Minung tampi kan cungah Pathian sunparnak le ṭhawnnak alangh khawhlonak aruangbik cu Pathian tu ṭihlo in kan ṭihmi adang an tamtuk caah asi. Kan ṭihmi hna cu sifahnak, harnak, buainak, coronavirus le damlonak, bill pek khawhlonak, thihnak, hnahnawhnak, tlamtlin lonak, eiawk ngeilonak, min chiatnak, sunghnak, umnak ngeihlonak tiin phun tampi kan ṭihmi hna ruangah hin Pathian sunparnak le ṭhawnnak kan cungah an phan khawhlonak asi. Kan ṭihmi kan cungah atlun tik le atlun lai ah Pathian ṭhawnnak bochannak he akutcak hngak loin kanmah khuakhannak le tuaktannak tuin hmai kan sak tawn caah Pathian ṭhawnnak le sunparnak kan cungah alangh khawhlonak asi. Nihin kan vawleipi nih a ṭihmi zoh tikah Pathian asi lo cu afiang taktak.
Kan miphun zong zeihleilo kan si ve ko i kan ṭihmi cu Coronavirus tu asi i Pathian cu asi ruam loh. Phang hlah, naa kilven len zongah Bawipa aitello ahcun santlaihnak adih te lai. Pathian Fa kan si cio i kan cungah fakpi acang dingmi hi kan Pa, Pathian nih hin chimlo in a kan um hnga maw? Abraham ka tuah dingmi chimlo cun zeitindah ka umkhawh lai atitu hi na Pathian le na Pa asi lo maw? Pathian Fa ka si na timi hi na kaa lawngin maw na chim, Pathian hi ka Pa na ti tikah teh hawi anti ballo maw? Pathian hi na Pa asi i na ṭihzah le na upat i naa bochan ko ahcun hna anhnawhtu vialte hi na hmaika in an zam dih caan aphan te lai. Coronavirus hi minung tampi nih kan ṭih nain nichiarte a kan hrawktu pumsa duhnak kan tuahnak in Pathian cu zei ngai ah kan rel lomi hi cu apoi ah kan chia bak lo hi mu…
Coronavirus ngahlonak dingah ralrin hi achiatnak aum men lai lo nain ralrinnak tampi kan ngeihmi nih cun Pathian kan zumhnak ah hnihkhawhmi ka si maw? silo? timi kan sining te kan van langhter ve timi cu nai hngalh ko lai dah. Ralrin na duhmi taktak na si ahcun zungzal nunnak ca he zeizong vialte ca he hmailei ara lai dingmi vialte ca he Pathian nih ralring hna seh ti a kan duh. Minung tampi kan i ralrinmi hi cu cansau ralrin thiamnak achuahpimi si loin chikhat te lawng kan cawnmi te hi kan i buaipi khimmi an si. Pathian nih ralrinnak ngei hna seh ti a kan duhmi tu cu zungzal in zeitik caan paoah ralrin le ready tein nun hi asi. Coronavirus caah naa ralring ngai ko lai nain zungzal na nunnak Thlarau caah le an Khamhtu Bawipa ratnak ding caah teh ready na si maw? tihi ralrin aṭha ko atimi vialte hna hal kan duh hna.. Coronavirus caah naa ralrin bantuk te hin nichiar te na pum le na nunnak an hrawktu vialte chung hin rak i ralring law zungzal nunnak ding ca zongah rak i ralring chih dingin kan sawm.. Atu in ralring athiammi na si ko ahcun lunglawm tein na tar tikah na thi te lai. Atu in pum le zeizong vialte dawt na thiamlo ahcun na tar lai I na celh te lai lo. Atu thawkin kan zeizong vialte dawt le zohkhenh thiam le ralrin thiam hi Bawipa nih a kan duhpiak zungzal mi asi…
Minung a kan hrawk cemtu cu nichiarte kan pum le kan thinlung, kan ruahnak le kan thlarau hrawktu hna Pathian nih aduh lomi chungah a kan kalpitu le a kan tuahpitu hna satan nih ahmanmi thilri hna hi an si deuh. Kan ral nganbik le kan ṭih dingmi nganbik cu Pathian nih aduh lomi le alawmh lomi kan tuahmi hna tuhi an si. Pathian nih aduh lomi le alawmh lomi ṭih ding khi chim duhmi si loin Pathian na ṭih ruangah Pathian duhlomi le lawmhlomi na hrial ding tu an si ti khi ka chim duh deuhmi asi. Minung leikam in na tonmi thil na ṭih chung paoh cu Pathian sunparnak le ṭhawnnak an lang bal lai lo, na tonmi thil vialte hi ṭihlo in Pathian tu na ṭih tikah Pathian sunparnak le ṭhawnnak an lang te lai. Pathian na ṭih ko zongah na duhlomi le na ṭihmi thil na tong lai loh tinak si loin na ṭihbikmi Pathian asi ko ahcun adang thil na ton hmanh ah Pathian ṭhawnnak in inkhawhnak le pahkhawhnak in teinak tiang an pek ko lai.
Sualnak na ṭih ruangah maw, sual na hrial? Pathian na ṭih ruangah dah sual na hrial? Mah hna pahnih hi sual hrial ciocio an si nain Pathian thinlung ahcun tampi ai dang lai ka zumh. Biatak cu Jesuh nih hin zeihmanh ṭihhlah uh, pum athat kho ṭung i thlarau athat kho ṭunglomi satan le minung, thil dangdang hi ṭihhlah uh tiah a kan cawnpaik. Ṭih dingmi cu Pathian pakhat lawnglawng hi asi i pum le thlarau that khotu asi ati... Na tuahmi le na ruahmi kipah Pathian aṭihmi le adawmi na si zungzal ko ahcun vawlei na nun chungah ton na duhlomi vialte nih an in zamtak caan a phan te lai. Biatak cu na ṭih taktak mi Pathian asi ko ahcun ṭih dingmi dang an um hrimhrim lo tihi ka chim duh cemmi asi ..
Nihin i minung nih kan ṭihmi vialte hna hi Pathian nih ṭih awkah a kan chiahpiakmi si loin kanmah cawnpiaknak dingah a hmanmi hna tu an rak si. Sihmanhsehlaw ṭih dingmi Pathian ṭihlo in ṭihlo dingmi thil tu kan ṭih hna caah kan ṭihmi hna thil hmangin Pathian ṭihzia kan thiamnak hnga cawnpiaknak tu ah Pathian nih a hman hna. Pathian nih a kan cawnpiak duhmi cu nihin i na ṭih lengmang mi thil vialte hnak hin Keimah ka ṭih deuh law Keimah nih cun na ṭihmi thil cungin kan khamh khawh i kan chuah khawh timi hi a kan cawnpiak. Minung vialte nih kan ṭihmi hna hi hrawkkhotu taktak le bawmkhotu taktak pakhat hmanh an um lo i Pathian lawnglawng hi bawmkhotu le hrawkkhotu taktak cu asi. Zeizong vialte bawmkhotu le hrawkkhotu Pathian maw na ṭih cang lai? Adongh tiang zeihmanh anbawm kholotu le anhrawk kholotu thil hnale an hrawk lengmang tu thil hna hi dah na ṭih zungzal rih ko lai?
Pathian ṭih ka ti tikah hin ahmaika i thir lengmang i ṭihnak khi chim duhmi si loin Jesuh Khrih na zumh le Bawipa naa sernak thawngin Khamhnak na co, Khamhnak na comi atling ti langhternak ah Ti le Thlarau in hrinṭhannak na hmu, Ti le Thlarau in hrintthannak na hmuhnak in vancung pennak chungah na lut, Amah pennak chung na umnak in aluangmi dawtnak nih nawlngaihnak le Pathian ṭihzah thiamnak achuakmi khi ka chim duhmi asi. Pathian pennak chungin aluangmi dawtnak taktak in nawlngaihnak le Pathian ṭihnak achuakmi cu thir lengmang in Pathian ṭihnak aum loh. Pa le fa taktak, dawtnak bantukin nawlngaihnak he ṭihzahnak tu khi achuak. Thir lengmang in ṭihnak cu sual ruangah a chuakmi phunhrunnak he aipeh tlaimi asi i phundang in ka chim ahcun satan sin in arami ṭihnak tu asi. Atu ah hin ahodah na ṭih? Zeidah na ṭih? Biatak cu na ṭihmi hna asal na si ko.. Thihnak na ṭih ahcun thihnak sal na si ko.. Nu na ṭih ahcun nu sal na si ko lai.. Zawtnak na ṭih ahcun zawtnak sal na si ko lai. C0ronavirus na ṭih ahcun cronavirus sal na si ko lai.. Zu na ṭih ahcun zu sal na si ko lai... Sual na ṭih ahcun sualnak sal na si ko lai... Pathian na ṭih ahcun Pathian sal na si ve ko lai (Pathian na ṭih caah Pathian sal nasi si loin Pathian Fapa na zumh thawngin Pathian fa na si ruang tu ah Pathian sal na si le Pathian na ṭih tu arak si)...
Biatak cu Pathian na ṭih ruangah hin sualnak phuntling na hrial ahau ko lai nain sualnak na ṭih ruangah sualnak na hrial ahcun na thi te ko lai. Aruang cu sualman cu thihnak asi(Sualnak na ṭih i na hrial zongah na hrial kho thai bal lai lo). Pathian fa nasi hnu ah Pathian ṭihnak he sual na hrial ahcun adongh tiang hrimhrim na hrial khawh lai. Bitak cu taksa duhnak in sualnak ah an luhpitu vialte zong hi Thiang Thlarau he naa hawikomhnak arum deuh tik ahcun an in taksa duhnak ṭhalomi nih an in zamtak dih can apan te lai. Aruang cu nangmah ruangah si loin na chungah aummi Thiang Thlarau ṭhawnnak in asi lai. Ka chim duhbikmi cu sualnak ṭih hlah tihi asi ko, Pathian fa na si ruangah le Pathian na ṭih ruangah sual hrial ko ti khi ka chim duh deuhmi asi. Biatak cu Pathian na ṭih ruangah sualnak na hrial ahcun zumhawktlakmi sinak le Bawipa alawmhtertu sinak na hmu lai. Coronavirus ṭih hlah, Pathian tu ṭih ko. Pathian ṭihzami na si ko ahcun ralrin thiamnak le fimnak le ngandamnak vialte cu Amah chungah aummi asi.
Sualnak na hrial ruangah le Pathian na ṭih ruangah zungzal na nun lai si loin Jesuh Khrih na zumh caah le Bawipa (Uktu Bawi) naa ser cang caah Pathian na chung i a nun cang ruang tuah zungzal nunnak na hmuh asi. Zeidang zeidang na ṭih ruangah sualnak na hrial si loin Pathian na ṭih le na dawt ruangah sualnak le Bawipa alawmhlomi paoh na hrial le na zamtak deuh ding arak si. Amen... Thiang Thlarau na chungah aum ko ahcun setan he aipeh tlaimi paoh nih cun an in zamtak hrimhrim ko lai. Zeihmanh, zeidang ṭihhlah, Pathian fa na si cang ruang tuah Pathian lawnglawng ṭih law upat ko. Amen.. Bawipa nih sunparnak co ko seh… Zeidang vialte ṭihnak nih ralchiatnak le thinphannak achuahpi lai nain Pathian ṭihzahnak le upatnak nih cun lawmhnak le ralṭhatnak in teinak tiang achuahpi lai. Amen..
—-
MATTHAI 10:26
"Cucaah mi cu va ṭih hna hlah u. Khuhmi thil paoh kha hun dih an si ko lai i biathli vialte kha hngalh dih an si ko lai.
MATTHAI 10:28
Pum cu a that kho ko nain thlarau a that kho lomi cu va ṭih hlah u; hell chungah pum he thlarau he a that khotu Pathian tu kha va ṭih u.
Comments
Post a Comment