Hezekiah nih Pathian duhnak kawl in a miphun le ram damnak caah a neihchia chawva le thazang he Pathian hmai a kawl i Judah ram chung lawng si loin Israel ram tiangin Pathian sinah kir tthan dingin ca a phorhter hna i Jerusalem biakinn ah langtakpuai hman zongah an ra i Bawipa an thangtthatti hna i an sualnak ngeihthiam in damnak a rak pek hna. Mah bantukin Pathian lei ian i mer tikah Tlangbawi le Levi mi hna nih tlamtling tein Pathian biakinn chungah le Pathian rian an tuan khawhnak hnga 1/10 le thlaithar pek dingin mipi cu a forh hna hna i thazang a pek hna. Bawipa nih mipi an thinlung ah rian a tuan ciammam i 1/10 le thlaithar cu tampi an rak chuahpi tikah Hezekiah le tlangbawi hna nih an hmuh tikah Bawipa an thangthat i mipi an hruainak ah nawlbia he aitlakin Bawipa kha lungthin dihlak in an kawl caah an tuahmi kip ah khuaawng an tong. Amen!
Khrihfabu a ning cang tein a kal khawhnak ding ahcun 1/10 le thawhlawm, thlaithar hi Bawipa nih a kan fial ning tein kan pek a hau i Moses nawlbia bangin Levi mi hna le tlangbawi covo a rak si. Moses hnu ah Israel mi nih siangpahrang kan pe ve ko tiah Pathian sinah an hal tikah Samuel sin in Bawipa nih a lehmi hna cu 1/10 tiang in siangpahrang nih an hal hna lai tiah a rak ti caah Hezekiah zong nih cun Pathian riantuanmi caah mipi kha pek a fial hna nak cu asi. Zei caahdah asi tiah cun riandang tuan lo tein Pathian inn ah an um i a ning cang tein rian an tuan khawhnak ding caah asi. Sihmanhsehlaw siangpahrang hna nih Pathian an ttanhlo le a nawl an zulh lo tikah mipi le tlangbawi hna le Levi mi zong an rak vaivuan i pekchanhnak um loin an rak im tawn. Pekchanhnak a um lo tikah tlangbawi le Levi mi hna cu Pathian biakinn an rak zamtak i an pawcawmnak cu an rak kawl tawn.
2 CHANRELNAK 31:4
Cun tlangbawi hna le Levi mi hna kha Bawipa phungbia ah an i pek khawh nakhnga, Jerusalem mi hna cu tlangbawi hna le Levi mi hna nih an hmuh awk a simi kha nan pek hna lai tiah nawl a pek hna.
2 CHANRELNAK 31:5
Nawlbia cu ka kip ah an thanh tikah Israel mi nih tampi in rawl thar hmasa hna le mitsur hang le chiti le khuaihliti le lo in a chuakmi vialte kha an thawh i zeizong kip cheu hra cheu khat kha tam piin an rak put.
2 CHANRELNAK 31:10
Cun Zadok hrin a simi tlangbawi upa bik Azariah nih khan a leh i, "An thawhlawm cu Bawipa inn chungah ratpi an thawk in kannih nih kan rak ei i kan i za i tampi a hleimi kan ngei rih; Bawipa nih a mi cu thluachuahnak a pek hna caah, cucaah tampi a hleimi kan ngei," tiah a ti.
2 CHANRELNAK 31:21
Cun Pathian inn rian le phungbia le nawlbia he aa tlak in a tuahmi rian vialte ah, Pathian a kawlnak ah, a lungthin dihlak in a ṭuan i khua awng a tong.
Comments
Post a Comment