Nitin Baibal Relnak

RUTH 1:8

Sihmanhsehlaw Naomi nih a fapale nupi pahnih hna kha a thawh hna i, "Va kal cang u, nanmah le nan nu le inn cio ah khan va kir cang u. Mithi hna le keimah cungah nan tuah bantuk hin Bawipa nih nan cungah zaangfahnak tuah ve ko seh.

RUTH 1:16

Sihmanhsehlaw Ruth nih, "Nangmah he i ṭhen awk le nangmah zul lo i kir ṭhan awkah ka lem len hlah; zeicahtiah na kalnak ah ka kal ve lai i na riahnak ah ka riak ve lai; na miphun cu ka miphun an si ve lai i na Pathian cu ka Pathian a si ve lai;

RUTH 1:17

na thihnak ah ka thi ve lai i khika ah cun an ka vui ve ko lai. Pathian nih cu bantukin ka cungah tuah seh law, tam deuh zongin tuah ko seh, thihnak hmanh nih nangmah sinin ka ṭhen ai kun," tiah a ti.

RUTH 1:20

Cun anih nih annih cu, "Naomi ka ti hlah u, Mara ka ti u, zeicahtiah Lianngan Bik nih khaa ngaingai in ka cungah a tuah cang.

RUTH 2:11

Sihmanhsehlaw Boaz nih a leh i, "Na va a thih ri in na pi cung i na tuahmi vialte cu tling tein an ka chimh dih ko, na nu le na pa le na chuahnak ram na kaltak hna i a hlan i na hngalh bal lomi miphun sin i na ratnak hawi hna hi.

RUTH 2:12

Bawipa nih na tuah ciami cu in rul seh law, Bawipa, Israel Pathian, a thla tangah i dor awk i na rak fuhmi nih cun, tampi in laksawng in pe ko seh!" tiah a ti.

RUTH 2:20

Cun Naomi nih a fapa nupi sinah cun, "A nungmi cungah siseh, a thimi cungah siseh, a zaangfahnak a ngol lomi Bawipa nih cun amah cu thluachuahnak pe ko seh!" tiah a ti. Cun Naomi nih a sinah, "Cu pa cu kan rualchan a si, kan sahlawh naih bik a si," tiah a ti fawn.

RUTH 3:9

Cun, "Ahodah na si?" tiah a ti i, "Na salnu Ruth ka si; ka rualchan naih na si caah na salnu hi na puan ka zawn tuah," tiah a ti.

RUTH 3:10

Cun anih nih, "Ka fanu, Bawipa nih thluachuahnak in pe ko seh; tlangval a sifakmi siseh, a rummi siseh na zulh hna lonak ah hin, a hmasa bik i nak hmanh khan hi a hmanung bik na vel hi na dawhter deuh cang.

RUTH 3:11

Cun ka fanu, ṭih hlah, ka khuapi hawi vialte nih nangmah cu mi ṭha na si kha an hngalh ko caah na ka halmi vialte cu kan tuahpiak lai.

RUTH 3:16

Cun a pi sin a va phak tikah, "Zeitindah na si, ka fanu?" tiah a rak ti. Cun mipa nih a ca i a tuahmi vialte kha a chimh i,

RUTH 3:17

"Hi barli rel ruk hi a ka pek i, 'Na pi sinah kut ro in na kir hrimhrim hnga lo,' a ka ti," tiah a ti.

RUTH 3:18

Cun amah nih, "Zeitindah thil cu a si ti kha na hngalh hlantiang, ka fanu, hngak ko rih, zeicahtiah nihin ah cu thil cu a lim hlantiang mipa cu a um sawhsawh lai lo," tiah a ti.

RUTH 4:3

Cun rualchan naih sinah cun, "Moab ram in a kir ṭhanmi Naomi nih kan phunhawi Elemelek ta a simi lobung pakhat kha a zuar.

RUTH 4:4

Cucaah cun, cu kong cu nangmah kha kan chimh awk le hika i a ummi hna le ka mi hna lak i upa hna hmaiah hin caw, kan ti awk a si tiah ka ruah. Na tlanh hnga a si ahcun, tlan tuah; sihmanhsehlaw na tlanh duh lo ahcun, ka hngalh nakhnga ka chim tuah, zeicahtiah nangmah hleiah a tlantu ding an um ti lo i nangmah an changtu cu keimah ka si ko," tiah a ti. Cun, "Ka tlanh lai," tiah a ti.

RUTH 4:6

Cun rualchan naihpa nih cun, "Keimah ro tu kha ka hrawh sual lai caah, keimah caah cun ka tlan kho lai lo. Keimah nih ka tlanh khawh lo caah nangmah tu nih tlan khotu ka sinak cu i lak ko," tiah a ti.

RUTH 4:10

Mithipa min cu a unau hna sin le a chuahnak hmun hauka in a loh nakhnga lo, mithipa min cu a ro chung i hmunhter awkah, Mahlon nih a rohmi Moab minu Ruth zong kha ka nupi si awkah ka cawk cang; cucu nannih hi nihin ah hin a hngaltu nan si," tiah a ti.

RUTH 4:11

Cun hauka ah a ummi vialte le upa hna nih khan, "Hngaltu kan si. Na inn chungah a ra ding minu cu, Rachel le Leah, Israel innchungkhar a dirhtu pahnih hna bantuk ah khan Bawipa nih ser ko seh. Efrathah ah hin khua awng tong law, Bethlehem ah na min thang ko seh;

RUTH 4:12

cun Bawipa nih hi ngaknu sinin an pek laimi tefa hna thawngin, na innchungkhar cu Tamar nih Judah a hrinpiakmi Perez innchungkhar bantuk kha si ko seh," an ti.

RUTH 4:13

Cucaah Boaz nih Ruth cu a lak i a nupi ah a cang; a theihhngalh i Bawipa nih fapawinak a pek i fapa a hrin.

RUTH 4:14

Cun nu hna nih khan Naomi sinah cun, "Nihin ni i rualchan naih chambau loin an umtertu Bawipa cu thangṭhat si ko seh; amah min cu Israel mi lakah thang ko seh!

RUTH 4:15

Amah cu nangmah caah nunter ṭhantu le na tar leiah an cawmtu a si lai; zeitintiah na fapa nupi, nangmah an dawtu, nangmah ca i fapa pasarih nakin a ṭha deuhmi nih cun, a hrin cang," tiah an ti.

RUTH 4:17

Cun innpa nu pawl nih khan min an sak i, "Naomi caah fapa a chuak," tiah an ti. Obed tiah min an sak; amah cu David pa Jesse i a pa a si.