PATHIAN ZOHKHENHNAK TANGAH UMMI KAN SI

Dear Khrih chungchuak unau hna,

Pathian zangfahnak thawng in Amah kan thangtthat khawh rih caah Bawipa min thangtthat si ko seh. Amen! Thangtthat kan duh zongah kan thangtthat khawh lo caan aphan ve te lai. Nunnak thawngttha ka rak in hrawmh tthan hna. Bawipa sunparnak caah si hram ko seh. Amen! 

1 PETER 4:6

Cu ruangah cun mithi mi hna sin zong i Thawngṭha chim a si venak cu a si. Annih cu midang cio bantuk khan an pum in an nun lioah khan biaceih cu an si ve ko cang; sihmanhsehlaw annih sin i Thawngṭha chim a sinak cu thlarau in an nunnak ah hin Pathian a nun bantukin an nun khawh ve nakhnga ding caah a si.

     

Jesuh Khrih nih anunnak in thawngttha arak chimnak ah hin mikip nih Thlarau in kamhmi zungzal nunnak kan hmuh khawhnak ding caah le Pathian anun zungzal bantuk in zungzal nunnak taktak kan hmuh khawhnak ding caah asi. Amen! Minung hi Khrih he kan ipeh loah cun thlarau in athimi kan si taktak ko. Sihmanhsehlaw Khrih he kan i pehtlainak thawng in Pathian he remnak kan hmuh i cu remnak kan hmuhmi nih asawh duhmi cu nan sual lo ti bia a kan khiah lawng hmanh si loin Pathian cu zungzal anung bang in nan nih zong nan thi ti lai lo i zungzal nunnak tu kan pek cang hna ti hi asi. Amen! Cucaah Pathian
fale kan si ruangah hin ilawm ko hna usih. Lawmh kan ti mi taksa nuam menmen i lawmh si loin Thlarau tuin ailawmmi kan si deuh awk asi.

1 PETER 4:8

Zeidang vialte nakin, pakhat le pakhat lungtak tein i daw u, zeicahtiah dawtnak nih cun sualnak tampi kha a khuh khawh.

1 PETER 4:10

Pathian laksawng kengtu ṭha bantukin Pathian sinin nan hmuhmi laksawng kha midang ca ṭhatnak ah hmang cio u.

      Pakhat le pakhat hi Khrih ta kan si ruangah lungtak tein i daw ko hna usih. Amen! Cu lungtak te dawtnak kan ngeihmi nih cun zeizong vialte hi a khuh dih khawh awk le kan i ngeihthiam khawh dih awk asi. Jesuh Khrih vawlei cung i arat hi dawtnak hrambunh in ara kan ti lengmang bang in cu dawtnak ruangah cun anunnak pek in kan sualnak vialte cu a kan khuh piak i a kan thenhpiak dih cikcek. Amen! Cucaah cun a ho poah hi Khrih ta ka si aitimi poah cu dawtnak nih a kan uk awk le dawtnak in kan nun hi akhah awk hrim asi ko. Sihmanhsehlw taksa kan si rih chung cu kan tling kho hrim lai lo i duh ning tluk in Dawtnak zong mi cungah kan langhter kho tuk men lai lo nain Khrih sin ah bawmh kan hal asiah cun bawmtu Thiang Thlarau in kan khat lai i kan nun cu Dawtnak in kan khat te ko lai. Amen! Zeizong vialte ngeitu Pathian sinah kan lungthin le ruahnak, thazang dihlak in dawtnak nun hriamnam tling khitkhet in kan ngeih khawhnak dingah bawmh hal hna usihlaw pek kan si hlei ah zeizong vialte zong chapchih kan si ko lai. Amen! Pathian sin in kan hmuhmi laksawmg lakah anganbikmi dawtnak hi midang (kan unau) sinah thatnak petu le dawtnak in lawmhnak phaktertu ah azungzal in hmang cang hna usih. Amen!

1 PETER 5:7

Amah nih an zohkhenh hna caah nan lungretheihnak vialte kha amah cungah chia dih ko u.

     Kan nih cu Pathian zohkhenhnak tangah a ummi kan si caah kan lungretheihnak le thilrit vialte cu Pa Pathian sinah chia dih ko hna usih. Kan thilrit le kan lungretheihnak chaang khotu le lawmhnak taktak pe khotu cu kan Pathian lawnglawng hi asi. Amen! Pathian zohkhenhnak tang i um cu himnak atling. Amen! Adonghnak ah cah kan duhmi hna cu Pathian fale kan si i Pathian nih azungzal in zohkenhmi fale kan si hi i philh hna hlah usihlaw Pathian duhnak tuah hi kan duhnak nganbik ah si ve cang ko seh. Amen! Bawipa nih thluachuahnak kan pekpiak ko seh...