si;

LUKA 17:21

Ahohmanh nih, 'Zohhmanh, hika ah a um hih, khika ah a um khih,' an ti kho lo; zeicahtiah Pathian Pennak cu nan chungah pei a um cu," tiah a ti hna.