BAWIPA ZANRIAH (JESUH KHRIH, THI LE SA) EI ṬHAWNNAK

JESUH KHRIH THI LE SA

Rawl ka ei tikah rian pakhat ka ngei ti bantukin rianlimnak men in rawl ka ei lengmang ahcun rawl thawtnak ka thlau khawh men… Bawipa nih rawlei hi rian bantukin a kan pekmi silo in thawtnak le lunglawmhnak he eiding ah pek kan si.. Chimduhmi cu Pathian fale asi cangmi zong nih Pathian lawmhter kan i timhnak ah hin kanmah hneknak le teimaknak, rianlimnak in kan zuanhnawh tikah Pathian nih a kan fial ciomi rian kan zuanhnawhnak ah hin thawtnak hmuhchih hna seh atimi vialte kan tlawlh dih.. Bawipa nih rawl hi kan pum caah thluachuah a kan pekpiak taktak ko nain kan ei lio ah thawtnak le awrdiriamhnak a kan chiahpiak chih. Pathian sinah thla kan cam zongah thla ka cam awk asi timi hneknak si loin rawlṭam caan i Rawl athawtcem bantukin thlacam duhnak caan te a kan pek lio caan i thlacam cu athawcem ve. Thlacam in kan duhmi kan halpah in thlacam thawtnak hmuhchih hna seh ti a kan duhpiak. Cucu Bawipa he hawikomhnak thawtnak ka ti lengmangmi cu asi. Kan Pathian Min thangṭhat si ko seh.. Zan I dinhnak asermi zong hi kan pum nih aherhmi asi ko nain nan pum nih aherh caah nan ihawk asi timi in silo in ihduhnak le ihthawtnak a kan pek chih caah minung vialte nih ih athawtnak kan teh dih. Zeizong vialte nih hin anmah tawk cio in thawtnak angeih dih….

Minung nih hin thilṭha kan timi vialte hi hnekding ah le zuamnak in tuah dingah kan zuamhnawh tuk caah thawtnak atlau i adongh tiang thluachuah kan i copi kho lo..Thilṭhalo I ruahmi zuu, kuak, khaini ti bantuk cu kan i hnek ruangah kan zukmi le kan tuahmi silo in thawtnak in kan kal caah ahohmanh nih na zuk in na tuah hrimhrim lai timi Thawngṭha chimlo in kan tuahdih ko.. Biatak chim ka duhmi cu Baibal rel naa hneknak zong adih te lai I thlacam naa hneknak le Pathian rian ah naa hnektuknak le naa zuamtuknak vialte zong thawtnak le lawmhnak he na hmuhlo ahcun na lung adong te lai I adongh caan aphan te lai.. Thla na cam ah siseh Baibal na rel ah siseh Thawngṭha na chimnak ah siseh rawl na ulhnak ah siseh hneknak le zuamnak in silo in na tuahmi kipah thawtnak tiang le lawmhnak tiang naa phakpi khawhnak dingah Thiang Thlarau he hawikomhnak fakpi kawl hmasa. Biatak cu tuahawk asi timi nih thawtnak tling angei ballo i rawlṭam tik i rawlei lawnglawng ah rawlthawtnak le awrdiriamhnak hmuhkhawh asi… Zeizong vialte nih hin anmah le caan angei dih caah anmah le caan te hi kan zuanhnawh ahcun thluachuah taktak asi hnga…

Pathian fa na si taktak ko ahcun Thiang Thlarau nih mah caan te ah rawlulh duhnak, thlacam duhnak, Baibal relduhnak, Thiang Thlarau atak in tonnak le hawikomh duhnak an pek ko lai.. Thiang Thlarau nih tuah duhnak an pekmi chung paoh thawtnak naa phakpi lengmeng ahcun Pathian kan biakmi le Pathian fa kan simi hnak asunglawimi le athawmi le lawmh aummi le anuammi aumlo hi na ton ve lai. Pathian kan biakmi hi hnekchih khi silo in thawtnak le lawmhnak phunzakip, thluachuah relcawklo in khat hna seh ti a kan duhtu kan Pathian asi… Zeizong vialte hi lungdiriamhnak kan i phakpilomi cu thluachuahnak taktak an phan lo….. Vawlei nih achuahpimi thil vialte le Pathian nih asermi minung kanmah le kanmah hmanh nih diriamhnak le lunglawmhnak kan i pek khawh ahcun Pathian kan zumh le kan fuhnak, Pathian fa kan si cangnak le aduhnak zulh kan i thimnak ah hin lunglawmhnak le lungdiriamhnak, thawtnak vialte atling tihi tehte khan ka duh…

Keimah hmanh hi Pathian fa ka sinak caansau asi rihlo nain Pathian fa ka sinak le Pathian he hawikomhnak ka ngeihnak hi zeihmanh nih alawmh khawhlomi thawtnak le lungdiriamhnak ka phan. Zeizong vialte hi thawtnak le diriamhnak na phanhmi cu na ngol khawh dingmi atlawm lai. Pathian duhnak zulh kan i thimnak ah hnekding timi lungput silo in kan hmaikaa ah achiahmi vanpang kipah thawtnak le lungriamhnak le thluachuah nganpipi nih a kan hngah zungzal timi lawng hmanh silo in an thawtnak ka tehbak lai timi tiang in fuh hna usih… Thlacam thawtnak na teh ahcun na ngol kho ti lai lo, Baibal thawtnak na teh ahcun na ngol kho ti lai lo i rawlulh thawtnak na teh ahcun na ngol kho ti lai, Bawipa he hawikomh athawtnak na teh ahcun na ngol kho ti lai lo i Bawipa nawlngaih athawt na teh ahcun na ngol kho ti lai lo tihi biatak asi.. Biatak cu zeizong vialte hi anmah le caan te ah Bawipa nih tuah duhnak an pekmi na tuahnak kipah thawtnak tling ahrin lai.. Thawtnak na hmuh cangmi cu thluachuah na copi zungzal cang lai.. Bawipa Jesuh nih apum le athisen in biakamnak Pathian sinah a kan serpiakmi ruangah sunparnak co zungzal ko seh.. Amen…

Bawipa he zanriah kan eiṭinak i Jesuh Khrih, Thi le Sa kan ihrawmnak zongah hin Bawipa nih a kan fialmi asi caah kan tuahawk asimi timi lawng siti loin Jesuh Khrih nih apum athlehnak in hmunthiangbik chungah luhnak nawl a kan peknak le Amah hmu rihlomi nih kan hmuhkhawhnak dingah changreu (puanzar=pum le sa) athlehmi kan einak in damnak le Amah kan hliahkhawh timi le kan sualnak ngaihthiamnak ca i thletmi thisen, Pathian le minung karlak ah arawk cangmi biakam fehter ṭhannak thisen, misurhang (thi) hi zumhnak in kan ding tikah Pathian biakam tlingnak in thawtnak kan hmu. Amen. Naizarh zarhpini ah khan nithum chung hrawng ka keng hi afak ngaingai i awidang zongah afak bal tawn i doctor nih sii an ka pekmi ka din tikah a dam tawn.. Kan i pumh lio ahcun afak cu azualchin lengmang i ka ṭhut hmanh ah siarem ngaiin ka ṭhu kho lo. Bawipa zanriah kan ei zarh asi caah Bawipa thi le sa (changreu le misurhang) cu ka kut in kaaput pah in Jesuh Khrih nih a kan serpiakmi biakamnak, apum thlehnak le athisen ṭhawnnak kong ka ruah pah in atu hrimhrim ah ka kengfah hi adam lai timi zumhnak he Bawipa Thi le Sa cu thla ka cam in ka ei le ka din hna… Bawipa zanriah ka eidih cun ka dam hnga maw tiah kaa ngaaicang nain adam tuk ka theilo nain zan i ka ihlai i Baibal ka rel dih tik ahcun apel hmanh tanglo in ka dam dih. Bawipa min thangṭhat si ko seh. Ka dammi kaa lawmh hngak in Bawipa thi le sa ṭhawnnak le Jesuh min ṭhawnnak ka zumhnak angan chin hlei ah Bawipa nih ka thlacamnak a theihmi nih hin a ka lawmhter chinchin. Bawipa zanriah ka ei tikah hin kan tuah awk asi timi lungput silo in Biakam ṭhawnnak, Jesuh Khrih thi le sa ṭhawnnak, Jesuh Khrih min ṭhawnnak taktak zumhnak he kan ei, kan din ahcun Bawipa sunparnak alang chinchin ko lai. Amen.. 

Biatak cu Jesuh Khrih, Thi le Sa zong nih hin thawtnak tling angei ve mi asi i thawtnak lawng hmanh silo in ṭhawnnak phunkip hmual angei chih. Amen… Jesuh Khrih, Thi le sa hi thawtnak na teh ve ding tiang le ahmual ngeihnak na co ve ding in na ei, na ding ve cang lai lo maw? Bawipa Jesuh biakamnak hi atak in na co ve cang maw? Keimah nih chimnak tiang lawng silo in Bawipa Min ṭhawnnak le Bawipa zanriah ei ṭhawnnak le Jesuh Khrih, Thi le Sa ei ṭhawnnak hi Bawipa zanriah na ei tikah siseh zeithil na tuah i na ruahmi kipah a biakamnak zumhnak taktak he nung dingin le eiding in kan sawm…
Matthai 26:26
Zanriah an ei lioah cun Jesuh nih khan changreu kha a lak i thla a cam dih in a cheu i a zultu kha a pek hna. “I lak u law ei u; hihi ka pum a si,” tiah a ti. 27Cun hrai kha a lak i Pathian sinah lawmhnak bia a chim dih in, annih cu a pek hna i, “Nan dihlak in ding u. 28Hihi ka thi a si, biakam fehternak thisen, sual ngaihthiamnak ca i mi tampi ca i thletmi cu a si.