Nitin Baibal Relnak

SALM 91:1

Himnak hmuh duh ah Cung Nung Bik kha a fuhmi le Lianngan Bik huhphenhnak chung ah aa dormi nih cun,

SALM 91:2

"Bawipa, nangmah cu a ka chanhtu le a ka hupphengtu na si! Nangmah cu ka Pathian na si; nangmah cu kan bochan," an ti lai.

SALM 91:3

Hmuh lomi thil ṭihnung vialte le thihnak zawtnak vialte chungin him tein an huhphenh hrimhrim lai.

SALM 91:4

A thla in an huh lai i him tein na um lai; zumhawktlak a sinak nih khan an huhphenh lai i him tein an umter lai.

SALM 91:5

Zan i a chuakmi ṭihnung kha na ṭih hna lai lo, chun ah ruahpak loin a chuakmi cantiang zong kha na ṭih lai lo;

SALM 91:6

mui lak i a ummi rai zong kha na ṭih lai lo i chun ceu i mi a that cuahmahmi ngal-eu zong kha na ṭih lai lo.

SALM 91:7

Na pawng ah mi thong khat an thi ko lai, na velchum ah thong hra zong an thi ko lai, sihmanhsehlaw nang cu zeihmanh nih an tawng lai lo.

SALM 91:9

Bawipa cu chanhtu ah naa ser i Cungnung Bik cu hupphengtu ah naa ser caah

SALM 91:10

harnak zeihmanh nih an tlunhnawh kho lai lo i vanchiatnak zeihmanh na inn a phan lai lo.

SALM 91:11

Na kalnak kip i nangmah zohkhenhtu dingah Pathian nih a vancungmi kha a chiah hna lai.

SALM 91:14

Pathian nih, "A ka dawmi cu ka khamh hna lai i a ka hngalmi cu ka huhphenh hna lai.

SALM 91:15

An ka auh tikah ka leh hna lai i harnak an in tikah ka umpi hna lai. Ka chuah hna lai i ka upat hna lai.

SALM 91:16

Laksawng ah nun sau ka pek hna lai i ka khamh hrimhrim hna lai," a ti.

SALM 92:1

Bawipa sinah lawmhnak hla sak cu zeitluk in dah a nuamh! Cungnung Bik Pathian, nangmah min upat in hlasak cu zeitluk in dah a nuamh!

SALM 92:4

Bawipa, thil lianngan na tuahmi nih ka lung an ka lawmhter, na tuahmi thil ruangah cun lawmhnak in hla ka sa.

SALM 92:10

Nangmah nih fungtum bantuk ṭhawng ah na ka ser; thluachuahnak na ka pek i ka lung aa lawm.

SALM 92:12

Miding mi cu tumkung bantukin an hninghno lai i Lebanon tlang sidar thingkung bantukin an ṭhang lai.

SALM 92:13

Annih cu Bawipa inn chungah cinmi thing bantuk, Bawipa biakinn chungah hninghno ngaiin a um i

SALM 92:14

an tar tik hmanh ah thei a tlai lengmang i a zungzal in hring dildel in a um i a ṭhawng ngaimi bantuk an si.

SALM 92:6

Mihrut nih an hngalh khawh lo i lungtlawmmi nih an theihthiam khawh lomi cu,

SALM 92:7

miṭhalo kha belh bantukin an ṭhan i thil ṭhalo a tuahmi hna kha thluachuah an hmuh hi a si; sihmanhsehlaw rawhralnak an hmu ko lai,

SALM 94:12

Bawipa, nangmah nih na chimhhrinmi, na phunglam na cawnpiakmi hna cu lunglawmmi an si,

SALM 94:14

Bawipa nih a mi cu a hlaw hna lai lo, amah ta a simi cu a zamtak hna lai lo.

SALM 94:18

Ka ke kha an nal cuahmah tikah, Bawipa, na dawtnak nih a ka tlaih.

SALM 94:19

Khuaruahhar vansang au in ka um tikah na ka hnemh i ka lung na ka lawmhter.

SALM 94:22

Sihmanhsehlaw kei cu Bawipa nih na ka huhphenh i ka Pathian nih him tein na ka umter.

SALM 95:1

Ra u law Bawipa cu thangṭhat u sih. Kannih a kan khamhtu Lungpi cu lunglawmhnak in hla in thangṭhat u sih.

SALM 95:6

Ra tuah u, kun u sih law bia u sih; a kan Sertu Bawipa hmaiah cun kan khuk i bil u sih!

SALM 95:7

Amah cu kan Pathian a si, kannih cu a kan zohkhenhmi kan si, a kan cawmmi tuurun kan si. A chimmi kha nihin cu ngai tuah u; a bia cu hihi a si:

SALM 95:8

"Nan pupa hna kha Meribah ah lung hak in an rak um bang khan nannih cu um hlah u,

SALM 95:11

Ka thin a hung i, "Dinhnak ka pek hnanak ding ram chungah cun an lut hrimhrim lai lo,' tiin chiatser in bia ka chim," a ti.

SALM 96:1

Bawipa cu hla thar in thangṭhat u, vawlei mi vialte hna, Bawipa cu hla in thangṭhat u!

SALM 96:2

Bawipa cu hla in thangṭhat u, a kan khamhnak thawng ṭha kha nifate in chim u.

SALM 96:3

Miphun hna sinah a sunparnak kha thanh u, mi vialte kha thil lianngan a tuahmi cu chim hna u.

SALM 96:6

Sunparnak le rumra cu a velchum ah an um i lianhngannak le dawhnak cu a biakinn chungah an um.

SALM 97:10

Ṭhat lonak a huami kha Bawipa nih a dawt hna, a mi kha a huhphenh hna i miṭhalo mi pawl kut chung khan a chuah hna.

SALM 97:11

Ceunak cu miding mi hna cungah khan a tlang i lunglawmhnak cu miṭha mi hna cungah khan a tlang.

SALM 97:12

Bawipa nih a tuahmi thil ruangah, a dingmi nannih vialte i lawm tuah u. Mi Thiang nih a tuahmi kha philh hlah u law amah kha lawmhnak in thangṭhat u.

SALM 98:1

Bawipa cu hla thar in thangṭhat tuah u, khuaruahharmi thil kha a tuah hna! A ṭhawnnak le a thiangmi a thazang in ral kha a tei hna.

SALM 98:2

Bawipa nih cun ral a tei hnanak thawng kha a thanh i a khamhnak ṭhawnnak kha miphun vialte a hngalhter hna.

SALM 98:4

Vawlei mi vialte hna, lunglawm in Bawipa cu hla in thangṭhat tuah u; lawmhnak hla in thangṭhat u law a au in au u!

SALM 98:9

zeicahtiah amah cu vawlei uk awkah a ra cang. Vawleicung mi vialte cu dinnak le ruannak in a uk hna lai.

SALM 99:8

Bawipa kan Pathian, na mi nih na sinah thla kan camnak kha na kan leh; nangmah cu sualnak a ngaithiam khotu Pathian na si kha na kan hngalhter i kannih cu a sual lo ah na kan rel.

SALM 100:2

Bawipa cu lunglawm tein bia u law lunglawmhnak hla he a hmaiah cun ra chuak u.

SALM 100:3

Bawipa cu Pathian a si kha zeitikhmanh ah philh hlah u! A kan sertu cu amah a si i kannih cu amah ta kan si; a mi kan si i a tuurun kan si.

SALM 100:5

Bawipa cu a ṭha; a fekmi a dawtnak cu zungzal in a hmun, zumhawktlak a sinak cu chan vialte tiangin a hmun.

SALM 101:7

Ka inn chungah mi thangchiat hmangmi kha ahohmanh an um kho lai lo, ka hmuh khawhnak hmun ah mi lihchim hmang cu an dir kho lai lo.

SALM 102:1

Maw Bawipa, ka thlacamnak cu ka ngaihpiak law nangmah bawmhnak hal ah ka aunak cu ka theihpiak ko.

SALM 102:2

Harnak ka in tikah hin ka thuhtak hlah! Ka aunak cu ka ngaihpiak law khulrang in ka let tuah.

SALM 102:17

Kaltak cia a mi kha an thlacamnak a ngaihpiak hna lai i a theihpiak hna lai.

SALM 102:19

Bawipa nih a sangmi a hmunthiang khin a run cuanh, vancung khin vawlei cu a run cuanh,

SALM 102:20

cu a run cuanh cu thongtla pawl an aihramnak theih awk le thah awk i biaceih cangmi hna luatter awkah a si.

SALM 102:22

cucu zeitik ah dah a si lai ti ahcun, miphun hna le pennak hna kha hmunkhat ah an i pumh i Bawipa kha an biak tikah a si lai.

SALM 102:26

Van le vawlei cu an lo dih lai, sihmanhsehlaw nang cu na hmun lai; annih cu puan bangin an ṭet lai. Puan bangin na thlen hna lai i an lo lai;

SALM 103:1

Maw ka nunnak, Bawipa cu thangṭhat tuah! Ka sining vialte, a min thiang cu thangṭhat tuah u!

SALM 103:2

Maw ka nunnak, Bawipa cu thangṭhat law zeitluk in dah zaangfahnak a ngeih kha philh hlah.

SALM 103:3

Ka sualnak vialte kha a ka ngaihthiam i ka zawtnak vialte kha a ka damter;

SALM 103:4

thlan chungin a ka khamh i dawtnak le zaangfahnak he thluachuah a ka pek;

SALM 103:5

ka nunnak cu thil ṭha in a khahter i cucaah ka no peng i mupi bantukin ka ṭhawng.

SALM 103:8

Bawipa cu zaangfahnak le dawtnak in a khat, a thin a fual i a fekmi dawtnak in a khat.

SALM 103:12

Nichuahlei le nitlaklei an i hlat tluk khin kan sualnak cu kanmah he i hlat ah a kan ṭhialpiak.

SALM 103:13

Pale nih an fale an zaangfah hna bantuk khin Bawipa nih amah a ṭihmi cu a zaangfah hna.

SALM 103:17

Sihmanhsehlaw Bawipa nih amah a upatmi hna a dawtnak hna cu, zungzal in a hmun i a ṭhatnak nih chan vialte tiang a nguh,

SALM 103:18

a biakamnak a zulmi le a nawlbia a ngaimi hna cungah cun Bawipa ṭhatnak cu cu bantuk cun a si.