BAWIPA SIN IN DINHNAK(REST) CU NA HMU NE MAW?

Jesuh nih retheimi le thilritmi vialte hna ka sinah ra tuah uh, "Dinhnak", kan pek hna lai ati. Ka pum le ka sining in retheih caan le ka thinlung khingrih caan ah Bawipa Jesuh nih achim bangin ka thilrit le ka retheihnak he thlacamnak in Bawipa hmai ah Amah he hawikomh ding in ka kal tawn, Amah nih achim bantukin ka kal leiah ka re athei i ka khing arit taktak ko nain thlacam in hawikomhnak ka dih tik ahun (Dinhnak=Rest) ka hmu taktak. Halleluijah... Amen..

Bawipa Jesuh Khrih nih Dinhnak kamh kan simi hi chimthiamnak men lawngin silo in na lungre atheihtuk le na battuk caan ah thlacamnak in Bawipa Jesuh Khrih nih achim bangin ahmai ah thlacamnak in hawikomhnak ngeih dingah va chuak ve law dinhnak tling cu an pek ko lai. Lungthin tak tein thlacam hawikomhnak ngeih dingah na chuah ko i lungsau tein na hngah i Thiang Thlarau nih an ton tiang na hngah ko ahcun dinhnak tling cu na hmu hrimhrim ko lai.. Dinhnak timi cu Dinh bak hi asi ko. Bawipa nih dinhnak an pek ahcun na lungre theihmi le na khingritmi vialte chungin daihnak le dinhnak taktak na hmu lai.. Amen..

Dinhnak timi cu nihin i na buai lengmang mi le na khingrihnak chungin dinh bak hi asi. Dinh timi cu zeihmanh tuahlo, ruahlo le daitein um, hnangamnak he um i dinh hi dinh timi cu asi. Pathian nih zeizong vialte hi niruk chungah aser dih hna hnu ah nisarihnak ni cu aidin timi Sabath rest taktak hi Bawipa Jesuh Khrih nih pek a kan duhmi cu asi. Amen. Cucaah pei Bawipa Jesuh Khrih nih vailamcung i athih laite ah aa lim cang atinak kha asi cu.. Bawipa Jesuh Khrih nih pek a kan duhmi Dinhnak=Rest, Sabbath Rest cu Pathian nih arian alimni i aidinhmi dinhnak le Bawipa Jesuh athihni ah achimmi alim dih cang atimi Dinhnak hi pek a kan duhmi cu asi. Nangmah le keimah nih tuah le ṭuanhaulo in Bawipa Jesuh Khrih nih alimmi teinak le dinhnak hi pek a kan duhmi cu asi. Laitlang ah khuate khua ah ummi ka si i lo kan kal tawn.. Lo kan kal i thilrit ngai he kan rak tlung cuahmah, kan khua alanghnak bo khi khuami nih "Thanthlahnak", or "Dinhhmun", tiin min an saknak kan phah ahcun kan phurhmi thilrit cu kan van ṭhumh i thlikikte nih a van kan chem i kan khua le ram kan van zoh i kan thilrit vialte kan chiahmi kan zang adam i kan iawmh hnak khin Bawipa Jesuh Khrih nih dinhnak kan pek hna lai atimi cu Dinhnak taktak asi deuh i na khing lawng silo in na thinlung tiang in azang lai.

Thiang Thlarau he hawikomhnak in na khingrihnak le na retheihnak Bawipa sin i na chuahpi ko ahcun Dinhnak cu na hmu hrimhrim ko lai. Dinhnak taktak hmu zungzal na duh ahcun Bawipa sinah na kal lengmang ahau ve timi hi Biatak Thawngṭha asi. Bawipa sinah Thiang Thlarau he thlacamnak in hawikomhnak chung na luhlo ahcun Dinhnak taktak cu na hmu zungzal bal lai lo. Dinhnak hmu zungzal khawhnak ding ahcun Bawipa sinah na thinlung khingrihnak vialte put in Thiang Thlarau he hawikomhnak ngeih dingin fuh law na khingrihnak azang ko lai i dinhnak tling cu na hmu zungzal ko lai. Pawkhim in nun zungzal na duh ahcun nifate rawl na ei ahau bantukin Dinhnak hmuh zungzal na duh ahcun nifate in Thiang Thlarau he hawikomhnak na ngeih zungzal ahau ve.. Thiang Thlarau he hawikomh cu Bawipa Nangmah he hawikomh ka duh ve tiin lungthin dihlak tein thlacamnak he an ton tiang, caan tampi pek in lungsau tein Bawipa hngah hi ka chim duhmi asi.. Amen..

Mathai 11: 29-30