Vawlei cung minung vialte nih hin zeicaah dah hi vawlei ah hin ka rak chuah ve hnga i zei tuah awk ah le zei rian lim ve dingah dah ka rak chuah ve hnga tihi rak i hngalh cio usihlaw vawlei kan nun chung caah zeitlukin dah thluachuah kan i copi cio hnga i Bawipa sin ka va phanh tik ca zongah lawmh awk ava si hnga. Biatak cu minung vialte hi Pathian nih tinhpiakmi le fialmi rian a kan ngeih cio ko nain Pathian nih a kan fialmi rian hngalh loin le hngalh ko bu zongah rianlim loin vawlei a kaltakmi tampi an um ko. Chim ka duhmi cu Pathian nih fialmi rian alim lomi hna kong hi si loin Pathian nih an fialmi rian le tinhpiakmi rian hi na hngal cang maw? tihi asi. Zeitindah Pathian tinhmi le fialmi rian cu kan hngalh cio lai timi hi fakpi ruahcan asi cang. Nihin I ka thinlung ah fakpi acawl lengmang mi cu minung vialte nih hin Pathian tinhpiakmi le fialmi rian hi an i hngalh cio hnga maw? timi hi asi. Hngalh taktak na duh ahcun thlacamnak in Thiang Thlarau he hawikomhnak lawnglawng in na hngalh khawh dingmi asi. Asi.. Asi.. Asi.. Thlacamnak in Thiang Thlarau he hawikomhnak lawnglawng in Pathian nih an tinhpiakmi le fialmi rian cu na hngalh khawh lai. Amen. Keimah hrimhrim zong Pathian nih a ka tinhpiakmi le fialmi rian cu ka hrinṭhan kumhnih hnu lawnglawng ah Thlacamnak in hawikomhnak ka ngeih lengmang hnu ah ka Pa (Pathian) nih a ka chimh ve. Amen..
Pathian tinhpiakmi le fialmi rian ka ti lengmang mi hi hrinṭhan rihlomi caah si loin hrinṭhan cangmi caah asi. Ti le Thlarau in na hrinṭhan rihlo ahcun lamdang aum lo. Jesuh Khrih nih a chimmi ka duh tukmi cu Thlarau nih cu thlarau ahrin, taksa nih cun taksa ahrin timi hi asi (John 3:5). Taksa minung kan si caah taksa minung kan hrin taktak hna i Thlarau hrin ding tu ahcun Thlarau asimi Pathian lawnglawng nih thlarau in a kan hrin khawh ve. Amen. Jesuh Khrih lawnglawng hi Pathian sin phanhnak lam le Nunnak, Biatak asi. Jesuh Khih nih Lam le Biatak le Nunnak cu Keimah hi ka si atimi bia hi minung vialte, ahlei in zumtu aitimi nih cun kan duh taktak mi Baibal ca cang asi nain ralṭha taktak in chim ka duhmi cu Jesuh Khrih, Amah ngeilo in achimmi bia lawng hi aingeihmi kan tamtuk. Biatak cu Jesuh Khrih nih chimmi bia hnak in Amah ngeih hi Nunnak, Biatak le Lam cu asi. Biatak cu Jesuh nih Pa Pathian sin phanhnak Lam ka si ati tikah Amah na ngeih hlan chung paoh cu Pa Pathian sin phanhnak Lam cu na hngal in na ngei bal lai lo I Nunnak zong hi Jesuh Khrih na ngeih hlan chung paoh cu Nunnak taktak cu na ngei bal lai lo, Biatak zong hi Jesuh Khrih na ngeih hlan chung paoh cu na ngeih bal lai lo timi hi Biatak Thawngṭha chim kan duhmi cu asi.
Pathian nih an tinhpiakmi le fialmi rian na hngalh cang ahcun na lim hlanlo adongh tiang na rian lim rak i tim. Na hngalh rih lo ahcun Bawipa sinah rawlulh thlacamnak he na hngalh hlan tiang bawmh rak hal ve tiah kan sawm. Biatak cu Pathian tinhmi le fialmi rian na hngalh khawhnak ding ahcun thlacam hngahnak in Thiang Thlarau he thukpi hawikomh lengmangnak lawngin na hmuh khawhmi asi lai. Amen. Thiang Thlarau he thukpi tonnak le hawikomhnak (deep Intimacy with Holy Spirit) cu thlacam hngahnak lawng in hmuhkhawhmi asi. Nihin kan vawlei cawnnak thiam sang tampi hna nih hin zeidah ka calling (rian) or talent asi timi hi an i hngalh ngaingai nain Pathian ka daw ko atimi tampi nih hin zeidah ka calling (rian) asi timi hi kan i hngalh deuh lo hlah maw tihi ka ruat lengmang, Bawipa duhnak bangin Thawngṭha kan chim tik zongah fakpi in chim aherhmi asi tiin ka hmuh. Vawlei fim thiamnak lei kong hi keimah nih ka phak khawhmi asi lo caah keimah nunnak nih aphak khawhmi te le ka hmuh khawhmi Bawipa kawh auhnak in fialmi ka rian (My calling) kong tu hi ka van ṭial lai.
Pathian thinlung taktak in ka chim ahcun minung nih kan ṭuanmi rian vialte hi vawlei rian timi hi a um loh. Ataktak le ngaingai ahcun zeizong vialte chungah aummi le zeizong vialte zong hi Amah caah le Pathian ta an rak si dih ko. Amah belte cu kanmah caah kan ṭuan timi le Pathian caah kan ṭuan (midang caah ṭuan or midang dawt) timi tuhi ai dang i asi ko. Nihin I Pathian caah kan ṭuan timi hna zong hi Pathian nih an caah aṭha bik in a khawnpiak ve ko hna. Amah belte cu keimah caah timi thinlung tuhi Bawipa nih arak duhlo caah asi. Cucaah cun pei nangmah le nangmah naa dawt bantukin na innpa va daw atinak kha asi cu (Luka 10:27)… Chim duhbikmi cu vawlei i kan rak chuah ve hi Pathian tinhmi rian kan lim khawh cionak dingah hin arak si. Cucaah cun Faro te hna zong hi Bawipa tinhning in vawlei ah arak chuahter venak hna le Izypt ram ah Siangpahrang an rak sinak arak si.
Zeizong vialte hi Pathian tinhning in an kal taktak ko. Sihmanhsehlaw kannih cu Jesuh Khrih kan zumh le kan cohlannak thawngin Pathian Fanu le Fapa sinak ahmumi kan si i Thlarau le Biatak in Pathian abiami kan si. Cucaah cun Pathian Fanu le Fapa kan si caah kan caah aṭhabik in Pathian nih tinhpiakmi le fialmi rian pek kan si. Pathian thinlung chungah hin tlangbawi bantukin a rianṭuan dingin siangpahrang phun ah thimmi kan si (Biathlam 1:6). Pathian rian hi tlangbawi bantukin ṭuan dingah thim kan si ka ti tikah kan dihlak in tlangbawi kan si dih lai ka tinak asi loh. Pathian lohma chungah hin tlangbawi kan um lai I Levi mi bantukin biakinn chungah rianṭuanmi zong kan um lai I Levi mi bantukin biakinn chungah rianṭuan loin Levi mi le tlangbawi cawmtu zongah Israel mipi bantukin riandang ṭuanmi zong kan um ko lai. Ṭial ka duh lengmang mi cu Bawipa nih zei rian dah an fialmi le an tinhpiakmi asi tihi hngal ve tihi asi. Biatak cu Pathian tinhmi le fialmi rian na hngalh khawhnak ding ahcun thlacam hngahnak in Thiang Thlarau he thukpi hawikomh lengmangnak lawngin na hmuh khawhmi asi lai. Amen. Thiang Thlarau he thukpi tonnak le hawikomhnak (deep Intimacy with Holy Spirit) cu thlacam hngahnak lawng in hmuhkhawhmi asi.
Nihin kan vawleipi i Pathian Thawngṭha kan chimhnak ah abiapi ngaingai vemi cu what is my calling? Zeidah ka rian asi timi I halnak hi asi. Nangmah le nangmah hi teh Bawipa nih zei rian dah a ka fialmi le tinhpiakmi asi hnga tihi na hal bal maw? Nihin mah Thawngṭha na relnak thawngin Bawipa nih zeirian dah a ka fial ve ti naa hngalhnak ah lam an hmuhsaktu si hram ko seh tihi mah Thawngṭha ka ṭial pah in ka thlacamnak asi. Pathian nih zei rian dah a ka fialmi le a ka duhpiakmi asi hnga timi halnak tiang lawng hi ka ṭial duhmi si loin Pathian nih an tinhpiakmi le fialmi rian hngalhmi adongh tiang Bawipa Jesuh nih ka rian ka lim cang ati bangin kan rian lim cio hna usih ti zong hi ṭialchih ka duhmi le ka thlacamnak asi chih. Amen. Biatak cu Pathian tinhmi le fialmi rian na hngalh khawhnak ding ahcun thlacam hngahnak in Thiang Thlarau he thukpi hawikomh lengmangnak lawngin na hmuh khawhmi asi lai. Amen. Thiang Thlarau he thukpi tonnak le hawikomhnak (deep Intimacy with the Holy Spirit) cu thlacam hngahnak lawng in hmuhkhawhmi asi.
Josef hi kum (17) asi ah mang pahnih arak manh I cu mang cu Pathian nih arak tinhpiakmi, a ṭuan te lai dingmi le asi te lai dingmi arak chimh chungmi asi. Pathian nih Josef tinhpiakmi le rian a pek bantukin keimah zong tinhpiakmi le rian pekmi a ka ngei ve ti na hngalh tikah vawlei cungah na rak chuah ve hi sullam tampi angei te lai. Biatak cu Pathian thinlung ah hin Minung vialte nih Khamhnak hmu hna seh ti lawng hi saduh thahmi le tinhpiakmi arak si loh. Jesuh Khrih thawngin Khamhnak kan hmuh hnu ah Amah he tonnak le hawikomhnak ngeih zong hi asi i Amah he hawikomhnak kan ngeihnak hin Pathian tinhpiakmi le fialmi rian zong hngalchih hna seh ti a kan duhchih. Amen. Josef nih mang amanhmi ruangah hin zeitlukin dah a rak i lawmh timi le zeitlukin dah ruahchannak arak ngeih timi cu kan hngalh ciomi asi. Minung vialte hi ruahchannak he anungmi kan si dih. Ruahchannak angei lomi paoh cu angan adam ti lomi ah an i cang dih ko lai. Nangteh zei ruahchannak dah na ngeih. Cucaah pei Paul nih ahmun zungzal mi zumhnak, ruahchannak le dawtnak an um atinak kha asi cu (1Corin 13:13)…
Vawlei cung minung vialte kan dihlak hin Pathian nih zeirian dah a kan fial timi le zeidah tuah hna seh ti a kan duh (Matthai 6:33) timi hi hngal cio in Pathian rian hi ṭuan cio in arian lim cio hna usihlaw zeitlukin dah kan Pathian ai lawmh hnga I minung vialte nih Pathian a thluachuahnak he kan hei i lawmh hnga. Jesuh Khrih nih Pathian Pennak le dinnak (zeidah tuah hna seh) tihi kawl hmasa uh ti a kan duhmi cu asi. Pathian Pennak chungah kan luh khawhnak ding le Pathian dinnak, zeidah tuah hna seh ti a kan duhmi kan hngalh khawhnak ding zong ah hin Jesuh Khrih hi minung vialte sualnak kalpitu Pathian Fapa asi ti kan zumh le kan cohlannak thawngin asi lai. Pathian tinhpiakmi le fialmi rian na ṭuan ruangah taksa in tlamtlingnak hmu rih hlah hmanh law thlarau le thinlung in cun diriamhnak na hmu hrimhrim lai tihi Bawipa Jesuh min in ka chim ngampi asi. Pathian kan Pa hi vawlei kan nun chung caah thlarau ca lawngah si loin taksa ca he thinlung ca he thlarau ca he thluak ca tiangin thluachuah pek a kan duhmi kan Pathian asi. Amen. Nawlh lengmang in Pathian fanu le fapa na si hnu ah Pathian nih tinhpiakmi le fialmi rian cu na hngal cang maw? Na hngalh rih lo ahcun na hngalhnak dingah Bawipa ruahnak hal in bawmh na hal hnga lo maw?
Minung vialte hi kanmah le kan tuah khawh ning cio in rianpek le rian fial kan si cio ko. Kanmah tein kan i hngalh le hngalhlo belte cu kanmah cungah ai hngatmi asi. Pathian kan Pa nih hin vawlei i kan nun chung pum pawcawmnak caah siseh thlarau le thinlung, thluak ca tiangin rian a ṭuan ko i tinhpiakmi le rian zong a kan pek cio ko. Tuni ah fakpi in ruat cio usih ti ka duhmi cu Pathian nih tinhpiakmi le fialmi rian a ka ngeih ko timi hi asi. Pathian nih an tinhpiakmi le fialmi rian na hngalh hlang chung paoh cu ṭhanchonak lam na phan kho bal lai lo i na nun zongah lawmhnak le diriamhnak tling na hmu bal lai lo. Pathian nih an tinhpiakmi le fialmi rian na ṭuan tik ahcun lawmhnak le thinlung diriamhnak tiang lawng hmanh si loin na pum pawcawmnak ah zalak in thluachuah an phurhtu asi lai I na pum damnak, na thinlung damnak le na ruahnak kauhnak le na thlarau ṭhannak caah an si lai. Amen! Cubantuk ṭhiamṭhiam in vawleipi ah hin lawmhnak le rem daihnak he Pathian sunparnak le khuakhannak ṭha tlingchin in hmuh lengmang asi hnga. Biatak cu Pathian tinhmi le fialmi rian na hngalh khawhnak ding ahcun thlacam hngahnak in Thiang Thlarau he thukpi hawikomh lengmangnak lawngin na hmuh khawhmi asi lai. Amen. Thiang Thlarau he thukpi tonnak le hawikomhnak (deep Intimacy with the Holy Spirit) cu thlacam hngahnak lawng in hmuhkhawhmi asi.
Ahlei in Pathian nih tinhpiak le fialmi rian, Pathain kawh auhnak in arian na ṭuan tik ahcun Pathian kan biak athawtnak le a ṭhatnak tampi na hmuh chin lengmang hnga. Minung vialte nih hin Pathian Biak a thawtnak kan teh cio lomi hi apoi cemmi asi lai tiah ka ruah. Pathian Biak a thawtnak na teh khawhnak cu Thiang Thlarau he thlacamnak in hawikomhnak chung na luhnak lawnglawng in asi. Pathian nih a kan fiallomi rian kan ṭuan lengmang cio ruangah kan miphun le vawleipi ah ṭhennak le buainak aum lengmangnak arak si. Pathian nih hin minung vialte hi Amah kawh auhnak in rianfial cio kan si. Nangteh Pathian nih zeirian dah an fial na hngal cang maw? Pathian Fanu le Fapa kan si tinak tiang lawngah tang ti loin Pathian nih vawlei ah an chuahter hnawhchannak rian hi lim rak i tim ve. Biatak cu Pathian nih an tinhpiakmi rian aum hrimhrim ko i cucu na lim hrimhrim ding hi Pathian nih alawmhmi taktak asi ve. Pathian nih an fialmi rian na hngalh tikah Pathian nih an fialmi rian na lim khawhnak dingah Thlarau laksawng zong pekchih na si hrimhrim lai. Pathian thinlung cu rian a kan khinh lawng hi si loin arian tlamtling tein kan lim khawhnak bawmtu dingah Thlarau laksawng pek chih zong hi asi. Amen! Pathian nih an fialmi rian na hngalh khawhnak dingah bawmtu ṭha ngaimi cu Thlarau laksawng an pekmi hin asi. Calling=(Rian) timi cu Pathian tinhpiakmi asi i Spiritual Gifts = Thlarau Laksawng timi cu Pathian nih a kan pekmi rian kan ṭuan khawhnak dingah bawmtu hriamnam an si. Biatak cu Pathian tinhmi le fialmi rian na hngalh khawhnak ding ahcun thlacam hngahnak in Thiang Thlarau he thukpi hawikomh lengmangnak lawngin na hmuh khawhmi asi lai. Amen. Thiang Thlarau he thukpi tonnak le hawikomhnak (deep Intimacy with the Holy Spirit) cu thlacam hngahnak lawng in hmuhkhawhmi asi.
Pathian nih tinhpiakmi rian le Thlarau laksawng timi cu tampi aum ko lai. Cathiang chung zongah tampi an um ko lai i Cathiang chung lo zongah Pathian nih asermi tampi an um hrimhrim ko lai. Sihmanhsehlaw kanmah si khawh ning cio in Pathian nih zei riandah a kan fial timi hngalh le cu rian a kan fialmi lim khawhnak dingah hriamnak bantukin a kan pekmi Thlarau laksawng ngeih le hmanthiam zong hi abiapi ngaingai. Nihin ah abik in chim lengmang ka duhmi cu Pathian nih zei riandah fial ka si? timi hi asi. Pathian nih an fialmi rian na hngalh hlan chung paoh cu Pathian fanu le fapa na si ko hmanh ah Bawipa sin na phak tikah na rian na lim loh ti na si te ko lai. Pathian nih a kan tinhpiakmi le fialmi rian kan i hngalh lo ahcun midang “lo” ah rian a ṭuan lengmang mi bantuk kan si. Nihin zumtu tampi cu kanmah “lo” ah rianṭuan loin midang “lo” ah rian kan ṭuan lengmang. Aruang cu kanmah rian hi zei riandah asi timi le kan ṭuannak ding hmunhma kan i hngalh lo caah asi. Biatak cu na rian hi tuante i naa hngalh ah aṭha bik. Pathian nih a kan tinhpiakmi rian kan ṭuan khawh cionak dingah hin timhtuahnak caan tampi kan pek cio arak hau. Thawngṭha chim dingah kawhauhmi zong nih a nunnak dihlak in Pathian nih a tinhpiakmi Thawngṭha achim khawhnak dingah fakpi in ai timhtuah a hau i timhtuah hnu zongah a nunnak dihlak le lungthin tak in Thiang Thlarau nih chim a ti ningin a chim bak awk asi. Cubantuk ṭhiamṭhiam in Pastor ah kawh auhmi zong nih Pastor a ṭuan hlan ah Baibal sianginn akai lawng si loin Pathian nih siseh ati ning in nun tampi a cawn ve awk le sianginn adih hnu zong Bawipa nih ṭuan atinak hmun ah a ṭuan awk asi.
Ka chim lengmang mi cu taksa in ngandamnak ah Pathian nih fimnak le hngalhnak apekmi hna Doctor hmanh hi kum tampi timhtuahnak in caan an pek ahau timi hi asi. Khah si ahcun Doctor na ṭuan lai hmanh na hngalh lo ahcun zeitik ah dah timhtuahnak le cawmnak caan na ngeih ti hnga? Minung vialte hi Pathian nih inn satu dingah rian a pekmi hna le lam sertu ah rian a pekmi hna le seh thilri serthiam dingah rian a pekmi hna tiin tampi an um ko lai. Micheu cu an chuahka in an I hngalh caah taksa in an nun chungah thluachuah tampi ai copimi an um ko. Biapi asimi cu taksa in kan nun chung tlamtlingnak lawng hi si loin taksa in kan nun chungah kan tuah ṭuanmi vialte hi Pathian fanu le fapa kan si hnu ah a kan tinhpiakmi l fialmi rianlim in Bawipa ah lung lawmhnak taktak he inn ah tlung cio hna usih tihi asi. Ka chim cia bangin Faro si a duhmi kan um hnga maw? Biatak cu kan duh cio lai lo nain atu kan vawlei sining zoh ahcun an um hrimhrim ko lai tihi alang ko. Kannih tu cu Pathian fanu le fapa kan si cangnak thawng tu hin Pathian nih a kan tinhpiakmi le fialmi rian hi hngalh buin lim cio ko hna usih. Jesuh Khrih thawngin Pathian kan Pa hi thangṭhat chin hna usih law Fapa cung zongah kan ilawmnak hi tlingchin ko seh..
Minung vialte nih kan herh hmasa bikmi hi chawva asi lo i rian zong asi loh. Nupi le va neih hmasa le fanu le fapa ngeih hmasa zong arak si lo i fimthiamnak ngeih hmasa zong arak si ṭhiam lo. Minung tampi nih cun mah hi kawl hmasa ding timi zong tampi a um ko lai nain Bawipa Jesuh Khrih nih nan kawl hmasa hrimhrim lai a kan timi cu hihi asi. Pathian cu na thinlung dihlak in na kawl ahcun na hmuh lai i Thiang Thlarau cu na hal ahcun pek na si lai, Keimah hi innka ka si caah nan kingh ahcun innkaa cu kan hun hna lai tihi asi. Jesuh Khrih nih cun Hrinthannak in Pathian Pennak chungah luh hi abiapi cem ah a chiah, Cun Pathian nih zeidah tuah hna seh ti an duhmi hna zong hi nan hmuh hlan tiang kawl uh tihi a kan fialchihmi asi. Minung vialte nih rak kawl hmasa dingmi hi Pathian asi nain kan kawl hmasa ciomi hi Pathian arak si hrimhrim lo ti cu kan fiang cio ko lai dah. Kan hgakchiat in a tu tiang hi ka zoh lengmang i kan rak kawl hmasa bikmi hi Pathian asi hrimhrim loh. Pathian dawtnak a thei ciami hmanh nih hin zeidah Bawipa nih tuah hna seh ti a kan duh timi cu kan kawl hrimhrim lo timi zong hi ka hmuh ṭhan. Cucaah cun nihin Thawngṭha ka ṭialmi nih hin na nun ah bia rak chim sehlaw hrinṭhan cangmi na si ahcun zeidah Bawipa nih tuah seh ti an duhmi kha na hmuh hlan tiang kawl dingin kan sawm.
Hrinṭhan timi cu Pathian Fa kan si cangnak tehte asi i Khamhnak kan co cu sualnak leiba champiak le sualnak chungin luatter kan si cang tinak asi i sualnak chungin luatter kan si timi cu lungthin thar le ruahnak thar Bawipa nih a kan pekmi kan chungah ahung tlinnak hin sualnak chungin luatter taktak kan sinak afehter tikah cucu Khamhnak ka hmuh cangnak Aamakhan zong asi chih. Jesuh Khrih thisen thawngin kan thinlung le kan ruahnak ṭawl in thianh ka si tikah sual leiba champiak dih ka si tinak asi i lungthin thar le ruahnak thar pek ka si tikah sualnak chungin luatter ka si cang tinak asi i cucu Khamhnak kan co kan ti lengmang mi cu asi. Khamhnak kan co hnu ah ti le Thlarau hrin timi nih a van zulh ve. Amen. Sualnak chungin khamhnak na co rihlo le a hrinṭhan rih lomi na si ahcun Bawipa Jesuh Khrih nih tuahpiakmi rak cohlang in Amah kha rak zum law Khamhnak na hmu lai I Khamhnak na hmuhmi atlin bak in ti le Thlarau in hrinṭhannak na hmuh lai, ti le thlarau Hrinṭhannak na hmuh hnu ah Pennak chungah na lut lai i Pennak chung na um lai. Pennak chung timi cu Pathian uknak le Jesuh Khrih uknak tang le Thiang Thlarau uknak tangah ka um tinak asi. Pathian Uknak tang I na um hnu ah an khamhtupa le Thiang Thlarau he thlacamnak in hawikomhnak chungah tampi luh le Amah hngak.. Thiang Thlarau he hawikomhnak nih cun fimnak le hngalhnak le na zulh awk lam an hmuhsak lai.
Sualnak chungin khamhnak na co rihlo le Thlarau in a hrinṭhan rih lomi na si ahcun Bawipa Jesuh Khrih nih tuahpiakmi rak cohlang in Amah kha rak zum law sualnak chung le satan ta sinak in Khamhnak na hmu lai I Khamhnak na hmuhmi atlin bak in ti le Thlarau in hrinṭhannak na hmuh lai, ti le thlarau hrinṭhannak na hmuh hnu ah Pennak chungah na lut lai. Pennak chung um timi cu Pathian uknak, Jesuh Khrih uknak le Thiang Thlarau uknak tangah ka um tinak asi. Hrinṭhannak in Pathian Pennak chungah kan lut. Hrinṭhan kan si cu Pathian pennak chung luhnak caah asi.. Na hrinṭhan lawngah Pathian pennak chungah na lut kho lai.. Na hrinṭhan hnu ah Pathian nih zeidah tuah seh ti a ka duh timi hngalh i zuam. Mah hi na hngalh hlan chung paoh cu baumi na ngei rih tinak asi.. Company chung luh i zeirian dah ka ṭuan lai ti hngalhlo bantuk khi na si lai.. Hrinṭhannak ka hmu cang ai timi tampi hi Pennak chung kan luh le luhlo ai hngalh lomi tampi kan um rih! Aruang cu Khamhnak le Hrinṭhannak hi kan khahter caah asi. Khamhnak ka hmu ati ṭung i Thiang Thlarau a ngei rih lomi tampi an um. Aruang cu Khamhnak taktak an hmuhlo caah asi ko. Khamhnak timi cu na sualciami thianhpiak dih le champiak dih na si tinak le atu in zungzal ca tiang zalak in sualnak chungin luatter na simi hi na chung i aphanh tikah Khamhnak na hmuh taktak cu asi. Cun zeidah Bawipa nih tuah hna seh ti a kan duh ti a theimi cu kan tlawm chinchin! Nangteh Pennak chung ah na um in Pathian tinhpiakmi le fialmi na rian cu na hngal ve cang maw? Biatak cu Pathian tinhmi le fialmi rian na hngalh khawhnak ding ahcun thlacam hngahnak in Thiang Thlarau he thukpi hawikomh lengmangnak lawngin na hmuh khawhmi asi lai. Amen. Thiang Thlarau he thukpi tonnak le hawikomhnak (deep Intimacy with the Holy Spirit) cu thlacam hngahnak lawng in hmuhkhawhmi asi.
Pathian Pennak chung na um hnu ah le Pathian nih zeidah tuah seh ti an duhmi na hngalh hnu ah duhsah in thil dang vialte zong hi chap na si te lai.. Biapi asimi cu Pathian Pennak chungah ka um cang maw? ti i hngalh ding. Pathian pennak chung na luh rih lo ahcun na hrinṭhan rihlo tinak asi hnga? Mi vialte hi Pathian Pennak chungah luh dih ding in hrinṭhan le khamh kan si. Zumtu vialte kan luh hmasanak cu Khamhnak in hrinṭhannak, Hrinṭhannak in Pathian Pennak chungah hin asi. Jesuh nih a chimmi cu na hrinṭhan lo ahcun Pathian Pennak chungah na lut kho lai lo ati. Biatak cu Khamhnak, chunglei sualnak thianhpiak le sualnak in luatnak taktak na hmuhlo ahcun ti le Thlarau in hrinṭhannak na hmu kho lai lo i hrinṭhannak na hmulo ahcun pennak chung ahcun na lut bal lai lo. Biapi asimi cu Pathian nih kan nun chung vialte zeidah tuah seh ti a ka duh timi hngalh i zuam hi asi. Mah hi hngalh khawhnak dingah hin can sau zong a rau kho men, nangmah nih zeitlukin dah hngalh na duhmi nih a neih ve lai? Mah hi na hngalh hlan chung paoh cu Pathian duhnak taktak le tinhmi na hngal kho hrim lai lo.. Pathian fialmi le tinhmi na hngalh khawh rih lo ahcun Pathian duhnak zulh le fialmi rian limnak lam cu a um hrim lo. Zumtu paoh hi Pathian nih kanmah tawk cio in rian a kan fial cio dih tihi hngalhter ṭhan kan duh. Minung kan si caah duhmi le herhmi kan ngei dih cio nain Bawipa duhnak a kawlmi kan caah cun kan duhmi le herhmi hi aṭhabik in khua a kan khanpiak zungzal ve ko tihi biatak asi.. Jesuh Khrih ka zumh le ka cohlan caah Pathian Fa ah cannak nawl ka hmu i Pathian Fa cannak nawl ka hmuh tikah Thlarau asimi Pathian nih Thlarau in hrinṭhannak a ka pek, ti le Thlarau in hrintthannak in Pathian Pennak chungah ka lut, Pathian Pennak chungah kan umnak in Pathian nih fialmi rian hngalh khawhnak a ka pek, Pathian fialmi rian hngalhnak in kan nun chung vialte Amah duhnak zulh le fialmi rianlim duhnak thluachuah ka hmu, Amah duhnak zulh le fialmi rianlim duhnak chung kan nun tikah kan herhmi vialte pek dingah Jesuh Khrih nih biakamh ka si. Amen..
Bawipa zangfahnak thawngin hrinṭhannak ka hmuh hnu ah ka ruah lengmangmi le thla ka cam lengmang mi cu Bawipa nih zei rian hi dah ka nun chung vialte tuah seh ti na ka duhmi asi hnga timi hi asi. Cucu Pathian nih tinhpiakmi le fialmi rian hi zeidah asi hnga ka ti lengmang mi (what is my calling) ka ti lengmang cu asi. Cuticun kum (2) leng thla ka cam lengmang nain ka hngal kho ngaingai loh. Voikhat cu ti le rawl ei loin nithum chung Bawipa hmai cu ka kawl ṭhan i a ka chawnh hrimhrim lai timi zumhnak he nichiar, zanchiar te ka hngak. Nithum a dih tikah Bawipa he chawnhnak le biaruahnak, hawikomhnak kan ngeih lo caah ka tha a chia ngaingai. Thlacam kan dih zanhnih hnu zinglei 4:15Am ah Bawipa Pathian cu ka mangah vancung khin khuadawm in a rak ṭum khi ka hmuh. Pathian nih cun ka min bak auh in ka nun chung vialte zeidah ka ṭuan lai timi (ka calling) ka rian cu a ka chimh (Mark 16:15, 2Timothy 2:2). Halluluijah. Amen. “Chan, Go and preach my Gospel to all the nation”, timi hi ka Pa, Pathian nih a ka chimhmi le fialmi cu asi. Ka Pa, Kaa lawm tuk ee. Mah ca ka ṭial ah hin ka Pathin nih arel ve lai I asi bak ati ve ko lai. Amen. Ni 40 rawl ka ulh lio ah Ka Pa, Pathian nih tipilnak a ka pek. Thiang Thlarau nih Mei in tipilnak a ka pek. Bawipa Jesuh le Pa Pathian nih anmah bochan nun an ka cawnpiak. Bawipa Jesuh Khrih ka kam ah adir i na chungah aummi khuachia 59 kan chuahpiak lai ati i a ka chuahpiak. Pa Pathian he hmaitonh tein bia kan i ruah lengmang. Bawipa Jesuh Khrih le Pa Pathian le Keimah kan umṭi I kan inuam tuk. Halleluijah. Amen.. Cu ka mang chung lawng cun siti loin ka hngen ah ka kelei hnakhawh hin ka mang i a chimmi bia “Chan, Go and preach my Gospel to all the nation” (ka calling) zeidah ka ṭuan lai timi cu a ka chimh ṭhan. Amen! Bawipa nih sunparnak co zungzal ko seh.. Mah tehte nih hin hmailei na nun chung vialte zeidah Pathian nih zei rian dah (calling) an fialmi asi timi na hngalh venak dingah an bawmhtu asi nakhnga le zumhnak he rawlulh thlacamnak in na hmailei tinhpiakmi le fialmi rian na hngalh khawh ve nakhnga lam an hmuhsaktu siseh tihi ka thlacam asi. Atang Cathiang hi Bawipa zangfahnak thawngin ka cungah a tling cuahmah bantukin nangmah cung zongah tling ve seh ti saduh thahnak he thazang pek kan duh. Cathiang hi rel ding men le theih ding ca men ah pek si loin kan chunglei ah Pathian Thlarau ṭhawnnak he tlinter dingin pekmi kan si caah nangmah le na innchungkhar cio ca zongah a tak in tling ve hram ko seh. A tak in mah Cathiang hi naa nunpi i na kawl ko ahcun Bawipa nih an tinhpiakmi rian (calling) cu an chimh ve hrimhrim ko lai tiah Jesuh Min in Bawipa ka bochan ko. Ka Pathian nih Fapa Jesuh Khrih thawngin sunparnak le upatnak, lianngannak zong co chin zungzal sehlaw Jesuh thawngin a fale kanmah thawng cio in kan Pathian cu mikip nih thangṭhat cio cang ko hna seh. Amen! Biatak cu Pathian tinhmi le fialmi rian na hngalh khawhnak ding ahcun Bawipa Jesuh thlacam hngahnak in le Thiang Thlarau he thukpi hawikomh lengmangnak lawngin na hmuh khawhmi asi lai. Amen. Thiang Thlarau he thukpi tonnak le hawikomhnak (deep Intimacy with the Holy Spirit) cu thlacam hngahnak lawng in hmuhkhawhmi asi.
—-
MATTHAI 6:33
Cucaah zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek ṭhiamṭhiam ko hna lai.
Comments
Post a Comment