Nitin Baibal Relnak

BIACEIHTU 2:1

Cun Bawipa vancungmi cu Gilgal in Bochim ah a hung kal. Cun amah nih, "Izipt ram in kan hunpi i na pupa hna sinah pek awkin chiat ka sermi ram chungah kan luhpi. 'Nangmah he ka biakamnak cu ka hrawk bal lai lo i

BIACEIHTU 2:2

hi ram i a ummi hna he hin biakamnak zeihmanh na tuah lai lo; an biakṭheng cu na hrawh dih hna lai,' tiah ka ti. Sihmanhsehlaw nawl kan pekmi cu na ngai lo. Na tuahmi hi zeidah a si?

BIACEIHTU 2:3

Cucaah atu cu, na hmai in ka ṭhawl hna lai lo, ka ti; sihmanhsehlaw na caah dohtu an si lai i an pathian cu na caah rap an si lai," tiah a ti.

BIACEIHTU 2:4

Bawipa vancungmi nih hi bia cu Israel mi vialte hna sinah a chim tikah, mi hna cu fak piin an ṭap.

BIACEIHTU 2:7

Cun mi hna nih cun Joshua nunchung le Joshua hnuah a nungmi upa, Israel mi caah Bawipa nih rian ngan a tuahmi vialte a rak hmutu hna an nunchung ah cun Bawipa rian kha an ṭuan.

BIACEIHTU 2:10

Cun cu chan mi vialte zong cu an pupa hna sinah pumh an si; cun annih hnuah Bawipa siseh, Israel ca i a tuahmi rian siseh, a hngal lomi chan thar a hung chuak.

BIACEIHTU 2:11

Cun Israel mi nih Bawipa mithmuh i thil ṭhalo a simi kha an tuah i Baal kha an biak hna.

BIACEIHTU 2:14

Cucaah Bawipa thinhunnak cu Israel cungah a alh i miramhtu hna sinah khan a pek hna i an ramh hna; cun an pawngkam i a ummi an ral hna kut chungah a zuarh hna, cucaah annih nih an ral kha an celh kho ti hna lo.

BIACEIHTU 2:15

Ral doh awkah an chuah fate Bawipa kut cu a chia lei in an caah a um, Bawipa nih ralrinnak a rak pek hna bang le an sinah chiat a rak ser bang khan; cucaah vansang au in an um.

BIACEIHTU 2:16

Khi tikah Bawipa nih biaceihtu a chuahter hna i annih cu annih a ramhtu hna kut chung khan an khamhtu hna kha an si.

BIACEIHTU 2:18

Bawipa nih an caah biaceihtu a chuahter fate, Bawipa cu biaceihtu sinah cun a um i biaceihtu nih cun amah chan chung vialte cu an ral hna kut chungin a khamh hna; zeicahtiah annih kha a hremtu hna le vansang au in a tuahtu hna ruang i an hrum-ainak nih khan Bawipa cu an cungah vel a ngeihter.

BIACEIHTU 2:19

Sihmanhsehlaw biaceihtu cu a thih fate, annih cu an i mer ṭhan i an pale nakkhan chia deuh in an nung, pathian dang kha an zulh hna i an biak hna i an hmaiah an kun; an tuah tawnmi le lungkhong lam an zulh tawnmi kha pakhat hmanh an hlaw hna lo.

BIACEIHTU 2:20

Cucaah Bawipa thinhunnak cu Israel cungah a alh i, "Hi mi hna nih hin an pupa hna sinah nawl ka pekmi ka biakamnak kha an hrawh i ka bia kha an ngaih lo caah,

BIACEIHTU 2:21

hi hnu hi cu annih hmai in, Joshua nih a thih tikah a nganhtami miphun hna kha, ka dawi ti hna lai lo,

BIACEIHTU 2:22

an pupa hna bantuk khan Bawipa lam kha an zul lai maw zul lo tiah Israel mi cu hneksaknak caah annih cu ka hman hna lai," tiah a ti.

BIACEIHTU 2:23

Cucaah Bawipa nih hi miphun hna cu hmakhatte ah dawi loin a umtak rih hna i Joshua kut chungah khan a pe hna lo.

BIACEIHTU 3:1

Mah miphun hna hi Bawipa nih Kanaan ram chung i raldohnak zeihmanh a hngal lomi Israel mi vialte kha, hneksaknak ding ca i a nganhtami cu an si;

BIACEIHTU 3:3

Cu miphun hna cu mah hihi an si: Filistin mi hna bawi panga le Kanaan mi vialte le Sidon mi hna le Lebanon Tlang i a ummi Hiv mi hna, Baal-hermon Tlang in Hamath luhnak tiang.

BIACEIHTU 3:4

Bawipa nih Moses in an pupa hna nawlbia a rak pekmi hna kha an ngai lai maw ngai lo ti hngalh nakding caah, cu hna cu Israel mi hneksaknak caah an si.

BIACEIHTU 3:6

an fanule cu nupi ah an ṭhit hna i an fanu hrimhrim hna cu, cu hna i an fapale sinah khan an pek hna; cun an pathian zong kha an biak hna.

BIACEIHTU 3:7

"Cun Israel mi nih Bawipa mithmuh i thil ṭha lo kha an tuah, Bawipa an Pathian kha an philh i Baal hna le Asherah hna rian kha an ṭuan hna.

BIACEIHTU 3:8

Cucaah Bawipa thinhunnak cu Israel mi cungah a alh i Mesopotamia siangpahrang Kushan-rishathaim kut chungah khan a zuarh hna; cu caah Israel mi nih cun Kushan-rishathaim cu kum riat an rianh.

BIACEIHTU 3:9

Sihmanhsehlaw Israel mi nih cun Bawipa kha an auh tikah Israel mi caah cun Bawipa nih chuahtu pakhat a hun umter; amah nih cun a chuah hna, amah cu Kaleb nau Kenaz fapa Othniel a si.

BIACEIHTU 3:10

Bawipa thlarau cu a cungah a tlung i Israel cu bia a ceih hna; raldoh awkah khan aa thawh i Mesopotamia siangpahrang Kushan-rishathaim kha Bawipa nih a kut chungah a pek; Kushan-rishathaim kha a tei.

BIACEIHTU 3:11

Cucaah ram cu kum sawm li aa din. Cun Kenaz fapa Othniel cu a thi.

BIACEIHTU 3:12

Cun Israel mi nih Bawipa mithmuh i thil ṭhalo cu an tuah ṭhan; cun Bawipa nih Moab siangpahrang Eglon cu Israel mi doh awkah a ṭhawnter, zeicahtiah Bawipa mithmuh i thil ṭhalo kha an tuah.

BIACEIHTU 3:13

Ammon mi hna le Amalek mi hna kha a pumh hna i a kal i Israel kha a tei; cun ungkung khua kha an lak.

BIACEIHTU 3:14

Cun Israel mi nih Moab siangpahrang Eglon cu kum hlei riat an rianh.

BIACEIHTU 3:15

Sihmanhsehlaw Israel mi nih Bawipa kha an auh tikah annih cu Bawipa nih cun chuahtu pakhat a serpiak hna, Benjamin phun Gera fapa Ehud, kehtlak kha a si. Israel mi nih amah cu Moab siangpahrang Eglon sinah ngunkhuai an phorhter.

BIACEIHTU 3:20

Cun inncung thlan daihnak dal chung i a ṭhut lioah Ehud cu a sinah a ra. Cun Ehud nih, "Nangmah caah Pathian sinin bia pakhat ka ngei," tiah a ti. Cun a ṭhutdan in a hung tho.

BIACEIHTU 3:21

Cun Ehud nih a kehlei kut in a vun i purh i a orhlei phei i nam kha a vun lak i a paw ah a sawh;

BIACEIHTU 3:25

An khuaruah a har cikcek tiang an ngan; thlan daihnak dal innka hna cu a hun hlei lo tikah khan tawh kha an i lak i an hun hna; cun cuka ah cun zelṭuang ah an bawipa cu a ruak in a rak ril ko.

BIACEIHTU 3:28

Cun anih nih, "Ka zul u; zeitintiah nan ral Moab mi hna cu Bawipa nih nan kut chungah an pek cang hna," tiah a ti hna. Cucaah an vun zulh i Moab ram zawn i Jordan tannak hna kha an tlaih hna i mi pakhat hmanh an tanter hna lo.

BIACEIHTU 3:30

Cucaah cu ni ah cun Moab cu Israel kut tangah an sung. Cun ram cu kum sawm riat chung aa din.

BIACEIHTU 3:31

Amah hnuah cun Anath fapa Shamgar a hung si, Filistin mi za ruk caw tuknak fung in a thah hna; amah zong nih Israel kha a luatter ve.

BIACEIHTU 4:1

Cun Ehud thih hnuah, Israel mi nih Pathian mithmuh i thil ṭhalo kha an tuah ṭhan hoi.

BIACEIHTU 4:2

Cun Bawipa nih Kanaan siangpahrang Jabin, Hazor i siangpahrang a simi kut chungah khan a zuarh hna; a ralbawi cu Harosheth-Hagoiim i a ummi Sisera a si.

BIACEIHTU 4:3

Khi tikah Israel mi nih Bawipa cu bawmhnak hal in an auh; zeitintiah Jabin nih thir rangleng za kua a ngei i Israel mi cu kum kul chung fak piin a hrem hna.

BIACEIHTU 4:4

Khi caan ah profetnu Deborah, Lappidoth nupi nih cun Israel mi cu bia a ceih hna.

BIACEIHTU 4:6

Mi a hei thlah hna i Abinoam fapa Barak kha, Naftali ram Kedesh khua in a auh i, "Bawipa, Israel Pathian nih nangmah cu, 'Va kal law, Tabor Tlang ah na mi hna cu va pum hna, Naftali phun le Zebulun phun chungin thong hra va la hna,

BIACEIHTU 4:7

cun Jabin ralbawi bik Sisera cu a rangleng hna le a ralkap hna he nangmah kha Kishon tiva pawng i rak in doh awkah, ka hnuh lai i amah cu nangmah kut chungah kan pek lai,' an ti lo maw?" tiah a ti.

BIACEIHTU 4:8

Cun Barak nih a sinah, "Na ka kalpi ahcun, ka kal lai; sihmanhsehlaw na ka kalpi lo ahcun, ka kal lai lo," tiah a ti.

BIACEIHTU 4:14

Cun Deborah nih Barak cu, "Tho tuah, zeitintiah nihin hi Bawipa nih Sisera cu na kut chungah an pek ni a si. Bawipa cu na hmaiah a kal a si lo mei?" tiah a ti. Cucaah Barak cu Tabor Tlang cun amah a zultu mi sang khat he cun an vung kal.

BIACEIHTU 4:15

Cun Bawipa nih Sisera le a rangleng vialte le a ralkap vialte cu vainam in a sualsawhrok dih cikcek hna; Sisera cu a rangleng cungin a ṭum i a ke in a zaam.

BIACEIHTU 4:23

Cucaah khi ni ah Pathian nih Kanaan siangpahrang Jabin cu Israel mi hna hmaiah a tei.

BIACEIHTU 5:31

"Cu bantukin na ral vialte cu, maw Bawipa, rawk dih hna seh! Sihmanhsehlaw na hawikom hna cu, Ni khi a ṭhawnnak in a chuah bantuk khi si hna seh." Cun ram cu kum sawm li chung aa din.

BIACEIHTU 6:1

Israel mi nih Bawipa mithmuh i a ṭha lomi kha an tuah i Bawipa nih Midian kut chungah kum sarih a pek hna.

BIACEIHTU 6:6

Cun Midian ruangah cun Israel cu a ṭumchuk ngaingai i Israel mi nih bawmhnak duh ah Bawipa sinah an au.

BIACEIHTU 6:8

Israel mi sinah cun Bawipa nih profet pakhat a thlah; cun anih nih annih sinah "Hi bangin, Bawipa, Israel Pathian nih, Izipt ram in ka hun in hruai hna i saltannak inn chungin kan chuah hna;

BIACEIHTU 6:9

cun Izipt mi hna kut le nanmah an hremtu hna kut chungin kan luatter hna i nan hmai in ka dawi hna i an ram cu kan pek hna;

BIACEIHTU 6:12

Cun Bawipa vancungmi cu a sinah a lang i a sinah, "Bawipa cu na sinah a um, nang a ṭhawng i ralṭha pa," tiah a ti.

BIACEIHTU 6:13

Cun Gideon nih anih cu, "Bawipa, kan nawl, Bawipa cu kan sin i a um a si ahcun zeicahdah mah thil vialte nih hin a kan tlunhnawh kun? Kan pupa hna nih, 'Izipt ram in Bawipa nih a kan chuahpi lo mei,' ti i kan sin i an ti tawnmi khuaruahhar thil vialte hna cu khuazei ah dah an si kun? Sihmanhsehlaw atu cu Bawipa nih a kan hlonh cang i Midian kut chungah a kan pek cang," tiah a ti.

BIACEIHTU 6:14

Cun Bawipa cu a sin leiah aa mer i, "Hi na ṭhawnnak he hin kal law, Midian kut chungin Israel cu chuah tuah; keimah nih kan thlah lo mei?" tiah a ti.

BIACEIHTU 6:15

Cun anih nih a sinah, "Bawipa, kan nawl ko, zeitindah Israel cu ka chuah khawh lai? Zohhmanh ka phun cu Manasseh chungah a der bik a si i kanmah innchungkhar chungah keimah cu a hme bik ka si," tiah a ti.

BIACEIHTU 6:16

Cun Bawipa nih a chawnh i, "Sihmanhsehlaw nangmah sinah ka um lai i Midian mi hna cu mi pakhat tluk ceu in na thah dih ko hna lai," tiah a ti.

BIACEIHTU 6:17

Cun anih nih, "Nangmah sinah mithmai ṭha ka hmuh a si ahcun, nangmah cu a ka chawntu na si tinak ah hmelchunhnak pakhat ka hmuksak tuah.

BIACEIHTU 6:18

Nangmah sinah ka rat i ka laksawng ka rak put i na hmai i ka chiah hlantiang cu, hika hin i ṭhial sawh hlah tiah kan nawl," tiah a ti. Cun anih nih, "Na kir ṭhan hlantiang ka um ko lai," tiah a ti.

BIACEIHTU 6:21

Khi tikah Bawipa vancungmi nih a kut i aa putmi ṭhiangṭhunh par cun, sa le thilnu cawh lo changreu kha a hei sawh hna i a tawngh hna; cun lung cun mei a tho i sa le thilnu cawh lo changreu cu a kangh dih hna; cun Bawipa vancungmi cu a mit hmuh lo ah a lo.

BIACEIHTU 6:34

Sihmanhsehlaw Bawipa thlarau cu Gideon cungah a tlung; cun muko kha a tum i Abiezer mi kha amah zulh awkah an i pum.

BIACEIHTU 6:36

Cun Gideon nih Pathian sinah cun, "Nangmah nih na chim cang bangin keimah kut in Israel kha na chuah ding a si ahcun.

BIACEIHTU 6:37

Zohhmanh, phuhri ah tuu hmul ka chiah lai; tuu hmul cung lawng i dap a um i vawlei vialte cu a ro ko ṭung ahcun, khi tikah nangmah nih na chim cang bantukin keimah kut in Israel kha na chuah hna lai ti kha ka hngalh lai," tiah a ti.

BIACEIHTU 6:38

Cun cu bang cun a si taktak. A thaizing ah tuan tein a thawh i tuu hmul kha a sur tikah, kheng khat ti tuu hmul cun a sur.

BIACEIHTU 6:39

Cun Gideon nih Pathian sinah, "Ka cungah na thinhunnak kanghter sawh hlah, hi voi khatte hi cu ka chimter ko rih; hi voi khatte hi cu tuu hmul he hin ka hneksakter ko rih; tuu hmul lawnglawng hi ro seh law vawlei vialte ah hin dap tla seh tiah kan nawl," tiah a ti.

BIACEIHTU 6:40

Cun cu bangin Pathian nih cu zan ah cun a tuah; zeitintiah tuu hmul lawng cu a ro i vawlei cung vialte ah cun dap a um.

BIACEIHTU 7:7

Cun Bawipa nih Gideon cu, "A liah in a liakmi mi za thum khan nannih cu kan khamh hna lai i Midian mi cu nan kut chungah kan pek hna lai; a dang vialte cu an inn cio ah kal hna seh," tiah a ti.

BIACEIHTU 7:9

Khi zan ṭhiamṭhiam ah cun Bawipa nih amah cu, "Tho law, an riahhmun cu vung do tuah, zeitintiah na kut chungah kan pek cang.

BIACEIHTU 7:11

cun annih nih an chimmi kha nan theih lai i cu hnuah cun an riahhmun cu vung doh awkah na kut cu ṭhawnter an si lai," tiah a ti. Cun a sinum Purah he khan riahhmun chung i a ummi hriampumi hna ralven buk ah khan an vung kal.

BIACEIHTU 7:13

Gideon nih a rat tikah, zohhmanh, mipa pakhat nih a hawipa kha a mang a rak chim len ko i, "Zohhmanh, mang pakhat ka manh; cun zohhmanh, barli changreu hlum khat cu Midian mi hna riahhmun ah a rung ril i riahbuk kha a phan i a khen i cucaah cun a tlu, cun a bingtalet in aa let i cucaah riahbuk cu per thlup in a ril ko," tiah a ti.

BIACEIHTU 7:14

Cun a hawipa nih cun, "Mah hihi zeidang zeidang si loin Israel mi Joash fapa Gideon i a vainam a si ko cu; Pathian nih Midian le ralkapbu vialte cu a kut chungah a pek cang hna," tiah a leh.

BIACEIHTU 7:15

Gideon nih mang le a sullam kong an i chimh cu a theih tikah Pathian kha a biak; cun Israel riahhmun ah khan a ra kir i, "Tho tuah u, zeitintiah Pathian nih Midian ralkapbu cu nan kut chungah an pek cang hna," tiah a ti.

BIACEIHTU 7:21

Cun riahhmun a velchum khan an umnak hmun cio ah an dir i ralkap vialte cu an le dih; an au i an zamter dih hna.

BIACEIHTU 7:22

Cun muko za thum kha an tum tikah Bawipa nih ralkap vialte cu anmah le anmah kha an vainam in a tukter ciammam hna i ralkap hna cu Zererah lei i Beth-shittah tiang an zam, Tabbath pawng Abel-meholah ramri tiangin.

BIACEIHTU 8:10

Cun Zebah le Zalmunna cu an ralkapbu he Karkor ah an um, sang khat le thong nga tluk an si, Nichuahlei mi ralkap vialte chungin nam tlaimi sing khat le sang hnih an thih cang caah a tangmi dihlak cu mah hihi an si.

BIACEIHTU 8:22

Cun Israel mi nih Gideon cu, "Nangmah nih kan uk tuah, nangmah le na fapa le na tu tiangin; zeicahtiah nangmah nih Midian kut chungin na kan chuah," tiah an ti.

BIACEIHTU 8:23

Gideon nih annih cu, "Keimah nih kan uk hna lai lo, ka fapa zong nih an uk hna lai lo; Bawipa nih an uk hna lai," tiah a ti hna.

BIACEIHTU 8:27

Cun mah cu cun Gideon nih tlangbawi angki a ser i amah khua, Ofrah khua ah cun a chiah; cun mah cucu Israel mi vialte nih hlawhhlang an celhhnawh i Gideon le a innchungkhar caah foihnak ah a cang.