PATHIAN RIANṬUANTU (SERVANT OF GOD)

Vawlei minung vialte nih hin pumpak pawcamnak caah rianṭuan, innchung caah rianṭuan, nu le pa, unau caah rianṭuan timi hi cu kan pemhtuk i vawlei adongh tiang kan ṭuan ko lai. Sihmanhsehlaw miphun le ram caah ṭuan timi le midang caah (Pathian rian) ṭuan timi tu hi cu kan i harh ngaingai rih ko lai. Ram le miphun caah, Pathian caah, midang caah ka ṭuan atimi hmanh nih adonghnak ahcun anmah miaknak le ṭhatnak caah an rak si dih ko hna. Vawlei cung minung vialte nih hin pum pawcamnak lawngte kan ruat zungzal nain Pathian lungton le lawmhter lei hi cu kan zuanhnawh duh bak lo. Kanmah pumpak caah rianṭuan ahaoh zungzal bantukhin Pathian rianṭuan le midang caah rianṭuan zong hi aherh tuk ve. Mah pumpak caah le innchungkhar caah rianṭuan kan zuanhnawh bantukin Pathian rian a zuanhnawhmi kan um hnga maw? Pumpak pawcawmnak caah kan caan pek kan siang bantukin Pathian caah caan kan pe siang ve hnga maw? Pathian rianṭuanmi nih hin teh mah pumpak caah caan hmang lawng si ti loin zeitlukin dah Bawipa caan kan pek ve hnga? Vawlei ah hin ahodah Pathian rian caah zeizong vialte kaltak in nunnak pek aithimmi kan si hnga? Ahodah a innchungkhar rian biapituk in ahmuh tlukin Pathian rian abiapituk ve tiin ahmumi a um ve hnga? 

Pathian nih hmu hna seh ti a kan duhmi cu kanmah ca timi lawng hi siti loin midang caah timi tu hi hmu ve cang hna seh tihi aduh. Pathian thinlung cu mah caah ṭhatnak ding lawng khi si loin midang caah ṭhatnak ding tu khi a thinlung asi deuh, Pathian thinlung ning in vawlei minung caah kan ṭuan ko ahcun Pathian lawmhmi cu kanmah thluachuah pek hi asi ve. Thluachuah hmanh ah anganbikmi thluachuahnak cu Sertu Pa, Pathian he hawikomhnak ngeih lengmang hi asi. Hawikomhnak ka ti tikah kanmah nih thla kan cam timi le Baibal kan rel timi lawng si ti loin Thiang Thlarau he umṭi, hawikomhnak ngeih lengmangnak le thlacam thawtnak vialte a kan hrawmhmi hi ka chim duhmi asi. Thiang Thlarau he hawikomhnak ka ngei bal ko atimi vialte nan cungah Bawipa lawmhnak phan chin ko seh.. Amen.. Pathian sin in thluachuah ka hmuhmi tampi lakah a ka lawmhter bikmi le ka duh bikmi cu Amah he thlacamnak in hawikomh duhnak a ka pekmi hi asi... Nangteh thlacam naa hnek maw? Thlacam duhnak le thawhnak dah Bawipa nih an chiahpiak ve?

Pathian rian kan ṭuan timi cu minung dang caah ṭhatnak le thlennak a um khawhnak ding caah asi i Pathian sinah kan ṭuan si loin minung sinah Pathian he kan ṭuan tu arak si deuh. Minung sinah midang ṭhatnak le thlennak aum khawhnak ding caah Pathian he rian kan ṭuan ti kan hngalh lo ahcun lungsau in Pathian rian kan ṭuan kho lai lo. Ataktak ahcun vancungkhua caah rianṭuan a haulo i vawleicung minung ca tu ah hin rianṭuan ahauhnak hmun tu cu asi. Pathian nih cun Fapa Jesuh hmanh kha minung vialte rianṭuan piaktu, nunnak pekpiaktu, khamhnak tuahpiaktu le sualnak vialte thianpiaktu ah a vun thlah ko. Pathian nih ṭuan hna seh ti a kan duhmi cu minung dang caah Jesuh Khrih bantuk hin ṭuan hna seh tihi asi. Pathian rian kan ṭuan ti lengmang mi cu minung dang caah salsinak thinlung he ṭuanpiakmi si loin ṭuanpiaktu siding tuhi asi.

1. Pathian rianṭuan kan timi cu kanmah hmuhnak le miaknak caah ṭuan si loin minung dang thlennak le ṭhatnak ding caah Pathian he ṭuanmi asi..

2. Pathian rianṭuan kan timi cu kanmah caah ṭuan hi asi loh, minung dang caah ṭuanmi tu asi. (Kanmah caah ṭhatnak le thluachuah petu bal Pathian asi).

3. Pathian rianṭuan kan timi cu Pathian caah kan tuan timi hnakin minung caah kan ṭuanmi asi deuh.. (Arian kan ṭuanpiakmi cu Pathian asi nain minung caah kan ṭuanmi asi. Rianngeitu=Pathian, Rianṭuantu=Keimah le Thiang Thlarau (Pathian rianṭuantu), Rianṭuan piakmi=Minung dang le Pathian (zumtu le zumlotu he)).

4. Pathian rianṭuan kan timi cu vancungkhua caah si loin vawlei ummi minung caah asi. (Kan ṭuanman kan hmuh ding aum ahcun Bawipa nawl asi ko).

5. Pathian rianṭuan kan timi cu Pathian caah, kanmah ca zongah le minung hawi dang caah an si dih nain Ahleiin minung dang caah asi khun. 

6. Thawngṭha kan chimmi zong hi Pathian caah chimmi si loin minung caah Pathian nih chim uh atimi chimmi asi...

7. Pathian rian lakah Thawngṭha chim hi Pathian rian pakhat asi ve i cucu kanmah caah le Pathian caah timi hnakin minung dang nih Thawngṭha an theih i anzumh khawhnak dingah le an zumh thawngin Khamhnak an hmuh i zumhnak in an nun venak ding caah Thawngṭha chim fial kan simi hi asi deuh.

8. Pathian rian ka ṭuan ruangah thluachuahnak ka hmu lai timi lungthin hi Pathian nih a lawmhmi si loin Pathian rian ka ṭuan ruangah minung dang nih ṭhatnak le thlennak an hmuh ding tu hi Pathian lawmhmi asi. 

9. Pathian rian ka ṭuan ruang lawngah thluachuah ka hmuh si loin Pathian lung ka ton caah thluachuahnak ka hmuh arak si deuh. Pathian lungton khawhnak ding ahcun Amah nawlngaih ahau. Pathian nawlngaih khawh zungzalnak ding ahcun thlacamnak in Bawipa he hawikomhnak ngeih zungzal ahau.

10. Pathian rianṭuan timi cu keimah duhnak tlinter dingah si loin ka tuanpiakmi Pathian duhnak tlinter dingah asi i Pathian duhnak cu minung dang nih ṭhatnak le thlennak in nunnak an hmuh ve hi asi. 

• Follower timi zultu cu miak duh, tlamtlinnak hmuh duh ah zultu an si. Anmah caah ṭhatnak ding le an duhning in hruaitu hna a zultu an si. Follower thinlung cu anmah duhnak tlinter asi.
• Jesuh nih chimmi Discipal timi zultu cu mah miakduhnak le tlamtlin duhnak lawng si ti loin an zulhmi Jesuh cungah zumhawktlak si duhnak he zultu hna khi kan si. Sunghnak le miaknak hi an caah biapi si loin zultuṭha si le an zulhmi caah zumhawktlakmi sinak hi an i tinhbikmi asi. Disciple thinlung cu an zulhmi Jesuh duhnak tlinter asi.

Vawlei cungah hin mi zei hi dah Pathian rianṭuantu taktak kan si hnga? Pathian rianṭuantu taktak kan si venak ding ahcun kanmah caah le Pathian caah asi timi lawng si ti loin minung dang caah Pathian rian kan ṭuan timi kan hngalh i minung dang nih rian ṭuanpiakmi si loin ṭuanpiaktu sinak lungthin he kan ṭuan lawngah Pathian thinlungah Amah rianṭuantu taktak kan si hnga. Pathian thinlung cu Amah caah ṭuan si loin minung vialte caah nunnak pek in ṭuanpiaktu dingah a Fapa Jesuh tu a van thlah ko. Amen.. Pathian nih ṭuan hna seh ti a kan duhmi cu minung dang caah Jesuh Khrih bantukhin ṭuan hna seh tihi asi. Pathian rian kan ṭuan ti lengmang mi cu minung dang caah salsinak thinlung he ṭuanpiakmi silo in ṭuanpiaktu siding tuhi asi.

—-

JOHAN 12:26

Ahohmanh ka rian ṭuantu si nan duh ahcun keimah kha nan ka zulh hrimhrim lai, cucaah ka rian a ka ṭuanpiaktu cu ka umnak ah a um ve lai. Ka rian a ka ṭuanpiaktu cu ka Pa nih upatnak a pek hna lai," tiah a leh hna.