Nitin Baibal Relnak

1 SAMUEL 17:4

Cun Filistin mi hna riahhmun cun an mi ṭhawng bik a min Goliath a simi, Gath khuami, a tung dong ruk le khap khat a timi cu a ra chuak.

1 SAMUEL 17:8

A dir riangmang i Israel ralkap cu a hei hauh hna i, "Zeicahdah raldoh awk i i tian awkah nan hei chuah ve? Keimah cu Filistin mi ka si i nannih cu Saul sal nan si lo maw? Nanmah caah mi pakhat i thim u law, keimah sinah hin rung seh.

1 SAMUEL 17:9

Keimah kha a ka doh khawh i a ka thah ahcun, kannih cu nan sal kan si lai; sihmanhsehlaw amah cu keimah nih ka tei i ka thah ahcun, nannih cu kan sal nan si lai i kan rian nan ṭuan lai," tiah a ti.

1 SAMUEL 17:11

Saul le Israel mi vialte nih Filistin mipa bia kha an theih tikah an lung a dong i an thin a phang ngaingai.

1 SAMUEL 17:16

Ni sawm li chung, Filistin mipa nih cun zingfa zanfa, a chuahhnawh hna i a dirhnawh lengmang hna.

1 SAMUEL 17:25

Cun Israel mi hna nih cun, "Hi a hung chuak mipa hi na hmu maw? Israel zawmhtaih awk hrimhrim ah a hung chuak ko hi ta; cun hi pa a thattu hi cu siangpahrang nih laksawng tampi a pek lai i a fanu zong kha a pek lai i, a pa innchungkhar ngunkhuai a luatter lai," tiah pakhat le pakhat an i ceih.

1 SAMUEL 17:26

Cun David nih a pawng i a dirmi hna cu, "Hi Filistin mipa a that i hi thangchiatnak Israel mi sinin a ṭhialtu cu, a cungah zeitindah tuah a si hnga? Hi cuarpartan lomi Filistin mipa hi aho rialmal dah a hei si i Pathian nung ralkapbu a hei zawmhtaih hna hnga cu!" tiah a ti.

1 SAMUEL 17:31

David nih a chimmi bia cu an theih tikah Saul kha an va chimh chin; cun amah kha a auh.

1 SAMUEL 17:32

Cun David nih Saul sinah cun, "Amah ruangah hin aho hmanh an lungdong hna hlah seh; na salpa nih ka va kal lai i hi Filistin mipa hi ka va doh lai," tiah a ti.

1 SAMUEL 17:33

Cun Saul nih David cu, "Hi Filistin mipa va doh awkah hin na kal kho lai lo, zeicahtiah nang cu tlangvalte men na si i anih cu a tlanval ka in pei ralkap a si cang cu," tiah a ti.

1 SAMUEL 17:34

Sihmanhsehlaw David nih Saul sinah cun, "Na salpa nih hin ka pa caah tuu ka khal tawn i chiandeih siseh, vom siseh a rat i tuufa kha tuurun chungin a seh tikah,

1 SAMUEL 17:35

ka dawi tawn i ka tuk i a ka chung khan ka chuah tawn; cun a rak ka zuanh a si ahcun a hmurhmul in ka tlaih i ka tuk i ka thah tawn.

1 SAMUEL 17:36

Na salpa nih hin chiandeih si hna seh, vom si hna seh, ka thah hna; cun hi cuarpartan lomi Filistin mipa hi anmah lak i pakhat cu a si ve lai, Pathian nung ralkapbu hna a zawmhtaih hna caah hin," tiah a ti.

1 SAMUEL 17:37

Cun David nih, "Chiandeih tin chung le vom tin chungin a ka chuahtu Bawipa nih hi Filistin mipa kut chung hin a ka chuah ko lai," tiah a ti. Cun Saul nih David cu, "Va kal law, Bawipa cu na sinah um ko seh," tiah a ti.

1 SAMUEL 17:39

Cun David nih cun ralthuam cungah cun a vainam cu aa bei, kal hnik aa zal i a kal kho lo, zeicahtiah cu bantuk cu aa hruk bal hna lo. Cu tikah David nih Saul sinah khan, "Hi hna he hin cun ka kal kho lo, zeicahtiah kaa nek hna lo," tiah a ti. Cun David nih aa phoih hna.

1 SAMUEL 17:40

Cun David nih cun a ṭhiangṭhunh kha aa lak i tiva in lung mil tete panga aa thim hna i a tuukhal zal, a saphaw zal ah khan aa sanh hna; a lungherhchehnak cu a kut in aa put i Filistin mipa kha a hei fuh.

1 SAMUEL 17:43

Cun Filistin mipa nih cun David cu, "Uico maw ka si i fung he na ka rathnawh?" tiah a ti. Cun Filistin mipa nih cun a pathian hna kha i chalh in David cu chiat a serh.

1 SAMUEL 17:45

Cu tikah David nih cun Filistin mipa cu a thawh i, "Nang nih cun vainam le fei le fei nganpi he na ka chuahhnawh; sihmanhsehlaw kei nih cun ralkapbu Bawipa, Israel ralkapbu hna i an Pathian, na zawmhtaihmi min khan kan chuahhnawh.

1 SAMUEL 17:46

Nihin ni ah hin Bawipa nih nangmah cu keimah kut chungah a ka pek lai i kan thah lai i na lu kan tan lai; cun Filistin ralkapbu chung i a thimi ruak hna cu nihin ah hin van i a zuangmi va hna le vawlei i a ummi sahrang hna sinah ka pek hna lai; zeitintiah vawlei cung dihlak nih Israel mi lakah Pathian a um ti kha an hngalh nakhnga le

1 SAMUEL 17:47

hi aa pummi vialte nih hin, vainam le fei in Bawipa khamhnak hi a si lo ti kha an hngalh nakhnga; zeitintiah hi raltuknak cu Bawipa ta a si i nannih cu kan kut chungah pek nan si lai," tiah a ti.

1 SAMUEL 17:49

Cun David nih a zal kha a vun i purh i lung pakhat kha a vun lak i a herh i a hei chaih i Filistin mipa kha a calpadar ah a khen; lung kha a cal ah cun a pil i a bawktakhup in vawlei ah a tlu.

1 SAMUEL 17:57

Cun David cu Filistin mipa a thahnak khan a hung kir ah, Abner nih cun a kalpi i a kut i Filistin mipa lu he cun Saul hmaiah a chuahpi.

1 SAMUEL 17:58

Cun Saul nih a sinah, "Aho fapa dah na si, tlangvalpa?" tiah a ti. Cun David nih, "Bethlehem khuami na sal Jesse fapa ka si," tiah a leh.

1 SAMUEL 18:1

Saul sinah bia kha a chim dih tikah, Jonathan nunnak cu David nunnak ah aa ṭhitchih i Jonathan nih amah nunnak aa dawt tluk khan a dawt.

1 SAMUEL 18:3

Khi tikah Jonathan nih David sinah khan biakamnak a ser, zeitintiah amah nunnak bantukin a dawt.

1 SAMUEL 18:5

Cun David cu Saul nih a kuatnak paoh ah khan a hlawhtling; cucaah Saul nih ralkap hna haotu ah khan a ser. Cun mah hihi mi vialte mithmuh le Saul sinum hna mithmuh zongah khan thil ṭha a si.

1 SAMUEL 18:7

Cun nu hna cu lawmhnak an tuahpah khan hla in an i chawn i, "Saul nih a thong thong in a thah hna, David nih a sang sang in," tiah an ti.

1 SAMUEL 18:8

Cun Saul cu a thin a hung ngaingai i hi chimnak nih hin a lawmh loter ngaingai; aa thawh i, "David vial cu a sang sang that ah an rel i kei tu cu a thong thong that ceo ah an ka rel; pennak hi dah ti lo cu zeidah cu hleiah a ngeih ding a um ti?" tiah a ti.

1 SAMUEL 18:9

Cun cu ni thawk in Saul nih David cu a ngiat ziar.

1 SAMUEL 18:12

Saul nih David kha a ṭih; zei-cahtiah amah sinah khan Bawipa a um, sihmanhsehlaw Saul kha cu a chuahtak cang.

1 SAMUEL 18:14

Cun Bawipa kha amah sinah a um caah David cu a thil tuahmi vialte ah a hlawhtling.

1 SAMUEL 18:17

Cun Saul nih David cu, "Hika ah hin ka fanu upa deuh Merab a um ko; nupi caah kan pek lai; keimah caah na ral bel ṭha ko law, Bawipa raldohnak cu do ko hna," tiah a ti. Zeitintiah Saul nih, "Keimah kut cun thi hlah seh, sihmanhsehlaw Filistin mi hna kut tu in thi deuh seh," tiah a ruah.

1 SAMUEL 18:18

Cun David nih Saul sinah cun, "Keimah cu ahodah ka si i ka rualchan Israel mi lak i ka pa innchungkhar cu ahodah an si, siangpahrang tupa ka si hnga cu?" tiah a ti.

1 SAMUEL 18:20

Saul fanu Mikhal nih David kha a duh i cucu Saul kha an chimh i cu nih cun a lung a lawmhter.

1 SAMUEL 18:21

Saul nih, "Amah cu a caah rap a si nakhnga le Filistin mi hna kut cu amah dotu a si nakhnga, amah cu pe ning," tiah a ruah. Cucaah Saul nih David cu a voi hnihnak a chimh i, "Atu cu ka tupa na si lai," tiah a ti.

1 SAMUEL 18:23

Cun Saul sinum hna nih hi bia cu David hna theih ah an chim. Cun David nih, "Keimah bantuk misifak le aho zei rel a tong lomi caah hin, siangpahrang tupa si hi thil hmetuai ah dahra nan rel hi?" tiah a ti.

1 SAMUEL 18:25

Khi tikah Saul nih, "Hi bangin David sinah cun, 'Siangpahrang nih, siangpahrang ral hna cungah khan phu a hlam nakhnga, Filistin mi hna cuarpar za khat dah ti lo cu man zei hmanh a duh lo,' tiah nan chim lai," tiah a ti. Saul nih David cu Filistin mi hna kut in thihter awk kha a ruah.

1 SAMUEL 18:27

David cu a mi hna he khan an tho i an kal i Filistin mi kha za hnih an thah hna i David nih an cuarpar cu a rak phorh hna i siangpahrang tupa a si nakhnga, siangpahrang sinah cun tling tein a pek hna. Cun Saul nih a fanu Mikhal cu nupi caah a pek.

1 SAMUEL 19:1

Cun Saul nih a fapa Jonathan le a sinum vialte hna kha, David kha nan thah lai, tiah a chimh hna. Sihmanhsehlaw Saul fapa Jonathan nih David kha a tlaihchan ngaingai.

1 SAMUEL 19:4

Cun Jonathan nih a pa Saul sinah cun David cu a chimthiam i, "Siangpahrang nih a sal David cungah hin sualnak tuah hlah seh, zeicahtiah na cungah a sual lo i a tuahmi cu nangmah caah a ṭhami rian lengmang a si;

1 SAMUEL 19:5

thih le thih tiin Filistin mipa kha a tuk i Israel mi vialte caah Bawipa nih teinak nganpi a tuah. Na rak hmuh i na rak i lawm; cucaah cun, zeicahdah, zeiruanglo i David thahnak thawngin zeihmanh a sual lomi thisen cungah sualnak na tuah kun lai?" tiah a ti.

1 SAMUEL 19:6

Cun Saul nih Jonathan aw cu a zawn i Saul nih, "Bawipa nih a nun bangin, amah cu thah a si lai lo," tiah chiat a ser.

1 SAMUEL 19:18

Cun David cu a zam i a luat i Ramah ah Samuel sinah a ra i Saul nih a cung i a tuahmi vialte kha a chimh dih. Cun amah le Samuel cu an kal i Naioth ah an um.

1 SAMUEL 19:20

Khi tikah Saul nih David kha lak awkah mi a hei thlah hna; annih nih profet bu cu an holh cukmak len ko le Samuel kha an cungah haotu in a um kha an va hmuh tikah, Saul nih a thlahmi hna cungah khan Pathian thlarau cu a tlung i annih zong an holh cukmak ve.

1 SAMUEL 19:21

Mah cucu Saul kha an chimh tikah, midang kha a thlah ṭhan hna; cun annih zong cu an holh cukmak ve. Cun Saul nih a voi thumnak ah mi a hei thlah ṭhan hna i annih zong cu an holh cukmak ve ṭhiamṭhiam.

1 SAMUEL 19:23

Cun khika in Ramah khua chung i Naioth ah cun a va kal i Pathian thlarau kha amah cungah cun a tlung ve i a kalpah cun, Ramah khua chung i Naioth a phak hlantiang a holh cukmak lengmang ko.

1 SAMUEL 20:17

Cun Jonathan nih David cu amah a dawtnak chalh in chiat a serter ṭhan; zeitintiah amah nunnak aa dawt bantuk te khan a dawt.

1 SAMUEL 20:33

Khi tikah Saul nih cun Jonathan cu a fei in a hei khawh i thah a zalh, cucun Jonathan nih khan a pa i David thah a timh taktak cu fiang tein a hngalh.

1 SAMUEL 20:41

Tlangvalpa kha a kal dih cangka, lungpon sir khan David cu a hung chuak i vawlei ah a bawk i voi thum a kun; cun pakhat le pakhat an i hnam i pakhat le pakhat an i ṭah, David kha a zualhma khun.

1 SAMUEL 20:42

Cun Jonathan nih David cu, "Dai tein va kal ko, zeicahtiah, 'Keimah le nangmah karah le ka tefa hna le na tefa hna karlak ah, zungzal in, Bawipa cu um ko seh,' tiin pei Bawipa min in kan pahnih in chiat kan ser ṭi cang kha," tiah a ti. Cun a tho i a kal; Jonathan cu khua chungah a lut.

1 SAMUEL 22:5

Cun profet Gad nih David cu, "Ralhruang chungah um ti hlah, va kal law, Judah ram chungah va lut tuah," tiah a ti. Cucaah David cu a kal i Hereth tupi chungah khan a lut.

1 SAMUEL 22:14

Cun Ahimelek nih siangpahrang cu a leh i, "A si ah, na sinum vialte lakah, siangpahrang tupa a simi, nangmah pum rungvengtu hna haotu, na inn chungah upat a simi David tluk in, ahodah zumh awk tlak a um?

1 SAMUEL 22:16

Cun siangpahrang nih, "Na thi hrimhrim lai, Ahimelek, nangmah le na pa innchungkhar vialte," tiah a ti.

1 SAMUEL 22:18

Cu tikah siangpahrang nih Doeg kha, "Nangmah kha i mer law, tlangbawi kha that hna," tiah a ti. Cun Edom mi Doeg cu aa mer i tlangbawi kha a thah hna; cun khi ni ah la hmang ṭhia tlangbawi angki aa hrukmi mi sawm riat le panga a thah hna.