Nitin Baibal Relnak

2 CHANRELNAK 30:1

Bawipa, Israel Pathian i Lanhtak Puai cu ulh awkah annih nih Bawipa inn ah Jerusalem ah an rat nakhnga, Hezekiah nih Israel ram le Judah ram ah mi a thlah hna i Efraim le Manasseh ram zongah ca a kuat hna.

2 CHANRELNAK 30:6

Cucaah siangpahrang nawl peknak bang khan ca phortu kha Israel le Judah ram vialte ah khan siangpahrang le a bawi pawl hna ca kha an i phorh i an kal, siangpahrang nih cun, "Maw Israel mi hna, Bawipa, Abraham, Isak le Israel Pathian sinah cun kir ṭhan u law Assiria siangpahrang hna kut in a luatmi nannih a tangmi hna leiah hin aa mer ṭhan ve lai.

2 CHANRELNAK 30:7

Nan pupa hna le nan unau hna, Bawipa, an pupa hna Pathian sinah zumhtlaklo an si ca i nannih nih nan hmuh bangin, a hrawhmi hna bantuk hi si hlah u.

2 CHANRELNAK 30:9

Zeitintiah nannih nih Bawipa sinah khan nan kir ṭhan ahcun nan unau hna le nan fale hna nih khan annih a tlaitu hna sin khan zaangfahnak an hmuh lai i hi ram ah hin an kir ṭhan lai. Zeicahtiah Bawipa nan Pathian cu velngeih thiam le zaangfah thiam a si i amah sinah nan kir ṭhan ahcun nannih kha khuadang an hoitak hna lai lo," tiah a ti.

2 CHANRELNAK 30:11

Asher mi tlawmte, Manasseh mi tlawmte le Zebulun mi tlawmte lawng nih toidornak lungthin an ngei i Jerusalem ah cun an ra.

2 CHANRELNAK 30:18

Zeicahtiah mi tampi, Efraim mi, Manasseh mi, Issakhar mi le Zebulun mi tampi hna cu an i thianh lo i asinain a ningcang si lo khan lanhtak puai cu an ei ve ko. Zeitintiah Hezekiah nih annih cu thla a campiak hna i,

2 CHANRELNAK 30:19

"Pathian, Bawipa an pupa hna Pathian cu a lungthin in kawl aa timmi paoh cu, hmunthiang chung i i thianhnak phung ningin a tuah lo hmanh ah, a ṭhami Bawipa nih cun ngaithiam ko seh," tiah a ti.

2 CHANRELNAK 30:20

Cun Bawipa nih Hezekiah cu a theih i mi cu a damter hna.

2 CHANRELNAK 30:23

Cun aa pummi nih cun an ningpi in puai cu a dang ni sarih tuah rih awk kha an hna a tla; cucaah lunglawmhnak in ni sarih an tuah rih.

2 CHANRELNAK 30:26

Israel siangpahrang David fapa Solomon chan hnu khan hi bantuk hi Jerusalem ah a um ti lo caah Jerusalem ah lunglawmhnak nganpi a um.

2 CHANRELNAK 31:4

Cun tlangbawi hna le Levi mi hna kha Bawipa phungbia ah an i pek khawh nakhnga, Jerusalem mi hna cu tlangbawi hna le Levi mi hna nih an hmuh awk a simi kha nan pek hna lai tiah nawl a pek hna.

2 CHANRELNAK 31:5

Nawlbia cu ka kip ah an thanh tikah Israel mi nih tampi in rawl thar hmasa hna le mitsur hang le chiti le khuaihliti le lo in a chuakmi vialte kha an thawh i zeizong kip cheu hra cheu khat kha tam piin an rak put.

2 CHANRELNAK 31:10

Cun Zadok hrin a simi tlangbawi upa bik Azariah nih khan a leh i, "An thawhlawm cu Bawipa inn chungah ratpi an thawk in kannih nih kan rak ei i kan i za i tampi a hleimi kan ngei rih; Bawipa nih a mi cu thluachuahnak a pek hna caah, cucaah tampi a hleimi kan ngei," tiah a ti.

2 CHANRELNAK 31:21

Cun Pathian inn rian le phungbia le nawlbia he aa tlak in a tuahmi rian vialte ah, Pathian a kawlnak ah, a lungthin dihlak in a ṭuan i khua awng a tong.

2 CHANRELNAK 32:2

Cun Sennakherib cu a ra cang i Jerusalem tuk kha aa tim ti kha Hezekiah nih a hmuh tikah,

2 CHANRELNAK 32:3

khuapi leng i a ummi cerhti kha a bawi hna le a miṭhawng hna he phih aa tim, annih nih cun an bawmh.

2 CHANRELNAK 32:4

Mi tampi kha an i pum i ram chung i a luangmi cerh hna le tiva tete hna kha an phih hna i, "Zeicahdah Assiria siangpahrang hna cu an rat lai i ti tampi an hmuh lai?" tiah an ti.

2 CHANRELNAK 32:6

Cun mi zapi cungah khan raltuknak lei ralbawi a chiah hna i khua kutka i a ummi tual ah khan amah sinah cun a pumh hna i lung ṭhawnnak in bia a chimh hna i,

2 CHANRELNAK 32:7

"Ṭhawng u law nan ralṭha ko u. Assiria siangpahrang le a sinah a ummi mibu cu ṭih hna hlah u law nan lung zong dong hlah seh; zeicahtiah a ngan deuhmi pakhat a sin i a um lomi kan sinah a um.

2 CHANRELNAK 32:8

Amah sin i a ummi cu titsa hriamnam a si, sihmanhsehlaw kan sin i a ummi cu Bawipa kan Pathian a si, amah nih a kan bawmh lai i kan ral hna cu a kan dohpiak lai," tiah a ti. Cun Judah siangpahrang Hezekiah bia cun mi nih zumhnak an i lak.

2 CHANRELNAK 32:8

Amah sin i a ummi cu titsa hriamnam a si, sihmanhsehlaw kan sin i a ummi cu Bawipa kan Pathian a si, amah nih a kan bawmh lai i kan ral hna cu a kan dohpiak lai," tiah a ti. Cun Judah siangpahrang Hezekiah bia cun mi nih zumhnak an i lak.

2 CHANRELNAK 32:14

Nan Pathian nih hin ka kut chungin an chuah khawh hna nakhnga ah hin, ka pa nih a hrawh cikcekmi miphun hna i an pathian hna lakah khan aho tal nih a miphun cu ka kut chungin a chuah kho hna maw?

2 CHANRELNAK 32:15

Cucaah Hezekiah cu hi bantukin i hlenter hlah u law a pingah i hruaiter hlah u, cun amah kha zum hlah u, zeicahtiah mi zei miphun pathian siseh, zei ram pathian siseh, ka pupa hna kut chungin siseh keimah kut chungin siseh a mi a chanh khotu hna an um lo. Zeitindah nan Pathian chinchin nih cun ka kut chung cun an chuah khawh hna lai!' a ti," tiah an ti.

2 CHANRELNAK 32:18

Khua kulhnak vampang cung i a ummi Jerusalem mi hna kha an thin a phan i an tha a ther i khuapi cu an lak khawh nakhnga, mah cucu Judah holh in an auhnawh hna.

2 CHANRELNAK 32:20

Khi tikah Siangpahrang Hezekiah le Amoz fapa profet Isaiah kha hi ruangah hin thla an cam i van leiah an au.

2 CHANRELNAK 32:21

Cun Bawipa nih vancungmi pakhat a thlah i Assiria siangpahrang riahhmun i a ṭhawngmi ralkap hna le haotu hna le bawi vialte hna kha a thah hna. Cucaah hmaichia in amah a ram ah a kir ṭhan. Cun a pathian inn chung i a luh tikah khan amah fapa hna lila nih khan vainam in an thah.

2 CHANRELNAK 32:23

Cun mi tampi nih Bawipa sinah Jerusalem ah khan laksawng an rak put i Judah siangpahrang Hezekiah sinah khan thil man sung an rak put hna, cucaah cu caan thawk in hmailei ah cun miphun vialte hna mithmuh ah khan hlorh a si.

2 CHANRELNAK 32:25

Sihmanhsehlaw Hezekiah cu a lung in aa porhlawt caah a cung i ṭhathnemnak a tuahmi caah khan aa lawm lo. Cucaah amah le Judah le Jerusalem cungah thinhunnak a tlung.

2 CHANRELNAK 32:26

Sihmanhsehlaw a lung porhlawtnak kha Hezekiah cu aa ṭhum ṭhan i amah he Jerusalem mi hna he an i ṭhumh caah Bawipa thinhunnak cu an cungah Hezekiah chan ah khan cun a tlung lo.

2 CHANRELNAK 32:31

Cucaah Babilon bawi hna nih, ram chung i tuahmi hmelchunhnak va hlathlai awk i a sinah an thlahmi lamkal hna kong ah khan, amah cu hneksak awk le a lung chung i a ummi vialte hngalhnak ah, Pathian nih amah tein a thlah ko.

2 CHANRELNAK 33:10

Bawipa nih Manasseh le a mi hna sinah khan bia a chim ko nain zeihmanh ah an rel lo.

2 CHANRELNAK 33:11

Cucaah Bawipa nih an cungah Assiria siangpahrang ralkapbu ralbawi kha a ratpi hna i annih nih Manasseh cu sio in an sio i dar hreng an khenh i Babilon ah an kalpi.

2 CHANRELNAK 33:12

Cun harnak a phak tikah Bawipa a Pathian zaangfahnak kha a nawl i a pupa hna Pathian hmaiah khan fak piin a lung aa ṭhum.

2 CHANRELNAK 33:13

Amah sinah khan thla a cam i Pathian nih a nawlnak kha a cohlan i a thlacamnak kha a theih i amah ram Jerusalem ah khan a kirpi ṭhan. Khi tikah Manasseh nih Bawipa cu Pathian a si kha a hngalh.

2 CHANRELNAK 33:16

Bawipa biakṭheng zong kha a chiah ṭhan i a cungah cun daihnak thawinak hna le lawmhnak thawinak hna kha a pekchanh hna i Bawipa, Israel Pathian cu a rian nan ṭuan lai, tiah Judah mi kha nawl a pek hna.

2 CHANRELNAK 34:1

Josiah cu pen hram a thawk ah kum riat a si i Jerusalem in kum sawm thum le kum khat a pen.

2 CHANRELNAK 34:19

Siangpahrang nih phungbia chung bia kha a theih tikah, a puan kha a thleh hna.

2 CHANRELNAK 34:24

Hi bangin Bawipa nih a ti, tiah va chim u, Zohhmanh, hi hmun le a chung i a ummi hna cungah hin ṭhat lonak, Judah siangpahrang hmai i kan relmi cauk chung i chiatserhnak vialte kha ka tlunter lai.

2 CHANRELNAK 34:27

hi hmun le hi hmun i a ummi hna cung i a bia cu na theih tikah na lung in naa ngaihchih i Bawipa hmaiah na lung na ṭhumh i ka hmaiah na puan na thleh i na ṭah caah, kei zong nih na bia kan theihpiak, tiah Bawipa nih a ti.

2 CHANRELNAK 34:28

Zohhmanh na pupa hna sinah kan pumh lai i daihnak in thlan khor na phan lai, cun hi hmun le a chung i a ummi hna cung i ṭhat lonak ka tlunter dingmi hi na mit nih a hmu lai lo, tiah va chim u,' a ti," tiah a ti. Cun annih nih bia cu siangpahrang sinah an ratpi ṭhan.

2 CHANRELNAK 34:30

Cun siangpahrang cu Judah ram mi vialte le Jerusalem khuami le tlangbawi hna le Levi mi hna le, mi vialte a ngan he a hme he, Bawipa inn ah cun an hung kal; cun Bawipa inn ah an hmuhmi biakamnak cauk chung bia vialte cu an theihhngan ah a relpiak hna.

2 CHANRELNAK 34:31

Cun siangpahrang cu amah hmun ah khan a dir i, Bawipa kha zulh awk le a nawlbia hna le a hngalhternak bia hna le a nawl hna cu a lungthin dihlak le a nunnak dihlak in tuah awk le hi cauk chung i aa ṭialmi biakamnak bia hna cu tuah awkah Bawipa hmaiah cun biakamnak a ser.

2 CHANRELNAK 34:33

Josiah nih cun Israel mi hna ta a simi ram chung khan fihnung vialte kha a hlonh dih i Israel ram i a ummi vialte kha Bawipa, an Pathian rian cu a ṭuanter hna. Amah chan chung cu annih nih Bawipa an pupa hna Pathian zulhnak khan an pial lo.

2 CHANRELNAK 35:1

Josiah nih Jerusalem ah Bawipa caah Lanhtak Puai a tuah i Lanhtak Puai tuufa cu thla khatnak thla ni hleili ni ah an thah.

2 CHANRELNAK 35:18

Profet Samuel chan hnuah cun cu bantuk cun Lanhtak Puai kha tuah a si bal ti lo; Josiah le tlangbawi hna le Levi mi hna le cuka i a ummi Judah ram mi le Israel ram mi vialte le Jerusalem khuami hna nih an tuahmi Lanhtak Puai bantuk cu Israel siangpahrang ahohmanh nih an tuah bal lo.

2 CHANRELNAK 35:20

Hi thil vialte hnuah, Josiah nih biaknak inn cu a timhtuah dih tikah khan, Zufrates tiva i a ummi Karkhemish khua i i doh awkah Izipt siangpahrang Neko cu a hung kal i Josiah nih a rak chuahhnawh.

2 CHANRELNAK 35:21

Sihmanhsehlaw a sinah lamkaltu a hei thlah hna i, "Judah siangpahrang, nangmah le keimah cu zeidah kan i ti awk a um? Nihin ah hin nangmah doh awkah ka ra lo, sihmanhsehlaw atu i a ka raltu innchungkhar he doh awkah ka ra; cun Pathian nih i khulranh tuah tiin nawl a ka pek. Ka sin i a ummi Pathian doh cu ngol tuah, zeicahtiah an hrawh sual lai,' tiah a ti.

2 CHANRELNAK 35:22

Asinain Josiah nih hrial cu a duh lo i amah he i doh awkah cun a mui aa hleng. Pathian kaa chungin a chuakmi bia Neko bia cu a ngai lo i Megiddo nelrawn i i tuk awkah khan a kal.

2 CHANRELNAK 35:24

Cucaah a sinum hna nih cun rangleng chung khan an chuah i a rangleng pahnihnak in Jerusalem ah an tlunpi. Cun a thi i a pupa hna thlan ah khan an vui. Cun Judah mi dihlak le Jerusalem mi dihlak nih khan Josiah kha an ṭah.

2 CHANRELNAK 36:15

Bawipa, an pupa hna Pathian nih khan a mi hna le a umnak hmun cungah khan zaangfahnak a ngeih caah lamkaltu kha ngol duh lo tein a thlahhnawh lengmang hna;

2 CHANRELNAK 36:16 

sihmanhsehlaw Bawipa thinhunnak cu a mi hna cungah a thawh i remh ṭhan khawhnak a um ti lo tiangin Pathian lamkaltu hna cu an rak zawmhtaih lengmang hna i a bia kha zei ah an rel lo i a profet hna kha an nihsawh hna.

2 CHANRELNAK 36:17

Cucaah an tlangval hna cu an hmunthiang inn chungah khan vainam in a that i, tlangval cungah siseh, upa cungah siseh, zaangfahnak a ngei lomi, Khaldi mi siangpahrang kha an cungah a ratpi; a kut chungah cun an dihlak in a chanh hna.

2 CHANRELNAK 36:17

Cucaah an tlangval hna cu an hmunthiang inn chungah khan vainam in a that i, tlangval cungah siseh, upa cungah siseh, zaangfahnak a ngei lomi, Khaldi mi siangpahrang kha an cungah a ratpi; a kut chungah cun an dihlak in a chanh hna.

2 CHANRELNAK 36:20

Cun vainam thahnak in a luatmi hna kha Babilon ah sal ah a kalpi hna i Persia pennak a feh hlantiang annih cu amah le a fapa hna sal ah an cang;

2 CHANRELNAK 36:21

mah hihi Jeremiah kaa in Bawipa bia a chuakmi, ram nih a sabbath hna cu aa lawmhpi dih hlantiang, timi tlinternak caah khan a si. Kum sawm sarih tlinternak caah khan rawkral in a um chung vialte sabbath kha a ul ko.

2 CHANRELNAK 36:23

"Hi bangin Persia siangpahrang Sairas nih, Bawipa, vancung Pathian nih vawleicung ram vialte cu a ka pek cang i mah caah Judah ram Jerusalem i inn pakhat sak awk kha a ka fial. Cucaah Pathian mi a simi nannih cu nan dihlak in cuka ah cun va kal u law Bawipa nan Pathian cu nan sinah um ko seh," a ti.