Nitin Baibal Relnak

MATTHAI 8:1

Jesuh cu tlang cung khan a rung ṭum i mi tampi nih an zulh.

MATTHAI 8:2

Cun thinghmuipa pakhat kha a ra i a hmaiah khuk bil in a kun i, "Bawipa, na duh ahcun na ka damter khawh ko," tiah a ti.

MATTHAI 8:3

Jesuh nih a hei banh i a tongh i, "Ka duh. Thiang ko cang," tiah a ti. Chikkhatte ah a zawtnak khan a thiang.

MATTHAI 8:5

Jesuh cu Kapernaum khua i a va luh ah khan Rom ralbawi pakhat nih a rak don i,

MATTHAI 8:6

"Bawipa, ka sinumpa cu a zaw i inn ah a ril ko, a cawl zong a cawlcang kho lo i a zual ngaingai ko," tiah a ti.

MATTHAI 8:7

Jesuh nih cun, "Ka ra lai i ka damter lai," tiah a ti.

MATTHAI 8:8

Ralbawipa nih cun, "Aa, bawipa, si hlah! Nang ka inn i rat dingah hin kaa tlak lo. Nawl hei pe law ka sinumpa cu a dam ko lai.

MATTHAI 8:10

Cu bia cu Jesuh nih a theih tikah a khuaruah a har i a zulmi mizapi hna cu, Hi pa bantukin zumhnak a ngeimi Israel mi hna lakah ahohmanh ka hmu rih hna lo.

MATTHAI 8:13

Cun Jesuh nih ralbawipa cu a thawh i, "Inn ah va ṭin law na zumhmi cu tuahpiak na si lai," tiah a ti. Cun ralbawi sal cu, cu caan hrimhrim ah cun a rak dam.

MATTHAI 8:16

Zanlei sang a si tikah khuavang ngeimi tampi kha Jesuh sinah cun an ratpi hna. Bia kaa khat in thlarau ṭhalo kha a ṭhawl hna i a zawmi vialte kha a damter hna.

MATTHAI 8:17

Hi a tuahmi hi, profet Isaiah nih, "Amah hrimhrim nih kan zawtnak kha a phorh i kan dam lonak kha a kalpi," tiin a rak chimmi tlinternak caah khan a si.

MATTHAI 8:19

Phungbia cawnpiaktu saya pakhat kha a sinah a ra i, "Saya, na kalnak paoh ah kan zulh lai," tiah a ti.

MATTHAI 8:20

Jesuh nih cun, "Cenghngia nih kua an ngei i vate cu bu an ngei, sihmanhsehlaw Mi Fapa cu riahnak hmun hmanh a ngei lo," tiah a leh.

MATTHAI 8:21

Amah zultu a simi, midang pakhat nih khan, "Bawipa, va kir ta ning law ka pa kha va vui ta ning," tiah a ti.

MATTHAI 8:22

Jesuh nih cun, "Ka zul ko, mithi nih an mithi cu rak vui ko hna seh," tiah a leh.

MATTHAI 8:24

Chikkhatte ah khin thlichia a hrang ciammam i tilet nih lawng cu a khuh. Sihmanhsehlaw Jesuh cu aa hngilh.

MATTHAI 8:25

A zultu cu a sinah khan an va kal i an ṭhangh i, "Bawipa, kan khamh tuah. Kan thi dih cang lai hi ta," an ti.

MATTHAI 8:26

Jesuh nih cun, "Zeicahdah cu ti lawmmam cun nan thin a phan? Nan hei ka bochan lo hringhran dah!" tiah a leh hna. Cun a tho i thli le tilet cu nawl a pek hna i dai zirziar tein rili cu a um ṭhan.

MATTHAI 8:28

Jesuh cu Rili khattelei ral Gadarin mi hna ram kha a va phan i, miruak vuinak lungkua chungin a ra chuakmi mi pahnih nih an rak ton. Hi hna hi an chung i khuachia a ngeimi an si i ṭih an nun tuk hringhran caah cu lam ah cun ahohmanh an kal ngam lo.

MATTHAI 8:29

Hmakhatte ah khin an ai i, "Pathian Fapa, zeidah na kan duhnak a um? A caan a tlin hlanah kannih dantat awkah na ra maw?" tiah an ti.

MATTHAI 8:33

Vok zohkhenhtu hna cu khulrang in khua ah cun an va le i cu kong cu le khuachia nih a tuahmi hna kong kha an va chimh hna.

MATTHAI 8:34

Cucaah khua chung mi vialte cu Jesuh ton awkah khan an i thawh i an hmuh tikah, kan ram hin kir ko, tiah an nawl.

MATTHAI 9:1

Jesuh cu lawng chungah khan a lut i rili cung cun an kir ṭhan i amah a khua kha a phan.

MATTHAI 9:2

A sinah khan mizengpa pakhat kha, a ihkhun in an rak zawnh. Jesuh nih an zumhnak kha a hmuh tikah mizeng pa cu, "Ka fapa, na lung dong hlah! Na sualnak cu ngaihthiam na si cang," tiah a ti.

MATTHAI 9:5

'Na sualnak cu ngaihthiam na si cang,' ti cu maw a fawi deuh, 'Tho law kal tuah,' ti dah a fawi deuh?

MATTHAI 9:6

Mi Fapa nih vawlei cungah hin sual ngaihthiam khawhnak a ngei ti kha kan hngalhter hna lai," a ti i cucaah mizengpa cu, "Tho law, na ihkhun kha i put law inn ah va ṭin," tiah a ti.

MATTHAI 9:7

Mipa cu a tho i inn ah cun a ṭin.

MATTHAI 9:8

Cucu mi nih khan an hmuh tikah an thin a phang i cu bantuk nawlngeihnak cu Pathian nih minung kha a pek hna caah Pathian cu an thangṭhat.

MATTHAI 9:9

Cuka hmun cun Jesuh cu a chuak i a kalpah ah khan ngunkhuai khawltu Matthai a zung i a rak ṭhut ko kha a hmuh. Amah cu, "Ka zul," tiah a ti. Matthai cu a tho i a zulh.

MATTHAI 9:11

Mah cucu Farasi mi nih khan an hmuh hna i cucaah a zultu cu an thawh hna i, "Zeicahdah nan sayapa hi ngunkhuai khawltu hna le misual hna he rawl an ei ṭi?" tiah an ti.

MATTHAI 9:12

Jesuh nih cun a theih hna i, "A dammi nih cun sibawi an herh lo, a zawmi lawng nih khan an herh.

MATTHAI 9:13

Va kal u law, 'Saram thawinak si loin ka duhmi cu zaangfahnak lungthin kha a si,' tiah Cathiang chungah aa ṭialmi hi a sullam va ruat tuah u. Miding mi pawl kawh awkah ka rat ṭung lo, misual mi hna kawh awkah pei ka rat ko cu," tiah a ti.

MATTHAI 9:15

Jesuh nih cun, "Nupi ṭhit rawl danghnak puai ah, nupi ṭhitu a um chungah cun zeitindah an sawmmi hna cu ngaihchia in an um lai? Sihmanhsehlaw nupi ṭhitu an sinin aa ṭhen caan kha a phan ve te lai i cu tikah cun rawl cu an ul te ko lai.

MATTHAI 9:17

Cun a hlunmi saphawcua chungah mitsur hang thar an rawn bal lo, cu ti an tuah ahcun a saphaw kha a kek lai i a mitsur hang kha a chuak dih lai i a saphaw kha a rawk lai. Cucaah mitsur hang thar cu saphawcua a tharmi chung tu ah an rawn tawn i cuticun an pahnih in ṭha tein an um," tiah a ti.

MATTHAI 9:18

Cu bia cu Jesuh nih a chimh lio hna ah khan, Judah mi lak i bawi pakhat a simi kha a sinah a ra i a hmaiah a khuk aa bil i, "Tunaite ah khan ka fanu a thi, sihmanhsehlaw ra law a cungah na kut ra chia law a nung ko lai," tiah a ti.

MATTHAI 9:20

Cu lioah cun, nu pakhat, thi chuah zawtnak in kum hleihnih tiang a zaw cangmi kha a hnulei in a ra i a puan parte kha a tongh.

MATTHAI 9:21

"A puan hmanh kha ka tongh khawh ahcun ka dam ko lai," tiah a lungchung in a ti.

MATTHAI 9:22

Jesuh cu a hun i mer i minu cu a hmuh i, "Ka fanu, na thinphang hlah! Na ka zumhnak nih an damter cang," tiah a ti. Cu caan te ah cun minu cu a dam colh.

MATTHAI 9:24

"Nan dihlak in chuak tuah u! Ngakchia nute hi a thih ṭung lo, aa hngilh i pei a si ko cu," tiah a ti hna. Annih nih an nihsawh,

MATTHAI 9:25

Mi kha an chuah dih cangka in Jesuh cu ngakchianu khaan chungah khan a vung lut i a kut in a vun tlaih i a tho.

MATTHAI 9:27

Cuka hmun cun Jesuh cu a chuak i a kalpah ah khan mitcaw pahnih nih an zulh. "David Fapa kan zaangfah tuah," tiah an au.

MATTHAI 9:28

Jesuh cu inn chung i a luh tikah khan mitcaw pahnih hna cu a sinah cun an ra i annih cu, "Hihi ka tuah khawh tiah nan zum maw?" tiah a rak hal hna. Annih nih, "Asi, na tuah khawh tiah kan zumh bawipa," tiah an leh.

MATTHAI 9:29

Cun Jesuh nih an mit kha a tongh hna i, "Nan zumhning te cun si ko seh," tiah a ti i

MATTHAI 9:30

annih cu khua an hmu kho ṭhan. Annih cu Jesuh nih fak piin, "Hihi ahohmanh va chim hna hlah u," tiah a ti hna.

MATTHAI 9:31

Sihmanhsehlaw an kal i Jesuh kong cu cuka hrawngah cun an thanh dih.

MATTHAI 9:32

Mi kha an ṭian cuahmah lioah cun, khuachia nih a tuah ca i a holh kho lomipa pakhat kha Jesuh sinah cun an ratpi.

MATTHAI 9:33

A khuachia cu a chuah cangka in mipa cu a holh kho i mi vialte cu an khuaruah a har dih. "Hi bantuk thil hi Israel mi lakah kan hmu bal lo," an ti.

MATTHAI 9:35

Cuticun Jesuh cu khuapi he khuate he a tlawng duahmah hna. An pumhnak inn ah khan a cawnpiak hna i Vancung Pennak kong Thawngṭha kha a chimh hna i a zaw a fakmi kip kha a damter hna.

MATTHAI 9:36

Mi zapi kha a hmuh hna tikah, khaltu a ngei lomi tuu bantukin lungrethei le awlokchong in an um kha a hmuh hna caah a zaang an fak ngaingai.

MATTHAI 9:37

Cucaah a zultu kha a thawh hna i, "Rawl ṭuan awk cu tampi a um ko, sihmanhsehlaw a ṭuantu ding cu tlawmte lawnglawng an si.

MATTHAI 9:38

Cucaah rawlṭuan uktu bawi sinah cun, rawl ṭuantu tam deuh a thlah hna nakhnga, thla va cam tuah u," a ti.

MATTHAI 10:1

Jesuh nih lamkal ah a thimmi hleihnih kha a auh hna i khuachia ṭhawl khawhnak le zawtnak fahnak vialte damter khawhnak nawl kha a pek hna.

MATTHAI 10:7

Cun, 'Vancung Pennak cu a nai cang,' tiah va chim hna u.

MATTHAI 10:8

A zawmi kha va damter hna u, mithi kha va thawhter hna u, thinghmui kha va thianter hna u, khuachia kha va ṭhawl hna u. Nannih nih man pek loin nan hmuh i man pek loin va pe ve hna u.

MATTHAI 10:10

Nan khualtlawnnak dingah cun rawl halnak zal siseh, angki khethuan siseh, kedan siseh, ṭhiangṭhunh siseh, i phorh hlah u. Rianṭuantu nih cun a herhmi thil cu a hmuh awk aa tlakmi a si ko.

MATTHAI 10:12

Cun inn pakhatkhat ah nan luh tikah, 'Nan cungah daihnak um ko seh,' nan ti lai.

MATTHAI 10:13

Cuka inn i a ummi nih tluninn an in awnh hna ahcun daihnak in nan biakchawnh hnanak cu an cungah hmun ko seh; sihmanhsehlaw an in awnh hna lo ahcun nan biakchawnh hnanak cu i lak ṭhan u.

MATTHAI 10:16

"Ngai hmanh u! Cenghngia hrang rual lak i thlahmi tuu bantukin kan thlah hna. Cucaah rul bantukin vaa fim u law ṭhuro bantukin nan nun va nem u.

MATTHAI 10:18

Uktu bawi hna hmai le siangpahrang hna hmaiah keimah ruangah an in chuahpi hna lai i annih cu le Jentail mi hna kha Thawngṭha kha nan chimh hna lai.

MATTHAI 10:19

Nan bia an in ceih hna tikah zeidah ka chim lai, ti le zeitindah ka chim lai, ti kha nan khuaruah va har hlah u; a caan a phak tikah chim ding cu pek nan si te ko lai.

MATTHAI 10:20

Zeicahtiah nan chimmi bia cu nanmah bia a si lai lo; nan chung i bia a chimtu nan Pa Thlarau nih an pekmi hna bia a si lai.

MATTHAI 10:22

Mi kip nih nannih cu keimah ruangah an in huat hna lai, sihmanhsehlaw a dongh tiangin aa tlaih pengmi cu khamhnak nan hmu lai.

MATTHAI 10:26

"Cucaah mi cu va ṭih hna hlah u. Khuhmi thil paoh kha hun dih an si ko lai i biathli vialte kha hngalh dih an si ko lai.

MATTHAI 10:28

Pum cu a that kho ko nain thlarau a that kho lomi cu va ṭih hlah u; hell chungah pum he thlarau he a that khotu Pathian tu kha va ṭih u.

MATTHAI 10:30

Nannih chinchin cu nan lu cung sam hmanh kha a rel dih.

MATTHAI 10:31

Cucaah nan thinphang hlah u: nannih cu pithlung tampi nakin tampi in nan sung deuh," tiah a ti.

MATTHAI 10:32

"Amah mi ka si, tiah zapi hmaiah a phuang ngammi cu vancung khua i ka Pa hmaiah kei zong nih cuticun amah cu ka ti ve lai.

MATTHAI 10:33

Sihmanhsehlaw zapi hmaiah, amah mi ka si lo, tiah aa phehmi cu vancung khua i a ummi ka Pa hmaiah cuticun ka ti ve hna lai.

MATTHAI 10:36

nan ral ṭhalo bik hna cu nanmah innchungkhar chung mi lila an si lai.

MATTHAI 10:37

"Ahohmanh a nu siseh, a pa siseh, keimah nakin a daw deuhmi cu ka mi si awk aa tlak lo; ahohmanh a fapa siseh, a fanu siseh, keimah nakin a daw deuhmi cu ka mi si awk aa tlak lo.

MATTHAI 10:38

Ahohmanh a vailam tahnak kha aa put i ka hnu in a ka zul lomi cu ka mi si awk aa tlak lo.

MATTHAI 10:39

Ahohmanh a nunnak humhak a duhmi nih cun a nunnak cu a sung lai i keimah ruangah a nunnak a sungmi nih cun a nunnak cu a hmuh lai.

MATTHAI 10:41

Pathian lamkaltu cu Pathian lamkaltu a si ruangah a rak conglawmhtu paoh cu a laksawng kha aa hrawm ve lai; cun miṭha cu miṭha an si ruangah a rak conglawmhtu paoh cu miṭhapa laksawng kha aa hrawm ve lai.

MATTHAI 10:42

Cun hihi philh hlah u! A ka zultu hna hi a ka zultu an si ruangah anmah lak i a nauta bik hmanh kha tikik hrai khat a pemi cu, laksawng kha a hmu hrimhrim lai," tiah a ti.

MATTHAI 11:2

Tipil petu Johan nih thong chungin Khrih rianṭuannak kong kha a rak theih tikah a zultu tlawmpal kha a sinah a hei thlah hna i,

MATTHAI 11:3

" 'A ra dingmi cu nangmah hi na si maw, asiloah, midang dah kan hngah rih lai,' tiah va hal u," a ti hna.

MATTHAI 11:4

Jesuh nih cun, "Nan hmuhmi le nan theihmi hi Johan cu va chim ko u:

MATTHAI 11:5

mitcaw nih khua an hmuhnak le kebei an kal khawhnak le mithinghmui an thiannak le hnachet nih khua an theihnak le mithi thawhṭhan an sinak le misifak mi hna sinah Thawngṭha chim a sinak hi va chim ko u.

MATTHAI 11:6

Keimah kong ah lung awṭawmnak zeihmanh a ngei lomi cu a caah lunglawmh awk a va si dah," tiah a leh hna.

MATTHAI 11:10

Johan hi Cathiang nih, 'Hika ah hin ka lamkaltu cu a um ko; Amah cu nangmah lam sialtu dingah na hmaiah ka thlah lai, tiah Pathian nih a ti,' tiah a timi kha a si.

MATTHAI 11:11

Hihi i cinken hmanh u: nu chungin a chuakmi lakah vawlei cungah hin Johan tlukin a nganmi ahohmanh an um lo; sihmanhsehlaw Vancung Pennak chung i a ummi hna lak i a hme bik hmanh Johan nakin a ngan deuh.

MATTHAI 11:13

Johan caan tiang khan profet vialte hna le Moses phungbia nih vancung Pennak kong hi an chim;

MATTHAI 11:14

cun cu bia cu nan zumh duh a si ahcun John hi Elijah kha a si i a ra lai tiah rak timi kha a si.

MATTHAI 11:20

Cun Jesuh nih khuaruahharnak tam bik a tuahnak khua hna kha, an chung i a ummi hna nih an ziaza an thlen hlei lo caah a sik hna,

MATTHAI 11:21

"Khorazin khua, na caah ngaihchia a va si dah. Bethsaida khua zong na caah ngaihchia a va si dah. Nan chung i khuaruahharnak ka tuahmi vialte hi Tair le Sidon khua ah rak tuah hna ning law, cu khua mi hna cu puanchia i aih le vutcam i phulh in an i ngaihchih diam cang hnga!

MATTHAI 11:25

Khi caan ah khan Jesuh nih aa thawh i, "Maw ka Pa, van le vawlei a uktu. A fimmi le cathiammi hna sinin na thuhmi kha cathiam lomi hna sinah na langhter caah na cungah ka lawm.

MATTHAI 11:27

Ka Pa nih zeizong vialte kha ka kut chungah a ka pek dih. Pa dah ti lo nih cun ahohmanh nih Fapa kha an ka hngal lo i Fapa le an sinah a phuanmi hna dah ti lo nih cun ahohmanh nih Pa kha an hngal lo.

MATTHAI 11:28

"Rethei le thilrit mi vialte hna, ka sinah ra tuah u, dinhnak kan pek hna lai.

MATTHAI 11:29

Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai.

MATTHAI 11:30

Ka seihnam cu a bei a nuam i ka thil cu a zaang," tiah a ti.

MATTHAI 12:2

Cucu Farasi mi nih an hmuh hna tikah Jesuh cu an thawh i, "Zohhmanh, Sabbath ni ah tuah lo ding timi kha na zultu hna nih an tuah," an ti.

MATTHAI 12:3

Jesuh nih cun, "David le a mi hna cu an rawl a ṭam tikah khan, David nih zeidah a rak tuah, ti kha nan rel bal lo maw?

MATTHAI 12:4

Pathian inn chungah pei a lut i changreu thiang cu a ei kha. Kha changreu kha amah nih siseh, a mi hna zong nih siseh, an ei awk a si ṭung lo. Tlangbawi lawnglawng nih pei an ei phung a si kha.

MATTHAI 12:5

Cu pinah, Sabbath ni fate tlangbawi hna nih biakinn chungah Sabbath phunglam kha an buar lengmang nain an sual lo timi kha Moses Nawlbia chungah nan rel bal lo maw?

MATTHAI 12:6

A ngaingai ti ahcun, biakinn nakin a ngan deuhmi pei hika ah hin a um cu.

MATTHAI 12:7

Cathiang nih, 'Ka duhmi cu sa in tuahmi thawinak hi si loin zaangfahnak a si,' tiah a timi kha a sullam rak hngal u law cu, a sual lomi kha sual nan phaw hna hnga lo;

MATTHAI 12:8

zeicahtiah Mi Fapa cu Sabbath cung bawi pei a si cu," tiah a ti.

MATTHAI 12:10

Cuka ah cun a kut a zengmipa pakhat a rak um. Khika i a ummi hna lakah khan Jesuh cu sualphawt a duhmi an um caah amah cu, "Sabbath ni ah hin mi damter phung a si maw si lo?" tiah an hal.

MATTHAI 12:11

Jesuh nih annih cu, "Abiana ah nan tuu pakhatkhat khor chungah Sabbath ni ah tla sual seh law, chuah loin maw nan um ko hnga?

MATTHAI 12:12

A ngaingai ti ahcun, mi cu tuu nakin a let tam piin a sung deuh! Cucaah Sabbath ni ah hin ṭhatnak cu tuah phung a si ko," tiah a ti.

MATTHAI 12:13

Cun mipa leiah khan a hei i mer i, "Na kut kha samh tuah," tiah a ti. A samh i khattelei kut bantukte khan a dam ko.

MATTHAI 12:17

Cuti in a tuah cu Pathian nih Isaiah kaa in:

MATTHAI 12:18

"Hika i a ummi hi ka thimmi ka sal a si. Ka dawt i a cung i ka lung a tlingmi a si. Amah cungah cun ka Thlarau kha ka chiah lai i miphun vialte hna sinah ka biading kha a thanh hna lai.

MATTHAI 12:20

Dinnak kha teinak ah a phakter hlantiang a kiakmi phaikung kha i hlang koin a khiak lai lo i a mit dengmangmi meiinn kha a hmit lai lo.

MATTHAI 12:21

Amah cu miphun vialte nih an i bochan lai,' tiah a timi kha tlinternak caah a si.

MATTHAI 12:22

Cun Jesuh sinah cun, mipa pakhat khuachia nih a tuah ruangah a mit a caw i a holh kho lomi kha an ratpi. Jesuh nih cun a rak damter i cucaah a holh kho i khua zong a hmu kho.

MATTHAI 12:23

Mizapi cu an khuaruah a har i, "Hi pa hi David fapa a si sual hnga maw?" an ti.

MATTHAI 12:28

Nan timi hi a si lo, khuachia ṭhawl khawhnak a ka petu hi Beelzebul si loin Pathian Thlarau a si i cu nih cun Pathian Pennak cu nan sin a phan cang ti kha a langhter.

MATTHAI 12:30

"Keimah a ka ṭanh lomi cu a ka ralmi an si; pumhkhawmh a ka bawm lomi cu ṭhektu an si.

MATTHAI 12:31

Cucaah hihi kan chimh hna: minung hi sualnak zeipaoh an tuahmi le thil ṭhalo a chimmi cu ngaihthiam khawh an si ko lai; sihmanhsehlaw Thiang Thlarau ralchanh in bia ṭhalo a chimmi cu tu chan ah siseh, hmailei chan ah siseh, ngaihthiam khawh an si lai lo.

MATTHAI 12:33

"Thingkung cu a kung na ṭhatter ahcun a thei a ṭha, a kung na chiatter ahcun a thei a chia. Thingkung cu a tlai in hngalh khawh a si.

MATTHAI 12:34

Rul hna, zeitindah miṭhalo nan si ahcun nan kaa in bia ṭha cu a chuah khawh lai? Kaa nih cun lungchung i a khatmi kha pei a chim cu.

MATTHAI 12:36

"Hihi kan chimh hna: Nan kaa in a chuakmi bia, ruah setsai loin nan chimmi bia vialte kha, zeicahdah kha ti khan ka rak chim, tiah Biaceih Ni ah cun nan ti a hau te lai.

MATTHAI 12:37

Zeicahtiah nanmah bia lila in nan luatnak a si lai i nanmah bia lila in sualphawt nan si lai," tiah a ti.

MATTHAI 12:40

Ngapi chungah Jonah cu ni thum le zan thum a um bantuk khan Mi Fapa zong cu vawlei chungah ni thum le zan thum a um ve lai.

MATTHAI 12:41

Biaceih Ni ah cun Nineveh khua mi hna kha, annih cu Jonah nih phung a chimh hna tikah an sualnak kha an i ngaihchih caah, an dir lai i sual an in phawt hna lai; hihi kan chimh hna: Jonah nakin a ngan deuhmi pei hika ah hin a um cu!

MATTHAI 12:45

Cu tikah a kal ṭhan i amah nakin a chia deuhmi thlarau pasarih kha a vaa sawm hna i an ra i cuka ah cun an um; a donghnak ah cun cu pa umtuning cu a hlan nakkhan a chia deuh. Cuticun atu chan, chan ṭhalo, umtuning ding hi a si lai," tiah a ti.

MATTHAI 12:48

Jesuh nih cun, "Ahodah ka nu cu a si? Ahodah ka naule cu an si?" tiah a leh i

MATTHAI 12:49

a zultu kha a hei sawh hna i, "Zohhmanh u, hi hna hi ka nu le ka naule cu an si!

MATTHAI 12:50

Vancung i a ummi ka Pa nih tuah hna seh ti a duhmi a tuahmi paoh cu, ka nau le ka far le ka nu an si ko," tiah a ti.