INNBAWI NIH HMANTLAK, HMAN ZUNGZALMI KA SI TIANG, ADONGH TIANG HRIMHRIM KA TLI LAI..

Ni le caan, zarh le thla, kum hna cu tlaih khawh loin an liam cuahmah. Minung kan duh herhmi zong nih dinh ve lo in an karh cuahmah ve. Pathian duhnak in Pathian tinhpiakmi rian kan i thim tikah pumpak caah siseh innchungkhar caah siseh cingla sahlawh rualchan caah siseh theihthiamnak tampi an tlau cuahmah nain Bawipa zangfahnak a dong ballomi nih dawtnak le lawmhnak aluanter tthan zau lai. Culawng hmanh si loin innchungkhar nih chambaunak a ngeihmi an um len lai nain Bawipa duhnak nai thimmi asi ko ahcun lunglawmhnak na cungah a phan zungzal ko lai. Jesuh nih a kan cahtakmi cu zulh nan ka duh taktak le nan ka dawt ahcun ka nawl nan ngaih lai i nangmah le nangmah hmanh i philh in nan ka zulh lai; keimah hnak in aho hmanh na daw deuh lai loh tiah bia a kan cahtakmi atlinnak asi ve ko tiah ka zumh. Sihmanhsehlaw Bawipa a daw taktak mi na si maw? ti cu nangmah tein naa hngalh ko lai.. Bawipa dawt kan timi hi zeidah a kan tuahpiak cang, zeidah a kan tuahpiak rih lai, zeizong vialte tuah khotu asi timi zumh lawng hi si loin zeitindah Bawipa duhnak ka zulh ve lai i Bawipa fialmi rian kan lim ve lai timi le zeitlukin dah Bawipa nawl ngaih kan i thim ve timi tu hi Bawipa dawt taktak cu asi deuh. Jesuh nih atimi cu nan ka dawt taktak ahcun ka nawlbia kha nan zulh hna lai tiah a kan ti (Johan14:15). Bawipa ka dawt na ti ko ttung i anawl na ngaih ttunglo ahcun na daw taktak lo tinak asi. Bawipa dawt cu anawl ngaih hi asi. Biatak cu Jesuh na ngeih lo ahcun zeitik hmanh ah na daw kho bal lai lo...

Bawipa ka dawt tuk caah a nawl ngaih kaa thim ve lai nati tikah nangmah duhnak tlinter khi si loin Amah duhnak tlinter tu asi lai caah a fawilomi tampi na pah lai. Minung hi kanmah duhmi kan tuah le kan ei ahcun kan ilawm ngaingai nain kanmah duhlomi asi cang ahcun kan lungdongh a fawi taktak. Pathian nawl zulh na thim tikah na duhmi si loin Amah duhmi le duhning in na zulh a hau lai caah Bawipa he hawikomhnak thukpi na ngeihta lo ahcun lungdongh a fawite mi asi. Sihmanhsehlaw Bawipa he a tak in hawikomhnak thukpi na ngeih ko ahcun naa lawmhnak bik cu Amah duhnak tlinter le anawl ngaih hi asi ko lai. Amen! Bawipa nawl na ngaih ruang zong ah na duhnak tlinter hnak in nangmah hrimhrim nih na hngalh khawh lomi na caah atthabikmi kha Bawipa nih atlinter ko lai. Bawipa nawl ka ngai lai i ka duhmi le ka herhmi atling lai timi in na zuanhnawh ahcun na duhmi le na herhmi atlinlo tikah na lung a dawng zau ko lai. Nangmah herhmi le duhmi tlinter duh ah Pathian nawl na ngeihmi cu Bawipa na dawt ruangah anawl na ngeihmi si loin na duhmi le na herhmi an tuahpiaknak dingah anawl na ngeihmi tu asi. Cubantuk in Pathian nawl ngaih naa thimmi cu Bawipa nih a lawmhmi si loin ruahchannak ngeilo in na dawt ve hrimhrim ruang i anawl na ngainak tu nih hin a lawmhter deuh i na herh ningin le na caah atthabik in thluachuah an pek ko lai. Amen! Minung tampi cu Bawipa nawl ngaih kan i thawh bakin kanmah duhmi le herhmi atlinter lai timi he kan i thawhchih. Zeidah a kan tuahpiak lai timi hi Bawipa rian asi i zeitindah Bawipa nawl ngaihnak in kan lawmhter ve lai timi hi minung kanmah rian asi ve.

Mah bantukin forhfialnak le thazang peknak ca na sin a rak phanh tikah ca ttialtu keimah hi nangmah hnak in ka tthawng deuh caah asi timi langhternak ah si loin ka thinlung te nih theihnak a ngeihmi ruangah le siaherhnak nganpi kan ngeih ve caah asi. Ca ttial luaimai hi attha ngaimi alo nain nun in cawn duhnak le Bawipa duhnak zulh duhnak a um ve ttunglo ahcun pakpalawng tthiam asi te ko lai. Ka chim duh lengmang mi cu Pathian na dawt taktak venak hi zeitindah langhter naa timh ve? Baibal relnak tiang lawng maw? Rawlulhnak le thlacamnak tiang lawng maw? Biakinn phak lengmang tiang lawng maw? Pathian rian kan ttuan timi tiang lawng maw? Taksa duhnak kaltaknak tiang lawngin maw? Bawipa nawl ngaihnak taktak he dah na dawt ve cang lai? Ka ruah lengmang mi cu Pathian kan dawt taktak nak hi kan tuahmi ruangah si loin Amah he hawikomhnak tling kan ngeihtti lengmang nak tu nih hin tehte an khan awk asi. Jesuh kong an chimmi theih hi cu kai za diam cang! Ka lungthin taktak nih a duhmi cu Jesuh kong theihnak lawng hi si ti loin Amah he umtti le hawikomhnak ngeitti lengmang hi asi. Mah ti ka tikah hin biadawh in chimmi khi si loin a tak in Bawipa Jesuh he i ton ve le Pa Pathian he bia ruahtti, Thiang Thlarau ka chung rianttuannak le cawlcanghnak tling tein hngalh lengmang le Bawipa nih a ka umpinak hngalh taktak hi asi... Nangmah tein van i tuak law na fuhpanh cuahmahmi na Bawipa hi nangmah nih na tong in bia nan i ruah ve cang maw? Kanmah leiin tuahnak tiang men in si ti loin Thiang Thlarau umpinak taktak he tuin Pathian nih a kan fialmi rian cio hi zuanhnawh hna usih..

Pathian nih hin Amah rianttuan dingah mikip a kan auh ko nain a rianttuantu ding taktak ah a thimmi cu mikip si ti loin Amah nawl angaimi lawnglawng a thim hna. Nangteh Innbawi nih hman awkah thimmi chungah naa tel ve lai maw? Zeizong vialte lakah a sangbik le atthabikmi Pathian rianttuan dingah timhtuahnak kan ngeih cionak ah hin kanmah nih kan tuahmi ruangah thimmi kansi si loin Bawipa fialning in a nawl kan zulh ruang tu ah thim kan si. Nangmah tein naa hngalh cem lai. Caan tlawm te kan nung chungah hin rian vialte lakah attha bikmi rian cu Pathian rian pei asi cu tiin kan nunnak dihlak he kan zuanhnawh cio awk asi nain kanmah duhning in Pathian rianttuan kan i timh ahcun kan nganh diam te lai. Innbawi nih hmantlak na si ve nak hnga cawnpiaknak a tthalomi vialte le atu i na zulh cuahmahmi lam Bawipa a lawmhter lotu vialte hna hi kaltak cang hna. Pathian nih an tinhpiakmi rian caah hmantlak le thimmi na sinak ding ah hin rawl ni 40 kan ulhnak thawng hin si loin Bawipa Jesuh Khrih le kanmah zeitluk thuk in dah kan i pehtlai i hawikomhnak in kan i hngalh cang timi nih hin afianter lai. 

Minung tampi nih Pathian rian kan ttuan lai timi kan zuanhnawh tikah tuahnak le ttuannak lawngte khi kan zuanhnawh nain kan nganh taktakmi cu Bawipa he naihniam taktak in umtti dingah hawikomhnak tling kan kawl lomi hi asi. Bawipa he hawikomhnak thukpi na ngeihmi nih na hmailei lam a pheiter lai, na zulhmi lam acho hmanh ah Bawipa he hawikomhnak tling na ngeihmi nih lungtthawnnak le raltthatnak an bawmh zungzal lai i adongh tiang na tli kho peng ko lai. Biaktak cu Bawipa he hawikomhnak tling ngeih lengmang nak nih hin Bawipa nih a kan umpi taktaknak hngalh khawhnak a hrin. Bawipa nih a kan umpi taktaknak hngalh khawhnak a hrin ka ti tikah na ti dingmi cu Bawipa nih pei a zungzal in kan umpi hna lai a ti kha tiah na ka ti ko lai. Cucu asi loh tinak si loin Bawipa nih a kan umpinak taktak hngalhnak cu Amah he hawikomhnak kan ngeihmi thawngin asi. Amen! Na ka zumhlo si le nangmah tein zeitlukin dah Bawipa nih a ka umpinak ka hngalh cang timi hi van i ruat law cu nih cun atu i ka chimmi hi ahman timi na hngalh ve ko lai. Bawipa nih an umpi taktaknak hngalh na duh ahcun lamdang a um lo, Amah he thlacamnak in hawikomhnak rak tuah lengmang ko. Thla na cam tikah nangmah lawng si ti loin Thiang Thlarau nih an umpi na hngalh tiang rak zuan hnawh lengmang ve. Thlacam thawtnak vialte na teh taktak tik lawngah Bawipa he hawikomhnak chungah na lut ve te lai. Thlacam nih an thawt rih lo ahcun thla na cammi a tlawm lawng si loin Thiang Thlarau he hawikomhnak na ngeihmi a tlawm tuk rih tinak asi. Thlacamnak in nazi 1 or 2 tiang kal nai harh rih asi ahcun thlacamnak na daithlang ngai tihi a lang ko.

• Innbawi nih hmantlak sinak ding ah hin zumtu he zumlotu he kan dihlak in auhdih kan si...
• Innbawi nih hman dingah thimmi tu cu Amah nawl angaimi lawnglawng athim hna lai...
• Innbawi he zumhnak in pehtlaihnak kan ngeih hnu ah hawikomhnak chungah luh asi.
• Innbawi he hawikomhnak chung luh hnu ah hawikomhnak ngeih asi i hawikomhnak ngeihlengmang nak nih anawl ngaih khawhnak ahrin...
• Innbawi he hawikomh khawhnak ah hin Baibal Relnak, Rawlulhnak le thlacamnak, Thangtthatnak hna hin ngeih khawh bik an si... Abik in thlacamnak hin asi in ka hmu...
• Innbawi nih hman zungzal ve ding ahcun zumhnak in nifate timhtuahnak na ngeihmi nih aphi an langhter te lai...
• Innbawi nih hman zungzal ding ahcun Foundation na chiahmi athuk ngaingai ahau...Foundation na chiahmi ah hin kum le caan zong nih tampi a ngeih lai... Abik in Thiang Thlarau hruaining in caan tam na pekmi nih aphi tambik achuah lai...
• Innbawi nih hman zungzal ding ahcun nifate Thiang Thlarau hruainak in Cathiang rel lengmang nak hin asi lai....
• Innbawi nih hman zungzal ding ahcun Bawipa duhpiaknak in Rawlulhnak na luh venak hin asi lai...
• Innbawi nih hman zungzal ding ahcun nifate Thlacamnak in Bawipa he hawikomhnak na ngeih pengnak hin asi lai ..
• Innbawi nih hmantlak, hman zungzalmi ka si tiang, adongh tiang hrimhrim ka tli lai...

——-
2 TIMOTE 2:21
Ahohmanh a man a sungmi le a thiangmi thil lak i aa tel kho ve ding, inn Bawi nih a hman awkah aa tlakmi si ve dingah cun, cawnpiaktu ṭhalo vialte kha a kal tak hna awk a si; cun hmaizah awk tlak a simi rian zei rian paoh caah khan aa tlakmi a si lai.
2 TIMOTE 3:17
Cucaah cun Pathian rianṭuantu a simi cu zeizong zeizong ah tlamtlingmi a si awk le thil ṭha phun zakip tuah khawh awkah thilthuam tling tein a ngeimi a si awk a si.
2 TIMOTE 4:5
Sihmanhsehlaw nang cu zeitik caan paoh ah daite le khualu khuataw khak tein um ko; harnak kha in i zuam, Thawngṭha karhter kha fak piin i zuam, Pathian nih an kawh chan rian vialte kha ṭuan.